٣٣
١ سْڒِيوڒْومْ إِ سِيذِي، أَ إِمْسڭَّاذنْ،
أَصبَّاحْ ذ إِشْثْ ن ثلْوِيزْثْ إِ يِينِّي إِسڭّْمنْ.
٢ قَاذَامْ سِيذِي س ڒْْڭَامْبْرِي،
زهّْذمْ أَسْ س لْعُوذْ
ؤُ س لهَارْپَا أَكْ-ذعشْرَا ن إِفِيڒَانْ.
٣ غنّْجمْ أَسْ س يِيجّْ ن يزْڒِي أَمَايْنُو،
إِرَارمْ مْلِيحْ س وسْرُودّحْ ن ڒْْبُوقْ.
٤ مِينْزِي أَوَاڒْ ن سِيذِي إِسڭّمْ،
مَارَّا مِينْ إِتّڭّْ، إِتّڭّْ إِ-ث س ڒَْامَانْ.
٥ نتَّا إِتّخْسْ ثَاسڭْذَا ذ ڒْْحقّْ.
ثَامُّورْثْ ثشُّورْ
س ثْمخْسِيوْثْ إِشوَّارنْ ن سِيذِي.
٦ زڭْ وَاوَاڒْ ن سِيذِي تّْوَاڭّنْ إِجنْوَانْ،
زِي أَرُّوحْ ن ؤُقمُّومْ نّسْ
تّْوَاڭّنْثْ مَارَّا ڒْْعسْكَارَاثْ نْسنْ.
٧ نتَّا إِسّْمُونْ أَمَانْ ن ڒبْحَارْ
أَمْ يِيجّْ ن وغْبَارْ.
نتَّا إِخمّڒْ أَمَانْ إِهوْڒنْ
ذڭْ إِخَّامنْ ن ڒخْزنْ.
٨ أَذْ ثڭّْوذْ مَارَّا ثَامُّورْثْ زِي سِيذِي،
أَذْ زَّايسْ ڭّْوذنْ
مَارَّا إِمزْذَاغْ ن دُّونشْثْ.
٩ مَاغَارْ نتَّا إِسَّاوَاڒْ ؤُشَا أَقَا-ث ذِينْ،
نتَّا إِتَّامَارْ ؤُشَا أَذْ يِيڒِي إِبدّْ ذِينْ.
١٠ سِيذِي إِتَّارژَّا شّْوَارْ ن ڒڭْنُوسْ،
إِسّبْضڒْ إِخَارِّيصنْ نْ ڒڭْنُوسْ.
١١ شّْوَارْ ن سِيذِي أَذْ إِقِّيمْ إِبدّْ إِ ڒبْذَا،
إِخَارِّيصنْ ن وُوڒْ نّسْ زِي جِّيڒْ أَڒْ جِّيڒْ.
١٢ سّعْذْ ن ڒْْڭنْسْ
إِ غَارْ إِدْجَا أَربِّي نّسْ ذ سِيذِي،
ڒْْڭنْسْ نِّي إِخْضَارْ إِ-ث نتَّا
ذ ثَاسْغَارْثْ إِ يِيخفْ نّسْ.
١٣ سِيذِي إِخزَّارْ-د زڭْ ؤُجنَّا،
إِتّْوَاڒَا مَارَّا ثَارْوَا ن بْنَاذمْ.
١٤ زِي ثْزذِّيغْثْ نّسْ إِمثْننْ إِخزَّارْ
غَارْ مَارَّا إِمزْذَاغْ ن ثمُّورْثْ.
١٥ نتَّا وحّْذسْ
ذ ونِّي إِكوّْننْ ؤُڒْ نْسنْ،
نتَّا إِحكَّارْ إِ مَارَّا ثِيمڭَّا نْسنْ.
١٦ أَجدْجِيذْ وَارْ إِتّْوَاسّنْجَامْ
س يِيجّْ ن ڒْْعسْكَارْ ذ أَمقّْرَانْ،
بُو-ثغْرُوضْثْ وَارْ إِتّْوَافكِّي
س جّهْذْ أَطَّاسْ.
١٧ أَقَا ذ أَخَارِّيقْ
بلِّي أَيِيسْ أَذْ د-يَاوِي أَسنْجمْ،
عَاذْ س جّهْذْ نّسْ أَمقّْرَانْ
وَارْ د-إِتّنْفكِّي.
١٨ خْزَارْ، ثِيطّْ ن سِيذِي
خْ يِينِّي زَّايسْ إِتّڭّْوذنْ،
خْ يِينِّي إِتّْرَاجَانْ
ثَامخْسِيوْثْ نّسْ إِشوَّارنْ،
١٩ حِيمَا أَذْ إِفكّْ ڒعْمَارْ نْسنْ زِي ڒْموْثْ،
حِيمَا أَذْ ثنْ يجّْ قِّيمنْ دَّارنْ ذِي ڒَْاژْ.
٢٠ ڒعْمَارْ نّغْ إِتّْرَاجَا سِيذِي،
أَقَا نتَّا ذ أَعَاونْ نّغْ
ذ ثَاسدَّارْثْ نّغْ إِ ؤُسڒْقِي.
٢١ مَاغَارْ زَّايسْ إِفَارّحْ وُوڒْ نّغْ،
مِينْزِي نتّْشَاڒْ خْ يِيسمْ نّسْ إِقدّْسنْ.
٢٢ أَذْ خَانغْ ثَارْسَا
ثْمخْسِيوْثْ نّشْ إِشوَّارنْ، أَ سِيذِي،
أَمْ مَامّشْ إِ شكْ نتّْرَاجَا.