٢٢
إِغْزَارْ ن وَامَانْ إِدَّارنْ
١ ؤُشَا نتَّا إِسّْشنْ أَيِي إِجّْ ن إِغْزَارْ إِزْذِيڭْ ن وَامَانْ إِدَّارنْ، ذ أَمزْذَاڭْ، إِصْفَا أَمْ ؤُكْرِيسْثَالْ، إِ د-إِتّفّْغنْ زِي ڒْْعَارْشْ ن أَربِّي ؤُ ن يزْمَارْ.
٢ ذِي ڒْْوسْطْ ن وَازَّايْ نّسْ، خْ ثْمَا-يَا ؤُ خْ ثْمَا نِّي ن إِغْزَارْ، ثُوغَا ثَاشجَّارْثْ ن ثُوذَارْثْ ثنِّي ثسّنْضَايْ ڒْْغِيدْجثْ ثنْعَاشْ ن ثْوَاڒَاوِينْ. ذِي مْكُوڒْ أَيُورْ ثتِّيشْ ڒْْغِيدْجثْ نّسْ ذ ثِيفْرَايْ نّسْ إِ ؤُسْڭنْفُو ن ڒڭْنُوسْ.
٣ وَارْ ذَايسْ ثتِّيڒِي عَاذْ نّعْڒثْ. أَذْ ذَايسْ يِيڒِي ڒْْعَارْشْ ن أَربِّي ؤُ ن يزْمَارْ ؤُشَا إِمْسخَّارنْ نّسْ أَذْ خَاسْ سخَّارنْ.
٤ نِيثْنِي أَذْ ژَترنْ ؤُذمْ نّسْ، إِسمْ نّسْ أَذْ يِيڒِي خْ ثنْيَارِينْ نْسنْ.
٥ وَارْ ذِينْ ثتِّيڒِي دْجِيڒثْ ؤُشَا نِيثْنِي وَارْ تّحْذِيجنْ عَاذْ طّْيَا ن ڒفْنَارَاثْ نِيغْ ن ثْفَاوِينْ نِيغْ ن ثْفَاوْثْ ن ثْفُوشْثْ، مِينْزِي سِيذِي أَربِّي أَذْ أَسنْ إِڭّْ ثَافَاوْثْ ؤُشَا أَذْ يِيڒِي ذ أَجدْجِيذْ نْسنْ إِ ڒبْذَا قَاعْ.
٦ خَاسْ ؤُشَا إِنَّا أَيِي:
”أَوَاڒنْ-أَ ذَايْسنْ ڒَْامَانْ ذ ثِيذتّْ!
سِيذِي، أَربِّي ن أَرُّوحْ ن إِنَابِييّنْ إِقدّْسنْ،
أَقَا إِسّكّْ لْمَالَاكْ نّسْ،
حِيمَا أَذْ إِسّْشنْ إِ إِمْسخَّارنْ نّسْ
مِينْ إِ غَا يِيڒِينْ ذغْيَا.“
٧ ”خْزَارْ نشّْ أَذْ د-أَسغْ ذغْيَا!
سّعْذْ ن ونِّي إِتّطّْفنْ
ذڭْ وَاوَاڒنْ ن نُّوبُووَاثْ
ن وذْلِيسْ-أَ إِتّْوَانْضنْ.“
٨ نشّْ، يُوحَانَّا، أَقَا ژْرِيغْ ؤُ سْڒِيغْ ثِيمسْڒَايِينْ-أَ. ؤُشَا ڒَْامِي ثنْثْ ژْرِيغْ ؤُ سْڒِيغْ، وْضِيغْ غَارْ إِضَارنْ ن لْمَالَاكْ ونِّي ذ أَيِي إِسّشْننْ ثِيمسْڒَايِينْ-أَ، حِيمَا أَذْ أَسْعبْذغْ.
٩ مَاشَا نتَّا إِنَّا أَيِي:
”حْضَا، لَّا، وَارْ تّڭّْ مَانْ أَيَا،
مَاغَارْ نشّْ ذ أَمْسخَّارْ أَمْعَاشَارْ نّشْ،
ؤُ ن أَيْثْمَاشْ، إِنَابِييّنْ، ؤُڒَا ن يِينِّي إِتّطّْفنْ
ذڭْ وَاوَاڒنْ ن وذْلِيسْ-أَ إِتّْوَانْضنْ.
عبْذثْ أَربِّي!“
١٠ خَاسْ ؤُشَا إِنَّا أَيِي:
”وَارْ تّڭّْ أَشمِّيعْ خْ وَاوَاڒنْ إِ إِتّْوَانَابّن
ذڭْ وذْلِيسْ-أَ إِتّْوَانْضنْ،
مِينْزِي ڒْْوقْثْ أَقَا ثِيوضْ-د.“
١١ ”ونِّي إِتّڭّنْ مِينْ وَارْ إِسڭّْذنْ،
أَذْ إِڭّْ مِينْ وَارْ إِسڭّْذنْ كْثَارْ،
أَمنْڭُوسْ أَذْ إِذْوڒْ ذ أَمنْڭُوسْ كْثَارْ،
أَمْسڭَّاذْ أَذْ إِڭّْ ثَاسڭْذَا كْثَارْ
ؤُشَا أَمْقدَّاسْ أَذْ إِذْوڒْ ذ أَمْقدَّاسْ كْثَارْ.“
١٢ ”خْزَارْ، نشّْ أَذْ د-أَسغْ ذغْيَا
ؤُشَا ڒْْمُونثْ إِنُو أَقَا-ت أَكِيذِي،
حِيمَا أَذْ خدْجْصغْ كُوڒْ إِجّنْ
أَنشْثْ ن ڒْْخذْمثْ نّسْ.
١٣ نشّْ ذ أَلِيفْ ؤُ نشّْ ذ ثَاوْ،
ذ أَمزْوَارُو ذ أَنڭَّارُو،
ذ بدُّو ذ أَكمّڒْ.“
١٤ ”سّعْذْ نْسنْ إِ يِينِّي إِتّڭّنْ ثِيوصَّا نّسْ.
أَذْ غَارْسنْ ثِيڒِي صُّولْطَا خْ ثْشجَّارْثْ ن ثُوذَارْثْ
ؤُشَا أَذْ د-أَذْفنْ غَارْ ثنْذِينْثْ
زِي ثوُّورَا نّسْ.
١٥ بَارَّا إِدْجَانْ إِنِّي إِتّڭّنْ فَارْقْ-شّْغڒْ
ذ يِينِّي إِنقّنْ
ذ يِينِّي إِعبّْذنْ لْ-أَصْنَامْ
ذ يِينِّي ذَايْسنْ ڒخْمجْ
ذ يِينِّي إِتّْسحَّارنْ ذ مَارَّا إِمْوَاڒَاونْ
ذ إِنِّي إِتّڭّنْ مِينْ إِ د-إِتّفّْغنْ
زڭْ ؤُخَارِّيقْ.“
١٦ ”نشّْ، يَاسُوع، أَقَا سّكّغْ لْمَالَاكْ إِنُو
مَاحنْذْ أَذْ خَاومْ إِشْهذْ مَانْ أَيَا
زَّاثْ إِ ثْمسْمُونِينْ.
أَقَا ذ نشّْ، ذ أَژْوَارْ ذ زَّارِيعثْ ن ذَاوُوذْ،
ذ ونِّي أَكِيذسْ،
ذ إِثْرِي ن ڒفْجَارْ يَارقّنْ.“
١٧ أَرُّوحْ ذ ثسْڒِيثْ قَّارنْ:
”أَسْ-د!“
ؤُشَا أجّْ ونِّي ث إِسْڒِينْ، أَذْ يِينِي:
”أَسْ-د!“
”ذ ونِّي إِفُوذنْ، أجّْ إِ-ث أَذْ د-يَاسْ،
أَذْ إِسُو أَمَانْ إِدَّارنْ بَاطڒْ.“
١٨ ”نشّْ شهّْذغْ إِ مَارَّا إِنِّي إِتّسْڒَانْ
إِ وَاوَاڒنْ ن نُّوبُووَا ن وذْلِيسْ-أَ إِتّْوَانْضنْ:
مَاڒَا ذِينْ حذْ ونِّي خَاسنْ إِ غَا يَارْنِينْ،
أَربِّي أَذْ خَاسْ يَارْنِي جّْرَايحْ،
ثِينِّي إِتّْوَازمّمنْ ذڭْ وذْلِيسْ-أَ.
١٩ مَاڒَا شَا ن إِجّنْ إِكّسْ زڭْ وَاوَاڒنْ
ن وذْلِيسْ إِتّْوَانْضنْ ن نُّوبُووَا-يَا،
أَذْ أَسْ إِكّسْ أَربِّي ثَاسْغَارْثْ نّسْ
زِي ثْشجَّارْثْ ن ثُوذَارْثْ ؤُ زِي ثنْذِينْثْ إِقدّْسنْ.“
٢٠ خْمِي نتَّا إِشْهذْ خْ مَانْ أَيَا، إِنَّا:
”وَاهْ، نشّْ أَذْ د-أَسغْ ذغْيَا!“
”أَسْ-د، أَ سِيذِي يَاسُوع!“
٢١ أَرْضَا ن سِيذِيثْنغْ يَاسُوع لْمَاسِيحْ أَقَا-ث أَكْ-ذ مَارَّا إِمْقدَّاسنْ نّسْ. ”أَمِينْ!“
أَنڭَّارْ ن ڒْْعَاهْذْ ن جْذِيذْ.
أَعُودْجِي إِ يِيسمْ ن أَربِّي،
بَابَاثْنغْ ذ سِيذِيثْنغْ يَاسُوع لْمَاسِيحْ
ذ أَرُّوحْ إِقدّْسنْ.