١١٩
١ أَلِيفْ. سّعْذْ نْسنْ إِ يِينِّي إِكمّْڒنْ
أَبْرِيذْ ن ثُوذَارْثْ نْسنْ بْڒَا ڒْْعِيبْ،
إِنِّي إِڭُّورنْ خْ وبْرِيذْ ن شَّارِيعَا ن سِيذِي.
٢ سّعْذْ نْسنْ إِ يِينِّي إِحطَّانْ
شّْهَاذَاثْ نّسْ،
إِنِّي خَاسْ يَارزُّونْ س مَارَّا ؤُڒْ نْسنْ.
٣ نِيثْنِي وَارْ تّڭّنْ ڒْْغشّْ،
مَاشَا ڭُّورنْ ذڭْ إِبْرِيذنْ نّسْ.
٤ أَ سِيذِي، شكْ ثُومَارذْ
مَاحنْذْ بْنَاذمْ
أَذْ إِحْضَا ثِيوصَّا نّشْ نِيشَانْ.
٥ مْڒِي قَاعْ إِبْرِيذنْ إِنُو تّْوَاسڭّْذنْ،
مَاحنْذْ أَذْ حْضِيغْ ثِيوصَّا نّشْ،
٦ خنِّيعمَّارْصْ أَذْ سضْحِيغْ
مَاڒَا خزَّارغْ غَارْ مَارَّا ثِيوصَّا نّشْ.
٧ س وُوڒْ إِقُّورْ أَذْ شكْ قَاذِيغْ،
مَاڒَا نشّْ ڒمْذغْ
ڒحْكَامَاثْ نّشْ إِسڭّْذنْ.
٨ أَذْ حْضِيغْ ثِيوصَّا نّشْ!
وَارْ ذَايِي سمّحْ مَارَّا!
٩ بِيثْ. مَامّشْ إِ غَا إِسِّيزْذڭْ
إِجّْ ن ؤُحُوذْرِي أَبْرِيذْ نّسْ؟
س ومْنَاعْ نّسْ ذڭْ وَاوَاڒْ نّشْ.
١٠ نشّْ أَرزُّوغْ خَاكْ س وُوڒْ إِنُو مَارَّا،
وَارْ ذ أَيِي تّجِّي
أَذْ فّْغغْ خْ ڒُْومُورَاثْ نّشْ.
١١ مِينْ ثقَّارذْ شكْ،
خمّْڒغْ ث ذڭْ وُوڒْ إِنُو،
مَاحنْذْ وَارْ كِيذكْ خطِّيغْ.
١٢ ثتّْوَابَارْكذْ شكْ، أَ سِيذِي،
سڒْمذْ أَيِي ثِيوصَّا نّشْ.
١٣ س إِينْشِيشنْ إِنُو بَارّْحغْ
مَارَّا لْفَارَايِيضْ ن ؤُقمُّومْ نّشْ.
١٤ أَقَا فَارْحغْ س وبْرِيذْ ن شّْهَاذَاثْ نّشْ،
أَمْ س مَارَّا مِينْ إِدْجَانْ إِغْڒَا.
١٥ أَذْ خَارّْصغْ ذِي ڒُْومُورَاثْ نّشْ،
أَذْ خزَّارغْ غَارْ إِمسْرَاقْ نّشْ.
١٦ نشّْ تَّارّغْ مژْڒِي ذِي ثِيوصَّا نّشْ،
أَوَاڒْ نّشْ وَارْ ث تّتُّوغْ.
١٧ ڭِيملْ. أڭّْ ثْشُونِي إِ ؤُمْسخَّارْ نّشْ،
مَاحنْذْ أَذْ دَّارغْ ؤُ أَذْ حْضِيغْ أَوَاڒْ نّشْ.
١٨ أَرْزمْ أَيِي ثِيطَّاوِينْ إِنُو،
حِيمَا أَذْ ژَترغْ لْمُوعْجِيزَاثْ ن شَّارِيعَا نّشْ.
١٩ نشّْ أَقَا أَيِي ذ أَبَارَّانِي خْ ثمُّورْثْ،
وَارْ خَافِي ثفَّارْ ڒُْومُورَاثْ نّشْ.
٢٠ ڒعْمَارْ إِنُو إِتّْوَافْنَا
س ؤُوحّشْ غَارْ لْفَارَايِيضْ نّشْ، ڒبْذَا.
٢١ شكْ ثْعَاقْبذْ إِمْعفَّارنْ إِتّْوَانعْڒنْ،
إِنِّي إِتّفّْغنْ خْ ڒُْومُورَاثْ نّشْ.
٢٢ كْسِي خَافِي ڒفْضِيحثْ ذ ؤُسحْقَارْ،
مَاغَارْ حْضِيغْ شّْهَاذَاثْ نّشْ.
٢٣ ؤُڒَا ذ ڒْْحُوكَّامْ قِّيمنْ،
سَّاوَاڒنْ أَكْ-ذ وَايَاوْيَا خَافِي،
مَاشَا أَمْسخَّارْ نّشْ
إِتّْخَارّصْ ذِي ثْوصَّا نّشْ.
٢٤ شّْهَاذَاثْ نّشْ ذ مژْرِي إِنُو،
أَقَا أَثنْثْ ذ إِمْشَاوَارنْ إِنُو.
٢٥ ذَالِيثْ. ڒعْمَارْ إِنُو إِڒْصقْ غَارْ ثْعجَّاجْثْ،
أَرّْ-د ذَايِي ثُوذَارْثْ عْلَاحْسَابْ أَوَاڒْ نّشْ.
٢٦ نشّْ نعْمغْ إِ شكْ خْ إِبْرِيذنْ إِنُو
ؤُ شكْ ثسْثَاجْبذْ أَيِي.
سڒْمذْ أَيِي ثِيوصَّا نّشْ.
٢٧ أَرّْ أَيِي أَذْ فهْمغْ
أَبْرِيذْ ن ڒُْومُورَاثْ نّشْ،
أَذْ خَارّْصغْ ذِي لْمُوعْجِيزَاثْ نّشْ.
٢٨ ڒعْمَارْ إِنُو إِفْسِي س وشْضَانْ،
سڭّمْ أَيِي غَارْ وبْرِيذْ ن وَاوَاڒْ نّشْ.
٢٩ سِيڭّْوجْ أَيِي خْ وبْرِيذْ ن إِخَارِّيقنْ،
حِينّْ خَافِي س شَّارِيعَا نّشْ.
٣٠ نشّْ إِخْضَارغْ أَبْرِيذْ ن ثِيذتّْ،
سَّارْسغْ لْفَارَايِيضْ نّشْ زَّاثِي.
٣١ نشّْ شبَّارغْ
ذِي شّْهَاذَاثْ نّشْ، أَ سِيذِي،
وَارْ ذ أَيِي تّجِّي أَذْ سضْحِيغْ.
٣٢ نشّْ أَذْ أَزّْڒغْ
أَبْرِيذْ ن ڒُْومُورَاثْ نّشْ،
مَاغَارْ شكْ ثڭِّيذْ تَّاسِيعْ إِ وُوڒْ إِنُو.
٣٣ هِي. أَ سِيذِي! سڒْمذْ أَيِي
أَبْرِيذْ ن ثْوصَّا نّشْ،
خنِّي نشّْ أَذْ ذَايسْ طّْفغْ أَڒْ أَنڭَّارْ.
٣٤ أوْشْ أَيِي ڒفْهَامثْ،
خنِّي أَذْ حْضِيغْ شَّارِيعَا نّشْ
ؤُ أَذْ ذَايسْ طّْفغْ س وُوڒْ إِنُو مَارَّا.
٣٥ نْذهْ أَيِي خْ وبْرِيذْ ن ڒُْومُورَاثْ نّشْ،
مِينْزِي فَارّْحغْ زَّايسْ.
٣٦ أَرّْ ؤُڒْ إِنُو غَارْ شّْهَاذَاثْ نّشْ،
وَارْ إِدْجِي غَارْ طّْمعْ ن أَرْبحْ.
٣٧ سْهيّضْ ثِيطَّاوِينْ إِنُو خْ ڒْْبَاطڒْ،
أَرّْ-د ذَايِي ثُوذَارْثْ س إِبْرِيذنْ نّشْ.
٣٨ ضْمنْ مِينْ ثنِّيذْ إِ ؤُمْسخَّارْ نّشْ،
ونِّي شكْ إِتّڭّْوْذنْ.
٣٩ سْحيّذْ خَافِي ڒفْضِيحثْ إِ زِي تّڭّْوذغْ،
مَاغَارْ لْفَارَايِيضْ نّشْ شْنَانْثْ.
٤٠ خْزَارْ، تّْوحّْشغْ ڒُْومُورَاثْ نّشْ،
أَرّْ أَيِي دَّارغْ س ثْسڭْذَا نّشْ.
٤١ وَاوْ. أجّْ أَذْ غَارِي د-ثَاسْ
ثْمخْسِيوْثْ نّشْ إِشوَّارنْ، أَ سِيذِي،
أَسنْجمْ نّشْ
أَقَا-ث أَمْ مَامّشْ إِ ثنِّيذْ شكْ.
٤٢ حِيمَا زمَّارغْ أَذْ أَرّغْ
خْ ونِّي زَّايِي إِسّْبهْذَاڒنْ،
مَاغَارْ تّشْڒغْ خْ وَاوَاڒْ نّشْ.
٤٣ وَارْ تّكّسْ أَوَاڒْ ن ثِيذتّْ قَاعْ
زڭْ ؤُقمُّومْ إِنُو،
مَاغَارْ تّْرَاجِيغْ لْفَارَايِيضْ نّشْ.
٤٤ نشّْ أَذْ حْضِيغْ شَّارِيعَا نّشْ بْڒَا قطُّو،
إِ ڒبْذَا قَاعْ.
٤٥ نشّْ ڭُّورغْ ذِي تَّاسِيعْ،
مَاغَارْ أَرْزُوغْ خْ ڒُْومُورَاثْ نّشْ.
٤٦ أَذْ سِّيوْڒغْ خْ شّْهَاذَاثْ نّشْ
زَّاثْ إِ إِجدْجِيذنْ،
وَارْ زَّاثْسنْ تّْسضْحِيغْ شَا.
٤٧ أَذْ أَرّغْ مژْرِي ذِي ڒُْومُورَاثْ نّشْ،
ثِينِّي إِ تّخْسغْ.
٤٨ أَذْ سْڭعّْذغْ إِفَاسّنْ إِنُو
قِيبَاڒْ إِ ڒُْومُورَاثْ نّشْ، ثِينِّي إِ تّخْسغْ،
أَذْ خَارّْصغْ ذِي ثْوصَّا نّشْ.
٤٩ زَايِينْ. عْقڒْ خْ وَاوَاڒْ
إِ ثنِّيذْ إِ ؤُمْسخَّارْ نّشْ،
مِينْ خفْ ثُويْڒذْ أَسِيثمْ إِنُو.
٥٠ ذ وَا ذ أَفوّجْ إِنُو ذِي ڒغْبنْ إِنُو،
مَاغَارْ لْوَاعْذْ نّشْ
يَارَّا-د ذَايِي ثُوذَارْثْ.
٥١ إِمْعفَّارنْ سْثهْزَانْ زَّايِي أَڒْ طَّارْفْ،
مَاشَا نشّْ وَارْ حيِّيذغْ شَا
خْ شَّارِيعَا نّشْ.
٥٢ نشّْ خَارّْصغْ
ذِي لْفَارَايِيضْ نّشْ ن ڒبْذَا، أَ سِيذِي،
خنِّي أَقَا تّْوَافوّْجغْ.
٥٣ ثَافْقحْثْ ثطّفْ أَيِي
ذِي سِّيبّثْ ن إِعفَّاننْ،
إِنِّي إِسمّْحنْ ذِي شَّارِيعَا نّشْ.
٥٤ ثِيوصَّا نّشْ ثُوغَا أَثنْثْ ذ إِزْڒَانْ إِنُو
ذِي ثَادَّارْثْ ن ثْبَارَّانشْثْ إِنُو.
٥٥ ذِي دْجِيڒثْ ثُوغَا تّْخَارّْصغْ
ذڭْ يِيسمْ نّشْ،
أَ سِيذِي، ؤُ حْضِيغْ شَّارِيعَا نّشْ.
٥٦ أَمُّو إِ ذ أَيِي إِمْسَارْ،
مَاغَارْ حْضِيغْ ڒُْومُورَاثْ نّشْ.
٥٧ خِيثْ. سِيذِي ذ ثَاسْغَارْثْ إِنُو،
نشّْ نِّيغْ أَذْ حْضِيغْ أَوَاڒنْ نّشْ.
٥٨ حشّْمغْ زَّاثْ إِ وُوذمْ نّشْ
س مَارَّا وُوڒْ إِنُو،
حِينّْ خَافِي أَمْ مَامّشْ إِ ذ أَيِي ثنِّيذْ.
٥٩ نشّْ خَارّْصغْ ذڭْ إِبْرِيذنْ إِنُو،
أَذْ سّْعقْبغْ إِصُورَافْ ن إِضَارنْ إِنُو
غَارْ شّْهَاذَاثْ نّشْ.
٦٠ نشّْ قدْجْقغْ، وَارْعطَّاڒغْ شَا،
حِيمَا أَذْ حْضِيغْ ڒُْومُورَاثْ نّشْ.
٦١ إِسغْوَانْ ن إِعفَّاننْ شَارّْفنْ أَيِي،
مَاشَا وَارْ تّتُّوغْ شَّارِيعَا نّشْ.
٦٢ غَارْ وزْينْ ن دْجِيڒثْ تّْنكَّارغْ،
حِيمَا أَذْ شكْ قَاذِيغْ
خْ لْفَارَايِيضْ نّشْ إِسڭّْذنْ.
٦٣ نشّْ ذ أَعْشِيرْ ن مَارَّا
إِنِّي شكْ إِتّڭّْوذنْ،
ن يِينِّي إِحطَّانْ ڒُْومُورَاثْ نّشْ.
٦٤ زِي ثْمخْسِيوْثْ نّشْ إِشوَّارنْ
ثشُّورْ ثمُّورْثْ مَارَّا، أَ سِيذِي،
سڒْمذْ أَيِي ثِيوصَّا نّشْ.
٦٥ ثِيث. شكْ ثڭِّيذْ س ثْشُونِي إِ ؤُمْسخَّارْ نّشْ،
أَ سِيذِي، عْلَاحْسَابْ أَوَاڒْ نّشْ.
٦٦ سڒْمذْ أَيِي مَاحنْذْ أَذْ ميّْزغْ
ؤُ أَذْ سّْنغْ مْلِيحْ،
مِينْزِي تّشْڒغْ خْ ڒُْومُورَاثْ نّشْ.
٦٧ قْبڒْ مَا تّْوَاحْصَارغْ، ودَّارغْ،
مَاشَا ڒخُّو حطِّيغْ مِينْ ثقَّارذْ شكْ.
٦٨ شكْ ذ أَصبْحَانْ، ثتّڭّذْ مِينْ إِصبْحنْ،
سڒْمذْ أَيِي ثِيوصَّا نّشْ.
٦٩ إِمْعفَّارنْ أَرخُّونْ-د خَافِي إِخَارِّيقنْ،
مَاشَا نشّْ حطِّيغْ ڒُومُورَاثْ نّشْ
س مَارَّا ؤُڒْ إِنُو.
٧٠ ؤُڒْ نْسنْ وَارْ إِتَّاشَانْ أَمْ ثَاذُونْثْ،
مَاشَا نشّْ، أَقَا شَّارِيعَا نّشْ
تَّافغْ ذَايسْ مژْرِي.
٧١ ثُوغَا إِ نشّْ مْلِيحْ ؤُمِي تّْوَاحْصَارغْ،
مَاغَارْ أَمُّو إِ ڒمْذغْ ثِيوصَّا نّشْ.
٧٢ شَّارِيعَا زڭْ ؤُقمُّومْ نّشْ
غَارِي إِحْڒَا أَطَّاسْ
خْ وَاڒَافْ ن ؤُقِييَّاثْ ن وُورغْ
نِيغْ ن نُّوقَارْثْ.
٧٣ يُوذْ. إِفَاسّنْ نّشْ ڭِّينْ أَيِي،
كوّْننْ أَيِي.
أوْشْ أَيِي ڒعْقڒْ،
مَاحنْذْ أَذْ ڒمْذغْ ڒُْومُورَاثْ نّشْ.
٧٤ إِنِّي شكْ إِتّڭّْوذنْ أَذْ أَيِي ژَترنْ
ؤُشَا أَذْ فَارْحنْ،
مَاغَارْ تّْرَاجِيغْ أَوَاڒْ نّشْ.
٧٥ نشّْ سّْنغْ، أَ سِيذِي،
أَقَا سڭّْذنْثْ ڒحْكَامَاثْ نّشْ،
ؤُ أَقَا شكْ ثحْصَارذْ أَيِي س ڒَْامَانْ.
٧٦ أجّْ أَذْ ثِيڒِي ثْمخْسِيوْثْ نّشْ إِشوَّارنْ
ذ أَفوّجْ إِ نشّْ،
أَمْ مَامّشْ إِ ثنِّيذْ إِ ؤُمْسخَّارْ نّشْ.
٧٧ أَذْ خَافِي د-ثَاسْ أَرّحْمثْ نّشْ،
مَاحنْذْ أَذْ دَّارغْ،
مَاغَارْ شَّارِيعَا نّشْ ذَايسْ مژْرِي إِنُو.
٧٨ أجّْ أَذْ سضْحَانْ إِمْعفَّارنْ،
مَاغَارْ س إِخَارِّيقنْ
سّْفَارّْغنْ أَيِي صِّيفثْ إِنُو،
مَاشَا نشّْ ثْخمَّامغْ
ذِي ڒُْومُورَاثْ نّشْ.
٧٩ أجّْ أَذْ غَارِي د-ذوْڒنْ
إِنِّي شكْ إِتّڭّْوذنْ،
إِنِّي إِسّْننْ شّْهَاذَاثْ نّشْ.
٨٠ أجّْ أَذْ يِيڒِي ؤُڒْ إِنُو إِمُونْ
غَارْ ثْوصَّا نّشْ،
حِيمَا وَارْ تّْسضْحِيغْ شَا.
٨١ كَافْ. ڒعْمَارْ إِنُو إِسْخفْ
زِي مژْرِي غَارْ ؤُسنْجمْ نّشْ،
أَقَا تّْرَاجِيغْ أَوَاڒْ نّشْ.
٨٢ ثِيطَّاوِينْ إِنُو ذقّْڒنْثْ زِي مژْرِي
غَارْ مِينْ ثقَّارذْ شكْ، ؤُمِي نِّيغْ:
’مڒْمِي إِ خَافِي إِ غَا ثسّْفوّْجذْ؟‘
٨٣ مَاغَارْ ذوْڒغْ
أَمْ يِيشْثْ ن ثْخَانْشثْ ن يِيڒمْ
ثُويڒْ ذِي دّخَّانْ،
مَاشَا ثِيوصَّا نّشْ
وَارْ ثنْثْ تُّوغْ.
٨٤ مشْحَاڒْ ن وُوسَّانْ عَاذْ
إِ إِقِّيمنْ إِ ؤُمْسخَّارْ نّشْ؟
مڒْمِي إِ غَا ثْشَارّْعذْ
إِنِّي ذ أَيِي إِضفَّارنْ؟
٨٥ إِمْعفَّارنْ غْزَانْ أَيِي إِحُوفَارْ،
مِينْ وَارْ د-يُوسِينْ أَكْ-ذ شَّارِيعَا نّشْ.
٨٦ مَارَّا ڒُْومُورَاثْ نّشْ ذ ثِيذتّْ.
نِيثْنِي تّْذَارَّاشنْ أَيِي س إِخَارِّيقنْ،
أوْشْ أَيِي أَفُوسْ!
٨٧ عْڒَاحَاڒْ إِڒِي أَقَا ثحَّانْ أَيِي
زِي ثمُّورْثْ،
مَاشَا نشّْ وَارْ حيّْذغْ
خْ ڒُْومُورَاثْ نّشْ.
٨٨ أَرّْ-د ذَايِي ثُوذَارْثْ
عْلَاحْسَابْ ثَامخْسِيوْثْ نّشْ إِشوَّارنْ،
خنِّي أَذْ حْضِيغْ شّْهَاذثْ إِ د-إِفّْغنْ
زڭْ ؤُقمُّومْ نّشْ.
٨٩ لَامِيذْ. أَ سِيذِي، أَوَاڒْ نّشْ
إِتّْغِيمَا إِ ڒبْذَا إِمْثنْ ذڭْ ؤُجنَّا.
٩٠ ثَامخْسِيوْثْ نّشْ إِشوَّارنْ
ثِيوضْ زِي جِّيڒْ أَڒْ جِّيڒْ.
شكْ ثڭِّيذْ ثَامُّورْثْ أَذْ ثْبدّْ ثمْثنْ
ؤُ أَمُّو إِ غَا ثقِّيمْ ثْبدّْ.
٩١ عْلَاحْسَابْ لْفَارَايِيضْ نّشْ أَذْ قِّيمنْ بدّنْ،
مَاغَارْ مَارَّا نِيثْنِي ذ إِمْسخَّارنْ نّشْ.
٩٢ معْلِيكْ وَارْ ثدْجِي شَّارِيعَا نّشْ
ذ مژْرِي إِنُو،
إِڒِي تّْوَاهلّْكغْ ذِي ڒحْصَارثْ إِنُو.
٩٣ عمَّارْصْ أَذْ تُّوغْ ڒُْومُورَاثْ نّشْ إِ ڒبْذَا،
مَاغَارْ زَّايْسنْثْ ثَارِّيذْ أَيِي-د ثُوذَارْثْ.
٩٤ نشّْ أَقَا أَيِي إِ شكْ، سنْجمْ أَيِي،
مِينْزِي أَرْزُوغْ خْ ڒُْومُورَاثْ نّشْ.
٩٥ إِعفَّاننْ رَاجَانْ أَيِي حِيمَا أَذْ أَيِي ثحَّانْ،
مَاشَا نشّْ خزَّارغْ غَارْ شّْهَاذَاثْ نّشْ.
٩٦ نشّْ ژْرِيغْ أَقَا مَارَّا مِينْ ثدْجَا ڒكْمَارثْ
غَارسْ أَنڭَّارْ،
مَاشَا ڒُْومُورْ نّشْ غَارسْ تَّاسِيعْ أَطَّاسْ.
٩٧ مِيمْ. مَامّشْ إِ خَافِي ثْعِيزّْ شَّارِيعَا نّشْ،
أَسّْ إِكْمڒْ تّْخَارّْصغْ ذَايسْ.
٩٨ س ڒُْومُورَاثْ نّشْ ثَارِّيذْ أَيِي ذ أَمِيغِيسْ
خْ ڒْْعذْيَانْ إِنُو، مَاغَارْ أَقَا أَثنْ غَارِي إِ ڒبْذَا.
٩٩ نشّْ غَارِي ڒعْقڒْ كْثَارْ
خْ مَارَّا إِمْسڒْمَاذنْ إِنُو،
مَاغَارْ تّْخَارّْصغْ ذڭْ إِبْرِيذنْ نّشْ.
١٠٠ نشّْ غَارِي ڒفْهَامثْ كْثَارْ خْ إِوسُّورَا،
مَاغَارْ حْضِيغْ ڒُْومُورَاثْ نّشْ.
١٠١ منْعغْ إِضَارنْ إِنُو
زِي قَاعْ إِبْرِيذنْ إِعفَّاننْ،
حِيمَا أَذْ حْضِيغْ أَوَاڒْ نّشْ.
١٠٢ نشّْ وَارْ حيّْذغْ شَا خْ لْفَارَايِيضْ نّشْ،
مَاغَارْ شكْ ذ ونِّي ذ أَيِي إِسّْغَارنْ.
١٠٣ مَامّشْ إِ غَا يِيڒِي ذ مِيژِيذْ
مِينْ ثقَّارذْ شكْ
إِ وَانغْ إِنُو، خْ ثَامّنْثْ إِ ؤُقمُّومْ إِنُو!
١٠٤ زِي ڒُْومُورَاثْ نّشْ تَّارِّيغْ-د ڒعْقڒْ،
خْ ؤُيَا شَارّْهغْ كُوڒْ أَمسْرُوقْ ن إِخَارِّيقنْ.
١٠٥ نُونْ. أَوَاڒْ نّشْ ذ ڒفْنَارْ إِ ؤُضَارْ إِنُو
ذ ثَافَاوْثْ إِ ؤُمسْرُوقْ إِنُو.
١٠٦ نشّْ جُّودْجغْ ؤُ أَذْ ث ڭّغْ،
أَقَا أَذْ حْضِيغْ
مَارَّا لْفَارَايِيضْ نّشْ إِسڭّْذنْ.
١٠٧ نشّْ تّْوَاحْصَارغْ أَطَّاسْ، أَ سِيذِي،
أَرّْ-د ذَايِي ثُوذَارْثْ عْلَاحْسَابْ أَوَاڒْ نّشْ.
١٠٨ تّْزَاوْڭغْ، كْسِي س أَرْضَا
ثِيوْهِيبِينْ ن ڒْْخَاضَارْ
زڭْ ؤُقمُّومْ إِنُو، أَ سِيذِي،
ؤُ سڒْمذْ أَيِي لْفَارَايِيضْ نّشْ.
١٠٩ ثُوذَارْثْ إِنُو أَقَا-ث ڒبْذَا ذِي لْخَاطرْ،
مَاشَاعمَّارْصْ أَذْ تُّوغْ شَّارِيعَا نّشْ.
١١٠ إِعفَّاننْ ڭِّينْ أَيِي إِجّْ ن ڒْْفخْ،
مَاشَا نشّْ وَارْ فّْغغْ شَا
خْ ڒُْومُورَاثْ نّشْ.
١١١ شّْهَاذَاثْ نّشْ ذ ثَاسْغَارْثْ إِنُو إِ ڒبْذَا،
مَاغَارْ نِيثنْثِي سّْفَارّْحنْثْ ؤُڒْ إِنُو.
١١٢ حزّْمغْ ؤُڒْ إِنُو
مَاحنْذْ أَذْ ڭّغْ عْلَاحْسَابْ ثِيوصَّا نّشْ،
إِ ڒبْذَا، أَڒْ أَنڭَّارْ.
١١٣ سَامِيخْ. أَيْثْ ن ثْنَاينْ ن إِغمْبَابْ
شَارّْهغْ ثنْ،
مَاشَا تّخْسغْ شَّارِيعَا نّشْ.
١١٤ شكْ ذ أَذُورِّي إِنُو
ذ ثَاسدَّارْثْ ن ؤُسڒْقِي إِنُو،
نشّْ تّْرَاجِيغْ أَوَاڒْ نّشْ.
١١٥ بعّْذمْ خَافِي، أَ إِعفَّاننْ،
حِيمَا أَذْ حْضِيغْ ڒُْومُورَاثْ ن أَربِّي إِنُو.
١١٦ سنّذْ أَيِي عْلَاحْسَابْ لْوَاعْذْ نّشْ،
مَاحنْذْ أَذْ دَّارغْ
ؤُ وَارْ تّْسضْحِيغْ ذِي ڒَْايَاسْ إِنُو.
١١٧ عمّذْ أَيِي،
خنِّي أَذْ تّْوَاسّْنجْمغْ،
ؤُ أَذْ أَرّغْ مژْرِي
ذِي ثْوصَّا نّشْ ڒبْذَا.
١١٨ مَارَّا إِنِّي إِتَّاڭّْوجنْ
خْ ثْوصَّا نّشْ، سّحْقَارغْ ثنْ،
مَاغَارْ ڒْْغشّْ نْسنْ مْغِيرْ ذ إِخَارِّيقنْ.
١١٩ أَمْ كُوفُّو ثْمحِّيذْ
مَارَّا إِعفَّاننْ زِي ثمُّورْثْ،
س ؤُيَا تّخْسغْ شّْهَاذَاثْ نّشْ.
١٢٠ زِي ثِيڭّْوُوذِي زَّايكْ
ثشِّيرُّووْ أَرِّيمثْ إِنُو،
أَمُّو إِ ڭّْوذغْ زِي ڒحْكَامَاثْ نّشْ.
١٢١ عَايِينْ. نشّْ ڭِّيغْ ڒْْحقّْ ذ ثْسڭْذَا،
وَارْ ذ أَيِي تّْسلّمْ إِ ڒْْمَارْڭحْ ن
يِينِّي ذ أَيِي إِحصَّارنْ.
١٢٢ أڭّْ ڒْْعَارْبُونْ ذِي طّْوعْ ن ؤُمْسخَّارْ نّشْ،
وَارْ تّجِّي إِمْعفَّارنْ أَذْ أَيِي حْصَارنْ.
١٢٣ ثِيطَّاوِينْ إِنُو ذقّْڒنْثْ
زِي مژْرِي غَارْ ؤُسنْجمْ نّشْ،
غَارْ لْوَاعْذْ ن ثْسڭْذَا نّشْ.
١٢٤ أڭّْ س ثْمخْسِيوْثْ نّشْ إِشوَّارنْ
أَكْ-ذ ؤُمْسخَّارْ نّشْ،
سڒْمذْ أَيِي ثِيوصَّا نّشْ.
١٢٥ نشّْ ذ أَمْسخَّارْ نّشْ، أوْشْ أَيِي ڒعْقڒْ،
مَاحنْذْ أَذْ سّْنغْ شّْهَاذَاثْ نّشْ.
١٢٦ أَقَا يِيوضْ أَسْ-د ڒْْحَاڒْ إِ سِيذِي،
حِيمَا أَذْ إِبدّْ خْ إِضَارنْ نّسْ،
مَاغَارْ نِيثْنِي أَرْژِينْ شَّارِيعَا نّشْ.
١٢٧ مِينْزِي تّخْسغْ ثِيوصَّا نّشْ خْ وُورغْ،
وَاهْ أَطَّاسْ خْ وُورغْ إِتّْوَاصفَّانْ،
١٢٨ خْ ؤُيَا حسْبغْ مَارَّا ڒُْومُورَاثْ نّشْ
ذِي كُوڒْ ثَامسْڒَاشْثْ نِيشَانْ،
مَاشَا شَارْهغْ كُوڒْ أَمسْرُوقْ ن إِخَارِّيقنْ.
١٢٩ بِي. شّْهَاذَاثْ نّشْ ذ لْمُوعْجِيزَاثْ،
خْ ؤُيَا إِحطَّا ثنْثْ وُوڒْ إِنُو.
١٣٠ أَنُورْزمْ ن وَاوَاڒنْ نّشْ
إِسّْشَانْ ثَافَاوْثْ،
إِ إِحَافِييّنْ إِتِّيشْ أَسنْ ڒعْقڒْ.
١٣١ أَرْزْمغْ أَقمُّومْ إِنُو أَطَّاسْ
ؤُ سَّاحْرَاثغْ زِي مژْرِي غَارْ ڒُْومُورَاثْ نّشْ.
١٣٢ أَرّْ ؤُذمْ نّشْ غَارِي ؤُ حِينّْ خَافِي،
أَمْ مَامّشْ د-ثكَّارْ
إِ يِينِّي إِتّخْسنْ إِسمْ نّشْ.
١٣٣ سمْثنْ إِصُورَافْ إِنُو
أَمْ مَامّشْ إِ ذ أَيِي ثنِّيذْ،
وَارْ تّجِّي أَذْ خَافِي إِحْكمْ ڒْْغشّْ وَالُو.
١٣٤ فكّْ أَيِي زِي ڒحْصَارثْ ن إِوْذَانْ،
مَاحنْذْ أَذْ حْضِيغْ ڒُْومُورَاثْ نّشْ.
١٣٥ أجّْ ؤُذمْ نّشْ
أَذْ يَارْغْ خْ ؤُمْسخَّارْ نّشْ،
سڒْمذْ أَيِي ثِيوصَّا نّشْ.
١٣٦ ثِيغزْرَاثِينْ ن وَامَانْ هْوَانْثْ-إِ-د
زِي ثِيطَّاوِينْ إِنُو،
مَاغَارْ نِيثْنِي وَارْ حطَّانْ شَّارِيعَا نّشْ.
١٣٧ ثْسَاذِي. أَقَا شكْ ذ أَمْسڭّذْ، أَ سِيذِي،
ؤُڒَا ذ لْفَارَايِيضْ نّشْ سڭّْذنْثْ.
١٣٨ شكْ ثُومُورذْ ثَاسڭْذَا ن شّْهَاذَاثْ نّشْ،
ڒْْمَانثْ نْسنْ ذ ثَامقّْرَانْثْ أَطَّاسْ.
١٣٩ ثُوسْمِي إِنُو إِقدّْسنْ إِنُو ثشَّا أَيِي،
مَاغَارْ إِنِّي ذ أَيِي إِحصَّارنْ
تُّونْ أَوَاڒنْ نّشْ.
١٤٠ لْوَاعْذْ نّشْ إِقُّورْ أَطَّاسْ،
أَمْسخَّارْ نّشْ إِتّخْسْ إِ-ث.
١٤١ نشّْ ذ أَمُوقْڒِيڒْ ؤُ تّْوَاسّحْقَارغْ،
مَاشَا وَارْ تّتُّوغْ ڒُْومُورَاثْ نّشْ.
١٤٢ ثَاسڭْذَا نّشْ ذ ثَاسڭْذَا إِ ڒبْذَا،
شَّارِيعَا نّشْ ذ ثِيذتّْ.
١٤٣ دِّيقثْ ذ ثڭّْوُوذِي ڒقّْفنْثْ أَيِي،
مَاشَا ڒُْومُورَاثْ نّشْ
ذَايْسنْثْ مژْرِي إِنُو.
١٤٤ ثَاسڭْذَا ن شّْهَاذَاثْ نّشْ
إِ ڒبْذَا إِ ثدْجَا.
سفْهمْ أَيِي ثنْثْ، خنِّي أَذْ دَّارغْ.
١٤٥ قُوفْ. ڒَْاغِيغْ س مَارَّا ؤُڒْ إِنُو،
أَرّْ-د خَافِي، أَ سِيذِي،
خنِّي أَذْ حْضِيغْ ثِيوصَّا نّشْ.
١٤٦ نشّْ ڒَْاغِيغْ-د خَاكْ، فكّْ أَيِي،
خنِّي أَذْ حْضِيغْ مَارَّا شّْهَاذَاثْ نّشْ.
١٤٧ قْبڒْ ثُوفُّوثْ ثُوغَا تّْڒَاغِيغْ
حِيمَا أَذْ أَيِي د-ثوْشذْ أَفُوسْ،
رَاجِيغْ أَوَاڒْ نّشْ.
١٤٨ ثِيطَّاوِينْ إِنُو فَاقنْثْ
قْبڒْ ڒْْوقْثْ ن وُوضُوفْ ن وشْبَارْ،
حِيمَا أَذْ خَارّْصغْ
ذڭْ وَاوَاڒنْ نّسْ.
١٤٩ سڒْ-د غَارْ ثْمِيجَّا إِنُو
عْلَاحْسَابْ ثَامخْسِيوْثْ نّشْ إِشوَّارنْ،
أَ سِيذِي، أَرّْ-د ذَايِي ثُوذَارْثْ
عْلَاحْسَابْ لْفَارَايِيضْ نّشْ.
١٥٠ إِنِّي يَارزُّونْ أَذْ ڭّنْ ڒفْضَايحْ،
ؤُذْسنْ أَيِي،
أَقَا نِيثْنِي تَّاڭّْوجنْ أَطَّاسْ
خْ شَّارِيعَا نّشْ.
١٥١ شكْ ثُوذْسذْ، أَ سِيذِي،
مَارَّا ڒُْومُورَاثْ نّشْ ذ ثِيذتّْ إِ دْجَانْ.
١٥٢ ؤُڒَا ذ أَطَّاسْ زڭْ وَامِي
ثُوغَا سّْنغْ شّْهَاذَاثْ نّشْ،
مَاغَارْ شكْ ثڭِّيذْ ثنْثْ إِ ڒبْذَا.
١٥٣ رِيخْ. خْزَارْ غَارْ ڒغْبنْ إِنُو
ؤُ ثسّْنجْمذْ أَيِي،
مَاغَارْ وَارْ تُّوغْ شَّارِيعَا نّشْ.
١٥٤ أَغْ أَيِي ثَاسْغَارْثْ ؤُشَا فكّْ أَيِي،
أَرّْ-د ذَايِي ثُوذَارْثْ
أَمْ مَامّشْ إِ ذ أَيِي ثنِّيذْ.
١٥٥ إِڭّْوجْ ؤُسنْجمْ خْ إِعفَّاننْ،
مَاغَارْ وَارْ أَرزُّونْ ثِيوصَّا نّشْ.
١٥٦ أَ سِيذِي، أَرّحْمثْ نّشْ ذ أَطَّاسْ،
أَرّْ-د ذَايِي ثُوذَارْثْ
عْلَاحْسَابْ لْفَارَايِيضْ ن نّشْ.
١٥٧ إِنِّي ذ أَيِي إِتّْذَارَّاشنْ
ذ يِينِّي ذ أَيِي إِحصَّارنْ
أَقَا أَثنْ س وَاطَّاسْ،
مَاشَا نشّْ وَارْ حيّْذغْ شَا
خْ شّْهَاذَاثْ نّشْ.
١٥٨ ژْرِيغْ إِنِّي ذ أَيِي إِغْذَارنْ ؤُشَا عِيفّغْ ثنْ،
مَاغَارْ نِيثْنِي وَارْ طِّيفنْ
ذڭْ وَاوَاڒْ نّشْ.
١٥٩ خْزَارْ، مَامّشْ تّخْسغْ ڒُْومُورَاثْ نّشْ،
أَ سِيذِي، أَرّْ-د ذَايِي ثُوذَارْثْ
عْلَاحْسَابْ ثَامخْسِيوْثْ نّشْ إِشوَّارنْ.
١٦٠ بدُّو ن وَاوَاڒْ نّشْ أَقَا-ث ذ ثِيذتّْ،
كُوڒْ ڒحْكَامْ إِسڭّْذنْ زَّايكْ
أَقَا-ث إِ ڒبْذَا.
١٦١ شِينْ. ڒْْحُوكَّامْ ذَارّْشنْ خَافِي خْ وَالُو،
مَاشَا ؤُڒْ إِنُو ثُوغَا إِتّڭّْوذْ
زڭْ وَاوَاڒْ نّشْ.
١٦٢ نشّْ فَارْحغْ خْ لْوَاعْذْ نّشْ،
أَمشْنَاوْ إِجّنْ إِ إِتَّافْ
إِشْثْ ن ثْكشَّاضْثْ ثَامقّْرَانْثْ.
١٦٣ نشّْ شَارّْهغْ أَخَارِّيقْ ؤُ عِيفّغْ ث،
مَاشَا تّخْسغْ شَّارِيعَا نّشْ.
١٦٤ سبْعَا ن ثْوَاڒَاوِينْ ذڭْ وَاسّْ
صبْحغْ شكْ
خْ ڒحْكَامَاثْ ن ثْسڭْذَا نّشْ.
١٦٥ إِنِّي إِتّخْسنْ شَّارِيعَا نّشْ،
أَقَا غَارْسنْ ڒهْنَا ثَامقّْرَانْثْ،
وَارْ ذِينْ أَژْرُو ن ؤُنقْرَاضْ زَّاثْسنْ.
١٦٦ أَ سِيذِي، تّْرَاجِيغْ أَسنْجمْ نّشْ،
ؤُ تّڭّغْ عْلَاحْصَابْ ثِيوصَّا نّشْ.
١٦٧ ڒعْمَارْ إِنُو إِحطَّا شّْهَاذَاثْ نّشْ،
تّخْسغْ ثنْثْ أَطَّاسْ.
١٦٨ نشّْ حطِّيغْ ڒُْومُورَاثْ نّشْ
ذ شّْهَاذَاثْ نّشْ،
مَاغَارْ مَارَّا إِبْرِيذنْ إِنُو
أَرْزْمنْ زَّاثكْ.
١٦٩ ثَافْ. أَ سِيذِي، أجّْ أَذْ غَاركْ د-يَاوضْ
ؤُڒَاغِي إِنُو زَّاثْ إِ وُوذمْ نّشْ،
أوْشْ أَيِي ڒعْقڒْ عْلَاحْسَابْ أَوَاڒْ نّشْ.
١٧٠ أجّْ أَذْ د-ثَاسْ ثُوثْرَا إِنُو
غَارْ وُوذمْ نّشْ،
فكّْ أَيِي أَمْ مَامّشْ إِ ذ أَيِي ثنِّيذْ.
١٧١ إِينْشِيشنْ إِنُو أَذْ ؤُشْرُورنْ أَصبّحْ
أَمْ يِيجّْ ن ڒْْعُونْصَارْ،
مَاغَارْ شكْ ثسّڒْمَاذذْ أَيِي
ثِيوصَّا نّشْ.
١٧٢ إِڒسْ إِنُو أَذْ يَارّْ مِينْ ثنِّيذْ شكْ،
مَاغَارْ مَارَّا ڒُْومُورَاثْ نّشْ سڭّْذنْ.
١٧٣ أجّْ أَفُوسْ نّشْ أَذْ أَيِي إِڭّْ ثْوِيزَا،
مَاغَارْ إِخْضَارغْ ڒُْومُورَاثْ نّشْ.
١٧٤ أَ سِيذِي، تّْمژْرغْ غَارْ ؤُسنْجمْ نّشْ،
شَّارِيعَا نّشْ أَقَا ذَايسْ مژْرِي إِنُو.
١٧٥ أجّْ ڒعْمَارْ إِنُو أَذْ إِدَّارْ،
أَذْ شكْ إِصبّحْ،
أَذْ أَيِي عَاوْننْثْ لْفَارَايِيضْ نّشْ.
١٧٦ نشّْ ودَّارغْ
أَمْ يِيجّْ ن ؤُهُوڒِي إِودَّارنْ.
أَرْزُو خْ ؤُمْسخَّارْ نّشْ،
مَاغَارْ وَارْ تُّوغْ ڒُْومُورَاثْ نّشْ.