٢٧
يُوثَامْ إِذْوڒْ ذ أَجدْجِيذْ ن يَاهُوذَا
١ يُوثَامْ ثُوغَا غَارسْ خمْسَا ؤُ-عِيشْرِينْ ن إِسڭّْوُوسَا ؤُمِي إِذْوڒْ ذ أَجدْجِيذْ. نتَّا إِحْكمْ سطَّاشْ ن إِسڭّْوُوسَا ذِي ؤُرْشَالِيمْ. يمَّاسْ قَّارنْ أَسْ يَارُوشَا، يدْجِيسْ ن صَاذُوقْ.
٢ نتَّا إِڭَّا مِينْ إِدْجَانْ نِيشَانْ ذِي ثِيطَّاوِينْ ن سِيذِي، نِيشَانْ أَمْ مَامّشْ ث إِڭَّا بَابَاسْ عُوزِّييَا، مَاشَا نتَّا وَارْ يُوذِيفْ شَا غَارْ زَّاوشْثْ ثَامقّْرَانْثْ ن سِيذِي. ڒْْڭنْسْ مَاشَا ثُوغَا عَاذْ إِفْسذْ إِخفْ نّسْ أَطَّاسْ.
٣ نتَّا إِبْنَا ثَاوَّارْثْ يُوعْڒَانْ ن ثَادَّارْثْ ن سِيذِي. ؤُڒَا غَارْ ڒْْحِيضْ ن عُوفِيلْ إِبْنَا أَطَّاسْ.
٤ إِبْنَا ثِيندَّامْ ذِي ثمُّورْثْ ن إِذُورَارْ ن يَاهُوذَا ؤُ ذڭْ إِزغْرَانْ إِبْنَا لْقلْعَاثْ ذ صُّومْعَاثْ.
٥ نتَّا إِمّْنغْ أَكْ-ذ أَيْثْ ن عَامُّونْ ؤُ إِغْڒبْ خَاسنْ، أَڒَامِي أَيْثْ ن عَامُّونْ سِّيوْضنْ غَارسْ ذڭْ ؤُسڭّْوَاسْ نِّي عَاذْ مْيَا ثَالِينْثْ ن نُّوقَارْثْ ذعشْرَا-أَڒَافْ ن إِكُورُوثنْ ن إِرْذنْ ذعشْرَا-أَڒَافْ إِكُورُوثنْ ن إِمنْذِي. ؤُڒَا ذڭْ ؤُسڭّْوَاسْ وِيسّْ ثْنَاينْ ذ وِيسّْ ثْڒَاثَا سِّيوْضنْ أَيْثْ ن عَامُّونْ غَارسْ مَانْ أَيَا عَاوذْ.
٦ أَمُّو إِ إِذْوڒْ يُوثَامْ إِجْهذْ، مَاغَارْ إِسّوْجذْ إِبْرِيذنْ نّسْ زَّاثْ إِ وُوذمْ ن سِيذِي، أَربِّي نّسْ.
٧ إِمزْرُوينْ إِقِّيمنْ ن يُوثَامْ، ذ مَارَّا إِمنْغَانْ إِ إِمّْنغْ ذ مَارَّا إِبْرِيذنْ نّسْ، أَقَا تّْوَازمّمنْ ذڭْ وذْلِيسْ ن إِمزْرُوينْ ن إِجدْجِيذنْ ن يَاهُوذَا.
٨ ثُوغَا غَارسْ خمْسَا ؤُ-عِيشْرِينْ ن إِسڭّْوُوسَا ؤُمِي إِذْوڒْ ذ أَجدْجِيذْ. نتَّا إِحْكمْ سطَّاشْ ن إِسڭّْوُوسَا ذِي ؤُرْشَالِيمْ.
٩ يُوثَامْ إِڭَّا أَذْ يَاريّحْ جَارْ ڒجْذُوذْ نّسْ. نتَّا إِتّْوَانْضڒْ ذِي ثنْذِينْثْ ن ذَاوُوذْ. مِّيسْ أَحَازْ إِذْوڒْ ذ أَجدْجِيذْ ذڭْ ومْشَانْ نّسْ.