٦
١ إِ ؤُمقّْرَانْ ن إِمغْنَاجنْ. أَكْ-ذ ؤُزنْزُونْ خْ ؤُفِيڒُو وِيسّْ ثْمنْيَا. أَزهّذْ ن ذَاوُوذْ.
٢ أَ سِيذِي، وَارْ ذ أَيِي تّْودَّابْ
ذڭْ وغْضَابْ نّشْ،
وَارْ ذ أَيِي تَّاربِّي شَا ذڭْ وسْعَارْ نّشْ!
٣ حِينّْ خَافِي، أَ سِيذِي،
مَاغَارْ نشّْ أَقَا أَرْخُوغْ.
سْڭنْفَا أَيِي، أَ سِيذِي،
مَاغَارْ إِغْسَانْ إِنُو تَّارْجِيجِينْ!
٤ وَاهْ، ڒعْمَارْ إِنُو يَارْجفْ أَطَّاسْ،
ؤُ شكْ، أَ سِيذِي، أَڒْ مڒْمِي؟
٥ ذْوڒْ-د، أَ سِيذِي، فكّْ ڒعْمَارْ إِنُو،
سنْجمْ أَيِي ذِي طّْوعْ
ن ثْمخْسِيوْثْ نّشْ إِشوَّارنْ.
٦ مِينْزِي ذِي ڒْْموْثْ وَارْ
ذِينِّي بُو ڒِْيذَارثْ نّشْ.
وِي شكْ إِ غَا إِقَاذَانْ ذِي ڒَْاخَارْثْ؟
٧ نشّْ ؤُحْڒغْ س إِنِيخْسِيسنْ إِنُو.
دْجِيڒثْ ثكْمڒْ سُّوفّغْ قَامَا إِنُو،
ؤُڒَا ذ ثَاسُّوثْ إِنُو ثطّبْطبْ قَاعْ س إِمطَّاونْ.
٨ ثِيطّْ إِنُو ثغْڒِي س وشْضَانْ،
جّهْذْ نّسْ إِرُوحْ زِي مَارَّا
إِنِّي ذ أَيِي إِحصَّارنْ.
٩ أَڭّْوجمْ خَافِي،
مَارَّا إِنِّي إِتّڭّنْ ڒْْمُوعْصِييّثْ،
مِينْزِي سِيذِي إِسْڒَا إِ ثْمِيجَّا ن إِمطَّاونْ إِنُو.
١٠ سِيذِي إِسْڒَا إِ ثُوثْرَا إِنُو،
سِيذِي أَذْ إِقْبڒْ ثَاژَادْجِيثْ إِنُو.
١١ مَارَّا ڒْْعذْيَانْ إِنُو أَذْ ثنْ ثڒْقفْ
ڒفْضِيحثْ ذ ؤُنخْڒِيعْ،
أَذْ د-ذوْڒنْ غَارْ ضفَّارْ،
أَكْ-ذ ورْمَاشْ ن وَابْڒِيونْ أَذْ سضْحَانْ.