105
1 قَاذَامْ سِيذِي،
ڒَْاغَامْ خْ يِيسمْ نّسْ،
بَارّْحمْ س ثْمڭَّا نّسْ جَارْ ڒڭْنُوسْ.
2 غنّْجمْ أَسْ، زهّْذمْ إِ نتَّا،
سِيوْڒمْ خْ مَارَّا لْمُوعْجِيزَاثْ نّسْ.
3 شنّْعمْ إِخفْ نّشْ
س يِيسمْ نّسْ إِقدّْسنْ،
حِيمَا ؤُڒْ ن يِينِّي يَارزُّونْ سِيذِي، أَذْ إِفَارْحْ.
4 سقْسَامْ خْ سِيذِي ذ جّهْذْ نّسْ،
أَرْزُومْ ؤُذمْ نّسْ ڒبْذَا.
5 عقْڒمْ خْ لْمُوعْجِيزَاثْ نّسْ إِ إِڭَّا،
خْ ڒعْڒَامثْ نّسْ
ؤُ خْ ڒحْكَامَاثْ ن ؤُقمُّومْ نّسْ.
6 زَّارِيعثْ ن إِبْرَاهِيمْ، أَمْسخَّارْ نّسْ،
أَيْثْ ن يَاعْقُوبْ، إِنِّي زَّايسْ إِتّْوَافَارْزنْ!
7 نتَّا ذ سِيذِي، أَربِّي نّغْ.
ڒحْكَامَاثْ نّسْ إِ د-إِتَّاسنْ
خْ ثمُّورْثْ مَارَّا.
8 عقْڒمْ خْ ڒْعَاهْذْ نّسْ إِ ڒبْذَا،
أَوَاڒْ نِّي إِوصَّا إِ وَاڒفْ ن جِّيڒَاثْ،
9 إِ إِڭَّا أَكْ-ذ إِبْرَاهِيمْ،
ؤُ إِسّمْثنْ إِ-ث س ثْجَادْجِيثْ نّسْ إِ إِسْحَاقْ.
10 نتَّا إِڭَّا إِ-ث ذ ثَاوْصيّثْ إِ يَاعْقُوبْ،
إِ إِسْرَائِيل إِڭَّا إِ-ث ذ ڒْعَاهْذْ إِ ڒبْذَا،
11 ؤُمِي إِنَّا:
”أَذْ أَشْ وْشغْ ثَامُّورْثْ ن كنْعَانْ،
أَفِيڒُو ن ڒعْبَارْ ن ثسْغَارْثْ نْومْ!“
12 ؤُمِي ثُوغَا كنِّيوْ ذڭْ إِجّْ ن وُورُو ن يرْيَازنْ،
س ذْرُوسْ وَاهَا،
ؤُ أَمْ يِيبَارَّانِييّنْ إِ ثدْجِيمْ ذَايسْ.
13 نِيثْنِي ثلْعنْ زِي ڒْڭنْسْ غَارْ ڒْڭنْسْ نّغْنِي،
زڭْ إِشْثْ ن ثْڭلْذِيثْ غَارْ إِجّْ ن ڒْڭنْسْ نّغْنِي.
14 وَارْ إِجِّي ؤُڒَا ذ إِجّْ ن بْنَاذمْ
أَذْ ثنْ إِسّحْصَارْ،
إِعَاقبْ إِجدْجِيذنْ ذِي طّْوعْ نْسنْ.
15 وَارْ تّْحَاذَامْ شَا إِمذْهُوننْ إِنُو،
وَارْ تّڭّمْ ڒْغَارْ ذڭْ إِنَابِييّنْ إِنُو.
16 خنِّي إِڒَاغَا-د إِ ڒَاژْ غَارْ ثمُّورْثْ.
يَارْژَا أَسنْ مَارَّا ڒعْوتْشْ ن وغْرُومْ.
17 إِسّكّْ-د إِجّْ ن ورْيَازْ غَارْ زَّاثْ،
يُوسُوفْ إِمّنْزْ ذ إِسْمغْ.
18 شَارْفنْ إِضَارنْ نّسْ ذڭْ إِشذِّييّنْ،
ڒعْمَارْ نّسْ إِتّْوَاحْصَارْ ذڭْ وُوزَّاڒْ.
19 أَڒْ ڒْوقْثْ نِّي ذِي إِتّْوَاسّقْفڒْ
وَاوَاڒْ نّسْ
إِصفَّا أَسْ ڒْهَارْذْ ن سِيذِي.
20 إِسّكّْ ؤُجدْجِيذْ إِجّْ حِيمَا أَذْ أَسْ إِسَّارْخُو،
ڒْْحَاكمْ نْ ڒڭْنُوسْ إِضْڒقْ إِ-ث.
21 نتَّا إِڭَّا إِ-ث ذ بَابْ خْ ثَادَّارْثْ نّسْ،
ؤُڒَا ذ ڒْحَاكمْ خْ مَارَّا مِينْ غَارسْ.
22 حِيمَا أَذْ غَارسْ إِشدّْ ڒْحُوكَّامْ
ؤُ حِيمَا أَذْ إِسّڒْمذْ ثِيغِيثْ إِ إِمْغَارنْ نّسْ.
23 أَوَارْنِي أَيَا يُوسَا-د إِسْرَائِيل غَارْ مِيصْرَا،
إِقِّيمْ يَاعْقُوبْ أَمْ ؤُبَارَّانِي
ذِي ثمُّورْثْ ن حَامْ.
24 نتَّا إِڭَّا ڒْغِيدْجثْ ذِي ڒْڭنْسْ نّسْ أَطَّاسْ،
يَارَّا إِ-ث إِجْهذْ خْ يِينِّي ث إِحصَّارنْ.
25 نتَّا يَارَّا ؤُڒْ نْسنْ إِنّقْڒبْ،
أَڒَامِي ذوْڒنْ شَارّْهنْ ڒْڭنْسْ نّسْ،
ذوْڒنْغدَّارنْ إِمْسخَّارنْ نّسْ.
26 خنِّي إِسّكّْ-د مُوسَا، أَمْسخَّارْ نّسْ،
ذ هَارُونْ ونِّي إِفَارْزْ إِ-ث نتَّا.
27 نِيثْنِي ڭِّينْ ڒعْڒَامَاثْ نْسنْ إِفَارْزنْ جَارْ أَسنْ،
ؤُ ڭِّينْ لْمُوعْجِيزَاثْ ذِي ثمُّورْثْ ن حَامْ.
28 نتَّا إِسّكّْ-د ثَادْجسْثْ
ؤُشَا ثذْوڒْ مَارَّا ذ ثَادْجسْثْ.
نِيثْنِي وَارْغوّْغنْ شَا خْ وَاوَاڒنْ نّسْ.
29 نتَّا يَارَّا أَمَانْ نْسنْ ذ إِذَامّنْ
ؤُ إِنْغَا إِسڒْمَانْ نْسنْ.
30 نتَّا يَارَّا ثَامُّورْثْ نْسنْ
ثْسفَّايْ س إِقَارْقْرِيونْ،
أَڒْ ذَاخڒْ ذڭْ إِخَّامنْ ن إِجدْجِيذنْ نْسنْ.
31 نتَّا إِسِّيوڒْ ؤُشَا يُوسَا-د
ويْڒَافْ ن إِبعَّاشْ،
نَّامُوسْ وْضَانْ-د
خْ ثمُّورْثْ نْسنْ مَارَّا.
32 نتَّا يَارَّا أَنْژَارْ نْسنْ ذ أَبْرُورِّي،
إِسّكّْ-د ثِيمسِّي ذ إِشعَّاڒنْ
خْ ثمُّورْثْ نْسنْ.
33 نتَّا إِوْثَا ثَازَايَارْثْ نْسنْ ذ وَارْثُو نْسنْ،
يَارْژَا ثِيشجُّورَا ذِي ثمُّورْثْ نْسنْ.
34 نتَّا إِسِّيوڒْ، خنِّي ثُوسَا-د ثْمُوغْرِي،
ؤُڒَا ذ بُو-وڒْسَاحْ، أَقَا أَثنْ بْڒَا ڒحْسَابْ.
35 نِيثْنِي شِّينْ مَارَّا أَفْسُو ذِي ثمُّورْثْ نْسنْ،
شِّينْ ڒْغِيدْجثْ ن ثمُّورْثْ نْسنْ.
36 نتَّا إِنْغَا مَارَّا إِمنْزَا
ذِي ثمُّورْثْ نْسنْ،
إِمنْزَا ن مَارَّا ثَارْيَاسْثْ نْسنْ.
37 نتَّا إِسُّوفّغْ إِ-ثنْ-د
س نُّوقَارْثْ ذ وُورغْ،
وَارْ ذِينْ ثُوغِي ؤُڒَا ذ إِجّْ
ذِي ثْقبَّاڒْ نْسنْ إِ إِنْذرْفنْ.
38 مِيصْرَا ثْفَارْحْ س وُوفُّوغْ نْسنْ،
مَاغَارْ ثوْضَا خَاسنْ ثِيڭّْوُوذِي ثمْغَارْ.
39 نتَّا إِبزّعْ أَسيْنُو أَمْ يِيجّْ ن أَرْوَاقْ
ؤُ ثْمسِّي حِيمَا أَذْ ثوْشْ ثَافَاوْثْ س دْجِيڒثْ.
40 نِيثْنِي ژُّودْجنْ ؤُ نتَّا يَارَّا
أَذْ د-أَسنْ إِجْضَاضْ، قَّارنْ أَسْ ’ثْسَالْوَا‘،
إِسّْجِّيونْ إِ-ثنْ س وغْرُومْ ن ؤُجنَّا.
41 نتَّا يَارْزمْ ثَاصْضَارْثْ،
أَمَانْ ذُوقّْزنْ-د زَّايسْ،
ؤُزّْڒنْ خْ ڒَاژَاغْ ؤُ ذوْڒنْ أَمْ يغْزَارْ.
42 مَاغَارْ نتَّا إِعْقڒْ
خْ وَاوَاڒْ نّسْ إِقدّْسنْ،
خْ ؤُمْسخَّارْ نّسْ إِبْرَاهِيمْ.
43 نتَّا إِسُّوفّغْ-د ڒْڭنْسْ نّسْ
س ڒفْرَاحثْ،
إِنِّي زَّايسْ إِتّْوَافَارْزنْ س ؤُسْڒِيوْڒوْ.
44 نتَّا إِوْشَا أَسنْ ثِيمُّورَا ن ڒڭْنُوسْ،
نِيثْنِي وَارْثنْ ثَامَارَا ن شُّوعُوبْ،
45 حِيمَا أَذْ طّْفنْ ذِي ثْوصَّا نّسْ،
أَذْ حْضَانْ إِزرْفَانْ نّسْ. هَالِّيلُو-يَاه.