١٠٣
١ ن ذَاوُوذْ.
بَاركْ سِيذِي، أَ ڒعْمَارْ إِنُو،
ذ مَارَّا مِينْ ذَايِي إِسمْ نّسْ إِقدّْسنْ.
٢ بَاركْ سِيذِي، أَ ڒعْمَارْ إِنُو،
وَارْ تّتُّوعمَّارْصْ
مَارَّا ثِيمڭَّا نّسْ إِصبْحنْ.
٣ نتَّا ذ ونِّي ذ أَشْ إِغفَّارنْ
مَارَّا دّْنُوبْ نّشْ،
ونِّي إِسّْڭنْفَانْ مَارَّا ڒهْڒَاشَاثْ نّشْ،
٤ ونِّي إِفْذِينْ ثُوذَارْثْ نّشْ زِي ثُورْصُوضِي،
ونِّي خَاكْ إِڭِّينْ تَّاجْ
ن ثْمخْسِيوْثْ إِشوَّارنْ ذ أَرّحْمثْ،
٥ ونِّي إِسّْجَّاوَاننْ أَقمُّومْ نّشْ
س مِينْ إِصبْحنْ،
ونِّي إِتَّارَّانْ ثمْژِي نّشْ أَمْ ؤُڭِيذرْ.
٦ سِيذِي إِتّڭّْ ثَاسڭْذَا ذ ڒْْحقّْ
إِ مَارَّا إِنِّي إِتّْوَاحصَّارنْ.
٧ نتَّا إِسّْشنْ إِ مُوسَا إِبْرِيذنْ نّسْ،
إِ أَيْثْ ن إِسْرَائِيل ثِيمڭَّا نّسْ.
٨ سِيذِي ذ أَرْحِيمْ ذ أَحْنِينْ،
غَارسْ تَّاسِيعْ ن ڒْْخَاضَارْ،
إِشُّورْ س ثْمخْسِيوْثْ إِشوَّارنْ.
٩ نتَّا وَارْ إِتّمْشُوبُّوشْ إِ ڒبْذَا،
وَارْ إِتّْغِيمِي إِتّْخيِّيقْ إِ ڒبْذَا.
١٠ نتَّا وَارْ ذ أَنغْ إِتّڭّْ
عْلَاحْسَابْ دّْنُوبْ نّغْ
ؤُ وَارْ زَّايْنغْ إِخدْجفْ
عْلَاحْسَابْ ڒْْمُوعْصِييّثْ نّغْ،
١١ مَاغَارْ أَمْ ؤُجنَّا يُوعْڒَانْ خْ ثمُّورْثْ،
أَمُّو إِ ثمْغَارْ
ثْمخْسِيوْثْ نّسْ إِشوَّارنْ
ثِيوَا مَارَّا إِنِّي ث إِتّڭّْوذنْ.
١٢ أَمْ إِڭّْوجْ شَّارْقْ خْ ڒْْغَارْبْ،
أَمُّو إِ إِسِّيڭّْوجْ نتَّا
إِخطَّانْ نّغْ خَانغْ.
١٣ أَمْ مَامّشْ إِحِينّْ بَابَاثْسنْ
خْ إِحنْجِيرنْ نّسْ،
أَمُّو إِ إِتّْحِينّْ سِيذِي خْ يِينِّي ث إِتّڭّْوذنْ.
١٤ مَاغَارْ نتَّا إِسّنْ مَامّشْ نتّْوَاڭّْ،
إِعْقڒْ أَقَا نشِّينْ ذ أَشَاڒْ.
١٥ ؤُسَّانْ ن بْنَاذمْ أَمشْنَاوْ ثُوڭَا،
نتَّا إِتّْنُووَارْ أَمْ ثْنُووَّاشْثْ ن ييَّارْ.
١٦ مَاڒَا إِكَّا-د خَاسْ ؤُسمِّيضْ، وَارْ ثقِّيمْ
ؤُ أَمْشَانْ مَانِي ثُوغَا ثْبدّْ،
وَارْ خَاسْ إِسِّينْ عَاذْ.
١٧ مَاشَا ثَامخْسِيوْثْ إِشوَّارنْ ن سِيذِي
ثتّْغِيمَا زِي ڒبْذَا أَڒْ ڒبْذَا
ثِيوَا يِينِّي ث إِتّڭّْوذنْ،
ؤُ ثَاسڭْذَا نّسْ ثتّْغِيمَا
إِ وَارَّاوْ ن وَارَّاوْ،
١٨ إِ مَارَّا إِنِّي إِحطَّانْ ڒْْعَاهْذْ نّسْ
ؤُ إِعقّْڒنْ خْ ڒُْومُورَاثْ نّسْ،
مَاحنْذْ أَذْ زَّايْسنْ تّڭّنْ.
١٩ سِيذِي إِسّْبدّْ ڒْْعَارْشْ نّسْ ذڭْ ؤُجنَّا،
ثَاڭلْذَا نّسْ ثْحكّمْ خْ مَارَّا مِينْ إِدْجَانْ.
٢٠ بَارْكنْثْ سِيذِي، كنِّينْثْ، لْمَالَاكَاثْ نّسْ،
أَيْثْ ن بُو-ثغْرُوضْثْ إِمحْضنْ
إِنِّي إِتّڭّنْ أَوَاڒْ نّسْ،
إِنِّي إِتّسْڒَانْ إِ ثْمِيجَّا ن وَاوَاڒْ نّسْ.
٢١ بَارْكنْثْ سِيذِي، مَارَّا ڒْْعسْكَارَاثْ نّسْ،
كنِّيوْ، إِمْسخَّارنْ نّسْ،
إِنِّي إِتّڭّنْ مِينْ ذ أَسْ يَارشْقنْ!
٢٢ بَارْكمْ سِيذِي،
أَ مَارَّا مِينْ إِتّْوَاڭّنْ س ؤُفُوسْ نّسْ،
ذِي مَانِي مَا إِ ثدْجَا ڒحْكَامثْ نّسْ.
بَاركْ سِيذِي، أَ ڒعْمَارْ إِنُو.