٧
أَژْرِي ن ثسْڒِيثْ غَارْ شّْذِيحْ
١ ”عْقبْ-د، عْقبْ-د، أَ شُولَامِيثْ!
عْقبْ-د، عْقبْ-د،
مَاحنْذْ أَذْ ذَايمْ نخْزَارْ.“
”مِينْ ثخْسمْ أَذْ ثْژَارمْ ذِي شُولَامِيثْ؟“
”نتَّاثْ أَمْ شّْضِيحْ س نُّوبْثَاثْ
ن ثْنَاينْ ن ڒْْعسْكَارَاثْ.“
٢ ”مشْحَاڒْ شْنَانْ إِصُورَافْ نّمْ
ذِي صَانْذَالِييَّاثْ نّمْ،
أَ، شمْ يسِّيسْ ن إِجّْ ن ؤُمْشنّعْ!
أَحْنُونِّي ن ثْمصَّاضْثْ نّمْ
أَمْ ثْسدّْيِينْ إِغْڒَانْ
تّْرَاحنْثْ تَّاسنْثْ-د،
صّنْعثْ ن إِفَاسّنْ ن ؤُفنَّانْ.
٣ ثَاعبُّوضْثْ نّمْ
أَمْ ثْسَارِيجْثْ ثحْنُونِّي،
مَانِي وَارْ إِتّْخصِّي بِينُو إِخدْجْضنْ.
أَعذِّيسْ نّمْ ذ أَكمِّيشْ ن إِرْذنْ،
نّْضنْثْ أَسْ-د ثْلِيلِّيشِينْ.
٤ إِذْمَارنْ نّمْ ڭِّينْ
أَمْ ثْنَاينْ ن إِغَايْضنْ إِمژْيَاننْ،
أَمْ وَاشْنِيونْ ن ثْغَايْضثْ ن وزْغَارْ.
٥ إِرِي نّمْ إِڭَّا أَمْ صُّومْعثْ ن ڒْْعَاجْ،
ثِيطَّاوِينْ نّمْ
أَمْ يِييڒْمَامنْ ن حَاشْبُونْ،
غَارْ ثوَّارْثْ ن بَاثْ-رَابِّيمْ،
ثِينْزَارْثْ نّمْ أَمْ صُّومْعثْ ن لُوبْنَانْ
إِ إِسَّاجَّانْ غَارْ ذِيمَاشْقْ.
٦ ثِيوَا نّمْ إِڭَّا أَزدْجِيفْ نّمْ
أَمْ كَارْمِيلْ،
أَشُوَّافْ ن ؤُزدْجِيفْ نّمْ ذ أَرْجُووَانِي،
أَجدْجِيذْ إِتّْوَاحْبسْ ذڭْ إِمُوزَارنْ نّمْ.“
٧ ”مشْحَاڒْ ثشْنِيذْ شمْ،
ؤُ مشْحَاڒْ ثْصبْحذْ، أَ ثَايْرِي،
ذِي كُوڒْشِي مِينْ إِزمَّارْ بْنَاذمْ
أَذْ يَارّْ مژْرِي!“
أَوَاڒْ ن يسْڒِي ؤُشَا ثَاسْڒِيثْ ثَارْنِي ذَايسْ
٨ ”ثِيذِّي نّمْ ثَارْوسْ ذِي ثْشجَّارْثْ ن ثِينِي،
إِذْمَارنْ نّمْ ذڭْ إِزكُّوننْ ن ؤُضِيڒْ.
٩ نشّْ نِّيغْ: ’أَذْ نْيغْ خْ ثْشجَّارْثْ ن ثِينِي،
أَذْ طّْفغْ ذِي ڒفْرُوعْ نّسْ.‘
إِذْمَارنْ نّمْ أَذْ إِڒِينْ
أَمْ إِزنْكَاكْ ن ؤُضِيڒْ غَارْ ثْزَايَارْثْ،
ڒفْوَاحثْ ن ونْزَارنْ نّمْ
أَمْ تّفَّاحِينْ،
١٠ أَنغْ نّمْ أَمْ بِينُو إِصبْحنْ أَطَّاسْ ...“،
”... ونِّي إِتّْرَاحنْ نِيشَانْ غَارْ لِّيفْ إِنُو،
ونِّي إِتَّارَّانْ إِينْشِيشنْ
ن يِينِّي إِطّْصنْ أَذْ نْهزّنْ.“
١١ ”نشّْ ن لِّيفْ إِنُو،
غَارِي د-إِتَّاسْ مژْرِي نّسْ.
١٢ أَسْ-د، لِّيفْ إِنُو،
أجّْ أَنغْ أَذْ نُويُورْ غَارْ ييَّارْ،
أَذْ نسّنْسْ ذِي ڒذْشُورْ.
١٣ أجّْ أَنغْ أَذْ نكَّارْ زِيشْ
حِيمَا أَذْ نُويُورْ غَارْ إِمَارْجَاعنْ ن ؤُضِيڒْ،
أجّْ أَنغْ أَذْ نْژَارْ،
مَا ثَازَايَارْثْ أَقَا ثسُّوفُّوغْ،
مَا نُّووَّارْ نّسْ نُّورْزْمنْ،
مَا ثِيشجِّيرَا ن أَرمَّانْ نوَّارنْثْ.
ذِينِّي إِ ذ أَشْ غَا وْشغْ أَسْحِينّبْ إِنُو.
١٤ تِّيفَّاحِينْ ن ثَايْرِي أَرْخُونْثْ إِ ڒفْوَاحْ
ؤُ ثِيوَا ن ثوُّورَا نّغْ
أَقَا ذِينْ فْرُوثَاثْ إِشوَّارنْ،
ثِينِّي ن طّْرِي ذ ثِينِّي إِتّْوَاخمّْڒنْ.
أَ لِّيفْ إِنُو، خمّْڒغْ ثنْثْ إِ شكْ!“