١٤٤
١ ن ذَاوُوذْ.
أَذْ إِتّْوَابَاركْ سِيذِي، ثَاصْضَارْثْ إِنُو،
ونِّي إِسّڒْمَاذنْ إِفَاسّنْ إِنُو إِ ؤُمنْغِي،
إِضوْضَانْ إِنُو إِ ڒْْحَارْبْ.
٢ شكْ إِ ذ أَيِي ثدْجِيذْ ذ أَمدُّوكّڒْ إِنُو
إِ ذَايسْ ثَامخْسِيوْثْ إِشوَّارنْ،
ؤُڒَا ذ لْبُورْجْ إِنُو، لْبُورْجْ إِنُو يُوعْڒَانْ
ذ أَمْسنْجمْ إِنُو،
ثَاسدَّارْثْ إِنُو إِ ؤُسڒْقِي،
ذ ونِّي غَارْ أَركّْوَاڒغْ،
ذ ونِّي ذ أَيِي إِسّْوَاضْضْعنْ ڒْْڭنْسْ إِنُو.
٣ أَ سِيذِي، مِينْ إِعْنَا بْنَاذمْ،
أَقَا شكْ ثخْسذْ أَذْ ث ثسّْنذْ؟
مِّيسْ ن بْنَاذمْ،
أَقَا شكْ ثتّْخَارِّيصذْ ذَايسْ؟
٤ بْنَاذمْ أَمشْنَاوْ ڒفْوَارْ،
ؤُسَّانْ نّسْ أَذْ عْذُونْ أَمْ ثِيڒِي.
٥ ميّڒْ إِجنْوَانْ نّشْ، أَ سِيذِي، هْوَا-د.
حَاذَا إِذُورَارْ، خنِّي أَذْ ڭّنْ دّخَّانْ.
٦ ژَترْيضْ أَسَّامنْ ؤُ زدْجعْ إِ-ثنْ،
سكّْ فْڒِيثْشَاثْ نّشْ ؤُ سْخَارْوضْ إِ-ثنْ.
٧ سْوِيژّضْ إِفَاسّنْ نّشْ زِي سنّجْ،
سُوفّغْ أَيِي-د ؤُ فكّْ أَيِي
زِي ڒْْحمْڒَاثْ ن وَامَانْ ثِيمقّْرَانِينْ،
زڭْ ؤُفُوسْ ن إِبَارَّانِييّنْ،
٨ مَاغَارْ أَقمُّومْ نْسنْ إِقَّارْ إِخَارِّيقنْ،
أَفُوسْ نْسنْ أَفُوسِي
ذ إِجّْ ن ؤُفُوسْ إِشُّورْ س ڒْْغشّْ.
٩ أَ أَربِّي، أَذْ أَشْغنّْجغْ
إِجّْ ن يزْڒِي ذ ن جْذِيذْ إِ شكْ،
س لهَارْپَا ؤُ س لْعُوذْ سعشْرَا ن إِفِيڒَانْ
أَذْ أَشْ زهّْذغْ.
١٠ شكْ ذ ونِّي إِسَّاوَاضنْ
أَسنْجمْ إِ إِججْدْجِيذنْ،
ذ ونِّي إِفكّنْ أَمْسخَّارْ نّسْ ذَاوُوذْ
زِي سِّيفْ أَعفَّانْ،
١١ سُوفّغْ أَيِي-د ؤُ فكّْ أَيِي
زڭْ ؤُفُوسْ ن ثَارْوَا ن ؤُبَارَّانِي،
زڭْ ونِّي غَارْ إِدْجَا ؤُقمُّومْ
إِ إِقَّارنْ مْغِيرْ إِخَارِّيقنْ،
ؤُ زڭْ ونِّي غَارْ إِدْجَا ؤُفُوسْ أَفُوسِي
إِشُّورْ س ڒْْغشّْ.
١٢ معْلِيكْ إِحنْجِيرنْ نّغْ
أَذْ إِڒِينْ أَمْ يِيغذِّيونْ،
إِنِّي إِمْغَارنْ عَاذْ ذِي ثمْژِي نْسنْ،
يسِّيثْنغْ أَمْ ثْغمَّارْ
إِ ڭِّينْ س ؤُكشُّوضْ
س عْڒَامْ كُوڒْ أَرْشَامنْ،
ڭِّينْ ثنْثْ إِ يِيشْثْ ن زَّاوشْثْ إِقدّْسنْ.
١٣ أَذْ شُّورنْ ڒهْرِيثْ نّغْ،
أَذْ وْشنْ زَّاذْ أَوَارْنِي زَّاذْ،
أَذْ يَارْنِي وُودْجِي نّغْ س ڒُْوڒُوفْ ن ثْسقَّارْ،
سعشْرَا ن ڒُْوڒُوفْ ن ثْسقَّارْ
ذِي دّْمَانِي ن ثَاروْسَا نّغْ.
١٤ أَذْ حمْڒنْ إِمْوَانْ نّغْ مْلِيحْ،
وَارْ إِتِّيڒِي عَاذْ ؤُهْجَامْ
نِيغْ ذ ؤُفُّوغْ إِ ؤُمنْغِي
ؤُڒَا ذ إِغُويَّانْ ذڭْ وَازَّاينْ نّغْ.
١٥ سّعْذْ ن ڒْْڭنْسْ نِّي إِدْجَانْ أَمْيَا.
سّعْذْ ن ڒْْڭنْسْ نِّي زِي أَربِّي نْسنْ ذ سِيذِي.