٤
أَنقِّي ن إِشْ-بُوشَاثْ
١ ؤُمِي إِسْڒَا مِّيسْ ن شَاوُولْ، أَقَا أَبْنِيرْ إِمُّوثْ ذِي حَابْرُونْ، ذوْڒنْ إِفَاسّنْ نّسْ ضعْفنْ ؤُ مَارَّا إِسْرَائِيل إِنّخْڒعْ.
٢ مِّيسْ ن شَاوُولْ ثُوغَا غَارسْ ثْنَاينْ ن يرْيَازنْ جَارْ إِمْسخَّارنْ نّسْ، إِنِّي إِدْجَانْ ذ ڒْْقبْطَانَاثْ ن بَانْذِييَّاثْ. إِجّنْ قَّارنْ أَسْ بَاعْنَا ؤُ ونّغْنِي رَاكَابْ، ثُوغَا أَثنْ ذ إِحنْجِيرنْ ن رِيمُّونْ، أَبِي‘رُوثِي، زڭْ أَيْثْ ن بِينْيَامِينْ، مَاغَارْ ؤُڒَا ذ بِيعْرُوثْ إِتّْوَاحْسبْ-د غَارْ بِينْيَامِينْ.
٣ إِبِيعْرُوثِييّنْ أَروْڒنْ غَارْ جَاتَّايِيمْ ؤُشَا قِّيمنْ زدّْغنْ ذِينِّي أَڒْ أَسّْ-أَ أَمْ إِبَارَّانِييّنْ.
٤ يُونَاثَانْ، مِّيسْ ن شَاوُولْ، ثُوغَا غَارسْ إِجّْ ن مِّيسْ نِّي ثُوغَا إِقَارّْمنْ زِي ثْنَاينْ ن إِضَارنْ. نتَّا ثُوغَا غَارسْ خمْسَا ن إِسڭّْوُوسَا ؤُمِي د-يُوسَا ڒخْبَارْ خْ شَاوُولْ ذ يُونَاثَانْ زِي يَازْرَاعِيلْ. ثنِّي ث إِسّيْمنْ ثُوغَا ثطّفْ إِ-ث ؤُشَا ثَارْوڒْ. أَقَا ذڭْ ؤُقدْجقْ ن ثَاروْڒَا، إِمْسَارْ، نتَّا إِوْضَا، إِذْوڒْ إِقَارّمْ. قَّارنْ أَسْ مَافِيبُوشَاثْ.
٥ رَاكَابْ ذ بَاعْنَا، إِحنْجِيرنْ ن رِيمُّونْ، أَبِيعْرُوثِي، طّْفنْ أَبْرِيذْ ؤُشَا ؤُسِينْ-د ذِي طّْحَا ن ؤُزِيڒْ غَارْ ثَادَّارْثْ ن إِشْ-بُوشَاثْ. نتَّا ثُوغَا إِزّڒْ ذِي قَامَا ذِي ثْمذِّيثْ.
٦ خْزَارْ، نِيثْنِي ؤُذْفنْ غَارْ ذَاخڒْ ذِي ثَادَّارْثْ أَخْمِي ثُوغَا نْوَانْ أَذْ كْسِينْ إِرْذنْ، ؤُشَا سّْنُوقّْبنْ ث ذڭْ ؤُعذِّيسْ. رَاكَابْ ذ ؤُمَاسْ بَاعْنَا خْثُوتّْڒنْ.
٧ نِيثْنِي ؤُذْفنْ غَارْ ثَادَّارْثْ ؤُمِي ث ثُوغَا إِزّڒْ ذِي قَامَا نّسْ ذڭْ وخَّامْ ن يِيضصْ نّسْ، ؤُشَا سّْنُوقْبنْ ث، نْغِينْ ث ؤُشَا قسّنْ أَسْ أَزدْجِيفْ. خنِّي كْسِينْ أَزدْجِيفْ نّسْ أَكِيذْسنْ ؤُشَا ؤُيُورنْ دْجِيڒثْ ثْمُونْ، كِّينْ أَبْرِيذْ ن ڒوْضَا.
٨ نِيثْنِي إِوْينْ أَزدْجِيفْ ن إِشْ-بُوشَاثْ غَارْ ذَاوُوذْ غَارْ حَابْرُونْ، نَّانْ إِ ؤُجدْجِيذْ: ”خْزَارْ، أَزدْجِيفْ ن إِشْ-بُوشَاثْ، مِّيسْ ن شَاوُولْ، ڒعْذُو نّشْ، ونِّي ثُوغَا يَارزُّونْ بُوحْبڒْ نّشْ. أَقَا أَسّْ-أَ سِيذِي إِخْڒفْ إِ سِيذِي إِنُو أَجدْجِيذْ زِي شَاوُولْ ذ زَّارِيعثْ نّسْ.“
٩ مَاشَا ذَاوُوذْ يَارَّا-د خْ رَاكَابْ ذ ؤُمَاسْ بَاعْنَا، إِحنْجِيرنْ ن رِيمُّونْ، أَبِيعْرُوثِي، إِنَّا أَسنْ: ”س ثِيذتّْ أَمْ إِدَّارْ سِيذِي، ونِّي إِفكّنْ ڒعْمَارْ إِنُو زِي مَارَّا ڒحْصَارثْ!
١٠ أَقَا ونِّي ذ أَيِي د-يِيوْينْ ڒخْبَارْ ؤُشَا إِنَّا: ’خْژَارْ، شَاوُولْ إِمُّوثْ!‘، ثُوغَا إِتّْغِيڒْ أَسْ ذِي ثِيطَّاوِينْ نّسْ أَقَا نتَّا أَمْ يِيجّنْ إِ د-يِيوْينْ ڒخْبَارْ أَصبْحَانْ، مَاشَا نشّْ طّْفغْ ث ؤُشَا نْغِيغْ ث ذِي صِيقْلَاغْ، وَاخَّا نتَّا ثُوغَا إِرَاجَا أَذْ أَسْ وْشغْ ڒْْمُونثْ إِ ڒخْبَارْ أَصبْحَانْ.
١١ مشْحَاڒْ عَاذْ ڒخُّو إِرْيَازنْ إِعفَّاننْ إِنِّي إِنْغِينْ إِجّْ ن ورْيَازْ ذ أَمْسڭّذْ ذِي ثَادَّارْثْ نّسْ خْ قَامَا نّسْ! خنِّي ڒخُّو، مَا نشّْ وَارْ خدْجْفغْ خنِّي زَّايْومْ إِذَامّنْ نّسْ ؤُ أَذْ كنِّيوْ مْحِيغْ زِي ثمُّورْثْ؟“
١٢ خنِّي يُومُورْ ذَاوُوذْ إِمْسخَّارنْ نّسْ ؤُ نِيثْنِي نْغِينْ ثنْ. قسّنْ أَسنْ إِفَاسّنْ ذ إِضَارنْ ؤُشَا ؤُيْڒنْ ثنْ غَارْ ؤُيڒْمَامْ ن حَابْرُونْ. أَزدْجِيفْ ن إِشْ-بُوشَاثْ، مَاشَا كْسِينْ ث نِيثْنِي، نضْڒنْ ث ذڭْ ونْضڒْ ن أَبْنِيرْ ذِي حَابْرُونْ.