٤٤
١ إِ ؤُمقّْرَانْ ن إِمغْنَاجنْ. زڭْ أَيْثْ ن قُورَاحْ. أَخمِّي.
٢ أَ أَربِّي، نشِّينْ نسْڒَا ت
س إِمزُّوغنْ نّغْ،
ڒجْذُوذْ نّغْ حَاجَانْ أَنغْ ت:
شكْ ثڭِّيذْ إِشْثْ ن ثْمڭِّيثْ
ذڭْ وُوسَّانْ نْسنْ،
ذڭْ وُوسَّانْ ن وشْحَاڒْ ؤُيَا.
٣ س ؤُفُوسْ نّشْ أَقَا ثسُّوفّْغذْ ڒڭْنُوسْ
زِي ثسْغَارْثْ نْسنْ،
خنِّي ثژُّوذْ ثنْ ذَايسْ.
شكْ ثڭِّيذْ ڒْْغَارْ ذِي شُّوعُوبْ،
ثْبزّْعذْ ثنْ.
٤ نِيثْنِي مَاشَا وَارْ وَارْثنْ ثَامُّورْثْ س سِّيفْ،
أَغِيڒْ نْسنْ وَارْ ذ أَسنْ د-يِيوِي أَسنْجمْ،
مَاشَا أَفُوسْ نّشْ أَفُوسِي،
أَغِيڒْ نّشْ ذ ثْفَاوْثْ ن وُوذمْ نّشْ،
مِينْزِي نِيثْنِي ؤُفِينْ أَرْضَا ذِي ثِيطَّاوِينْ نّشْ.
٥ أَقَا شكْ ذ أَجدْجِيذْ إِنُو، أَ أَربِّي!
أوْشْ عَاذْ ڒخُّو ڒُْومُورْ
إِ إِسنْجَامنْ ن يَاعْقُوبْ.
٦ أَكِيذكْ أَذْ نغْضڒْ إِنِّي ذ أَنغْ إِحصَّارنْ،
س يِيسمْ نّشْ أَذْ نعْفسْ
خْ يِينِّي خَانغْ إِتّمْعَاڒَانْ.
٧ مَاغَارْ وَارْ تّشْڒغْ خْ ڒْْقوْسْ إِنُو،
سِّيفْ إِنُو وَارْ ذ أَيِي إِسّنْجَامْ.
٨ مَاغَارْ شكْ ثسّنْجَامذْ أَنغْ
زڭْ إِنِّي ذ أَنغْ إِحصَّارنْ،
ثسّْبهْذِيڒذْ إِنِّي ذ أَنغْ إِشَارّْهنْ.
٩ نْصبّحْ إِ أَربِّي أَسّْ مَارَّا،
أَذْ نْقَاذَا إِسمْ نّشْ إِ ڒبْذَا. سِيلَاهْ.
١٠ مَاشَا ڒخُّو ثنْضَارذْ أَنغْ،
ثسّْبهْذَاڒذْ أَنغْ،
شكْ وَارْ ثتّفِّيغذْ شَا
أَكْ-ذ ڒْْعسْكَارَاثْ نّغْ غَارْ ؤُمنْغِي.
١١ شكْ ثجِّيذْ أَنغْ نتّْرَاكّْوَاڒْ
زَّاثْ إِ ونِّي ذ أَنغْ إِحصَّارنْ،
إِنِّي ذ أَنغْ إِشَارّْهنْ
تّْكشّْضنْ مِينْ تّخْسنْ إِ يِيخفْ نْسنْ.
١٢ شكْ ثوْشِيذْ أَنغْ أَمْ وُودْجِي إِ مَاشَّا،
ثزُّوزَارذْ أَنغْ جَارْ ڒڭْنُوسْ.
١٣ شكْ ثزّْنُوزِيذْ ڒْْڭنْسْ نّشْ س وَالُو،
ذڭْ ؤُزّنْزِي نْسنْ وَارْ غَاركْ بُو ڒفْضڒْ.
١٤ شكْ ثتّڭّذْ أَنغْ ذ ڒْْحڭْرَا
إِ وَاجَّارنْ نّغْ،
ذ أَسْثهْزِي ذ ؤُبهْذڒْ
غَارْ يِينِّي ذ أَنغْ-د إِتّنّْضنْ.
١٥ شكْ ثتّڭّذْ أَنغْ ذ أَمذْيَا
جَارْ ڒڭْنُوسْ،
ثتّڭّذْ أَذْ خَانغْ هزّنْ
أَزدْجِيفْ جَارْ شُّوعُوبْ.
١٦ أَسّْ مَارَّا ڒْْعَارْ إِنُو أَقَا-ث زَّاثِي
جَارْ ثِيطَّاوِينْ إِنُو،
ڒحْيَا إِذْڒَا أَغمْبُوبْ إِنُو،
١٧ زِي ثْمِيجَّا ن يِينِّي إِسّحْقَارَّانْ،
تّْشقَّافنْ، زِي سِّيبّثْ ن ڒعْذُو
ؤُ ن ونِّي يَارزُّونْ أَنْثَاقمْ.
١٨ أَيَا مَارَّا إِكَّا خَانغْ،
مَاشَا وَارْ شكْ نتُّو،
وَارْ نْغشّْ شَا ذِي ڒْْعَاهْذْ نّشْ.
١٩ ؤُڒْ نّغْ وَارْ إِذْوِيڒْ غَارْ ضفَّارْ،
إِصُورَافْ نّغْ وَارْ د-فِّيغنْ شَا
زڭْ ؤُمسْرُوقْ نّشْ،
٢٠ وَاخَّا شكْ ثْڒبْزذْ أَنغْ
ذڭْ ومْشَانْ ن وُوشَّاننْ ن ڒخْڒَا،
ثذْڒِيذْ أَنغْ س ثِيڒِي ن ڒْْموْثْ.
٢١ مْڒِي ثُوغَا نتُّو إِسمْ ن أَربِّي نّغْ،
نسّْوِيژّضْ إِفَاسّنْ نّغْ
غَارْ يِيجّْ ن أَربِّي ذ أَغْرِيبْ،
٢٢ مَا إِڒِي أَربِّي وَارْ يَارزُّو ذِي مَانْ أَيَا؟
أَقَا نتَّا يَارڭّبْ
خْ مِينْ إِنُّوفَّارنْ ذڭْ وُوڒْ.
٢٣ مَاغَارْ ذِي طّْوعْ نّشْ
نقّنْ أَنغْ كُوڒْ أَسّْ،
أَقَا حسّْبنْ أَنغْ أَمْ وُودْجِي ن ثْغَارْصْثْ.
٢٤ فَاقْ، مَايمِّي ثطّْصذْ، سِيذِي إِنُو؟
فَاقْ، وَارْ ذ أَنغْ نطَّارْ إِ ڒبْذَا!
٢٥ مَايمِّي غَا ثفَّارذْ ؤُذمْ نّشْ،
أَذْ ثتُّوذْ ڒغْبنْ ذ دّدْجْ نّغْ؟
٢٦ مَاغَارْ ڒعْمَارْ نّغْ إِتَّاضَارْ غَارْ ثْعجَّاجْثْ،
أَعذِّيسْ نّغْ إِڒصّقْ ذِي ثمُّورْثْ.
٢٧ كَّارْ، أوْشْ أَنغْ أَفُوسْ، فْذِي خَانغْ
ذِي طّْوعْ ن ثْمخْسِيوْثْ نّشْ إِشوَّارنْ.