14
Bulus d Barnaba ruḥen ɣar Ikuniya di Likaɛunya
1 Deg Ikuniya udfen nitni jmiɛ ɣar temzida n Wudayen uca ssiwřen ařami umnen aṭṭas n řɣaci, am Wudayen am Iyunaniyyen.
2 Maca Udayen inni war yuminen, ssekkaren iryazen n tendint i yeǧan zi řegnus, maḥend ad ssɛiǧten tawmat.
3 Waxxa amenni kkin dinni aṭṭas n řweqt, ttbarrḥen s bṭayṭay s SIDI. U Netta tuɣa ittic cchadet i Wawař n arḍa nnes s řeɛřamat d řeɛjayeb i igga s ifassen nsen.
4 Marra řɣaci n imezdaɣ n tendint immsebḍa. Ca zzaysen ruḥen ak-d Wudayen u ca nneɣni ak-d rrusul.
5 Tuɣa din ict n tmeɛmuč xasen zeg yinni zi řegnus u zeg Wudayen ak-d imeqqranen nsen, ḥima ad xasen karfsen u ḥima ad ten arejmen.
6 Řami ssnen man aya, ffɣen-dd uca arewřen ɣar tneddam n Likaɛunya, aqa aten d Listra d Dirbi, u ɣar dcurat i d as dd-innḍen,
7 uca ttbarrḥen dinni s Řexbar Aṣebḥan.
Abarreḥ d uḥejjar n Bulus di Listra
8 Tuɣa izeddeɣ ijj n weryaz di Listra wenni d aneɛḍab deg iḍaren nnes, aqa-t d aqejdaḥ zeg uɛeddis n yemmas, war yuyur ɛemmarṣ.
9 Tuɣa ittesřa i Bulus am issawař netta. Řami t iẓra Bulus, yuca aqa dayes l’iman ḥima ad ittwassgenfa.
10 Inna as s ict n tmijja tejhed: “Ad ac iniɣ deg Yisem n Siditneɣ Yasuɛ Lmasiḥ, kkar, tbedded nican x iḍaren nnec!” Ingez, ikkar, uca iggur.
11 Řami iẓra řɣaci min igga Bulus, ssgeɛɛden tmijja nsen, nnan s řhard n temmurt nni: “Aqa irebbiten dewřen arewsen deg iwdan, hwan-dd ɣarneɣ!”
12 Nitni semman Bar-Naba s yisem ‘Sidi n irebbiten’, u Bulus s yisem ‘Hirmis’, minzi netta izwar ɣar wawař.
13 Akehhan n ‘Sidi n irebbiten’ tuɣa barra i tendint, yiwi iyenduzen d tseddiyin n nnuwwac ɣar tiwwura n řemraḥ mani qqimen, tuɣa ixs ad ten iqeddem d tɣarṣt i nitni.
14 Řami sřin Bar-Naba d Bulus x man aya, carrgen arruḍ nsen, negzen, ffɣen ɣar barra jar řɣaci, sɣuyyun, nnan:
15 “A iryazen, min i tᵉtteggem? Uřa d neccin d lbacar d ijjen am kenniw, nettbarreḥ kenniw ḥima ad tbeɛɛdem x tmesřayin-a ibeṭṭřen, ḥima ad tubem ɣar AREBBI iddaren i dd-ixeřqen ajenna d temmurt d řebḥar d marra min daysen.
16 Di řweqt n řejyuř iɛdun ijja Netta marra řegnus ad uyuren deg ibriden nsen,
17 waxxa war ijji Ixef nnes břa cchadet am d asen iwca tcuni zeg ujenna, issehwa-dd anẓar u iwca aṭṭas n řɣiǧet di řweqt nsen ittwaggen uca issjiwen uřawen nneɣ s macca d řefraḥet.”
18 Waxxa ssawařen amenni, tuɣa ɛad iqseḥ xasen ad ssbedden řɣaci, maḥend uřa d ijj war ittqeddim tiɣarṣin i nitni.
19 Maca usin-dd Wudayen zi Ikuniya d Antiyuxiya, ssḥarrcen xasen řɣaci uca arejmen Bulus, jarren t barra i tendint, minzi ittɣiř asen aqa immut.
20 Maca am d as dd-nnḍen imeḥḍaren, ikkar uca yudef ɣar tendint. Xenni tiwecca nnes iffeɣ ak-d Bar-Naba, iwḍen nitni ɣar tendint n Dirbi.
Aɛqab ɣar Antiyuxiya di Surya
21 Umi barrḥen s Řexbar Aṣebḥan i imezdaɣ n tendint nni, ggin aṭṭas n imeḥḍaren. Xenni ɛeqben ɣar Listra d Ikuniya d Antiyuxiya,
22 ggin uř di řeɛmur n imeḥḍaren, ɛeřmen asen ad cebbaren di l’iman, nnan asen belli ittxeṣṣa ad nadef ɣar Tgeldit n AREBBI s waṭṭas n řemḥayem.
23 Areccḥen imɣaren di kuř tamesmunt am ttẓuman u ttẓaǧan akidsen, uca xenni sellmen ten i Siditneɣ i di umnen nitni.
24 Xas uca ẓwan Pisidiya, usin-dd ɣar Pamfiliya.
25 Awarni řami ssiwřen s Wawař n SIDI di Pirxa, hwan-dd ɣar Attalya.
26 Ssenni ruḥen di řebḥar ɣar Antiyuxiya minzi ssenni tuɣa ttwassqebbḍen i arḍa n SIDI di ṭṭweɛ n řxedmet tenni aqa kemmřen.
27 Řami din iwḍen, řaɣan x tmesmunt, xebbaren s marra řexdayem timeqqranin i yegga AREBBI s ifassen nsen u mammec yarzem tawwart n l’iman i řegnus.
28 Uca qqimen din ict řweqt d azirar ak-d imeḥḍaren. *