١٩
إِژْڒِي خْ ؤُوطُّو ن بَابِيلْ
١ أَوَارْنِي أَسْ سْڒِيغْ إِجّْ ن ڒْْحسّْ أَمقّْرَانْ ن وَاطَّاسْ ن ڒْْغَاشِي ذڭْ ؤُجنَّا، نَّانْ:
”هَالِّيلُو-يَاهْ!
أَسنْجمْ ذ ؤُعُودْجِي ذ جّهْذْ
أَقَا أَثنْ غَارْ أَربِّي نّغْ،
٢ مِينْزِي ڒحْكَامَاثْ نّسْ مْغِيرْ ذ ثِيذتّْ ذ ڒْْحقّْ،
ؤُمِي إِحَاسبْ خْ ثمْغَارْثْ ن فَارْقْ-شّْغڒْ،
ثنِّي يَاردّْدْجنْ دُّونشْثْ س فَارْقْ-شّْغڒْ نّسْ،
ؤُشَا نتَّا يُوغَا ثَاسْغَارْثْ
خْ إِذَامّنْ ن إِمْسخَّارنْ نّسْ
إِ يُومْسنْ غَارْ إِفَاسّنْ نّسْ.“
٣ نَّانْ إِ ؤُمُورْ وِيسّْ ثْنَاينْ:
”هَالِّيلُو-يَاهْ!“
ؤُشَا أَذْ يَاڒِي دّخَّانْ نّسْ غَارْ ؤُجنَّا إِ ڒبْذَا قَاعْ.
٤ ؤُشَا أَربْعَا ؤُ-عِيشْرِينْ ن إِمْغَارنْ ذ أَربْعَا ن إِمُودَّارنْ وْضَانْ غَارْ ثمُّورْثْ، سجْذنْ إِ أَربِّي نّغْ ونِّي إِقِّيمنْ خْ ڒْْعَارْشْ، نَّانْ:
”أَمِينْ، هَالِّيلُو-يَاهْ!“
٥ ؤُشَا ثُوسَا-د إِشْثْ ن ثْمِيجَّا زِي ڒْْعَارْشْ، ثنَّا:
”سمْغَارمْ أَربِّي نّغْ، أَ كنِّيوْ مَارَّا إِمْسخَّارنْ نّسْ،
ؤُ مَارَّا إِنِّي إِتّڭّْوذنْ إِسمْ نّسْ،
أَمْ ؤُمژْيَانْ أَمْ ؤُمقّْرَانْ!“
ڒمْڒَاشْ ن يزْمَارْ
٦ ؤُشَا سْڒِيغْ أَقَا نَّانْ أَمْ س ثْمِيجَّا ن ؤُبَارُّو ن ڒْْغَاشِي، أَمْ س ڒْْحسّْ ن وَاطَّاسْ ن وَامَانْ، أَمْ س زّْهِيرْ ن وَاجَّاجنْ إِمقّْرَاننْ:
”هَالِّيلُو-يَاهْ، مِينْزِي سِيذِي أَربِّي،
أَمْزمَّارْ خْ كُوڒْشِي، أَقَا إِحكّمْ.
٧ أجّْ أَذْ نْفَارْحْ، أَذْ نسْڒِيوْڒِيوْ،
أَذْ أَسْ نڭّْ أَعُودْجِي،
مَاغَارْ ؤُرَارْ ن يزْمَارْ يِيوضْ-د،
ؤُشَا ثَامْغَارْثْ نّسْ أَقَا ثْحزّمْ،
٨ ؤُشَا ثمّوْشْ أَسْ أَذْ ثْيَارْضْ أَرُّوضْ
زِي ڒْْقطَّانْ إِفْسُوسنْ إِزْذِيڭنْ إِتِّيسِّيقنْ،
مِينْزِي ڒْْقطَّانْ نِّي
ذ ڒخْذَايمْ إِسڭّْذنْ ن إِمْقدَّاسنْ.“
٩ نِيثْنِي نَّانْ أَيِي:
”أَرِي: سّعْذْ ن يِينِّي إِتّْوَاعَارْضنْ
غَارْ ؤُمنْسِي ن وُورَارْ ن إِزْمَارْ.‘
خَاسْ ؤُشَا إِنَّا أَيِي شَا ن يِيجّنْ:
”إِنَا ذ أَوَاڒنْ ن ثِيذتّْ ن أَربِّي.“
١٠ ؤُشَا وْضِيغْ أَسْ غَارْ إِضَارنْ نّسْ حِيمَا أَذْ ثعبْذغْ، مَاشَا نتَّا إِنَّا أَيِي:
”لَّ، وَارْ تّڭّْ شَا مَانْ أَيَا! أَقَا نشّْ ذ أَمْسخَّارْ أَمْعَاشَارْ أَمْ شكْ ذ أَيْثْمَاشْ إِنِّي غَارْ ثدْجَا شّْهَاذثْ ن يَاسُوع.عبْذثْ أَربِّي، مِينْزِي شّْهَاذثْ ن يَاسُوع نتَّاثْ ذ أَرُّوحْ ن مِينْ إِتّْوَانَابّنْ.“
أَمْنَايْ س ؤُيِيسْ ذ أَشمْڒَاڒْ
١١ أَوَارْنِي أَيَا ژْرِيغْ أَجنَّا إِنُّورْزمْ، ؤُ خْزَارْ، أَقَا ذِينْ إِجّْ ن ؤُيِيسْ ذ أَشمْڒَاڒْ ذ ونِّي خَاسْ إِنْيِينْ، قَّارنْ أَسْ ’ذَايسْ ڒَْامَانْ!‘، ’ذَايسْ ثِيذتّْ!‘، ؤُشَا نتَّا أَذْ إِحَاسبْ ؤُ أَذْ إِمّْنغْ س ثْسڭْذَا.
١٢ ثُوغَا ثِيطَّاوِينْ نّسْ أَمشْنَاوْ إِحُوذَاقْ ن ثْمسِّي، ؤُشَا غَارسْ خْ ؤُزدْجِيفْ نّسْ أَطَّاسْ ن تِّيجَانْ، ؤُشَا يُورَا خَاسْ إِسمْ إِ وَارْ ث إِسِّينْ حذْ مْغِيرْ نتَّا وَاهَا.
١٣ ثُوغَا يَارْضْ إِجّْ ن ؤُسڒْهَامْ إِتّْوَارُوشّنْ س إِذَامّنْ، ؤُشَا وَا ذ إِسمْ نّسْ: ’أَوَاڒْ ن أَربِّي‘.
١٤ ڒْْعسْكَارَاثْ ن ؤُجنَّا ضْفَارنْ ث-إِ-د خْ ييْسَانْ إِشمْڒَاڒنْ، أَرْضنْ ڒْْقطَّانْ ذ أَشمْڒَاڒْ إِزْذِيڭْ.
١٥ فّْغنْ-د ڒسْيُوفْ إِقضْعنْ زڭْ إِقمُّومنْ نْسنْ مَاحنْذْ أَذْ زَّايْسنْ نْغنْ ڒڭْنُوسْ، ؤُ نتَّا أَذْ ثنْ إِحْضَا س ؤُزدْجَاضْ ن وُوزَّاڒْ، ؤُ نتَّا سِيمَانْثْ نّسْ أَذْ إِعْفسْ ذِي ثْسِيرْثْ ن وغْضَابْ ن أَربِّي، أَمْزمَّارْ خْ كُوڒْشِي.
١٦ خْ وَارُّوضْ نّسْ ؤُ خْ ثْمصَّاضِينْ نّسْ يُورَا خَاسنْ إِسمْ-أَ: ’أَجدْجِيذْ خْ مَارَّا إِجدْجِيذنْ‘، ’سِيذِي خْ مَارَّا ڒْْحُوكَّامْ‘.
١٧ ؤُشَا ژْرِيغْ إِجّْ ن لْمَالَاكْ نّغْنِي إِبدّْ ذِي ثْفُوشْثْ. نتَّا إِڒَاغَا س جّهْذْ، إِنَّا إِ مَارَّا إِجْضَاضْ إِطَّاونْ ذِي ڒْْوسْطْ ن ؤُجنَّا:
”أَستِّيوْ-ذ، مُونتِّيوْ-د
غَارْ ؤُمنْسِي أَمقّْرَانْ ن أَربِّي،
١٨ حِيمَا أَذْ ثشّمْ أَيْسُومْ ن إِجدْجِيذنْ
ذ ويْسُومْ ن إِمقّْرَاننْ خْ وَاڒفْ
ذ ويْسُومْ ن يِينِّي إِجهْذنْ
ذ ويْسُومْ ن إِيْسَانْ ذ يِينِّي خَاسنْ إِنْيِينْ،
ذ ويْسُومْ ن إِحُورِّييّنْ ذ إِسمْغَانْ،
أَمْ ن إِمژْيَاننْ أَمْ ن إِمقّْرَاننْ.“
١٩ ؤُشَا ژْرِيغْ ڒْْوحْشْ أَكْ-ذ ڒْْعسْكَارَاثْ نّسْ ذ إِجدْجِيذنْ ن ثمُّورْثْ ذ إِعسْكَارِّييّنْ نْسنْ، إِنِّي إِمُوننْ حِيمَا أَذْ مّنْغنْ أَكْ-ذ ونِّي إِنْيِينْ خْ ؤُيِيسْ، ؤُ أَكْ-ذ إِعسْكَارِييّنْ نّسْ.
٢٠ أَقَا إِتّْوَاطّفْ ڒْْوحْشْ أَكْ-ذ ؤُنَابِي إِسّْخَارِّيقنْ، ونِّي إِڭِّينْ زَّاثسْ ڒعْڒَامَاثْ نِّي زِي ثُوغَا إِغشّْ إِنِّي إِكْسِينْ ڒْْمَارْكَا ن ڒْْوحْشْ ؤُشَا سجْذنْ إِ ڒخْيَاڒْ نّسْ. نِيثْنِي س ثْنَاينْ إِذْسنْ تّْوَامّنْضَارنْ ذِي ڒبْحَارْ ن ثْمسِّي إِتّْشفْشُوفنْ عَاوذْ س ڒشْبَاريّثْ.
٢١ مَاشَا وِي إِقِّيمنْ تّْوَانْغنْ س وُوزَّاڒْ إِ د-إِكِّينْ زڭْ ؤُقمُّومْ ن ونِّي إِنْيِينْ خْ ؤُيِيسْ. ؤُشَا مَارَّا إِجْضَاضْ إِتّْكشَّاضنْ جِّيوْننْ س ويْسُومْ نْسنْ.