٣
مّژْڒِي ن ثسْڒِيثْ إِ يسْڒِي
١ ”أَرْزُوغْ خَاسْ ذِي دْجْيَاڒِي
أَمْ دْجِيغْ خْ ثَاسُّوثْ إِنُو،
أَرْزُوغْ خْ ونِّي إِتّخْسْ ڒعْمَارْ إِنُو.
نشّْ أَرْزُوغْ خَاسْ،
مَاشَا نشّْ وَارْ ث ؤُفِيغْ.
٢ نشّْ نِّيغْ: ’أَذْ كَّارغْ،
أَذْ سُوحغْ ذِي ثنْذِينْثْ،
ذڭْ إِبْرِيذنْ ؤُ خْ وَازَّاينْ.
نشّْ أَذْ خَاسْ أَرْزُوغْ، أَذْ أَرْزُوغْ
خْ ونِّي إِتّخْسْ ڒعْمَارْ إِنُو.‘
نشّْ أَرْزُوغْ خَاسْ، مَاشَا وَارْ ث ؤُفِيغْ.
٣ ؤُفِينْ أَيِي إِعسَّاسنْ
أَمْ تّنّْضنْ ذِي ثنْذِينْثْ.
نشّْ نِّيغْ: ’مَا ثژْرِيمْ كنِّيوْ
ونِّي إِتّخْسنْ ڒعْمَارْ إِنُو؟‘
٤ ڒَْامِي ثُوغَا عَاذْ وَارْ خَاسنْ عْذُوغْ، ؤُفِيغْ ث،
ونِّي إِتّخْسنْ ڒعْمَارْ إِنُو.
نشّْ طّْفغْ ث، وَارْ زَّايسْ أَرخُّوغْ
أَڒَامِي ث-إِ-د-إِوْيغْ
غَارْ ثَادَّارْثْ ن يمَّا،
ذڭْ وخَّامْ ن ذَاخڒْ
ن ثنِّي إِ د أَيِي يُورْونْ.
٥ نشّْ أَذْ كنِّينْثْ سّْجَادْجَاغْ،
أَ يسِّيسْ ن ؤُرْشَالِيمْ،
غَارْ ثْغَايْضِينْ ن وزْغَارْ
ؤُ غَارْ ثُوذَاذِينْ ذڭْ إِيَّارْأنْ،
أَقَا كنِّينْثْ وَارْ هكّْوْڒنْثْ ثَايْرِي،
وَارْ ت-إِ-د-سّكَّارَانْثْ
أَڒْ ثتّخْسْ سِيمَانْثْ نّسْ.“
ثَاوَاسِيثْ ن كُولَا أَكْ-ذ يسْڒِي إِ ڒمْڒَاشْ
٦ ”مِينْ ثعْنَا ثنِّي إِ د-إِڭعّْذنْ زِي ڒخْڒَا،
أَمْ إِقلِّيجنْ ن دّخَّانْ،
ذڭْ إِجّْ ن ؤُسيْنُو ن مِيرُّو ذ جَّاوِي،
ن مَارَّا ڒبْزَارْ إِتّْفُوحنْ ن ؤُسبَّابْ؟
٧ خْزَارْ، ڒشْثُو ن ثْربُّوثْ ن سُولِيمَانْ،
تّنّْضنْ أَسْ-د ستِّينْ ن أَيْثْ ن بُو-ثغْرُوضْثْ،
زڭْ أَيْثْ ن بُو-ثغْرُوضْثْ ن إِسْرَائِيل،
٨ مَارَّا إِنِّي إِتّطّْفنْ سِّيفْ،
إِنِّي إِڒمّْذنْ أَمنْغِي،
كُوڒْ إِجّْ س سِّيفْ نّسْ غَارْ ثْمصَّاضْثْ نّسْ
زِي سِّيبّثْ ن مِينْ إِسَّاڭّْوَاذنْ ذِي دْجِيڒثْ.
٩ أَجدْجِيذْ سُولِيمَانْ إِڭَّا إِ يِيخفْ نّسْ
إِجّْ ن ڒشْثُو إِ ثْربُّوثْ س ؤُكشُّوضْ ن لُوبْنَانْ.
١٠ إِعُومَاذْ غَارْ ثغْمَارْثْ
إِڭَّا إِ-ثنْ س نُّوقَارْثْ،
أَعمّذْ ن وعْرُورْ ن وُورغْ
ؤُشَا أَغِيمِي نّسْ ن أَرْجُووَانِي.
ذَاخڒْ نّسْ يَارْضنْ ث
س ثَايْرِي ن يسِّيسْ ن ؤُرْشَالِيمْ.“
١١ ”فّْغنْثْ ؤُ خْزَارنْثْ،
كنِّينْثْ يسِّيسْ ن صِيهْيُونْ،
أَقَا ذَا أَجدْجِيذْ سُولِيمَانْ
أَكْ-ذ تَّاجْ إِ زِي ث ثْڭلّذْ يمَّاسْ
ذڭْ وَاسّْ ن وُورَارْ نّسْ،
ذڭْ وَاسّْ ن ڒفْرَاحثْ يُوژْغنْ
ذڭْ وُوڒْ نّسْ.“