٢٦
ذَاوُوذْ إِسّْعِيزّْ خْ ثُوذَارْثْ ن شَاوُولْ إِ ثْوَاڒَا وِيسّْ ثْنَاينْ
١ إِرْيَازنْ ن زِيفْ ؤُسِينْ-د غَارْ شَاوُولْ غَارْ جِيبْعَا، نَّانْ: ”مَا وَارْ إِسّْنُوفَّارْ ذَاوُوذْ إِخفْ نّسْ خْ ثوْرِيرْثْ ن حَاخِيلَا أَرنْذَاذْ ن ثْنزْرُوفْثْ؟“
٢ خنِّي إِكَّارْ شَاوُولْ ؤُشَا إِهْوَا غَارْ ڒخْڒَا ن زِيفْ، أَكِيذسْ ثڒْثْ-أَڒَافْ ن يرْيَازنْ إِتّْوَافَارْزنْ زِي إِسْرَائِيل، حِيمَا أَذْ يَارْزُو خْ ذَاوُوذْ ذِي ڒخْڒَا ن زِيفْ.
٣ إِوْثَا شَاوُولْ إِقِيضَانْ نّسْ غَارْ وبْرِيذْ خْ ثوْرِيرْثْ ن حَاخِيلَا ثنِّي أَرنْذَاذْ ن ثْنزْرُوفْثْ. ذَاوُوذْ إِقِّيمْ ذِي ڒخْڒَا، إِژْرَا شَاوُولْ إِضْفَارْ إِ-ث-إِ-د غَارْ ڒخْڒَا.
٤ مَاغَارْ ذَاوُوذْ ثُوغَا إِسّكّْ إِخْبَارْجِييّنْ ؤُ نتَّا ثُوغَا إِسّنْ أَقَا شَاوُولْ إِڭَّا أَذْ د-يَاسْ.
٥ ذَاوُوذْ إِكَّارْ ؤُ يُوسَا-د مَانِي ثُوغَا إِوْثَا شَاوُولْ إِقِيضَانْ نّسْ. ذَاوُوذْ ثُوغَا إِتّْوَاڒَا مَانِي ثُوغَا إِزّڒْ شَاوُولْ أَكْ-ذ ؤُكُومَانْذَارْ ن ڒْْعسْكَارْ نّسْ، أَبْنِيرْ، مِّيسْ ن نِيرْ. شَاوُولْ إِطّصْ ذِي ڒْْمَارْڭحْ ن إِكَارُّوثنْ ؤُ ڒْْڭنْسْ ثُوغَا إِنّضْ أَسْ-د س إِقِيضَانْ نْسنْ.
٦ خنِّي إِطّفْ ذَاوُوذْ ذڭْ وَاوَاڒْ. إِسِّيوڒْ أَكْ-ذ أَخِيمَالِيكْ، أَحِيتِّي، ؤُ أَكْ-ذ أَبِيشَايْ، مِّيسْ ن صِيرُويَا، ؤُمَاسْ ن يُووَابْ، إِنَّا: ”مَانْ ونْ أَكِيذِي إِ غَا إِهْوَانْ غَارْ شَاوُولْ ذِي ڒْْمَارْڭحْ ن ڒْْعسْكَارْ؟“ أَبِيشَايْ إِنَّا: ”نشّْ أَذْ كِيذكْ هْوِيغْ.“
٧ يُوسَا-د ذَاوُوذْ أَكْ-ذ أَبِيشَايْ ذِي دْجِيڒثْ غَارْ ڒْْڭنْسْ، ؤُ خْزَارْ، شَاوُولْ ثُوغَا إِطّصْ ذِي ڒْْمَارْڭحْ ن إِكَارُّوثنْ ؤُ لَانْسَا نّسْ ثجِّي زَّاثْ إِ ؤُزدْجِيفْ نّسْ ذِي ثمُّورْثْ. إِنّْضنْ أَسْ-د أَبْنِيرْ ذ ڒْْڭنْسْ.
٨ خنِّي إِنَّا أَبِيشَايْ إِ ذَاوُوذْ: ”أَسّْ-أَ إِقّنْ سِيذِي ڒعْذُو نّشْ ذڭْ ؤُفُوسْ نّشْ. أجّْ أَيِي ڒخُّو أَذْ ث سّْنُوقّْبغْ أَكْ-ذ ثمُّورْثْ س إِشْثْ ن ثشْثِي ن لَانْسَا. وَارْ تّحْذِيجِيغْ أَذْ ت ڭّغْ إِشْثْ ن ثْوَاڒَا نّغْنِيثْ.“
٩ ذَاوُوذْ إِنَّا إِ أَبِيشَايْ: ”وَارْ ث تَّاردّدْجْ شَا، مَاغَارْ مَانْ ونْ إِزمَّارنْ أَذْ يَارّْ أَفُوسْ نّسْ غَارْ ؤُمذْهُونْ ن سِيذِي ؤُشَا أَذْ إِقِّيمْ ذ أَفُورِّي؟“
١٠ خنِّي إِنَّا ذَاوُوذْ: ”س ثِيذتّْ أَمْ إِدَّارْ سِيذِي، سِيذِي أَذْ ث إِوّثْ: نِيغْ أَذْ د-يَاسْ وَاسّْ نّسْ إِ ذِي إِ غَا إِمّثْ نِيغْ أَذْ د-إِهْوَا غَارْ ؤُمنْغِي ؤُشَا أَذْ إِتّْوَانغْ.
١١ سِيذِي أَذْ أَيِي إِحْضَا أَقَا نشّْ أَذْ وْثغْ س ؤُفُوسْ إِنُو أَمذْهُونْ ن سِيذِي. تّْزَاوْڭغْ شكْ، كْسِي لَانْسَا إِ إِدْجَانْ زَّاثْ إِ ؤُزدْجِيفْ نّسْ ذ ثبْرِيقْثْ ن وَامَانْ ؤُشَا أجّْ أَنغْ أَذْ نُويُورْ!“
١٢ إِكْسِي ذَاوُوذْ لَانْسَا ذ ثبْرِيقْثْ ن وَامَانْ إِ ثُوغَا ذِينْ إِدْجَانْ زَّاثْ إِ ؤُزدْجِيفْ ن شَاوُولْ ؤُشَا فّْغنْ نِيثْنِي. ؤُڒَا ذ إِجّْ وَارْ ث إِژْرِي، ڒَْا ذ إِجّْ وَارْ ث يُوشِي ؤُ ؤُڒَا ذ إِجّْ وَارْ إِفِيقْ، مَاغَارْ مَارَّا طّْصنْ، مِينْزِي سِيذِي ثُوغَا إِسّغْضسْ إِ-ثنْ ذڭْ إِجّْ ن يِيضصْ يُودْجغْ.
١٣ ذَاوُوذْ إِعْذُو غَارْ ؤُغزْذِيسْ نّغْنِي ؤُشَا إِبدّْ غَارْ ڒَْاڭّْوَاجْ خْ ثْقِيشَّاثْ ن وذْرَارْ. ثُوغَا إِدْجَا تَّاسِيعْ ذ أَمقّْرَانْ جَارْ أَسنْ.
١٤ إِڒَاغَا-د ذَاوُوذْ إِ ڒْْڭنْسْ ؤُ إِ أَبْنِيرْ، مِّيسْ ن نِيرْ، إِنَّا: ”مَا وَارْ د-ثَارِّيذْ شَا، أَبْنِيرْ؟“ خنِّي يَارَّا-د أَبْنِيرْ، إِنَّا: ”مِينْ ثعْنِيذْ شكْ ونِّي ذ إِتّْڒَاغَانْ خْ ؤُجدْجِيذْ؟“
١٥ خنِّي إِنَّا ذَاوُوذْ إِ أَبْنِيرْ: ”مَا شكْ وَارْ ثدْجِيذْ ذ أَرْيَازْ؟ مَانْ ونْ ذِي إِسْرَائِيل إِ إِدْجَانْ أَمْ شكْ؟ مَايمِّي خنِّي وَارْ ثحْضِيذْ خْ سِيذِي نّشْ، أَجدْجِيذْ؟ أَقَا إِجّنْ زِي ڒْْڭنْسْ يُوذفْ-د حِيمَا أَذْ يَاردّدْجْ أَجدْجِيذْ، سِيذِي نّشْ.
١٦ مِينْ ثڭِّيذْ وَارْ إِدْجِي شَا مْلِيحْ. س ثِيذتّْ أَمْ إِدَّارْ سِيذِي، كنِّيوْ ذ ثَارْوَا ن ڒْْموْثْ، مِينْزِي كنِّيوْ وَارْ ثْعسّمْ خْ سِيذِي نْومْ، أَمذْهُونْ ن سِيذِي! خْزَارْ مَانِي دْجَانْثْ ڒخُّو لَانْسَا ن ؤُجدْجِيذْ ذ ثبْرِيقْثْ ن وَامَانْ ثِينِّي ثُوغَا زَّاثْ إِ ؤُزدْجِيفْ نّسْ!“
١٧ شَاوُولْ إِعْقڒْ ثْمِيجَّا ن ذَاوُوذْ، إِنَّا: ”مَا ثَا ذ ثْمِيجَّا نّشْ، أَ مِّي ذَاوُوذْ؟“ ذَاوُوذْ إِنَّا: ”أَقَا-ت ذ ثْمِيجَّا إِنُو، سِيذِي إِنُو، أَجدْجِيذْ!“
١٨ خنِّي إِنَّا: ”مَايمِّي إِضفَّارْ سِيذِي إِنُو أَمْسخَّارْ نّسْ أَمُّو؟ مِينْزِي مِينْ ڭِّيغْ ؤُ مَانْ ث ڒْْعِيبْ إِ يُومْسنْ غَارْ ؤُفُوسْ إِنُو؟
١٩ خنِّي ڒخُّو، أجّْ أَذْ إِسڒْ سِيذِي إِنُو، أَجدْجِيذْ، إِ وَاوَاڒنْ ن ؤُمْسخَّارْ نّسْ. مَاڒَا سِيذِي إِسّهْوڒْ إِ شكْ خَافِي، إِڒِي أَذْ إِشمّْ نتَّا ثَاوْهِيبْثْ ن ڒْْغِيدْجثْ، مَاشَا مَاڒَا ذ إِوْذَانْ إِ إِدْجَانْ، خنِّي أَذْ تّْوَانعْڒنْ نِيثْنِي زَّاثْ إِ وُوذمْ ن سِيذِي، مَاغَارْ نِيثْنِي ؤُژّْڒنْ خَافِي أَسّْ-أَ أَڒَامِي وَارْ زمَّارغْ أَذْ قِّيمغْ قّْنغْ عَاذْ إِ ڒْْوَارْثْ ن سِيذِي، ؤُ مَاغَارْ نِيثْنِي قَّارنْ: ’رُوهْ، سخَّارْ إِ إِربِّيثنْ إِنّغْنِي!‘
٢٠ خنِّي ڒخُّو، أجّْ إِذَامّنْ إِنُو وَارْ تِّيزّْڒنْ ذڭْ إِشْثْ ن ثمُّورْثْ إِڭّْوجنْ خْ سِيذِي. مِينْزِي أَجدْجِيذْ ن إِسْرَائِيل إِفّغْ، حِيمَا أَذْ يَارْزُو خْ إِجّْ ن ؤُينِّي ن ؤُشُورْذُو وَاهَا، أَمْ مَامّشْ يمَّارنْ ثَاسكُّورْثْ ذڭْ إِذُورَارْ.“
٢١ خَاسْ ؤُشَا إِنَّا شَاوُولْ: ”نشّْ خْضِيغْ، عْقبْ-د، أَ مِّي ذَاوُوذْ، مَاغَارْ نشّْ وَارْ ذ أَشْ تّڭّغْ عَاذْ ڒْْغَارْ، مِينْزِي ثُوذَارْثْ إِنُو ثُوغَا أَسّْ-أَ ثْسكّْوَا غَاركْ ذِي ثِيطَّاوِينْ نّشْ. خْزَارْ، نشّْ ڭِّيغْ ثُوبُّوهڒْيَا ؤُ ودَّارغْ س وَاطَّاسْ.“
٢٢ ذَاوُوذْ يَارَّا-د، إِنَّا: ”خْزَارْ، أَقَا ذَا لَانْسَا ن ؤُجدْجِيذْ. أجّْ إِجّْ زڭْ إِمْسخَّارنْ نّشْ أَذْ إِژْوَا، أَذْ ت-إِ-د يَاوِي.
٢٣ أَذْ إِخدْجصْ سِيذِي كُوڒْ إِجّْ خْ ثْسڭْذَا نّسْ ذ تِّيقّثْ نّسْ، مِينْزِي سِيذِي ثُوغَا إِسلّمْ إِ شكْ أَسّْ-أَ ذڭْ ؤُفُوسْ إِنُو، مَاشَا وَارْ خْسغْ شَا أَذْ ڭّغْ أَفُوسْ إِنُو ذڭْ ؤُمذْهُونْ ن سِيذِي.
٢٤ خْزَارْ، أَمْ مَامّشْ ثُوغَا ثُوذَارْثْ نّشْ أَسّْ-أَ ثِيغْڒَا ذِي ثِيطَّاوِينْ إِنُو، أَمُّو إِ غَا ثِيڒِي ثُوذَارْثْ إِنُو ذِي ثِيطَّاوِينْ ن سِيذِي ثِيغْڒَا. نتَّا أَذْ أَيِي إِفكّْ زِي مَارَّا ڒحْصَارثْ.“
٢٥ شَاوُولْ إِنَّا إِ ذَاوُوذْ: ”أَقَا شكْ ثتّْوَابَارْكذْ، مِّي ذَاوُوذْ. مِينْ مَا إِ غَا ثڭّذْ، أَقَا أَذْ ثَاوْضذْ عَاوذْ.“ خنِّي يُويُورْ ذَاوُوذْ أَبْرِيذْ نّسْ ؤُ شَاوُولْ إِعْقبْ غَارْ ومْشَانْ نّسْ مَانِي ثُوغَا إِزدّغْ.