٩٧
١ سِيذِي إِحكّمْ،
أجّْ ثَامُّورْثْ أَذْ ثْفَارْحْ،
أَذْ أَرشْقنْثْ مَارَّا ثڭْزِيرِينْ.
٢ قُووَّارنْ أَسْ إِسيْنُوثنْ
ذ يِيجّْ ن ؤُسيْنُو إِبُّومْبسْ،
ثَاسڭْذَا ذ ڒْْحقّْ
أَقَا أَثنْ ذ ذْسَاسْ ن ڒْْعَارْشْ نّسْ.
٣ ثِيمسِّي ثڭُّورْ أَسْ
زَّاثْ ن وُوذمْ نّسْ،
ثْقدّْ إِغْرِيمنْ نّسْ
إِ ذ أَسْ د-إِتّنّْضنْ.
٤ أَسَّامنْ نّسْ سّْڒَاقَّانْ دُّونشْثْ،
ثَامُّورْثْ ثْژَارّْ إِ-ت، ثنْهزَّا.
٥ إِذُورَارْ فسّْينْ أَمْ شّْمعْ
زَّاثْ إِ وُوذمْ ن سِيذِي،
زَّاثْ إِ وُوذمْ ن سِيذِي ن مَارَّا ثَامُّورْثْ.
٦ إِجنْوَانْ تّْبَارّْحنْ ثَاسڭْذَا نّسْ،
مَارَّا ڒڭْنُوسْ تّْوَاڒَانْ أَعُودْجِي نّسْ.
٧ أجّْ أَذْ سضْحَانْ مَارَّا إِنِّيعبّْذنْ
إِ ڒخْيَاڒَاثْ إِنقْشنْ ن ؤُكشُّوضْ،
مَارَّا إِنِّي إِتّْشنّْعنْ ذِي لْ-أَصْنَامْ.
بنْذْقمْ زَّاثسْ، كنِّيوْ،
مَارَّا إِربِّيثنْ!
٨ صِيهْيُونْ إِسْڒَا، إِفَارْحْ،
يسِّيسْ ن يَاهُوذَا أَرشْقنْثْ،
زِي سِّيبّثْ ن ڒحْكَامَاثْ نّشْ، أَ سِيذِي.
٩ مَاغَارْ شكْ، أَ سِيذِي،
ذ أَمْعُودْجِي خْ مَارَّا ثَامُّورْثْ،
شكْ ذ ونِّي يُوعْڒَانْ قَاعْ
خْ مَارَّا إِربِّيثنْ.
١٠ كنِّيوْ إِ إِتّخْسنْ سِيذِي، شَارْهمْ ڒْْغَارْ.
نتَّا إِحطَّا خْ ڒعْمُورْ ن إِمْثِيقَّانْ نّسْ،
نتَّا إِتّْفكَّا إِ-ثنْ زڭْ ؤُفُوسْ ن إِعفَّاننْ.
١١ ثَافَاوْثْ ثتّْوَازَارْعْ إِ ؤُمْسڭّذْ،
ڒفْرَاحثْ إِ يِينِّي غَارْ إِدْجَا ؤُڒْ إِسڭّْمنْ.
١٢ كنِّيوْ إِمْسڭَّاذنْ، فَارْحمْ زِي سِيذِي،
قَاذَامْ خْمِي ثتِّيذَارمْ ثَاقدَّاسْثْ نّسْ.