٩٥
١ أَسمْ-د، أجّْ أَنغْ أَذْ نسْڒِيوْڒوْ زَّاثْ إِ سِيذِي،
أجّْ أَنغْ أَذْ نْذُوقّزْ س ؤُسْڒِيوْڒوْ
إِ ثصْضَارْثْ ن ؤُسنْجمْ نّغْ.
٢ أجّْ أَنغْ أَذْ نَاذسْ
غَارْ وُوذمْ نّسْ س ؤُقَاذِي،
أجّْ أَنغْ أَذْ أَسْ نسْڒِيوْڒوْ س إِزهِّيذنْ.
٣ مَاغَارْ سِيذِي ذ إِجّْ أَربِّي ذ أَمقّْرَانْ،
إِجّْ ن ؤُجدْجِيذْ ذ أَمقّْرَانْ
سنّجْ إِ مَارَّا إِربِّيثنْ.
٤ ذڭْ ؤُفُوسْ نّسْ دْجَانْ
إِمُوشَانْ يُودْجْغنْ قَاعْ ن ثمُّورْثْ،
ؤُڒَا ذ ثِيقِيشَّاثِينْ ن إِذُورَارْ
أَقَا أَثنْثْ نّسْ.
٥ نّسْ ڒبْحَارْ، مَاغَارْ إِخْڒقْ إِ-ث-إِ-د،
ؤُ إِفَاسّنْ نّسْ ڭِّينْ ؤُڒَا ذ ڒْْبَارْ.
٦ أَسمْ-د، أجّْ أَنغْ
أَذْ أَسْ نْبنْذقْ، أَذْ نسْجذْ،
أجّْ أَنغْ أَذْ نسْجذْ خْ إِفَادّنْ زَّاثْ إِ سِيذِي،
ونِّي ذ أَنغْ إِڭِّينْ،
٧ مَاغَارْ نتَّا ذ أَربِّي نّغْ
ؤُ نشِّينْ ذ ڒْْڭنْسْ ن ثَاروْسَا نّسْ،
ؤُڒَا ذ ؤُدْجِي ن ؤُفُوسْ نّسْ.
مَاڒَا أَسّْ-أَ ثْسدْجمْ غَارْ ثْمِيجَّا نّسْ،
٨ وَارْ سّقْسِيحمْ شَا ؤُڒْ نْومْ،
أَمْ ذِي مَارِيبَا،
أَمْ ذڭْ وَاسّْ ن مَاسَّا ذِي ڒخْڒَا،
٩ مَانِي ثُوغَا ذ أَيِي تّْجَارّْبنْ
ڒجْذُوذْ نْومْ،
قدْجْبنْ أَيِي،
وَاخَّا ثُوغَا ژْرِينْ ڒْْخذْمثْ إِنُو.
١٠ أَربْعِينْ ن إِسڭّْوُوسَا
ثُوغَا تّْعِيفّغْ جِّيڒْ-أَ، نِّيغْ:
”أَقَا-ثنْ ذ إِجّْ ن ڒْْڭنْسْ
س وُوڒْ إِودَّارنْ،
وَارْ سِّيننْ إِبْرِيذنْ إِنُو.“
١١ س ؤُينِّي نشّْ جُّودْجغْ
ذڭْ وغْضَابْ إِنُو:
”نِيثْنِي وَارْ د-تِّيذْفنْعمَّارْصْ
ذِي أَرَّاحثْ إِنُو!“