٢
ڒْحُوكْمْ خْ ڒْْعذْيَانْ ن يَاهُوذَا
١ سْذوْڒمْ-د إِخفْ نْومْ غَارْ ڒعْقڒْ،
ذوْڒمْ-د غَارْ ڒعْقڒْ،
أَ ڒْْڭنْسْ بْڒَا أَسضْحِي،
٢ قْبڒْ إِ غَا إِفّغْ ڒْْحُوكْمْ
- أَسّْ أَمْ ؤُڒُومْ إِعدُّو -
قْبڒْ إِ خَاومْ د غَا يَاسْ
ڒْْحَاذُوقْ ن وغْضَابْ ن سِيذِي،
قْبڒْ إِ خَاومْ د غَا يَاسْ
وَاسّْ ن وغْضَابْ ن سِيذِي.
٣ أَرْزُومْ خْ سِيذِي،
مَارَّا إِمْوَاضْعنْ ن ثمُّورْثْ،
إِنِّي إِتّڭّنْ ڒْْحقّْ نّسْ!
أَرْزُومْ ثَاسڭْذَا، أَرْزُومْ أَوَاضعْ،
أَذْ ثَاغْ أَذْ ثنُّوفَّارمْ كنِّيوْ
ذڭْ وَاسّْ ن وغْضَابْ ن سِيذِي.
٤ مَاغَارْ غَازَّا أَذْ ثتّْوَاجّْ،
أَشْقَالُونْ أَذْ ثذْوڒْ
ذ إِشْثْ ن ثمُّورْثْ إِتّْوَاردّْدْجنْ،
أَشْذُوذْ أَذْ خَاسْ أَزّْڒنْ
غَارْ وزْينْ ن وَاسّْ،
ؤُشَا عَاقْرُونْ أَذْ ثتّْوَاقْڒعْ.
٥ ؤُشْثْ خْ إِمزْذَاغْ ن ثْمَا ن ڒبْحَارْ،
ڒْْڭنْسْ ن إِكَارِيثِييّنْ.
أَوَاڒْ ن سِيذِي أَذْ خَاومْ يِيڒِي،
أَ كنْعَانْ، ثَامُّورْثْ ن إِفِيلِيسْطِينِييّنْ!
نشّْ أَذْ كنِّيوْ هلّْكغْ،
وَارْ إِتِّيڒِي ؤُمزْذُوغْ عَاذْ.
٦ ثَامُّورْثْ نِّي خْ ثْمَا ن ڒبْحَارْ
أَذْ ثِيڒِي ذ دّْمَانِي ن ثَاروْسَا،
ؤُڒَا ذ وَانُوثنْ إِ إِمكْسَاونْ
ذ ڒْْكُورِيثْ إِ وُودْجِي.
٧ أَذْ ثِيڒِي ثمُّورْثْ إِ مِينْ إِقِّيمنْ
ن ثَادَّارْثْ ن يَاهُوذَا،
حِيمَا أَذْ ذَايسْ أَروْسنْ ثِيحِيمْرِيوِينْ نْسنْ.
ذِي ثُوذْرِينْ ن أَشْقَالُونْ
أَذْ ذِينْ أَرْسنْ غَارْ ثْمذِّيثْ،
مَاغَارْ سِيذِي، أَربِّي نْسنْ،
أَذْ غَارْسنْ يَارْزفْ،
ؤُ نتَّا إِسّْنقْڒبْ ثَامحْبَاسْثْ نْسنْ.
٨ نشّْ سْڒِيغْ إِ ؤُسحْقَارْ ن مُوآبَ
ذ ؤُشقّفْ ن أَيْثْ ن عَامُّونْ،
إِ زِي سّْحقَارنْ نِيثْنِي ڒْْڭنْسْ إِنُو،
ؤُ سّْڭعّْذنْ إِخفْ نْسنْ أَطَّاسْ
ضِيدّْ إِ ثمُّورْثْ نْسنْ.
٩ س ؤُيَا، س ثِيذتّْ أَمْ دَّارغْ نشّْ،
إِقَّارْ سِيذِي ن ڒْْعسْكَارَاثْ،
أَربِّي ن إِسْرَائِيل:
مُوآبَ أَذْ ثذْوڒْ أَمْ سَاذُومْ،
ؤُ أَيْثْ ن مُوآبَ أَمْ عَامُورَّا،
زِي سِّيبّثْ ن ؤُغمُّويْ ن ثْزڭّْوَارْثْ
ؤُ زِي سِّيبّثْ ن وَانُوثنْ ن ثْمدْجَاحْثْ،
إِشْثْ ن ثمُّورْثْ إِتّْوَاردّْدْجنْ إِ ڒبْذَا.
مِينْ إِقِّيمنْ ن ڒْْڭنْسْ إِنُو
أَذْ ثنْ إِكشّضْ
ؤُ إِنِّي إِقِّيمنْ ن ڒْْڭنْسْ إِنُو
أَذْ طّْفنْ ثَاسْغَارْثْ نْسنْ ذ ڒْْوَارْثْ.
١٠ أَيَا أَذْ ثنْ إِڒْقفْ
زِي سِّيبّثْ ن نّْفَاخثْ نْسنْ،
مَاغَارْ نِيثْنِي ثُوغَا سّحْقَارنْ
ؤُ أَرْزْمنْ أَقمُّومْ نْسنْ
خْ ڒْْڭنْسْ ن سِيذِي ن ڒْْعسْكَارَاثْ.
١١ إِسَّاڭّْوَاذْ أَذْ غَارْسنْ إِفّغْ سِيذِي،
مَاغَارْ نتَّا أَذْ إِقْضَا
خْ مَارَّا إِربِّيثنْ زِي ثمُّورْثْ،
ؤُ نِيثْنِي أَذْ أَسْ بنْذْقنْ،
كُوڒْ إِجّْ زڭْ ومْشَانْ نّسْ،
مَارَّا ثِيڭْزِيرِينْ ن ڒڭْنُوسْ.
١٢ كنِّيوْ عَاوذْ، أَ أَيْثْ ن كُوشْ،
تّْوَاسّْنُوقّْبنْ نِيثْنِي زِي سِّيفْ إِنُو.
١٣ نتَّا أَذْ إِسّْوِيژّضْ
س ؤُفُوسْ نّسْ غَارْ شَّامَالْ،
نتَّا أَذْ يَاردّدْجْ أَشُّورْ،
ؤُ أَذْ يَارّْ نِينْوَا
ذ إِشْثْ ن ثمُّورْثْ إِتّْوَاردّْدْجنْ،
ثُوژغْ أَمْ ڒخْڒَا.
١٤ ذِي ڒْْوسْطْ نّسْ أَذْ ڭيّْرنْثْ ثْحِيمْرِيوِينْ،
مَارَّا ڒْْمَاڒْ نّسْ، أَقَا تّڭّنْ
أَمْ يِيجّْ ؤُبَارُّو ن ن ڒْْڭنْسْ.
ؤُڒَا ذ بُو-إِعُوقَّانْ،
وَاهْ ؤُڒَا ذ ثْوُوشْثْ ن دْجِيڒثْ
أَذْ سّنْسنْ خْ إِزدْجِيفنْ ن إِپِيلَارنْ نّسْ.
ثْمِيجَّا نْسنْ أَذْ ثْغنّجْ زِي ڒْْكَازِي،
أَردّدْجْ أَذْ يِيڒِي خْ ثْنبْذَاثْ نّسْ،
مَاغَارْ ثَافْروْثْ ن ثنْڭلْثْ ثتّْوَاعَارَّا.
١٥ ذ ثَا ذ ثَانْذِينْثْ إِسْڒِيوْڒِيونْ،
ثنِّي إِقِّيمنْ ذِي ڒَْامَانْ،
ثنِّي إِنَّانْ ذڭْ وُوڒْ نّسْ:
’نشّْ ذ ثنِّي، وَارْ ثدْجِي ذ ثنّغْنِي!‘
مَامّشْ ثذْوڒْ
ذ إِشْثْ ن ڒْْقشْعثْ ن ؤُنخْڒِيعْ،
إِشْثْ ن ومْشَانْ ن أَرَّاحثْ إِ ڒْْمَاڒْ ن ڒخْڒَا!
مَارَّا إِنِّي خَاسْ غَا إِكّنْ،
أَذْ خَاسنْ إِصفَّارْ ؤُ س ؤُسحْقَارْ
أَذْ إِسّنْهزّْ أَفُوسْ نّسْ.