2 ثِيمُوثِييُو
١
أَسدْجمْ غَارْ ؤُمزْوَارُو ذ ؤُسجّعْ
١ بُولُوسْ، رَّاسُولْ ن يَاسُوع لْمَاسِيحْ عْلَاحْسَابْ ڒْْخَاضَارْ ن أَربِّي، عْلَاحْسَابْ لْوَاعْذْ ن ثُوذَارْثْ إِ ذِينْ إِدْجَانْ ذِي يَاسُوع لْمَاسِيحْ.
٢ إِ ثِيمُوثِييُو، مِّي إِعِيزّنْ: أَرْضَا ذ أَرّحْمثْ ذ ڒهْنَا زِي أَربِّي، بَابَاثْنغْ، ؤُ زِي يَاسُوع لْمَاسِيحْ، سِيذِيثْنغْ.
أَشجّعْ إِ ثِيمُوثِييُو
٣ نشّْ تّْقَاذِيغْ أَربِّي ونِّي ؤُمِيعبْذغْ أَمْ ڒجْذُوذْ إِنُو س ثْنفْسشْثْ ثزْذڭْ، أَمْ تِّيذَارغْ شكْ بْڒَا قطُّو ذِي ثْژَادْجِيثِينْ إِنُو أَسّْ ذ دْجِيڒثْ.
٤ وحّْشغْ أَذْ شكْ ژَترغْ، خْمِي تّْفكَّارغْ ذڭْ إِمطَّاونْ نّشْ ؤُ تّْوَاشُّورغْ س ڒفْرَاحثْ،
٥ ؤُمِي تِّيذَارغْ ذِي لْ-إِيمَانْ نّشْ بْڒَا نِّيفَاقْ، لْ-إِيمَانْ نِّي ثُوغَا إِزدّْغنْ أَمزْوَارْ ذِي حنَّاشْ لُووِيسْ ؤُ ذڭْ يمَّاشْ ؤُنِيكِي، ؤُشَا، أَقَا سّْنغْ نِيشَانْ بلِّي إِزْذغْ ذَايكْ عَاوذْ.
٦ س ؤُينِّي سّْعقْڒغْ شكْ أَذْ ثسّكَّارذْ ثَاوْهِيبْثْ ن أَربِّي ثنِّي ذَايكْ س وبْرِيذْ ن وسْرُوسِي ن إِفَاسّنْ إِنُو خَاكْ.
٧ مِينْزِي أَربِّي وَارْ ذ أَنغْ إِوْشِي أَرُّوحْ ن ڒْْعُورّثْ، مَاشَا أَرُّوحْ ن جّهْذْ ذ ثَايْرِي ذ ؤُثبّثْ.
٨ س ؤُيَا وَارْ تّْسضْحِي شَا حِيمَا أَذْ ثوْشذْ شّْهَاذثْ خْ سِيذِيثْنغْ، ؤُ وَارْ تّْسضْحِي زَّايِي نشّْ، ونِّي ذ أَمحْبُوسْ نّسْ، مَاشَا كْسِيمْ مَارَّا ڒْْغَارْ ذِي طّْوعْ ن لْ-إِنْجِيلْ س جّهْذْ ن أَربِّي،
٩ ونِّي أَقَا إِوْشَا أَنغْ ثُوذَارْثْ ؤُشَا إِڒَاغَا أَنغْ-د س ثْڒَاغِيثْ إِقدّْسنْ، وَارْ إِدْجِي عْلَاحْسَابْ ڒخْذَايمْ نّغْ، مَاشَا عْلَاحْسَابْ ڒْْخَاضَارْ نّسْ ذ أَرْضَا نِّي إِ ذ أَنغْ إِمّوْشنْ ذِي يَاسُوع لْمَاسِيحْ قْبڒْ ڒْْوقْثْ ن زّْمَانَاثْ.
١٠ أَقَا أَرْضَا-يَا إِتّْوَاسّضْهَارْ ڒخُّو س ؤُخشِّي ن ونِّي ذ أَنغْ إِتِّيشنْ ثُوذَارْثْ، يَاسُوع لْمَاسِيحْ، ونِّي ثُوغَا إِبضْڒنْ ڒْْموْثْ ؤُشَا إِسّضْهَارْ ثُوذَارْثْ وَارْ إِفنِّينْ س لْ-إِنْجِيلْ.
١١ زَّايسْ تّْوَاسّْڭعّْذغْ نشّْ ذ أَمْبَارّحْ ذ رَّاسُولْ ذ ؤُمْسڒْمَاذْ ن ڒڭْنُوسْ.
١٢ خْ سِّيبّثْ-أَ عَاوذْ كْسِيغْ أَرْمحْ ؤُ وَارْ تّْسضْحِيغْ شَا، مِينْزِي سّْنغْ مَانْ ونْ إِ زِي تَّامْنغْ ؤُشَا أَقَا تّْوَاسّْقنْعغْ بلِّي نتَّا أَقَا غَارسْ صُّولْطَا، مَاحنْذْ أَذْ إِحْضَا إِ نشّْ أَضْمَانْ إِنُو أَڒْ أَسّْ نِّي.
١٣ أجّْ أَذْ غَاركْ إِقِّيمْ لْمِيثَالْ ن وَاوَاڒنْ إِصحّنْ إِ زَّايِي ثسْڒِيذْ س لْ-إِيمَانْ ذ ثَايْرِي إِ إِدْجَانْ ذِي يَاسُوع لْمَاسِيحْ.
١٤ حْضَا أَضْمَانْ أَصبْحَانْ إِ ذ أَشْ إِتّْوَاوكّْڒنْ س أَرُّوحْ إِقدّْسنْ نِّي ذَايْنغْ إِزدّْغنْ.
١٥ أَقَا ثسّْنذْ بلِّي مَارَّا إِنِّي إِدْجَانْ ذِي أَسِييَا جِّينْ أَيِي، زَّايْسنْ فِيخِيلُوسْ ذ هِيرْمُوخِينِيسْ.
١٦ أَذْ يَارْزفْ سِيذِيثْنغْ س أَرّحْمثْ ذِي ثَادَّارْثْ ن ؤُنِيسِيفُورُوسْ، مِينْزِي ثُوغَا إِسَّاريّحْ أَيِي أَطَّاسْ ن ثْوَاڒَاوِينْ ؤُشَا وَارْ إِسضْحِي شَا زِي سّْنَاسڒْ ن ثْمحْبَاسْثْ إِنُو.
١٧ مَاغَارْ ڒَْامِي د-يُوسَا غَارْ رُومَا، ثُوغَا يَارزُّو خَافِي س شْضَارثْ أَطَّاسْ ؤُشَا يُوفَا أَيِي.
١٨ أَذْ أَسْ إِوْشْ سِيذِيثْنغْ، أَقَا أَذْ يَافْ أَرّحْمثْ غَارْ سِيذِيثْنغْ ذڭْ وَاسّْ نِّي. ؤُشَا مشْحَاڒْ إِسخَّارْ أَيِي ذِي أَفَاسُوسْ، شكْ ثسّْنذْ كْثَارْ.