١٣٩
١ إِ ؤُمقّْرَانْ ن إِمغْنَاجنْ. ن ذَاوُوذْ. أَزهّذْ.
أَ سِيذِي، شكْ ثْبقّْشذْ أَيِي ؤُ ثسّْنذْ أَيِي.
٢ شكْ ثسّْنذْ أَغِيمِي إِنُو ذ ؤُبذِّي إِنُو،
زِي ڒَْاڭّْوَاجْ ثْفهّْمذْ إِخَارِّيصنْ إِنُو.
٣ خْمِي ڭُّورغْ ؤُ خْمِي طّْصغْ ثَارزُّوذْ ذَايِي،
أَقَا شكْ ثسّْنذْ مَارَّا إِبْرِيذنْ إِنُو.
٤ مِينْزِي وَارْ ذِينْ ؤُڒَا ذ إِجّْ ن وَاوَاڒْ
خْ يِيڒسْ إِنُو، ؤُ خْزَارْ،
شكْ أَ سِيذِي، ثسّْنذْ ث كُوڒْشِي.
٥ شكْ ثْحصَّارذْ أَيِي زِي ضفَّارْ ؤُ زِي زَّاثْ،
ثسَّارْسذْ خَافِي ثَاڒقَّا ن ؤُفُوسْ نّشْ.
٦ ثُوسّْنَا-يَا ذ أَثبْهثْ إِ نشّْ،
ثُوعْڒَا خَافِي، وَارْ زمَّارغْ أَذْ ت أَوْضغْ.
٧ غَارْ مَانِي زمَّارغْ
أَذْ رَاحغْ زِي أَرُّوحْ نّشْ،
غَارْ مَانِي غَا أَروْڒغْ زڭْ وُوذمْ نّشْ؟
٨ مَاڒَا ڭعّْذغْ غَارْ ؤُجنَّا،
أَقَا شكْ ذِينِّي،
مَاڒَا ڭِّيغْ ڒَْاخَارْثْ ذ ثَاسُّوثْ إِنُو، خْزَارْ،
أَقَا شكْ ؤُڒَا ذِينِّي،
٩ مَاڒَا كْسِيغْ أَفْرِيونْ أَمْ ثْفَاوْثْ ن ڒفْجَارْ،
أَذْ زذْغغْ غَارْ ؤُنڭَّارْ قَاعْ ن ڒبْحَارْ،
١٠ خنِّي ؤُڒَا ذِينِّي أَذْ أَيِي إِنْذهْ ؤُفُوسْ نّشْ،
أَفُوسْ نّشْ أَفُوسِي أَذْ أَيِي إِطّفْ.
١١ مَاڒَا نِّيغْ: ”إِوَا ثَادْجسْثْ، وْضَا-د خَافِي،
خنِّي دْجِيڒثْ ذ ثْفَاوْثْ إِ ذ أَيِي إِقُووَّارنْ.
١٢ إِ شكْ ثَادْجسْثْ وَارْ ثدْجِي ذ طّْڒَامْ،
إِ شكْ دْجِيڒثْ ثتّڭّْ ثْفَاوْثْ أَمْ ؤُزِيڒْ،
إِ شكْ ثَادْجسْثْ أَقَا-ت أَمْ ثْفَاوْثْ.
١٣ وَاهْ، شكْ ثْخڒْقذْ-د ثِيژَّاڒْ إِنُو،
ثْمُوذذْ أَيِي ذڭْ ؤُعذِّيسْ ن يمَّا.
١٤ قَاذِيغْ شكْ ؤُمِي د-تّْوَاخڒْقغْ
زڭْ إِشْثْ ن ثبْرِيذْثْ ن ڒعْجبْ ذ ثَامقّْرَانْثْ.
ثِيمڭَّا نّشْ ذ لْمُوعْجِيزَاثْ،
ڒعْمَارْ إِنُو ثسّنْ ث مْلِيحْ قَاعْ.
١٥ إِخْسَانْ إِنُو ثُوغَا وَارْ خَاكْ نُّوفَّارنْ،
ؤُمِي تّْوَاڭّغْ س ثْنُوفّْرَا،
تّْوَامُوذغْ أَمْ إِجّْ ن ؤُبُورْضَا
ذِي ڒَْادْجَاغْ ن ثمُّورْثْ.
١٦ ثِيطَّاوِينْ نّشْ ژْرِينْثْ
أَبدُّو إِنُو إِضفْصنْ.
ذڭْ وذْلِيسْ نّشْ إِتّْوَانّْضنْ
أَقَا مَارَّا يُورَانْ،
أَقَا ؤُسَّانْ إِ ثُوغَا تّْوَاڭّنْ،
جَارْ أَسنْ ؤُڒَا ذ أَسّْ أَمزْوَارُو
ن ؤُبدُّو إِنُو.
١٧ مَامّشْ غَارِي تّْعِيزَّانْ
إِخَارِّيصنْ نّشْ، أَ أَربِّي،
مَامّشْ إِمْغَارْ ؤُبَارُّو نْسنْ!
١٨ مَاڒَا خْسغْ أَذْ ثنْ حسْبغْ،
أَقَا أَثنْ كْثَارْ أَطَّاسْ زڭْ يجْذِي،
ؤُ خْمِي فَاقغْ، أَقَا أَيِي عَاذْ أَكِيذكْ.
١٩ أَ أَربِّي، معْلِيكْ إِ غَا ثنْغذْ أَعفَّانْ،
معْلِيكْ إِ غَا ثجّذْ إِرْيَازنْ
إِ إِسَّازَّاڒنْ إِذَامّنْ
أَذْ خَافِي أَڭّْوجّنْ،
٢٠ إِنِّي خَاكْ إِسَّاوَاڒنْ س ثْحْرَايْمشْثْ،
ڒْْعذْيَانْ نّشْ
إِنِّي إِنطّْقنْ إِسمْ نّشْ ذِي ڒْْبَاطڒْ.
٢١ أَ سِيذِي، مَا وَارْ شَارّْهغْ
إِنِّي شكْ إِشَارّْهنْ،
ؤُ مَا وَارْ تّْعِيفّغْ
إِنِّي أَكِيذكْ إِتّمْعَاڒَانْ؟
٢٢ نشّْ شَارّْهغْ ثنْ
س إِجّْ ن وشْرَاهْ إِكْمڒْ،
أَقَا نِيثْنِي ذوْڒنْ أَيِي ذ ڒْْعذْيَانْ.
٢٣ أَرْزُو خَافِي، أَ أَربِّي، سّنْ ؤُڒْ إِنُو،
قدْجبْ أَيِي ؤُ سّنْ إِخَارِّيصنْ إِنُو.
٢٤ خْزَارْ-د، مَا أَقَا أَيِي
ذِي شَا ن وبْرِيذْ ن ڒقْجَاحثْ
ؤُ نْذهْ أَيِي غَارْ وبْرِيذْ ن ڒبْذَا.