٥٣
١ إِ ؤُمقّْرَانْ ن إِمغْنَاجنْ. س ثغْنِينْثْ ن ’إِزْڒِي ن وشْضَانْ‘. أَخمِّي ن ذَاوُوذْ.
٢ أَبُوهَاڒِي إِنَّا ذڭْ وُوڒْ نّسْ:
”وَارْ ذِينْ بُو أَربِّي!“
نِيثْنِي تَّاردّْدْجنْ،
تّڭّنْ مِينْ إِدْجَانْ ذ نّْعِي ن ڒْْغشّْ،
وَارْ ذِينْ ؤُڒَا ذ إِجّْ إِتّڭّْ مِينْ إِشْنَانْ.
٣ أَربِّي إِخزَّارْ-د زڭْ ؤُجنَّا
غَارْ ثَارْوَا ن بْنَاذمْ،
حِيمَا أَذْ إِژَارْ مَا ذِينْ حذْ
غَارسْ ڒفْهَامثْ،
إِجّنْ إِ يَارزُّونْ أَربِّي.
٤ مَارَّا فّْغنْ زڭْ وبْرِيذْ،
أَقَا أَثنْ جْمِيعْ ذوْڒنْ ذ إِعفَّاننْ،
وَارْ ذِينْ ؤُڒَا ذ إِجّْ إِتّڭّْ ڒْْخَارْ،
ؤُڒَا ذ إِجّْ.
٥ إِنِّي إِتّڭّنْ ڒْْمُوعْصِييّثْ
مَا وَارْ غَارْسنْ ثُوسّْنَا،
إِنِّي إِتّتّنْ ڒْْڭنْسْ إِنُو
أَخْمِي تّتّنْ أَغْرُومْ؟
نِيثْنِي وَارْ تّْڒَاغَانْ خْ أَربِّي.
٦ أَقَا ذِينْ إِ خَاسنْ ثوْضَا
ثِيڭّْوُوذِي إِمْغَارنْ،
ؤُمِي وَارْ ذِينْ مِينْ زِي إِ غَا ڭّْوذنْ،
مَاغَارْ أَربِّي إِطَارّشْ إِغْسَانْ
ن ونِّي خَاكْ إِهجّْمنْ.
شكْ ثسّْبهْذْڒذْ إِ-ثنْ،
مِينْزِي أَربِّي إِنْضَارْ إِ-ثنْ.
٧ أَهْ، إِڒِي أَسنْجمْ أَمقّْرَانْ ن إِسْرَائِيل
أَذْ د-يَاسْ ذغْيَا زِي صِيهْيُونْ!
خْمِي د غَا إِنّقْڒبْ أَربِّي
ثَامحْبَاسْثْ ن ڒْْڭنْسْ نّسْ،
أَذْ يَارْشقْ يَاعْقُوبْ،
أَذْ إِفَارْحْ إِسْرَائِيل.