٣١
أَعْذَاڒْ ن ڒْْخذْمثْ ذِي زَّاوشْثْ ثَامقّْرَانْثْ
١ أَوَارْنِي ڒَْامِي كمّْڒنْ س مَانْ أَيَا مَارَّا، فّْغنْ-د مَارَّا أَيْثْ ن إِسْرَائِيل نِّي ثُوغَا ذِينْ إِدْجَانْ غَارْ ثْندَّامْ ن يَاهُوذَا ؤُ أَرْژِينْ إِمَايْضُوثنْ إِقدّْسنْ، هذْمنْ ثِيربِّينْ ن شْوَارْثِي ؤُشَا كّْسنْ ڒڭْعُوذِي ذ إِعَالْطَارنْ زِي مَارَّا يَاهُوذَا ذ بِينْيَامِينْ. أَمُّو إِ ڭِّينْ ؤُڒَا ذِي إِفْرَايِيمْ ذ مَانَاسَّا أَڒَامِي ت كمّْڒنْ. أَوَارْنِي ؤُيَاعقْبنْ مَارَّا أَيْثْ ن إِسْرَائِيل، كُوڒْ إِجّْ غَارْ وَاڭْڒَا نّسْ، مَارَّا نِيثْنِي غَارْ ثْندَّامْ نْسنْ.
٢ حِيزْقِييَا إِسّْبدّْ ثِيرْبِيعِينْ ن إِكهَّاننْ ذ إِلَاوِييّنْ عْلَاحْصَابْ ثِيرْبِيعِينْ نْسنْ، كُوڒْ إِجّْ عْلَاحْسَابْ ثَاسخَّارْثْ نّسْ: إِكهَّاننْ ذ إِلَاوِييّنْ إِ ثْغَارْصْثْ ن وشْمَاضْ ؤُ إِ ثوْهِيبِينْ ن ڒهْنَا، حِيمَا أَذْ سخَّارنْ، أَذْ قَاذَانْ ؤُ أَذْ سّْعُودْجَانْ ذِي ثوُّورَا ن ڒمْرَاڭحْ ن ڒْْعسْكَارْ ن سِيذِي.
٣ نتَّا إِوْشَا ؤُڒَا ذ ثَاوْهِيبْثْ ن ؤُجدْجِيذْ زڭْ وَاڭْڒَا نّسْ إِ ثْغَارْصَا ن وشْمَاضْ، إِ ثْغَارْصَا ن وشْمَاضْ غَارْ ثُوفُّوثْ ؤُ غَارْ ثْمذِّيثْ، ؤُڒَا ذ ثِيغَارْصَا ن وشْمَاضْ إِ وُوسَّانْ ن سّبْثْ، إِ ؤُيُورنْ إِمَايْنُوثنْ ؤُ إِ ڒعْيُوذَاثْ إِتّْوَاڭّنْ، أَمْ مَامّشْ ثُورَا ذِي شَّارِيعَا ن سِيذِي.
٤ نتَّا إِنَّا إِ ڒْڭنْسْ، إِ إِمزْذَاغْ ن ؤُرْشَالِيمْ، أَذْ وهّْبنْ ثَاسْغَارْثْ ن إِكهَّاننْ ذ إِلَاوِييّنْ، حِيمَا إِنَا زمَّارنْ أَذْ إِڒِينْ جهْذنْ ذِي ثْغُورِي ن شَّارِيعَا ن سِيذِي.
٥ ؤُمِي د-إِفّغْ وَاوَاڒْ نِّي، إِوْينْ-د أَيْثْ ن إِسْرَائِيل س ؤُفيّضْ زڭْ ؤُسُوفّغْ أَمزْوَارُو ن إِمنْذِي، ن بِينُو ن جْذِيذْ ذ زّشْثْ ذ ثَامّنْثْ ؤُ زِي مَارَّا ڒْْغِيدْجثْ ن ييَّارْ. إِوْينْ ؤُڒَا ذ ڒعْشُورْ زِي مَارَّا س ؤُفيّضْ.
٦ ثَارْوَا ن إِسْرَائِيل ذ يَاهُوذَا، إِنِّي إِزذْغنْ ذِي ثْندَّامْ ن يَاهُوذَا، إِوْينْ ؤُڒَا ذ ڒعْشُورْ زڭْ إِفُونَاسنْ ؤُ زڭْ وُودْجِي ؤُڒَا ذ ڒعْشُورْ ن ثوْهِيبِينْ إِقدّْسنْ نِّي ثُوغَا سّْقدّْسنْ إِ سِيذِي، أَربِّي نْسنْ، ؤُشَا وْشِينْ ثنْ، ڭِّينْ زَّايْسنْ إِعُورَّاشْ.
٧ ذڭْ ؤُيُورْ وِيسّْ ثْڒَاثَا بْذَانْ نِيثْنِي أَذْ زَّايْسنْ ڭّنْ إِعُورَّاشْ زِي ثِيسِي ؤُ ذڭْ ؤُيُورْ وِيسّْ سبْعَا كمّْڒنْ ت.
٨ ؤُمِي حِيزْقِييَا ذ ڒْْحُوكَّامْ ؤُسِينْ-د ؤُ ژْرِينْ إِعُورَّاشْ نِّي، بَارْكنْ سِيذِي ذ ڒْْڭنْسْ نّسْ إِسْرَائِيل.
٩ إِسّقْسَا حِيزْقِييَا إِكهَّاننْ ذ إِلَاوِييّنْ خْ إِعُورَّاشْ نِّي.
١٠ عَازَارْيَا، أَكهَّانْ أَمقّْرَانْ زِي ثَادَّارْثْ ن صَاذُوقْ يَارَّا-د خَاسْ، إِنَّا: ”زڭْ وَامِي د-نكَّارْ أَذْ نَاوِي ثَاوْهِيبْثْ ن ؤُسْڭعّذْ غَارْ ثَادَّارْثْ ن سِيذِي، أَقَا غَارْنغْ مِينْ غَا نشّْ أَڒْ ثْيَاوَانْثْ ؤُشَا عَاذْ إِقِّيمْ أَطَّاسْ إِشطّْ، مَاغَارْ سِيذِي إِبَاركْ ڒْْڭنْسْ نّسْ، أَڒَامِي إِقِّيمْ ڒْْقدّْ-أَ ن وَاطَّاسْ إِشطّْ.“
١١ خنِّي إِنَّا حِيزْقِييَا، أَذْ سّْوجْذنْ إِخَّامنْ ن ثَادَّارْثْ ن سِيذِي، ؤُ نِيثْنِي سّْوجْذنْ ثنْ.
١٢ نِيثْنِي سِّيذْفنْ ثَاوْهِيبْثْ ن ؤُسْڭعّذْ ذ ڒعْشُورْ ذ ثوْهِيبِينْ إِقدّْسنْ ذِينْ س ڒَْامَانْ. كُونَانْيَا، أَلَاوِي، أَمحْضَايْ، ذ ؤُمَاسْ شِيمْعِي، ونِّي ذ وِيسّْ ثْنَاينْ، ثُوغَا أَثنْ خْ مَانْ أَيَا مَارَّا.
١٣ يَاحِييِيلْ، عَازَازْيَا، نَاحَاثْ، عَسَائِيلْ، يَارِيمُوثْ، يُوزَابَاذْ، إِلِييِيلْ، يِيسْمَاخْيَا، مَاحَاثْ، بَانَايَا ثُوغَا أَثنْ ذ إِوقَّافنْ سَاذُو ؤُفُوسْ ن كُونَانْيَا ذ شِيمْعِي، ؤُمَاسْ، خْ ڒُْومُورْ ن ؤُجدْجِيذْ حِيزْقِييَا ؤُ ن عَازَارْيَا، أَمحْضَايْ ن ثَادَّارْثْ ن أَربِّي.
١٤ قُورِي، مِّيسْ ن يِيمْنَا، أَلَاوِي، أَعسَّاسْ ن ثوَّارْثْ غَارْ ؤُغزْذِيسْ ن شَّارْقْ، إِتّْوَاڭّْ خْ ثوْهِيبِينْ ن ڒْْخَاضَارْ ن أَربِّي، حِيمَا أَذْ إِبْضَا ثَاوْهِيبْثْ ن ؤُسْڭعّذْ ن سِيذِي ذ ثوْهِيبِينْ إِقدّْسنْ قَاعْ.
١٥ عَاذَانْ، مِينْيَامِينْ، يشُوعَا، شَامْعِييَا، أَمَارْيَا ذ شَاكُونْيَا بدّنْ س ڒْْمَانثْ غَارْ ؤُغزْذِيسْ نّسْ عْلَاحْصَابْ ثِيرْبِيعِينْ نْسنْ، حِيمَا أَذْ وزّْعنْ ذِي ثْندَّامْ ن إِكهَّاننْ إِ أَيْثْمَاثْسنْ، أَمْ إِ إِمقّْرَاننْ، أَمْ إِ إِمژْيَاننْ،
١٦ مَاشَا وَارْ إِدْجِي إِ يِينِّي إِتّْوَازمّمنْ ذِي لِيسْثَا ن جَّاذِيرَا ن يرْيَازنْ إِ غَارْ إِدْجَا ثْڒَاثَا ن إِسڭّْوُوسَا سنّجْ، أَقَا مَارَّا إِنِّي د-يُوسِينْ غَارْ ثَادَّارْثْ ن سِيذِي إِ ڒْْخذْمثْ ن كُوڒْ أَسّْ إِ وَاسّْ نِّي، إِ ڒْْخذْمثْ نْسنْ ذِي ثْسخَّارْثْ نْسنْ، عْلَاحْسَابْ ثِيرْبِيعِينْ نْسنْ.
١٧ أَزمّنْ ذِي لِيسْثَا ن جَّاذِيرَا ن إِكهَّاننْ ثُوغَا-ث عْلَاحْصَابْ ثُوذْرِينْ ن إِبَابَاثنْ نْسنْ، مَاشَا أَزمّمْ ن إِلَاوِييّنْ زِي عِيشْرِينْ ن إِسڭّْوُوسَا سنّجْ، ثُوغَا-ث عْلَاحْسَابْ ثَاسخَّارْثْ نْسنْ، عْلَاحْسَابْ ثِيرْبِيعِينْ نْسنْ.
١٨ نِيثْنِي وزّْعنْ إِ يِينِّي إِتّْوَازمّمنْ ذِي لِيسْثَا ن جَّاذِيرَا أَكْ-ذ مَارَّا ثَارْوَا نْسنْ ذ ثمْغَارِينْ نْسنْ ذ إِحنْجِيرنْ نْسنْ ذ ثْحنْجِيرِينْ نْسنْ زِي مَارَّا أَڭْرَاوْ ن ڒْْڭنْسْ، مَاغَارْ نِيثْنِي ڭِّينْ س ڒَْامَانْ ؤُمِي سّْقدّْسنْ إِخفْ نْسنْ س ثِيذتّْ.
١٩ جَارْ وَارَّاونْ ن هَارُونْ، إِكهَّاننْ، ذڭْ إِيَّارنْ ن دّْمَانِي ن ثْندَّامْ نْسنْ، ذِي كُوڒْ ثَانْذِينْثْ، ثُوغَا ذِينْ إِرْيَازنْ نِّي إِتّْوَازمّمنْ س إِسْمَاونْ نْسنْ حِيمَا أَذْ وْشنْ ثَاسْغَارْثْ إِ مَارَّا أَوْثمْ جَارْ إِكهَّاننْ ؤُ إِ مَارَّا إِنِّي إِتّْوَازمّمنْ ذِي لِيسْثَا ن جَّاذِيرَا جَارْ إِلَاوِييّنْ.
٢٠ أَمُّو إِ إِڭَّا حِيزْقِييَا ذِي مَارَّا يَاهُوذَا. نتَّا إِڭَّا مِينْ إِدْجَانْ إِشْنَانْ ذ إِسڭّْذنْ ذ نِيشَانْ زَّاثْ إِ وُوذمْ ن سِيذِي، أَربِّي نّسْ.
٢١ مَارَّا ڒْْخذْمثْ إِ إِبْذَا ذِي طّْوعْ ن ثْسخَّارْثْ ن ثَادَّارْثْ ن أَربِّي ؤُ ذِي طّْوعْ ن شَّارِيعَا ذ ثوْصيّثْ حِيمَا أَذْ يَارْزُو أَمُّو أَربِّي، إِڭَّا إِ-ت س مَارَّا ؤُڒْ نّسْ ؤُشَا إِفْڒحْ.