٣
ثَامژْرِيوْثْ وِيسّْ أَربْعَا- أَكهَّانْ أَمقّْرَانْ يَاهُوشَاعْ
١ أَوَارْنِي أَسْ إِسّْشنْ أَيِي يَاهُوشَاعْ، أَرَّايْسْ ن إِكهَّاننْ. نتَّا ثُوغَا إِبدّْ زَّاثْ إِ وُوذمْ ن لْمَالَاكْ ن سِيذِي. شِّيطَانْ إِبدّْ-د غَارْ ؤُفُوسْ أَفُوسِي ن يَاشُوعَا حِيمَا أَذْ زَّايسْ إِسّْشثْشَا.
٢ سِيذِي إِنَّا إِ شِّيطَانْ: ”أَذْ يِيڒِي أَذْ شكْ إِعَاقبْ سِيذِي، أَ شِّيطَانْ! أَذْ شكْ إِعَاقبْ سِيذِي، ونِّي إِفَارْزنْ ؤُرْشَالِيمْ! مَا وَارْ إِدْجِي يَاهُوشَاعْ وَانِيثَا ذ إِجّْ ن ؤُكشُّوضْ قڒْعنْ ث-د زِي ثْمسِّي؟“
٣ يَاهُوشَاعْ ثُوغَا يَارْضْ أَرُّوضْ إِوسّْخنْ أَمْ إِبدّْ زَّاثْ إِ وُوذمْ ن لْمَالَاكْ.
٤ خنِّي إِطّفْ نتَّا ذڭْ وَاوَاڒْ ؤُشَا إِسِّيوڒْ أَكْ-ذ يِينِّي إِبدّنْ زَّاثْ إِ وُوذمْ نّسْ، إِنَّا: ”كّْسمْ أَسْ أَرُّوضْ إِوسّْخنْ إِ وَانِيثَا!“ خنِّي إِنَّا أَسْ: ”خْزَارْ، نشّْ كّْسغْ زَّايكْ ڒْْمُوعْصِييّثْ نّشْ ؤُ أَذْ شكْ سّْيَارْضغْ س إِجّْ ن وَارُّوضْ إِشُووَّارنْ.“
٥ نشّْ نِّيغْ: ”أَذْ أَسْ قّْننْ إِشْثْ ن أَرژّثْ ثَامزْذَاڭْثْ خْ ؤُزدْجِيفْ نّسْ!“ ؤُ نِيثْنِي قّْننْ أَسْ أَرژّثْ ثَامزْذَاڭْثْ خْ ؤُزدْجِيفْ نّسْ ؤُشَا سّْيَارْضنْ أَسْ أَرُّوضْ إِشُووَّارنْ، أَمْ ثُوغَا لْمَالَاكْ ن سِيذِي إِبدّْ ذِينْ
٦ خَاسْ ؤُشَا إِشْهذْ لْمَالَاكْ ن سِيذِي إِ يَاهُوشَاعْ، إِنَّا:
٧ ”أَمُّو إِ إِقَّارْ سِيذِي ن ڒْْعسْكَارَاثْ:
’مَاڒَا شكْ ثُويُورذْ خْ إِبْرِيذنْ إِنُو،
ؤُ مَاڒَا شكْ أَذْ ثحْضِيذْ ثَاسخَّارْثْ إِنُو،
خنِّي أَذْ ثسُّويُورذْ
ؤُڒَا ذ ثَادَّارْثْ إِنُو س ڒْْحقّْ
ؤُ أَذْ ثِيڒِيذْ ذ أَمحْضَايْ ن ڒمْرَاحَاثْ إِنُو،
ؤُ نشّْ أَذْ أَشْ وْشغْ
أَذْ ثْزمَّارذْ أَذْ ثْرَاحذْ أَذْ ثَاذْفذْ
جَارْ إِنِّي ذَا إِبدّنْ.
٨ خنِّي سڒْ، يَاهُوشَاعْ،
شكْ، أَرَّايْسْ ن إِكهَّاننْ،
شكْ ذ إِمدُّوكَّاڒْ نّشْ،
إِنِّي إِقِّيمنْ زَّاثكْ،
مَاغَارْ نِيثْنِي ذ إِشْثْ ن ڒعْڒَامثْ ن ؤُثبْهثْ،
مَاغَارْ خْزَارْ، نشّْ أَذْ د-أَوْيغْ
أَمْسخَّارْ إِنُو، ’أَغدُّو‘.
٩ مَاغَارْ خْزَارْ، أَژْرُو،
ونِّي ذِينْ سَّارْسغْ زَّاثْ إِ يَاهُوشَاعْ،
خْ وژْڒُو نِّي خزَّارنْثْ سبْعَا ن ثِيطَّاوِينْ.
خْزَارْ، نشّْ أَذْ ذَايسْ نقْشغْ
ثَانقَّاشْثْ نّسْ،
أَمُّو إِ إِقَّارْ سِيذِي ن ڒْْعسْكَارَاثْ،
ؤُ نشّْ أَذْ كّْسغْ
ڒْْمُوعْصِييّثْ ن ثمُّورْثْ-أَ
ذڭْ إِجّْ ن وَاسّْ!
١٠ ذڭْ وَاسّْ نِّي، إِقَّارْ سِيذِي ن ڒْْعسْكَارَاثْ،
أَذْ ثْعَارْضمْ إِجّْ إِ ونّغْنِي
سَاذُو ثْزَايَارْثْ ؤُ سَاذُو وَارْثُو.‘ “