٣٥
١ ن ذَاوُوذْ.
مْشُوبّشْ، أَ سِيذِي،
أَكْ-ذ يِينِّي أَكِيذِي إِتّمْشُوبُّوشنْ،
مْنغْ أَكْ-ذ يِينِّي كِيذِي إِتّْمنْغَانْ.
٢ طّفْ ثَاسدَّارْثْ ن ؤُسڒْقِي
ذ ثْسدَّارْثْ ثَامقّْرَانْثْ،
ؤُشَا كَّارْ، أوْشْ أَيِي أَفُوسْ.
٣ جْبذْ-د لَانْسَا، قّنْ أَبْرِيذْ إِ ؤُمْسَاڭَارْ
أَكْ-ذ يِينِّي د أَيِي إِضَافَّارنْ،
إِنِي إِ ڒعْمَارْ إِنُو:
”أَسنْجمْ نّشْ أَقَا ذ نشّْ!“
٤ أَرّْ إِنِّي يَارزُّونْ خْ ڒعْمَارْ إِنُو
أَذْ تّْوَاخَاروْضنْ ؤُ أَذْ تّْوَافضْحنْ،
أجّْ إِنِّي إِتّْخَارِّيصنْ ذِي ڒْْغَارْ خَافِي
أَذْ تّْوَاعَارّْننْ غَارْ ضفَّارْ،
أجّْ إِ-ثنْ أَذْ ذوْڒنْ تّْسضْحَانْ.
٥ أجّْ إِ-ثنْ أَذْ ذوْڒنْ أَمْ يِيشَارْفَا
ذڭْ ؤُسمِّيضْ،
أجّْ لْمَالَاكْ ن سِيذِي أَذْ ثنْ إِعَارْنْ.
٦ أجّْ أَذْ إِذْوڒْ وبْرِيذْ نْسنْ ذ ثَادْجسْثْ،
أَذْ يِيڒِي إِتّحْڒُودْجُوضْ،
ؤُشَا أجّْ لْمَالَاكْ ن سِيذِي أَذْ ثنْ إِضْفَارْ.
٧ مَاغَارْ بْڒَا سِّيبّثْ
سّْنُوفَّارنْ خَافِي أَحْفُورْ ن ثُورْصُوضِي
ذ ثْرَاشَّا نْسنْ،
بْڒَا سِّيبّثْ غْزِينْ ث إِ ڒعْمَارْ إِنُو.
٨ أجّْ أَردّدْجْ أَذْ خَاسْ د-يَاسْ بْڒَا مَا إِسّنْ،
أجّْ ثْرَاشَّا نّسْ نِّي إِسّْنُوفَّارْ
أَذْ ث ثطّفْ سِيمَانْثْ نّسْ،
أجّْ إِ-ث أَذْ ذَايسْ د-إِوْضَا سِيمَانْثْ نّسْ،
س إِجّْ ن ؤُوطُّو إِ ث إِ غَا يَاردّْدْجنْ.
٩ ڒعْمَارْ إِنُو أَذْ إِفَارْحْ زِي سِيذِي،
أَذْ يَارْشقْ ذڭْ ؤُسنْجمْ نّسْ.
١٠ أَذْ إِنِينْ مَارَّا إِغْسَانْ إِنُو:
”أَ سِيذِي، مَانْ ونْ إِدْجَانْ أَمْ شكْ!
شكْ ذ ونِّي إِتّْفكَّانْ ڒْْمسْكِينْ
زڭْ ونِّي خَاسْ إِجهّْذنْ،
ڒْْمسْكِينْ ذ ؤُمزْڒُوضْ
زڭْ إِنِّي ذ أَسنْ إِكشّْضنْ.“
١١ إِشهَّاذنْ إِقْطَاطْعِييّنْ كَّارنْ.
مِينْ وَارْ سِّينغْ، تّْسقْسَانْ أَيِي.
١٢ أَرِّينْ أَيِي-د ڒْْغَارْ ذِي ڒْْخَارْ،
ڭِّينْ ذَايِي ڒحْوجْ ن يِينِّي خَافِي إِعِيزّنْ.
١٣ نشّْ مَاشَا أَرْضغْ
إِشْثْ ن ثْخَانْشثْ ن وشْضَانْ،
ڒَْامِي ثُوغَا هدْجْشنْ نِيثْنِي،
ڭِّيغْ أَذْ إِژُومّْ ڒعْمَارْ إِنُو،
ؤُشَا ثَاژَادْجِيثْ إِنُو ثتّْغِيمَا
ثدّكّْوَاڒْ-د غَارِي
ذِي ذَاخڒْ إِنُو.
١٤ أَخْمِي ث ثُوغَا ذ أَمدُّوكّڒْ إِنُو
نِيغْ ذ ؤُمَا،
أَمُّو إِ ثُوغَا ڭُّورغْ،
أَمْ شَا ن إِجّْ إِشطّْ خْ يمَّاسْ،
أَمُّو ثُوغَا أَيِي ڭُّورغْغنّْسغْ
ذڭْ وَارُّوضْ ذ أَبَارْشَانْ.
١٥ مَاشَا خْمِي تّْقجْذِيحغْ، فَارّْحنْ نِيثْنِي،
تّْمُوننْ أَكْ-ذ وَايَاوْيَا.
تّْمُوننْ ضِيدّْ إِنُو إِنِّي ن وَادَّايْ،
بْڒَا مَا أَذْ ث سّْنغْ.
شقّْفنْ ذَايِي، وَارْ سُّوسْمنْ.
١٦ أَمْ إِنِّي إِغطّْصنْ بْنَاذمْ
إِ يِيجّْ ن ؤُڒقُّوزْ ن وغْرُومْ،
أَمُّوغزَّانْ-د غَارِي ثِيغْمَاسْ.
١٧ أَ سِيذِي إِنُو، أَڒْ مشْحَاڒْ إِ غَا ثكّذْ
ثْخزَّارذْ وَاهَا؟
سنْجمْ أَيِي زڭْ وَاردّدْجْ نْسنْ إِ إِڭِّينْ،
أَينِّي إِنُو زڭْ ويْرَاذنْ إِمژْيَاننْ.
١٨ نشّْ أَذْ شكْ قَاذِيغْ
ذڭْ يِيجّْ ن وڭْرَاوْ ن ڒْْڭنْسْ ذ أَمقّْرَانْ،
أَذْ شكْ صبّْحغْ جَارْ إِجّْ ن ڒْْڭنْسْ
إِمْغَارْ أَطَّاسْ.
١٩ إِنِّي إِدْجَانْ ذ ڒْْعذْيَانْ إِنُو ذِي ڒْْبَاطرْ،
وَارْ ثنْ تّجِّي أَذْ خَافِي فَارْحنْ،
إِنِّي ذ أَيِي إِشَارّْهنْ، وَارْ ثنْ تّجِّي
أَذْ خَافِي مّْسغْمَازنْ بْڒَا سِّيبّثْ.
٢٠ مَاغَارْ نِيثْنِي وَارْ سِّيوِيڒنْ شَا خْ ڒهْنَا،
مَاشَا تّْخَارِّيصنْ ذڭْ إِنْوَاينْ
شُّورنْ س ڒْْغشّْ
ضِيدّْ إِنِّي يَارزُّونْ ڒْْهُوذْنثْ ذِي ثمُّورْثْ.
٢١ نِيثْنِي أَرزّْمنْ أَقمُّومْ نْسنْ قَاعْ،
قَّارنْ: ”هَا، هَا، ثِيطّْ نّغْ سِيمَانْثْ نّسْ
ثژْرَا إِ-ت!“
٢٢ أَ سِيذِي، شكْ ثژْرِيذْ ت،
وَارْ تّسْقَارَا، سِيذِي إِنُو،
وَارْ خَافِي تّڭّْوِيجْ شَا.
٢٣ فَاقْ، كَّارْ ذِي طّْوعْ ن ڒْْحقّْ إِنُو،
أَ أَربِّي إِنُو ذ سِيذِي إِنُو،
ذِي طّْوعْ ن دّعْوثْ إِنُو.
٢٤ حْكمْ خَافِي س ڒْْحقّْ
عْلَاحْسَابْ ثَاسڭْذَا نّشْ،
أَ سِيذِي، أَربِّي إِنُو،
وَارْ ثنْ تّجِّي أَذْ خَافِي فَارْحنْ.
٢٥ وَارْ ثنْ تّجِّي أَذْ إِنِينْ ذڭْ وُوڒْ نْسنْ:
”هَا، أَقَا أَنغْ مْلِيحْ!“،
وَارْ ثنْ تّجِّي أَذْ إِنِينْ:
”أَقَا نْسَارْضْ إِ-ث!“
٢٦ أجّْ إِنِّي إِفَارّْحنْ خْ أَرْژِييّثْ إِنُو،
أَذْ تّْوَاخَاروْضنْ
ؤُ أَذْ سّْنُوفَّارنْ إِخفْ نْسنْ جْمِيعْ،
أجّْ إِنِّي إِڭِّينْ إِخفْ نْسنْ مْغَارنْ زَّاثِي،
أَذْ يَارْضنْ س ؤُسضْحِي ذ ڒفْضِيحثْ.
٢٧ أجّْ إِنِّي يَارْضَانْ ذِي ثْسڭْذَا
أَذْ سْڒِيوڒْونْ ؤُ أَذْ فَارْحنْ،
أجّْ إِ-ثنْ أَذْ إِنِينْ:
”ذ أَمقّْرَانْ إِ يدْجَا سِيذِي ونِّي يَارْضَانْ
ذِي ڒهْنَا ن ؤُمْسخَّارْ نّسْ.“
٢٨ خنِّي إِڒسْ إِنُو
أَذْ إِبَارّحْ ثَاسڭْذَا نّشْ
ذ ؤُصبّحْ نّشْ أَسّْ مَارَّا.