٥٠
١ إِجّْ ن ؤُزهّذْ ن أَسَافْ. أَربِّي خْ مَارَّا إِربِّيثنْ، سِيذِي إِسَّاوَاڒْ. نتَّا إِتّْڒَاغَا إِ ثمُّورْثْ زِي مَانِي د-ثنْقَارْ ثْفُوشْثْ أَڒْ مَانِي ثغْڒِي.
٢ زِي صِيهْيُونْ، أَژْرِي إِكمّْڒنْ،
إِتّْبَانْ أَربِّي إِتِّيسِّيقْ.
٣ أَربِّي نّغْ أَذْ د-يَاسْ،
وَارْ إِسّغْذْ شَا.
ثِيمسِّي زَّاثسْ أَذْ ثشّْ،
ثَاحَارْيَاضْثْ إِ ذ أَسْ د-إِتّنّْضنْ
أَذْ ثْسُوضْ أَطَّاسْ.
٤ نتَّا أَذْ إِڒَاغَا إِ إِجنْوَانْ سنّجْ،
إِ ثمُّورْثْ حِيمَا أَذْ إِحْكمْ خْ ڒْْڭنْسْ نّسْ:
٥ ”سْمُونمْ-د غَارِي إِمْثِيقَّانْ إِنُو،
إِنِّي كِيذِي إِتّڭّنْ ڒْْعَاهْذْ س ثْغَارْصْثْ.“
٦ إِجنْوَانْ تّْبَارّْحنْ ثَاسڭْذَا نّسْ،
مَاغَارْ أَربِّي س يِيخفْ نّسْ
أَقَا-ث ذ ڒْْقَاضِي. سِيلَاهْ.
٧ ”سڒْ، أَ ڒْْڭنْسْ إِنُو،
ؤُ نشّْ أَذْ سِّيوْڒغْ، إِسْرَائِيل،
نشّْ أَذْ شهْذغْ ضِيدّْ نّشْ:
أَقَا نشّْ، أَربِّي، ذ أَربِّي نّشْ!
٨ وَارْ إِدْجِي خْ ثْغَارْصَا نّشْ
أَذْ شكْ وبّْخغْ،
مَاغَارْ ثِيغَارْصَا نّشْ
أَقَا أَثنْثْ ڒبْذَا زَّاثِي.
٩ وَارْ كسِّيغْ شَا أَفُونَاسْ أَمژْيَانْ
زِي ثَادَّارْثْ نّشْ،
ؤُڒَا ذ إِغَايْضنْ زِي ثقْوِيرِينْ نّشْ.
١٠ مَاغَارْ مَارَّا إِمُودَّارْ ن وزْغَارْ،
أَقَا إِنُو، ڒْْمَاڒْ خْ وَاڒفْ إِذُورَارْ.
١١ نشّْ سّْنغْ مَارَّا إِجْضَاضْ ن إِذُورَارْ،
مَارَّا مِينْ إِتّنْهزَّانْ ذڭْ إِيَّارْ،
أَقَا-ث إِنُو.
١٢ مْڒِي ثُوغَا ذَايِي ڒَْاژْ،
مَا وَارْ ذ أَشْ ث قَّارغْ،
مَاغَارْ إِنُو دُّونشْثْ ذ ؤُعمَّارْ نّسْ.
١٣ مَا أَذْ شّغْ خنِّي
أَيْسُومْ ن إِفُونَاسنْ إِجهْذنْ،
نِيغْ إِذَامّنْ ن إِغَايْضنْ؟
١٤ أَوِي-د إِ أَربِّي ثَاوْهِيبْثْ ن ؤُقَاذِي،
كمّڒْ لْوُوعُوذْ نّشْ إِ ؤُمْعُودْجِي خْ كُوڒْشِي.
١٥ ڒَْاغَا أَيِي-د ذڭْ وَاسّْ ن ڒحْصَارثْ،
خنِّي أَذْ شكْ سّْنجْمغْ
ؤُشَا شكْ أَذْ أَيِي ثڭّذْ شَّانْ.“
١٦ مَاشَا إِ ؤُعفَّانْ إِقَّارْ أَربِّي:
”مَايمِّي ثْبَارّْحذْ ثِيوصَّا إِنُو،
مَايمِّي إِ ثڭِّيذْ ڒْْعَاهْذْ إِنُو
ذڭْ ؤُقمُّومْ نّشْ،
١٧ ؤُمِي ثْشَارّْهذْ تَّارْبِييّثْ إِنُو
ؤُ ثنْضَارذْ أَوَاڒنْ إِنُو أَوَارْنِي أَشْ.
١٨ مَاڒَا ثژْرِيضْ إِجّْ ن ؤُخوَّانْ،
أَمُّو إِ ثڭُّورذْ أَكِيذسْ،
ثتّْصُورِيذْ أَكْ-ذ يِينِّي إِزنَّانْ.
١٩ أَقمُّومْ نّشْ ثتَّارِّيذْ إِ-ث إِ ڒْْغَارْ،
إِڒسْ نّشْ إِتّْخَارّصْ ذڭْ وشْمَاثْ.
٢٠ ثتّْغِيمِيذْ ذِينِّي، ثسَّاوَاڒذْ خْ ؤُمَاشْ،
ثسّفْذَاحضْ زِي مِّيسْ ن يمَّاسْ.
٢١ أَيَا ثتّڭّذْ ؤُ نشّْ سّغْذِيغْ.
تّْغِيڒْ أَشْ، أَقَا أَيِي أَمْ شكْ.
نشّْ أَذْ شكْ وبّْخغْ،
أَذْ سَّارْسغْ دّْنُوبْ نّشْ
زَّاثْ إِ ثِيطَّاوِينْ نّشْ.
٢٢ فْهمْ أَيَا خنِّي، أَ شكْ إِ إِتُّونْ أَربِّي،
حِيمَا وَارْ شكْ ثْمزّْقغْ
أَمْ وَارْ ذِينْ إِتِّيڒِي ؤُفكِّي.“
٢٣ ونِّي د-إِتَّاوْينْ ثَاغَارْصْثْ ن ؤُقَاذِي،
إِتّڭّْ أَيِي شَّانْ ؤُ إِسّوْجَاذْ أَبْرِيذْ،
حِيمَا أَذْ أَسْ سّشْنغْ أَسنْجمْ ن أَربِّي.