١٤
أَهكّْوُو ن سِيذِي خْ وذْرَارْ ن زِّيثُونْ
١ ”خْزَارثْ، أَذْ د-يَاسْ إِجّْ ن وَاسّْ إِ سِيذِي إِ ذِي إِ غَا ثتّْوَابْضَا ثْكشَّاضْثْ نّمْ ذِي ڒْْوسْطْ نّمْ!
٢ نشّْ أَذْ سّْمُونغْ مَارَّا ڒڭْنُوسْ إِ ؤُمنْغِي أَكْ-ذ ؤُرْشَالِيمْ. ثَانْذِينْثْ أَذْ ثتّْوَاطّفْ، ثُوذْرِينْ أَذْ تّْوَاكشّْضنْثْ، ثِيمْغَارِينْ أَذْ تّْوَاسّْنُوقّْبنْثْ ؤُ أَزْينْ ن ثنْذِينْثْ أَذْ إِتّْوَانْذهْ ذِي لْمنْفَا، مَاشَا مِينْ إِقِّيمنْ ن ڒْْڭنْسْ وَارْ ڭُّورْ شَا أَذْ إِتّْوَاقْضعْ.
٣ سِيذِي أَذْ إِفّغْ ؤُ نتَّا أَذْ إِمّْنغْ أَكْ-ذ ڒڭْنُوسْ أَمْ ذڭْ وَاسّْ ن ؤُمنْغِي، ذڭْ وَاسّْ ن إِتّْمنْغَا ڒبْذَا ذڭْ وَاسّْ ن وهْجَامْ.
٤ ذڭْ وَاسّْ نِّي أَذْ بدّنْ إِضَارنْ نّسْ خْ وذْرَارْ ن زِّيثُونْ ونِّي قِيبَاتْشْ إِ ؤُرْشَالِيمْ، غَارْ شَّارْقْ. أَذْرَارْ ن زِّيثُونْ أَذْ إِتّْوَافدْجقْ ذِي ثْنَاينْ ن إِزِييْنَاثْ، جِّيهثْ ن شَّارْقْ ؤُ جِّيهثْ ن ڒبْحَارْ، مَاحنْذْ أَذْ ذِينْ ثِيڒِي إِشْثْ ن ثغْزُورْثْ ذ ثَامقّْرَانْثْ. أَزْينْ ن وذْرَارْ أَذْ إِميّڒْ غَارْ شَّامَالْ ؤُ أَزْينْ نّغْنِي ن وذْرَارْ أَذْ إِميّڒْ غَارْ لْجَانُوبْ.
٥ ؤُشَا كنِّيوْ أَذْ ثَاروْڒمْ زِي هكّْوُو ن إِذُورَارْ إِنُو، مَاغَارْ ثَاغْزُورْثْ ن إِذُورَارْ أَذْ د-ثَاوضْ أَڒْ أَصَالْ ؤُ كنِّيوْ أَذْ ثَاروْڒمْ أَمْ مَامّشْ ثَاروْڒمْ كنِّيوْ زڭْ ونْهزِّي ن ثمُّورْثْ ذڭْ وُوسَّانْ ن عُوزِّييَا، أَجدْجِيذْ ن يَاهُوذَا، ؤُشَا سِيذِي، أَربِّي إِنُو، أَذْ د-يَاسْ ؤُ مَارَّا إِمْقدَّاسنْ أَكِيذكْ.
٦ ذڭْ وَاسّْ نِّي ڭُّورْ أَذْ إِمْسَارْ أَقَا وَارْ ثتِّيڒِي ثْفَاوْثْ، إِثْرَانْ إِتِّيسِّيقنْ أَذْ ثتّْوَاكمّْشنْ.
٧ أَذْ يِيڒِي ذ إِجّْ ن وَاسّْ إِتّْوَافَارْزْ، أَذْ يِيڒِي إِتّْوَاسّنْ غَارْ سِيذِي. وَارْ إِدْجِي ذ أَسّْ ؤُڒَا ذ دْجِيڒثْ. أَذْ إِمْسَارْ غَارْ ڒْْوقْثْ ن ؤُعشِّي أَذْ ثِيڒِي ثْفَاوْثْ.
٨ ذڭْ وَاسّْ نِّي أَذْ إِمْسَارْ أَقَا أَمَانْ إِدَّارنْ أَذْ د-فّْغنْ زِي ؤُرْشَالِيمْ، أَزْينْ زَّايْسنْ غَارْ ڒبْحَارْ أَشَارْقِي ؤُ أَزْينْ نّغْنِي غَارْ ڒبْحَارْ ن ڒْْغَارْبِي. أَمُّو إِ غَا يِيڒِي ذڭْ ؤُنبْذُو ؤُ ذِي ثْڭَارْسْثْ.
٩ سِيذِي أَذْ يِيڒِي ذ أَجدْجِيذْ خْ مَارَّا ثَامُّورْثْ.
ذڭْ وَاسّْ نِّي أَذْ يِيڒِي نتَّا ذ أَينِّي ن سِيذِي ؤُ إِسمْ نّسْ ذ أَينِّي ن يِيسمْ.
١٠ مَارَّا ثَامُّورْثْ أَذْ ثذْوڒْ أَمْ ڒوْضَا، زِي جَابْعَا أَڒْ رِيمُّونْ، غَارْ جِّيهثْ ن لْجَانُوبْ ن ؤُرْشَالِيمْ. ثَانْذِينْثْ أَذْ ثتّْوَاسّْڭعّذْ ؤُ أَذْ ذَايسْ زذْغنْ إِوْذَانْ ذڭْ ومْشَانْ نّسْ، زِي ثوَّارْثْ ن بِينْيَامِينْ أَڒْ أَمْشَانْ ن ثوَّارْثْ إِ ذِينْ ثُوغَا زِيشْ، أَڒْ ثَاوَّارْثْ ن ثغْمَارْثْ، ؤُ زِي لْبُورْجْ ن حَانَانِييِيلْ أَڒْ ثِيسَارِينْ ن وحْرَايْ ن دِّيڒشْثْ ن ؤُجدْجِيذْ.
١١ نِيثْنِي أَذْ ذَايسْ زذْغنْ ؤُ وَارْ إِتِّيڒِي عَاذْ ؤُڒَا ذ إِجّْ ن ؤُحَارّمْ إِ ؤُثحِّي، مِينْزِي ؤُرْشَالِيمْ أَذْ إِزْذغْ ذِي ڒَْامَانْ.
١٢ ثَا أَذْ ثِيڒِي ذ ثِيشْثِي إِ زِي غَا إِوّثْ سِيذِي مَارَّا ڒڭْنُوسْ نِّي إِمّنْغنْ أَكْ-ذ ؤُرْشَالِيمْ: نتَّا أَذْ يَارّْ أَرِّيمثْ ن كُوڒْ بْنَاذمْ أَذْ إِكِّيشُّو أَمْ نتَّا عَاذْ إِبدّْ خْ إِضَارنْ نّسْ ؤُ ثِيطَّاوِينْ نّسْ أَذْ كِّيشّْونْثْ ذڭْ إِخُوبَاشْ نْسنْ ؤُ إِڒسْ نّسْ أَذْ إِكِّيشُّو ذڭْ ؤُقمُّومْ نّسْ.
١٣ ذڭْ وَاسّْ نِّي ڭُّورْ أَذْ إِمْسَارْ أَقَا إِجّْ ن ؤُمْخَارْوضْ ذ أَمقّْرَانْ زِي سِيذِي أَذْ إِذْوڒْ جَارْ أَسنْ، أَڒَامِي غَا إِطّفْ كُوڒْ إِجّْ أَفُوسْ ن جَّارْ نّسْ ؤُ خنِّي أَفُوسْ ن كُوڒْ إِجّنْ أَذْ إِنّقْڒبْ ضِيدّْ إِ ؤُفُوسْ ن جَّارْ نّسْ.
١٤ عَاذْ أَذْ إِمّْنغْ يَاهُوذَا ذِي ؤُرْشَالِيمْ ؤُشَا أَذْ تّْوَاسّْمُوننْ وَاڭْڒَا ن مَارَّا ڒڭْنُوسْ إِ ذ أَسْ د-إِنّْضنْ: ؤُرغْ ذ نُّوقَارْثْ ذ وَارُّوضْ أَطَّاسْ س وَاطَّاسْ.
١٥ أَمُّو إِ غَا ثِيڒِي عَاوذْ ثشْثِي ن ؤُيِيسْ ذ ؤُسَارْذُونْ ذ وڒْغمْ ذ يغْيَاڒْ ذ مَارَّا ڒْْمَاڒْ نِّي إِدْجَانْ ذِي ڒْْعسْكَارَاثْ، أَقَا ثِيشْثِي-يَا أَذْ ثنْ ثڒْقفْ.
١٦ خنِّي أَذْ إِمْسَارْ أَقَا مَارَّا إِنِّي إِقِّيمنْ زِي مَارَّا ڒڭْنُوسْ نِّي د-يُوسِينْ غَارْ ؤُرْشَالِيمْ إِ ڒحْصَارثْ، أَذْ ڭعّْذنْ زڭْ ؤُسڭّْوَاسْ أَڒْ أَسڭّْوَاسْ، حِيمَا أَذْ بنْذْقنْ زَّاثْ إِ ؤُجدْجِيذْ، إِ سِيذِي ن ڒْْعسْكَارَاثْ ؤُ حِيمَا أَذْعيّْذنْ ڒْْعِيذْ ن إِعُوشُّوثنْ.
١٧ أَذْ إِمْسَارْ بلِّي مَانْ ونْ زِي ڒَْادْجَاثْ ن ثمُّورْثْ وَارْ د-إِتّْڭِيعِّيذْ شَا غَارْ ؤُرْشَالِيمْ حِيمَا أَذْ إِبنْذقْ إِ ؤُجدْجِيذْ، إِ سِيذِي ن ڒْْعسْكَارَاثْ، أَقَا وَارْ خَاسْ إِوطِّي شَا ونْژَارْ.
١٨ مَاڒَا ڒَْادْجْ ن مِيصْرَا وَارْ د-إِڭعّذْ ؤُ وَارْ د-ثُوسِي شَا، خنِّي وَارْ خَاسنْ إِشِّيثْ ونْژَارْ. ثَا أَذْ ثِيڒِي ذ ثِيشْثِي إِ زِي غَا إِڒْقفْ سِيذِي ڒڭْنُوسْ نِّي وَارْ ذِينْ إِتّْڭِيعِّيذنْ شَا حِيمَا أَذْعيّْذنْ فِيشْثَا ن ڒْْعِيذْ ن إِعُوشُّوثنْ.
١٩ ثَا ڭُّورْ أَذْ ثِيڒِي ذ ثِيشْثِي إِ دّْنُوبْ ن مِيصْرَا ؤُڒَا ذ ثِيشْثِي إِ مَارَّا ڒڭْنُوسْ، إِنِّي وَارْ ذِينْ إِتّْڭعّذنْ، حِيمَا أَذْعيّْذنْ ڒْْعِيذْ ن إِعُوشُّوثنْ.
٢٠ ذڭْ وَاسّْ نِّي ڭُّورْ أَذْ يِيڒِي خْ ثْنَاقُوسِينْ ن ييْسَانْ ’ذ أَمْقدَّاسْ إِ سِيذِي!‘ تّْنَاجَارْ ذِي ثَادَّارْثْ ن سِيذِي أَذْ إِڒِينْ أَمْ طَّاوْيَاثْ إِ ؤُرُوشِّي زَّاثْ إِ ؤُعَالْطَارْ.
٢١ مَارَّا تّْنَاجَارْ ذِي ؤُرْشَالِيمْ ؤُ ذِي يَاهُوذَا أَذْ إِڒِينْ قدّْسنْ إِ سِيذِي ن ڒْْعسْكَارَاثْ ؤُ مَارَّا إِنِّي إِ د غَا يَاسنْ حِيمَا أَذْ قدّْمنْ ثِيوْهِيبِينْ، أَذْ زَّايْسنْثْ كْسِينْ ؤُ أَذْ ذَايْسنْثْ سّْننَّانْ.
ذڭْ وَاسّْ نِّي وَارْ ذِينْ إِتِّيڒِي ؤُڒَا ذ إِجّْ ن ؤُكنْعَانِي ذِي ثَادَّارْثْ ن سِيذِي ن ڒْْعسْكَارَاثْ.“