٣
ثَاڒَاغِيثْ ن أَربِّي خْ صَامْوِيلْ
١ شَامْوِيلْ أَمژْيَانْ ثُوغَا إِتّْسخَّارْ إِ سِيذِي زَّاثْ إِ وُوذمْ ن عَالِي. ذڭْ وُوسَّانْ نِّي ثُوغَا أَوَاڒْ ن سِيذِي إِقِّيدْجثْ. وَارْ ثُوغِي ثتّفِّيغْ شَا ن ڒوْحِييْ.
٢ ذڭْ وَاسّْ نِّي، ؤُمِي عَالِي إِطّصْ ذڭْ ومْشَانْ نّسْ ؤُشَا ذوْڒنْثْ ثِيطَّاوِينْ نّسْ أَرْخُونْثْ أَڒَامِي ثُوغَا وَارْ إِزمَّارْ أَذْ إِتّْوَاڒَا عَاذْ، إِمْسَارْ -
٣ عَاذْ قْبڒْ إِخْسِي ڒفْنَارْ ن أَربِّي ؤُ شَامْوِيلْ ثُوغَا إِطّصْ ذِي زَّاوشْثْ ن سِيذِي مَانِي ثدْجَا تَّابُوثْ ن أَربِّي -
٤ أَقَا سِيذِي إِڒَاغَا إِ شَامْوِيلْ. ؤُشَا يَارَّا-د خَاسْ شَامْوِيلْ: ”نشّْ أَقَا أَيِي ذَا!“
٥ نتَّا يُوزّڒْ غَارْ عَالِي، إِنَّا: ”ذَانِيثَا إِ دْجِيغْ، شكْ ثْڒَاغِيذْ أَيِي-د.“ مَاشَا نتَّا إِنَّا: ”نشّْ وَارْ خَاكْ د-ڒَْاغِيغْ شَا، عْقبْ، أَذْ ثزّْڒذْ!“ ؤُشَا إِعْقبْ، إِزّڒْ.
٦ سِيذِي إِڒَاغَا إِ شَامْوِيلْ ثْوَاڒَا نّغْنِيثْ ؤُشَا إِكَّارْ-د شَامْوِيلْ، يُويُورْ غَارْ عَالِي، إِنَّا: ”نشّْ أَقَا أَيِي ذَا، مِينْزِي شكْ ثْڒَاغِيذْ أَيِي-د.“ يَارَّا-د خَاسْ نتَّا: ”نشّْ وَارْ خَاكْ د-ڒَْاغِيغْ شَا، مِّي، عْقبْ، أَذْ ثزّْڒذْ!“
٧ شَامْوِيلْ عَاذْ وَارْ إِسِّينْ سِيذِي ؤُ أَوَاڒْ ن سِيذِي ثُوغَا عَاذْ وَارْ ذ أَسْ إِتّْوَاسَّارْڭبْ.
٨ إِڒَاغَا-د سِيذِي خْ شَامْوِيلْ عَاوذْ إِ ثْوَاڒَا وِيسّْ ثْڒَاثَا ؤُ نتَّا إِكَّارْ-د، يُويُورْ غَارْ عَالِي، إِنَّا: ”نشّْ أَقَا أَيِي ذَا، شكْ ثْڒَاغِيذْ أَيِي-د.“ خَاسْ ؤُشَا إِحكَّارْ عَالِي، أَقَا سِيذِي ثُوغَا إِڒَاغَا خْ ؤُحنْجِيرْ،
٩ ؤُشَا عَالِي إِنَّا إِ شَامْوِيلْ: ”رُوحْ، أَذْ ثزّْڒذْ! مَاڒَا نتَّا إِڒَاغَا أَشْ-د عَاوذْ، خنِّي أَرّْ خَاسْ: ’سِيوڒْ، سِيذِي، مَاغَارْ أَمْسخَّارْ نّشْ إِتّسْڒَا!‘ “ ؤُشَا إِعْقبْ شَامْوِيلْ، إِزّڒْ ذڭْ ومْشَانْ نّسْ.
١٠ خنِّي يُوسَا-د سِيذِي ؤُشَا إِبدّْ ذِينْ ؤُشَا إِڒَاغَا أَمْ ثْوَاڒَاوِينْ نّغْنِي: ”شَامْوِيلْ، شَامْوِيلْ!“ إِنَّا شَامْوِيلْ: ”سِيوڒْ، مَاغَارْ أَمْسخَّارْ نّشْ إِتّسْڒَا!“
١١ سِيذِي إِنَّا إِ شَامْوِيلْ: ”خْزَارْ، نشّْ أَذْ ڭّغْ شَا ذِي إِسْرَائِيل أَڒَامِي مَارَّا وِي خَاسْ إِ غَا إِسْڒنْ، ثْنَاينْ ن إِمزُّوغنْ نّسْ أَذْ طْنطْننْ.
١٢ ذڭْ وَاسّْ نِّي أَذْ قفْڒغْ مَارَّا إِ عَالِي، زڭْ ؤُمزْوَارُو أَڒْ أَنڭَّارُو مِينْ زِي سِّيوْڒغْ خْ ثَادَّارْثْ نّسْ.
١٣ مِينْزِي نشّْعڒْمغْ أَسْ، أَقَا نشّْ أَذْ حكْمغْ ثَادَّارْثْ نّسْ إِ ڒبْذَا خْ ڒْْمُوعْصِييّثْ مِينْ خفْ إِسّنْ، مِينْزِي ڒَْامِي سِّيوْضنْ إِحنْجِيرنْ نّسْ نّعْڒثْ خْ يِيخفْ نْسنْ، نتَّا وَارْ ثنْ إِطِّيفْ شَا.
١٤ س ؤُيَا نشّْ جُّودْجغْ إِ ثَادَّارْثْ ن عَالِي: ’وَارْ إِتّْوَاڭّْ وصْڒَاحْ إِ ڒبْذَا إِ ڒْْمُوعْصِييّثْ ن ثَادَّارْثْ ن عَالِي س ثْغَارْصْثْ ؤُڒَا س ثوْهِيبْثْ ن ڒْْغِيدْجثْ!‘ “
١٥ شَامْوِيلْ إِقِّيمْ إِزّڒْ أَڒْ صّْبحْ، خنِّي يَارْزمْ ثِيوُّورَا ن ثَادَّارْثْ ن سِيذِي. مَاشَا شَامْوِيلْ إِڭّْوذْ أَذْ إِحَاجَا ڒوْحِييْ إِ عَالِي.
١٦ خنِّي إِڒَاغَا عَالِي خْ شَامْوِيلْ، إِنَّا: ”شَامْوِيلْ، مِّي!“ نتَّا يَارَّا-د خَاسْ: ”نشّْ أَقَا أَيِي ذَا!“
١٧ خنِّي إِنَّا: ”مَانْ أَوَاڒْ إِ ذ أَشْ إِنَّا؟ تّْزَاوْڭغْ شكْ، وَارْ خَافِي سْنُوفَّارْ! أجّْ أَذْ أَشْ إِڭّْ أَربِّي أَمُّو، عَاذْ مَاهُو، مَاڒَا شكْ ثسّْنُوفَّارذْ خَافِي إِجّْ ن وَاوَاڒْ وَاهَا زِي مَارَّا أَوَاڒْأنْ إِ كِيذكْ إِسِّيوڒْ نتَّا.“
١٨ خنِّي إِحَاجَا أَسْ شَامْوِيلْ مَارَّا أَوَاڒنْ ؤُ وَارْ خَاسْ ثنْ إِفَّارْ. ؤُشَا يَارَّا-د خَاسْ عَالِي: ”أَقَا-ث ذ سِيذِي، أجّْ إِ-ث أَذْ إِڭّْ مِينْ إِدْجَانْ نِيشَانْ ذِي ثِيطَّاوِينْ نّسْ!“
١٩ شَامْوِيلْ ثُوغَا إِمقَّارْ ؤُ سِيذِي ثُوغَا-ث أَكِيذسْ ؤُ وَارْ إِجِّي ؤُڒَا ذ إِجّنْ زِي مَارَّا أَوَاڒنْ نّسْ أَذْ إِوْضَا غَارْ ثمُّورْثْ.
٢٠ مَارَّا إِسْرَائِيل، زِي ذَانْ أَڒْ بِئرْ-سبْعَا، ثُوغَا إِتّْوَاڒَا أَقَا شَامْوِيلْ ثُوغَا إِتّْوَاڒقّمْ ذ أَنَابِي ن سِيذِي.
٢١ سِيذِي إِقِّيمْ أَذْ د-إِضْهَارْ ذِي شِيلُو، مِينْزِي سِيذِي إِسَّارْڭبْ إِخفْ نّسْ إِ شَامْوِيلْ ذِي شِيلُو س وَاوَاڒْ ن سِيذِي.