٤٢
أَذْلِيسْ وِيسّْ ثْنَاينْ - إِزهِّيذنْ 42-72
١ إِ ؤُمقّْرَانْ ن إِمغْنَاجنْ. أَخمِّي ن أَيْثْ ن قُورَاحْ.
٢ أَمْ إِغَايْضْ ن وزْغَارْ إِتّْمژْرِي
غَارْ ثْغزْرَاثِينْ ن وَامَانْ،
أَمُّو ؤُڒَا ذ ؤُڒْ إِنُو
إِتّْمژْرِي غَاركْ، أَ أَربِّي.
٣ ڒعْمَارْ إِنُو إِتّْفَاذَا غَارْ أَربِّي،
غَارْ أَربِّي إِدَّارنْ.
مڒْمِي إِ غَا أَذْفغْ،
أَذْ بَانغْ زَّاثْ إِ وُوذمْ ن أَربِّي؟
٤ إِمطَّاونْ إِنُو
ثُوغَا أَثنْ ذ أَغْرُومْ إِنُو
أَسّْ ذ دْجِيڒثْ،
ؤُمِي ذ أَيِي قَّارنْ أَسّْ إِمُونْ:
”مَانِي إِدْجَا أَربِّي نّشْ؟“
٥ نشّْ تِّيذَارغْ ذِي مَانْ أَيَا
ؤُ سّْفَارّْغغْ ڒعْمَارْ إِنُو ذَايِي،
مَاغَارْ نشّْ تّْنُومغْ ڭّعّْذغْ
ذڭْ إِجّْ ن ؤُهِيمُورْ إِقّنْ،
أَمْ ڭُّورغْ أَكِيذْسنْ
غَارْ ثَادَّارْثْ ن أَربِّي،
س ڒْْحسّْ ن ؤُسْڒِيوْڒوْ ذ ؤُقَاذِي،
إِجّْ نْ ڒْغَاشِي إِتّْعيّْذنْ.
٦ أَ ڒعْمَارْ إِنُو،
مَايمِّي ثْقنْضذْ أَمُّو،
ثْهكّْوڒذْ ذَايِي؟
رَاجَا أَربِّي،
مَاغَارْ أَذْ قِّيمغْ أَذْ ث قَاذِيغْ عَاذْ
خْ إِسنْجَامنْ إِ د-إِتّفّْغنْ
زِي زَّاثْ ن وُوذمْ نّسْ.
٧ أَ أَربِّي، ڒعْمَارْ إِنُو
إِقْنضْ أَمُّو ذَايِي.
خْ ؤُيَا تِّيذَارغْ شكْ
زِي ثمُّورْثْ ن لْ-ؤُرْذُونْ،
زڭْ إِذُورَارْ ن هِيرْمُونْ،
زڭْ إِذُورَارْ ن مِيصْعَارَا.
٨ ڒْْحمْڒثْ ثتّْڒَاغَا إِ ڒْْحمْڒثْ نّغْنِي
غَارْ زّْهِيرْ ن إِشرْشُورنْ نّشْ،
مَارَّا ڒمْهَامذْ نّشْ
ذ ڒمْوَاجْ نّشْ كِّينْ خَافِي.
٩ أجّْ سِيذِي أَذْ إِوصَّا
ثَامخْسِيوْثْ نّسْ إِشوَّارنْ س وَاسّْ،
ؤُشَا أَذْ غَارِي يِيڒِي يِيجّْ ن إِزْڒِي ذِي دْجِيڒثْ،
أَقَا-ث ذ ثْژَادْجِيثْ إِ أَربِّي ن ثُوذَارْثْ إِنُو.
١٠ نشّْ أَذْ إِنِيغْ إِ أَربِّي:
”ثَاصْضَارْثْ إِنُو ذ شكْ، مَايمِّي ذ أَيِي ثتُّوذْ؟
مَايمِّي ڭُّورغْ ذڭْ ورُّوضْ ذ أَبَارْشَانْ
زِي سِّيبّثْ ن دّدْجْ ن ڒعْذُو؟“
١١ إِنِّي ذ أَيِي إِحصَّارنْ سّْبهْتّْڒنْ أَيِي
س إِشْثْ ن ثَاجِّيثْ إِنقّنْ ذڭْ إِغْسَانْ إِنُو،
ؤُمِي ذ أَيِي قَّارنْ:
”مَانِي إِدْجَا أَربِّي نّشْ؟“
١٢ أَ ڒعْمَارْ إِنُو،
مَايمِّي ثْقنْضذْ أَمُّو،
ثْهكّْوڒذْ ذَايِي؟
رَاجَا أَربِّي، مَاغَارْ أَذْ ث قَاذِيغْ عَاذْ
خْ إِسنْجَامنْ إِ د-إِتّفّْغنْ
زِي زَّاثْ ن وُوذمْ إِنُو،
ؤُ زِي زَّاثْ ن أَربِّي إِنُو.