٤٠
١ إِ ؤُمقّْرَانْ ن إِمغْنَاجنْ. ن ذَاوُوذْ. أَزهّذْ.
٢ سِّيثِيمغْ قَاعْ خْ سِيذِي.
نتَّا يَارَّا-د غَارِي س ؤُزدْجِيفْ،
إِسّْحسّْ غَارْ ؤُغُويِّي إِنُو.
٣ نتَّا إِسّْڭعّذْ أَيِي-د
زڭْ إِجّْ ن وَانُو إِنقّنْ،
زڭْ ؤُبدْجَاعْ ذ ؤُبَارْيُوضْ،
نتَّا إِسَّارْسْ إِضَارنْ إِنُو خْ ثصْضَارْثْ،
إِسّمْثنْ إِصُورَافْ إِنُو.
٤ نتَّا إِڭَّا أَيِي إِجّْ ن يزْڒِي ذ أَمَايْنُو
ذڭْ ؤُقمُّومْ إِنُو،
إِجّْ ن إِزْڒِي ن ؤُصبّحْ إِ أَربِّي.
أَطَّاسْ أَذْ ث ژَترنْ،
أَذْ ثشْڒنْ خْ سِيذِي.
٥ سّعْذْ ن ورْيَازْ
ونِّي إِتّشْڒنْ خْ سِيذِي،
ونِّي وَارْ إِتّْميّْڒنْ
غَارْ أَيْثْ ن بُو-نّْفَاخثْ،
ؤُڒَا غَارْ يِينِّي إِودَّارنْ غَارْ ؤُخَارِّيقْ.
٦ أَطَّاسْ، أَ سِيذِي، أَربِّي إِنُو، ذ لْمُوعْجِيزَاثْ
نِّي ثڭِّيذْ، ؤُڒَا ذ مِينْ ثنْوِيذْ خَانغْ.
ؤُڒَا ذ إِجّْ إِزمَّارْ
أَذْ إِعْبَارْ إِخفْ نّسْ أَكِيذكْ.
نشّْ أَذْ ثنْثْ هَاجِيغْ، أَذْ زَّايْسنْثْ سِّيوْڒغْ.
أَقَا نِيثنْثِي ذڭْ وَاطَّاسْ،
وَارْ زمَّارنْثْ أَذْ تّْوَاحسْبنْثْ.
٧ وَارْ ثخْسذْ ثَاغَارْصْثْ
ذ ثوْهِيبْثْ ن ڒْْغِيدْجثْ.
شكْ ثَارْزْمذْ إِمزُّوغنْ إِنُو.
ثَاغَارْصْثْ ن وشْمَاضْ ذ ثْغَارْصْثْ ن دّنْبْ
وَارْ ثنْثْ ثتَّارذْ.
٨ خنِّي نِّيغْ: ”خْزَارْ، نشّْ أَذْ د-أَسغْ،
ذڭْ وذْلِيسْ إِتّْوَانّْضنْ يُورَا خَافِي.
٩ نشّْ غَارِي مژْرِي، أَ أَربِّي،
حِيمَا أَذْ ڭّغْ مِينْ ثخْسذْ شكْ.
شَّارِيعَا نّشْ أَقَا-ت ذِي ذَاخڒْ إِنُو.“
١٠ نشّْ تّْبَارّْحغْ ڒخْبَارْ أَصبْحَانْ
ن ثْسڭْذَا نّشْ
ذڭْ وڭْرَاوْ ن ڒْْڭنْسْ أَمقّْرَانْ.
خْزَارْ، وَارْ تّقّْنغْ إِينْشِيشنْ إِنُو،
أَ سِيذِي، شكْ ثسّْنذْ ث.
١١ وَارْ تّْخمّْڒغْ ثَاسڭْذَا نّشْ
ذَاخڒْ ذڭْ وُوڒْ إِنُو،
سَّاوَاڒغْ خْ ثِيذتّْ نّشْ ؤُ خْ ؤُسنْجمْ نّشْ.
ثَامخْسِيوْثْ نّشْ إِشوَّارنْ
ذ ڒَْامَانْ إِ ذَايكْ
وَارْ ثنْ سّْنُوفَّارغْ
ذڭْ وڭْرَاوْ ن ڒْْڭنْسْ أَمقّْرَانْ.
١٢ شكْ، أَ سِيذِي،
وَارْ خَافِي ثسّْبذِّيذْ أَرّحْمثْ نّشْ.
أجّْ ثَامخْسِيوْثْ نّشْ إِشوَّارنْ
ذ ڒَْامَانْ إِ ذَايكْ أَذْ أَيِي حْضَانْثْ ڒبْذَا.
١٣ مَاغَارْ وَارْ إِزمَّارْ أَذْ إِتّْوَاحصّبْ
ڒْْغَارْ إِ ذ أَيِي إِقُووَّارنْ،
ڒْْمُوعْصِييَّاثْ إِنُو تّْمنْعنْثْ أَيِي-د،
ذوْڒغْ وَارْ تّْوِيڒِيغْ عَاذْ س مَانْ أَيَا.
أَقَا-ثنْثْ ذ أَطَّاسْ خْ ؤُشُوَّافْ ن ؤُزدْجِيفْ إِنُو،
ؤُڒْ إِنُو إِتّفْشِيڒْ.
١٤ أَ سِيذِي، أَذْ أَشْ يَارْضَا
حِيمَا أَذْ أَيِي ثْفكّذْ،
أَ سِيذِي، ذغْيَاثْ حِيمَا أَذْ أَيِي ثوْشذْ أَفُوسْ.
١٥ أجّْ إِنِّي يَارزُّونْ ڒعْمَارْ إِنُو
حِيمَا أَذْ ث ثحَّانْ
أَذْ تّْوَاخَارْوضنْ،
أَذْ سّْنُوفَارنْ إِخفْ نْسنْ جْمِيعْ،
أجّْ إِنِّي إِفَارّْحنْ ذڭْ ؤُعدّبْ إِنُو
أَذْ ذوْڒنْ غَارْ ضفَّارْ ؤُ أَذْ تّْوَاسّْبهْذْڒنْ.
١٦ أجّْ إِ-ثنْ أَذْ تّْوَاردّْدْجنْ
أَمْ ؤُخدْجصْ إِ ڒفْضِيحثْ نْسنْ إِ إِڭِّينْ،
إِنِّي ذِينْ إِقَّارنْ: ”هَا، هَا!“
١٧ أجّْ مَارَّا إِنِّي خَاكْ يَارزُّونْ،
أَذْ أَرّنْ مژْرِي، أَذْ زَّايكْ فَارْحنْ.
أجّْ إِنِّي إِتّخْسنْ أَسنْجمْ نّشْ
أَذْ إِنِينْ ڒبْذَا: ”سِيذِي ذ أَمقّْرَانْ!“
١٨ نشّْ ذِي ڒغْبنْ ؤُ زڒْضغْ،
مَاشَا سِيذِي إِنُو إِعْقڒْ خَافِي.
شكْ ذ ونِّي ذ أَيِي إِوْشِينْ أَفُوسْ
ذ ونِّي ذ أَيِي إِسّْنجْمنْ.
أَ أَربِّي إِنُو، وَارْ تّْعطَّاڒْ شَا.