12
Řmewt n Yaɛqub d ufekki n Buṭrus
1 Di řweqt nni ɛřaḥař isswiẓẓeḍ Hirudus afus nnes ḥima ad ikarfes x ca n yinni iǧan zi tmesmunt.
2 Inɣa Yaɛqub umas n Yuḥanna s ssif.
3 Umi iẓra aqa man aya iɛjeb asen i Wudayen, ikemmeř deg webrid nni maḥend ad iṭṭef uřa d Cimɛun Buṭrus. Tuɣa d ussan n Weɣrum břa Antun.
4 Řami t iṭṭef, igga i-t di řeḥbes, uca igga as deg ifassen n setta-ɛecra n iɛessasen, ḥima ad xas ɛessen. Tuɣa ixs ad t iqeddem zzat i Wudayen awarni i Řɛid n Tɣarṣt n Useɛdu.
5 Umi tuɣa ɛessen x Cimɛun di řeḥbes, tuɣa teẓẓaǧa tmesmunt i AREBBI břa qeṭṭu di ṭṭweɛ nnes.
6 Di ǧiřet, ɣar tuffut i di tuɣa izɛem Hirudus ad t iqeddem, umi iṭṭeṣ Cimɛun am t cedden s tnayen n ssnaseř jar tnayen n iɛessasen n řɛeskar u inneɣni ḥeṭṭan ɣar tewwart n řeḥbes,
7 ibedd-dd lmalak n SIDI sennej nnes u ṭṭya n tfawt tᵉttceɛciɛ di marra axxam uca netta iɛarn i-t deg uɣezdis nnes, issfaq i-t, inna: “Kkar deɣya!” Deɣya wḍant ssnaseř zeg ifassen nnes.
8 Inna as lmalak: “Byes, teqqned tisiřa nnec!” Igga ammu. Inna as xenni: “Arḍ ajeǧab nnec, ḍfar ayi-dd!”
9 Xenni iffeɣ, iḍfar i-t, war issin min d as igga lmalak, aqa man aya d tidett, maɣar ittɣiř as iẓra ijj n řewḥiy.
10 Ařami kkin x uɛessas amezwaru d x wenni wiss tnayen, iwḍen ɣar tewwart n wuzzař tenni ittawyen ɣar tendint, tennurzem asen weḥḥdes. Awarni řami zzayes ffɣen, qeḍɛen ict n zzenqet, řexdenni ijja i-t lmalak.
11 Xenni idweř-dd Cimɛun ɣar řbař nnes, inna: “Řexxu ssneɣ s tidett belli SIDI issekk-dd lmalak nnes, issenjem ayi zeg ifassen n Hirudus u zi marra min zeɛmen ad ayi ggen Wudayen.”
12 Umi tuɣa ittxarreṣ di man aya, yusa-dd ɣar taddart n Maryam, yemmas n Yuḥanna, wenni ittkennan Markus, mani tuɣa ttmunan aṭṭas, ttẓaǧan din.
13 Ařami issqarqeb di tewwart n barra n řemraḥ, tusa-dd ict n tḥenjirt, qqaren as Ruda ḥima ad tseř wi dinni.
14 Teɛqeř tmijja n Cimɛun, uca zi ssibbet n řefraḥet war tarzim ca tewwart, maca teɛqeb deɣya uca txebbar i-ten, inna asen: “Xzar, Cimɛun, aqa ibedd ɣar tewwart n řemraḥ!”
15 Nnan as: “Aqa cem txeřfed!” Maca nettat teqqim teqqar aqa man aya nican. Nnan as: “Ma ad taɣ d lmalak nnes!”
16 Maca Cimɛun, iqqim issqarqub uca ffɣen, ẓrin t uca tbehten.
17 Iceyyar asen s ufus nnes ḥima ad sqaren uca iɛawed asen mammec t-i-dd-issuffeɣ SIDI zi řeḥbes, inna: “Xebbarem Yaɛqub d tawmat x uya!” Xenni iffeɣ ɣar ijj n wemcan nneɣni.
18 Řami dd-yiweḍ uziř, imsar ijj n uxarweḍ i war iǧin drust jar řɛeskar x min imsaren i Cimɛun.
19 Awarni řami tuɣa xas yarezzu Hirudus, maca war t yufi, iḥkem x iɛessasen s řmewt, iffeɣ zi Yahudiyya, iqqim izeddeɣ di Qayṣariya.
Řmewt n Hirudus Aɣripas
20 Umi tuɣa řeɛdawet di Hirudus ḍidd i ayt n Ṣur d Ṣaydun, munen nitni, iwḍen ad ssqenɛen Blastus amsexxar icennɛen n ujeǧid uca ttaren as maḥend ad asen iwc ijj n weṣřaḥ, minzi macca n temmurt nsen tekka-dd zi tgeldit n Hirudus.
21 Deg ijj n wass n řfarḥ ittwassnen yarḍ Hirudus ajeǧab n ujeǧid am iqqim x řkursi n ccreɛ, uca issiweř i řɣaci.
22 Uca marra řgens isɣuy ɣares: “Aqa d awařen n AREBBI, war iǧi n bnadem.”
23 Řexdenni iwta i-t lmalak n SIDI, minzi netta war iwci aɛuǧi i AREBBI. Uca dřen t ikeccawen, iffeɣ zzayes buḥbeř.
24 Awař n AREBBI ittwabarreḥ zzayes, imeqqar.
25 Bar-Naba d Cawul ɛeqben-dd zi Urcalim ɣar Antiyukiya awarni řami kemmřen tasexxart nsen uca iwyen akidsen Yuḥanna, wenni umi ttkennan Markus.