٥٩
١ إِ ؤُمقّْرَانْ ن إِمغْنَاجنْ. ’وَارْ ث تَّاردّدْجْ!‘ ن ذَاوُوذْ. ثِيرَا إِنقْشنْ. ؤُمِي شَاوُولْ إِجَّا أَذْ حْضَانْ ثَادَّارْثْ ن ذَاوُوذْ حِيمَا أَذْ ث نْغنْ.
٢ فكّْ أَيِي زِي ڒْْعذْيَانْ إِنُو، أَ أَربِّي،
سْڭعّذْ أَيِي سنّجْ غَارْ ؤُحطُّو
زڭْ إِنِّي خَافِي إِتّكَّارنْ.
٣ فكّْ أَيِي زڭْ إِنِّي إِتّڭّنْ ڒْْغشّْ،
سنْجمْ أَيِي زڭْ إِرْيَازنْ ن إِذَامّنْ.
٤ أَقَا، خْزَارْ، نِيثْنِي ڭِّينْ
إِجّْ ن ڒْْفخْ إِ ڒعْمَارْ إِنُو،
أَيْثْ ن بُو-صُّولْطَا مُوننْ خَافِي.
وَارْ ذِينْ أَخطُّو
ؤُڒَا ذ دّنْبْ غَارِي، أَ سِيذِي!
٥ وَاخَّا وَارْ ڭِّيغْ لْجَارِيمَا،
أَقَا نِيثْنِي زعْمَا ؤُسِينْ-د
تَّازّْڒنْ-د غَارِي
ؤُ سّْوجَّاذنْ إِخفْ نْسنْ.
فَاقْ، أَسْ-د غَارْ ؤُمْسَاڭَارْ أَكِيذِي ؤُ خْزَارْ.
٦ شكْ، أَ سِيذِي، أَربِّي ن ڒْْعسْكَارَاثْ،
أَربِّي ن إِسْرَائِيل،
فَاقْ حِيمَا أَذْ ثْڒقْفذْ مَارَّا ڒڭْنُوسْ.
وَارْ تّْحِينِّي خْ ؤُڒَا ذ إِجّْ
زِي مَارَّا إِغدَّارنْ
إِنِّي إِتّڭّنْ ڒْْغشّْ. سِيلَاهْ.
٧ أَقَا تّْعقْبنْ غَارْ ثْمذِّيثْ،
تّْزُونْ أَمْ وقْزِينْ،
تّنّْضنْ إِ ثنْذِينْثْ.
٨ خْزَارْ، س ؤُقمُّومْ نْسنْ سُّوسُوفنْ قَاعْ،
ڒسْيُوفْ نْسنْ أَقَا أَثنْ
خْ إِينْشِيشنْ نْسنْ،
مِينْزِي مَانْ ونْ إِ غَا إِسْڒنْ؟
٩ شكْ مَاشَا، أَ سِيذِي، أَذْ خَاسنْ ثْضحْشذْ،
شكْ أَذْ ثْحشّذْ خْ مَارَّا ڒڭْنُوسْ.
١٠ أَ جّهْذْ نّسْ، نشّْ أَذْ ث رَاجِيغْ،
مَاغَارْ أَربِّي ذ لْبُورْجْ إِنُو يُوعْڒَانْ.
١١ ثَامخْسِيوْثْ إِشوَّارنْ ن أَربِّي إِنُو
أَذْ أَيِي ثِيزْوَارْ،
أَربِّي أَذْ أَيِي يَارّْ
أَذْ ژَترغْ إِنِّي ذ أَيِي إِحصَّارنْ.
١٢ وَارْ ثنْ نقّْ شَا،
مَاحنْذْ ڒْْڭنْسْ إِنُو وَارْ ث إِتّتُّو.
أجّْ إِ-ثنْ أَذْ ودَّارنْ س جّهْذْ نّشْ،
منْضَارْ إِ-ثنْ سْوَادَّايْ،
مَاغَارْ شكْ ذ ثَاسدَّارْثْ نّغْ إِ ؤُسڒْقِي،
أَ سِيذِي إِنُو.
١٣ خْ دّْنُوبْ ن ؤُقمُّومْ نْسنْ،
خْ وَاوَاڒنْ إِ د-إِتّفّْغنْ
زڭْ إِينْشِيشنْ نْسنْ،
خْ ؤُيَا أجّْ إِ-ثنْ أَذْ تّْوَاحبّْسنْ
ذِي نّْفَاخثْ نْسنْ،
ؤُڒَا خْ نّعْڒثْ ؤُ خْ ؤُخَارِّيقْ
نِّي خفْ تّْحَارْذنْ.
١٤ كحّضْ إِ-ثنْ ذڭْ وسْعَارْ نّشْ،
كحّضْ إِ-ثنْ أَڒَامِي وَارْ دْجِينْ عَاذْ،
أَرّْ إِ-ثنْ أَذْ سّْننْ،
أَقَا أَربِّي ذ ڒْْحَاكمْ ذِي يَاعْقُوبْ،
أَڒْ ثِينڭُّورَا ن ثمُّورْثْ. سِيلَاهْ.
١٥ أَقَا أَذْعقْبنْ غَارْ ثْمذِّيثْ،
تّْزُونْ أَمْ وقْزِينْ
ؤُ تّنّْضنْ إِ ثنْذِينْثْ.
١٦ أجّْ إِ-ثنْ تّمْهَافَانْ ذَا ذ ذِيهَا خْ مَاشَّا،
أجّْ إِ-ثنْ خنِّي أَذْ قِّيمنْ سّْنُوسَانْ،
مَاڒَا وَارْ جِّيوْننْ،
١٧ نشّْ أَذْغنّْجغْ خْ جّْهذْ نّشْ،
غَارْ ثفُّوثْ أَذْ سْڒِيوْڒوغْ
خْ ثْمخْسِيوْثْ نّشْ إِشوَّارنْ،
مَاغَارْ ثُوغَا شكْ
ذ إِجّْ ن لْبُورْجْ يُوعْڒَانْ إِ نشّْ،
ذ أَمْشَانْ ن ثَاروْڒَا
ذڭْ وَاسّْ ن ڒحْصَارثْ إِنُو.
١٨ جّهْذْ إِنُو، نشّْ أَذْ زهّْذغْ إِ شكْ،
مَاغَارْ شكْ أَربِّي ذ لْبُورْجْ إِنُو يُوعْڒَانْ،
أَربِّي ن ثْمخْسِيوْثْ إِنُو إِشوَّارنْ.