٢٢
١ إِ ؤُمقّْرَانْ ن إِمغْنَاجنْ، س ثغْنِينْثْ ن ’ثُوذَاذْثْ ن ثُوفُّوثْ‘. أَزهّذْ ن ذَاوُوذْ.
٢ أَربِّي إِنُو، أَربِّي إِنُو،
مَايمِّي إِ ذ أَيِي ثجِّيذْ؟
زِي ڒَْاڭّْوَاجْ إِ ثدْجِيذْ زڭْ ؤُسنْجمْ إِنُو،
زڭْ وَاوَاڒنْ إِ سْغُويُّوغْ أَمْ ويْرَاذْ.
٣ أَ أَربِّي إِنُو، ڒَْاغِيغْ ذڭْ وَاسّْ،
مَاشَا شكْ وَارْ خَافِي د-ثَارِّيذْ شَا،
س دْجِيڒثْ، مَاشَا نشّْ وَارْ ؤُفِيغْ أَرَّاحثْ.
٤ شكْ ذ أَمْقدّسْ إِ ثدْجِيذْ،
ثْزدّْغذْ ذِي ڒْْوسْطْ ن إِزْڒَانْ
ن ؤُصبّحْ ن إِسْرَائِيل.
٥ تّشْڒنْ خَاكْ ڒجْذُوذْ نّغْ،
ثُوغَا تّشْڒنْ ؤُ شكْ ثَارِّيذْ ثنْ أَذْ نجْمنْ.
٦ نِيثْنِي سْغُوينْ-د غَاركْ
ؤُشَا تّْوَاسّْنجْمنْ،
ثُوغَا تّشْڒنْ خَاكْ ؤُ وَارْ نّْحشْمنْ شَا.
٧ نشّْ ذ إِشْثْ ن ثْكشَّا، وَارْ إِدْجِي ذ أَرْيَازْ،
نشّْ ذ ڒْْحڭْرَا ن بْنَاذمْ
تّْوَاسّحْقَارغْ جَارْ ڒْْڭنْسْ.
٨ مَارَّا إِنِّي ذ أَيِي إِژْرِينْ،
سْثْهزَّانْ زَّايِي،
أَرزّْمنْ إِينْشِيشنْ نْسنْ،
سّنْهزَّانْ أَزدْجِيفْ.
٩ قَّارنْ: ”سعْذُو ث خْ سِيذِي،
أجّْ وَانِيثَا أَذْ ث إِفكّْ، أَذْ ث إِسّنْجمْ،
مَاغَارْ نتَّا يَارْضَا خَاسْ.“
١٠ شكْ ثْجبّْذذْ أَيِي-د
زڭْ ؤُعذِّيسْ ن يمَّا،
شكْ ثَارِّيذْ أَيِي ذِي ڒَْامَانْ
خْ وَابُّوشنْ ن يمَّا.
١١ زِي ڒمْرَاوثْ تّْوَامّنْضَارغْ خَاكْ،
زڭْ ؤُعذِّيسْ ن يمَّا
أَقَا شكْ ذ أَربِّي إِنُو.
١٢ وَارْ تّْغِيمِي بُو غَارْ ڒَْاڭّْوَاجْ زَّايِي،
مَاغَارْ ڒحْصَارثْ ثُوذسْ
ؤُ وَارْ ذِينْ شَا أَمْعَاوَانْ.
١٣ أَطَّاسْ ن إِفُونَاسنْ نّْضنْ أَيِي-د،
إِفُونَاسنْ إِجهْذنْ زِي بَاشَانْ
قُووَّارنْ أَيِي-د،
١٤ أَرْزْمنْ-د غَارِي أَقمُّومْ نْسنْ
أَمشْنَاوْ إِجّْ ن ويْرَاذْ
إِتّْمزَّاقنْ، إِزهَّارنْ.
١٥ نشّْ تّْوَافَارّْغغْ أَمْ وَامَانْ
ؤُ مَارَّا إِغْسَانْ إِنُو تّْوَامّْسبْضَانْ.
ؤُڒْ إِنُو أَمْ شّْمعْ،
أَقَا إِفْسِي ذَاخڒْ إِنُو.
١٦ جّهْذْ إِنُو يُوژغْ
أَمْ يِيجّْ ن ؤُشدْجِيقْ ن إِشْثْ ن ثْقدُّوحْثْ،
إِڒسْ إِنُو إِڒْصقْ غَارْ وَانغْ إِنُو.
شكْ ثسَّارْسذْ أَيِي ذِي ثْعجَّاجْثْ ن ڒْْموْثْ.
١٧ مَاغَارْ إِطَانْ نّْضنْ أَيِي-د،
إِشْثْ ن بَانْذِييَّا ن ثَارْوَا ن ڒحْرَامْ
قُووَّارنْ أَيِي-د،
أَقَا أَمْ ويْرَاذْ إِفَاسّنْ ذ إِضَارنْ إِنُو.
١٨ زمَّارغْ أَذْ حسْبغْ
مَارَّا إِغْسَانْ إِنُو.
نِيثْنِي تّْوَاڒَانْ أَيِي، خزَّارنْ-د غَارِي.
١٩ نِيثْنِي بْضَانْ أَرُّوضْ إِنُو جَارْ أَسنْ،
ؤُشَا نْضَارنْ ثَاقدُّوحْثْ خْ ڒعْبَايثْ إِنُو.
٢٠ شكْ، أَ سِيذِي، وَارْ تِّيڒِي
غَارْ ڒَْاڭّْوَاجْ، أَ جّهْذْ إِنُو،
أَسْ-د ذغْيَا حِيمَا أَذْ أَيِي ثْعَاوْنذْ.
٢١ فكّْ ڒعْمَارْ إِنُو زِي سِّيفْ،
أَينِّي زڭْ ؤُقطّسْ ن وقْزِينْ.
٢٢ فكّْ أَيِي زڭْ ؤُقمُّومْ ن ويْرَاذْ،
فكّْ أَيِي زڭْ وَاشَّاونْ ذ إِزِيرَارنْ
ن إِغَايْضْ نْ ڒخْڒَا!
أَقَا شكْ ثسْڒِيذْ أَيِي.
٢٣ أَذْ بَارّْحغْ إِسمْ نّشْ إِ وَاوْمَاثنْ إِنُو،
أَذْ خَاكْ صبْحغْ ذِي ڒْْوسْطْ ن وڭْرَاوْ نْ ڒْڭنْسْ.
٢٤ كنِّيوْ، إِنِّي إِتّڭّْوْذنْ سِيذِي،
سمْغَارمْ ث،
أَ كنِّيوْ، مَارَّا زَّارِيعثْ ن يَاعْقُوبْ،
سْعُودْجمْ ث ؤُ وقَّارمْ ث،
أَ كنِّيوْ، مَارَّا زَّارِيعثْ ن إِسْرَائِيل!
٢٥ مَاغَارْ وَارْ إِسّحْقِيرْ شَا
ڒحْصَارثْ ن ونِّي إِتّْوَاحْصَارنْ،
وَارْ ت إِعِيفّْ شَا،
وَارْ خَاسْ إِسّْنُوفَّارْ شَا ؤُذمْ نّسْ،
مَاشَا نتَّا إِسْڒَا أَسْ مَاڒَا إِڒَاغَا أَسْ-د.
٢٦ زَّايكْ أَذْ د-يَاسْ ؤُقَاذِي إِنُو
ذڭْ إِجّْ ن وڭْرَاوْ ن ڒْْڭنْسْ أَمقّْرَانْ،
أَذْ كمّْڒغْ لْوُوعُوذْ إِنُو
زَّاثْ إِ يِينِّي زَّايسْ إِتّڭّْوذنْ.
٢٧ إِمْوَاضْعنْ أَذْ شّنْ ؤُ أَذْ جِّيوْننْ،
إِنِّي أَرزُّونْ خْ سِيذِي أَذْ أَسْ صبّْحنْ،
ؤُڒَاونْ نْسنْ أَذْ دَّارنْ إِ ڒبْذَا.
٢٨ مَارَّا ثِينڭُّورَا ن ثمُّورْثْ أَذْ ث إِذَارنْثْ،
أَذْ د-ذوْڒنْثْ غَارْ سِيذِي،
مَارَّا ڒَْادْجَاثْ ن ڒڭْنُوسْ
أَذْ سجْذنْثْ زَّاثْ إِ وُوذمْ نّشْ،
٢٩ مِينْزِي ثَاڭلْذِيثْ إِ سِيذِي إِ ثدْجَا،
نتَّا إِحكّمْ جَارْ ڒڭْنُوسْ.
٣٠ مَارَّا إِنِّي إِصحّنْ ذِي ثمُّورْثْ
أَذْ شّنْ، أَذْ سجْذنْ،
مَارَّا إِنِّي د-إِهكّْوَانْ ذِي ثْعجَّاجْثْ
أَذْ سجْذنْ زَّاثْ إِ وُوذمْ نّسْ،
كُوڒْ إِجّنْ إِ وَارْ إِزمَّارنْ
أَذْ إِحْضَا ڒعْمَارْ نّسْ.
٣١ زَّارِيعثْ أَذْ أَسْ ثْسخَّارْ،
أَذْ ثتّْوَازمّْ ذ أَرَّاوْ إِ سِيذِي إِنُو.
٣٢ أَذْ د-أَسنْ، أَذْ بَارّْحنْ ثَاسڭْذَا نّسْ
إِ يِيجّْ ن ڒْْڭنْسْ إِ غَا د-إِتّْوَاخڒْقنْ،
مَاغَارْ نتَّا أَقَا إِڭَّا إِ-ت.