٨
أَوَاڒْ وِيسّْ ثْنَاينْ ن سِيذِي - سِيذِي أَذْ إِبَاركْ ؤُرْشَالِيمْ
١ يُوسَا-د غَارِي وَاوَاڒْ ن سِيذِي ن ڒْْعسْكَارَاثْ، إِنَّا:
٢ ”أَمُّو إِ إِقَّارْ سِيذِي ن ڒْْعسْكَارَاثْ: ’س وَاسَامْ ذ أَمقّْرَانْ ؤُسْمغْ زِي صِيهْيُونْ، س وسْعَارْ ثَامقّْرَانْثْ ؤُسْمغْ ذِي طّْوعْ نّسْ.‘
٣ أَمُّو إِ إِقَّارْ سِيذِي: ’نشّْعقْبغْ-د غَارْ صِيهْيُونْ ؤُ أَذْ زذْغغْ ذِي ڒْْوسْطْ ن ؤُرْشَالِيمْ ؤُشَا ؤُرْشَالِيمْ أَذْ أَسْ ڒَْاغَانْ ’ثَانْذِينْثْ ن ثِيذتّْ!‘، ؤُ أَذْرَارْ ن سِيذِي ن ڒْْعسْكَارَاثْ أَذْ أَسْ إِنِينْ ’أَذْرَارْ إِقدّْسنْ!‘
٤ أَمُّو إِ إِقَّارْ سِيذِي ن ڒْْعسْكَارَاثْ: ’أَذْ إِڒِينْ عَاوذْ إِوسُّورَا ذ ثْوسُّورَا ذڭْ وَازَّاينْ ن ؤُرْشَالِيمْ. كُوڒْ أَرْيَازْ أَذْ غَارسْ ثِيڒِي ثغَّارْشْثْ نّسْ ذڭْ ؤُفُوسْ نّسْ زِي سِّيبّثْ ن وَاطَّاسْ ن وُوسَّانْ إِ غَا إِدَّارْ.
٥ أَزَّاينْ ن ثنْذِينْثْ أَذْ ذوْڒنْ شُّورنْ س إِحنْجِيرنْ ذ ثْحنْجِيرِينْ إِ إِتِّيرَارنْ ذڭْ وَازَّاينْ نّسْ.‘
٦ أَمُّو إِ إِقَّارْ سِيذِي ن ڒْْعسْكَارَاثْ: ’مَاغَارْ ذ ڒعْجبْ قَاعْ ذِي ثِيطَّاوِينْ ن مِينْ إِقِّيمنْ ن ڒْْڭنْسْ-أَ ذڭْ وُوسَّانْ نِّي، مَا أَذْ يِيڒِي أَيَا ؤُڒَا إِ نشّْ ذ ڒعْجبْ قَاعْ؟‘، إِقَّارْ سِيذِي ن ڒْْعسْكَارَاثْ.
٧ أَمُّو إِ إِقَّارْ سِيذِي ن ڒْْعسْكَارَاثْ: ’خْزَارمْ، نشّْ أَذْ سّْنجْمغْ ڒْْڭنْسْ إِنُو زِي ثمُّورْثْ ن ونْقَارْ ن ثْفُوشْثْ ؤُ زِي ثمُّورْثْ ن ؤُغدْجِي ن ثْفُوشْثْ،
٨ ؤُ نشّْ أَذْ ثنْ أَوْيغْ ذِينْ حِيمَا أَذْ زذْغنْ ذِي ؤُرْشَالِيمْ. نِيثْنِي أَذْ إِڒِينْ ذ ڒْْڭنْسْ إِ نشّْ ؤُ نشّْ أَذْ إِڒِيغْ ذ أَربِّي إِ نِيثْنِي، ذِي ثِيذتّْ ؤُ ذِي ثْسڭْذَا.‘
٩ أَمُّو إِ إِقَّارْ سِيذِي ن ڒْْعسْكَارَاثْ: ’محْضمْ إِفَاسّنْ نْومْ، كنِّيوْ إِنِّي إِسْڒِينْ ذڭْ وُوسَّانْ-أَ أَوَاڒنْ-أَ زڭْ ؤُقمُّومْ ن إِنَابِييّنْ نِّي ذِينْ إِدْجَانْ ذڭْ وَاسّْ نِّي ذِي إِتّْوَاسَّارْسْ ذْسَاسْ ن ثَادَّارْثْ ن سِيذِي ن ڒْْعسْكَارَاثْ، مَاحنْذْ أَذْ خَاسْ ثتّْوَابْنَا زَّاوشْثْ ثَامقّْرَانْثْ زِي جْذِيذْ.
١٠ مَاغَارْ قْبڒْ إِ وُوسَّانْ نِّي وَارْ إِقِّيمْ وَالُو زِي ڒْمُونثْ ن بْنَاذمْ ؤُ إِشْثْ نْ ڒبْهِيمثْ وَارْ د-ثتَّاوِي وَالُو ؤُ ونِّي د-إِفّْغنْ ذ ونِّي د-إِذوْڒنْ، وَارْ يِيوِي ڒَْامَانْ زِي سِّيبّثْ ن ڒعْذُو، مَاغَارْ نشّْ سّكَّارغْ كُوڒْ إِجّْ خْ جَّارْ نّسْ.
١١ ڒخُّو مَاشَا نشّْ وَارْ تِّيڒِيغْ إِ مِينْ إِقِّيمنْ ن ڒْْڭنْسْ-أَ أَمْ وُوسَّانْ إِمزْوُورَا، إِقَّارْ سِيذِي ن ڒْْعسْكَارَاثْ.
١٢ مَاغَارْ زَّارِيعثْ ن ڒهْنَا، ثَازَايَارْثْ، أَذْ ثوْشْ ڒْْغِيدْجثْ نّسْ ؤُ ثَامُّورْثْ أَذْ ثوْشْ صَّابثْ نّسْ ؤُ أَجنَّا أَذْ إِوْشْ نّْذَا نّسْ ؤُ نشّْ أَذْ وْشغْ مَارَّا أَيَا ذ ثَاسْغَارْثْ إِ مِينْ إِقِّيمنْ ن ڒْْڭنْسْ-أَ.
١٣ أَذْ إِمْسَارْ، أَقَا أَمْ مَامّشْ ثُوغَا كنِّيوْ ذ نّعْڒثْ جَارْ رڭْنُوسْ، كنِّيوْ، أَ ثَادَّارْثْ ن يَاهُوذَا ذ ثَادَّارْثْ ن إِسْرَائِيل، أَقَا نشّْ أَذْ كنِّيوْ سّْنجْمغْ ؤُ أَذْ إِڒِيغْ ذ لْبَارَاكَا إِ كنِّيوْ. وَارْ تّڭّْوذمْ، محْضمْ إِفَاسّنْ نْومْ!‘
١٤ مَاغَارْ أَمُّو إِ إِقَّارْ سِيذِي ن ڒْْعسْكَارَاثْ: ’أَمْ مَامّشْ نشّْ خَارّْصغْ أَذْ أَومْ ڭّغْ ڒْْغَارْ، ڒَْامِي ذ أَيِي سّْفُوڭْمنْ ڒجْذُوذْ نْومْ، أَمُّو إِ إِقَّارْ سِيذِي ن ڒْْعسْكَارَاثْ، ؤُ نشّْ وَارْ نْذِيمغْ زِي مَانْ أَيَا،
١٥ أَمُّو إِ د-ذوْڒغْ نشّْ ڒخُّو أَذْ خَارّْصغْ ذڭْ وُوسَّانْ-أَ مَاحنْذْ أَذْ ڭّغْ ڒْْخَارْ ذِي ؤُرْشَالِيمْ ؤُ ذِي ثَادَّارْثْ ن يَاهُوذَا. وَارْ تّڭّْوذمْ شَا!
١٦ ثِينَا ذ ثِيمسْڒَايِينْ إِ كنِّيوْ إِتّْخصَّانْ أَذْ ثنْثْ ثڭّمْ: سِيوْڒمْ ثِيذتّْ كُوڒْ إِجّْ أَكْ-ذ جَّارْ نّسْ، شَارّْعمْ ذِي ثوُّورَا نْومْ س ثِيذتّْ ؤُ س يِيجّْ نْ ڒْحُوكْمْ إِڒِيقّنْ.
١٧ وَارْ تّجِّيمْ أَذْ إِخَارّصْ إِجّْ ن ورْيَازْ ذِي ڒْْغَارْ خْ جَّارْ نّسْ ؤُ وَارْ تّخْسمْ ثَاجَادْجِيثْ ژُورْ، مَاغَارْ نشّْ شَارّْهغْ مَارَّا أَيَا!‘، إِقَّارْ سِيذِي.“
١٨ يُوسَا-د غَارِي وَاوَاڒْ ن سِيذِي ن ڒْْعسْكَارَاثْ، إِنَّا:
١٩ ”أَمُّو إِ إِقَّارْ سِيذِي ن ڒْْعسْكَارَاثْ: ’أَژُومِّي ن ؤُيُورْ وِيسّْ أَربْعَا ؤُ أَژُومِّي ن ؤُيُورْ وِيسّْ خمْسَا ؤُ أَژُومِّي ن ؤُيُورْ وِيسّْ سبْعَا ؤُ أَژُومِّي ن ؤُيُورْ وِيسّْعشْرَا أَذْ ذوْڒنْ ذ ڒفْرَاحثْ ؤُ ذ وَارْشقْ إِ ثَادَّارْثْ ن يَاهُوذَا. أَذْ إِڒِينْ ذ ڒعْيُوذَاثْ شْنَانْ. خْسمْ ثِيذتّْ ذ ڒهْنَا!‘
٢٠ أَمُّو إِ إِقَّارْ سِيذِي ن ڒْْعسْكَارَاثْ: ’أَقَا ڒڭْنُوسْ ؤُڒَا ذ إِمزْذَاغْ ن وَاطَّاسْ ن ثْندَّامْ أَذْ د-أَسنْ عَاذْ ذَانِيثَا!
٢١ إِمزْذَاغْ ن إِشْثْ ن ثنْذِينْثْ أَذْ رَاحنْ غَارْ إِمزْذَاغْ ن إِشْثْ ن ثنْذِينْثْ نّغْنِيثْ، أَذْ إِنِينْ: جّمْ أَنغْ أَذْ نطّفْ أَبْرِيذْ حِيمَا أَذْ نتَّارْ زَّاثْ إِ وُوذمْ ن سِيذِي ؤُ حِيمَا أَذْ نَارْزُو سِيذِي ن ڒْْعسْكَارَاثْ. ؤُڒَا ذ نشّْ أَذْ رَاحغْ.
٢٢ أَطَّاسْ ن إِيْذُوذنْ ذ وَاطَّاسْ ن ڒڭْنُوسْ إِجهْذنْ أَذْ د-أَسنْ حِيمَا أَذْ أَرْزُونْ خْ وُوذمْ ن سِيذِي ن ڒْْعسْكَارَاثْ ذِي ؤُرْشَالِيمْ ؤُ حِيمَا أَذْ تَّارنْ أَرْضَا زَّاثْ إِ وُوذمْ ن سِيذِي.‘
٢٣ أَمُّو إِ إِقَّارْ سِيذِي ن ڒْْعسْكَارَاثْ: ’ذڭْ وُوسَّانْ نِّي أَذْ إِمْسَارْ، أَقَاعشْرَا ن يرْيَازنْ، زِي مَارَّا ثُوثْلَايِينْ ن ڒڭْنُوسْ أَذْ طّْفنْ، وَاهْ، أَذْ طّْفنْ أَبحْڒُوڒْ ن إِجّْ ن ورْيَازْ ذ ؤُذَايْ، أَذْ إِنِينْ: ’نشِّينْ أَذْ نْرَاحْ أَكِيذْومْ، مَاغَارْ نسْڒَا أَقَا أَربِّي أَكِيذْومْ!‘ “