٤
ؤُقَارِّي ن شَّايَاطِينْ ذ ثْهُوجَا ثِيپُوهَاڒِييّنْ
١ مَاشَا أَرُّوحْ إِقَّارْ نِيشَانْ بلِّي ذِي زّْمَانَاثْ ثِينڭُّورَا شَا أَذْ حيّْذنْ خْ لْ-إِيمَانْ ؤُمِي غَا ضْفَارنْ ڒَْارْيَاحْ إِسّْغكّْوَانْ ذ ثْغُورِي ن شّْوَاطنْ.
٢ نِيثْنِي سْغكّْوَانْ أَمْ سّْنِيعْمِيڒنْ إِخفْ نْسنْ، سّْخَارِّيقنْ ؤُ تّقّْذنْ ثَانفْسشْثْ نْسنْ.
٣ نِيثْنِي تّطّْفنْ ڒمْڒَاشْ ؤُشَا تَّامَارنْ أَسْبعّذْ خْ مَاشَّا نِّي د-إِتّْوَاخڒْقنْ زِي أَربِّي مَاحنْذْ أَذْ ثِيڒِي إِ نّْفعْ ذ ؤُقَاذِي إِ يِينِّي يُومْننْ ؤُ سّْننْ ثِيذتّْ.
٤ مِينْزِي مَارَّا مِينْ د-إِتّْوَاخڒْقنْ زِي أَربِّي إِصْبحْ ؤُشَا وَارْ ذَايسْ مِينْ غَا نَاڭِي مَاڒَا نقْبڒْ زَّايسْ س ؤُقَاذِي،
٥ مِينْزِي أَذْ إِتّْوَاقدّسْ س وَاوَاڒْ ن أَربِّي ذ ثْژَادْجِيثْ.
٦ مَاڒَا ثسّْڒمْذذْ مَانْ أَيَا إِ وَاوْمَاثنْ نّشْ، أَذْ ثِيڒِيذْ ذ أَمْسخَّارْ ن يَاسُوع لْمَاسِيحْ، أَقَا ثتّْوَاربِّيذْ ذڭْ وَاوَاڒنْ ن لْ-إِيمَانْ ؤُ ثتّْوَاسّْڒمْذذْ ذِي ثْغُورِي ن صَّاحْ.
٧ مَاشَا أَڭّْوجْ خْ ثْحُوجَا إِخْوَانْ ن ثْوسُّورَا ؤُ مَارّسْ إِخفْ نّشْ ذِي ثْسڭْذَا.
٨ مِينْزِي أَرِّييَاضَا ن أَرِّيمثْ ثتَّاوِي غَارْ نّْفَاعْ إِ ذْرُوسْ ن ڒْْوقْثْ وَاهَا، مَاشَا ثَاسڭْذَا ثْنفّعْ ڒبْذَا، ؤُشَا أَقَا غَارسْ لْوَاعْذْ ن ثُوذَارْثْ إِ يِيضَا ؤُ إِ ڒْْوقْثْ إِ د غَا يَاسنْ.
٩ وَا ذ أَوَاڒْ ذَايسْ ڒَْامَانْ، إِسْذَاهدْجْ أَذْ إِتّْوَاقْبڒْ.
١٠ مِينْزِي إِ مَانْ أَيَا ؤُمِي نْخدّمْ ؤُ نتّْوَاسّحْقَارَا عَاوذْ، مِينْزِي أَسِيثمْ نّغْ أَقَا-ث ذِي أَربِّي إِدَّارنْ، ونِّي إِتِّيشنْ ثُوذَارْثْ إِ مَارَّا إِوْذَانْ، أَمزْوَارُو إِ يِينِّي يُومْننْ.
١١ سڒْمذْ، ثُومُورذْ س مَانْ أَيَا.
١٢ أجّْ ؤُڒَا ذ إِجّْ وَارْ شكْ إِسّحْقِيرِي شَا خْ ثمْژِي نّشْ، مَاشَا إِڒِي ذ لْمِيثَالْ إِ يِينِّي يُومْننْ، س وَاوَاڒْ، س ونْذَاهْ، س ثَايْرِي، س لْ-إِيمَانْ ؤُ س ثَازْذُوڭِي.
١٣ إِڒِي ثشْضَارذْ ذِي ثْغُورِي إِ ثْمسْمُونْثْ، ذِي طْژَادْجِيثْ ؤُ ذڭْ ؤُسڒْمذْ أَڒْ د غَا يَاسغْ.
١٤ وَارْ سْحقَّارَا شَا ثَاوْهِيبْثْ إِ ذَايكْ، ثنِّي إِ ذ أَشْ إِمّوْشنْ ؤُمِي ثُوغَا تّْنَابّنْ ؤُ سَّارْسنْ إِمْغَارنْ خَاكْ إِفَاسّنْ.
١٥ عْقڒْ خْ ثْمسْڒَايِينْ-أَ، شبَّارْ ذَايْسنْثْ، حِيمَا ثِيشْڒِي نّشْ غَارْ زَّاثْ أَذْ ثْبَانْ إِ مَارَّا.
١٦ حْضَا إِخفْ نّشْ ؤُ حْضَا خْ ؤُسڒْمذْ، صْبَارْ ذِي مَانْ أَيَا، مِينْزِي مَاڒَا ثڭِّيذْ دّڭَّا، أَذْ ثحْضِيذْ إِخفْ نّشْ ذِي ثُوذَارْثْ ؤُڒَا ذ إِنِّي ذ أَشْ إِتّسْڒَانْ.