٨
أَڒَاغِي ن ثِيغِيثْ
١ مَا وَارْ ثتّْڒِيغِي ثِيغِيثْ ؤُ وَارْ ثسْڭِيعِّيذْ
ڒفْهَامثْ ثْمِيجَّا نّسْ؟
٢ خْ ثْقِيشَّاثْ ن ڒڭْعُوذِي خْ وبْرِيذْ،
مَانِي تّمْسڒْقَانْ إِمسْرَاقْ
ثْبدّْ نتَّاثْ ذ أَبذِّي.
٣ غَارْ ؤُغزْذِيسْ ن ثوُّورَا،
غَارْ وَاذَافْ ن ثنْذِينْثْ،
مَانِي غَا ثَاذْفذْ خْ ثوُّورَا،
ثتّْڒَاغَا س جّهْذْ:
٤ ”إِ كنِّيوْ، أَ إِرْيَازنْ، تّْڒَاغِيغْ،
ثْمِيجَّا إِنُو ثتّفّغْ غَارْ ثَارْوَا ن بْنَاذمْ.
٥ كنِّيوْ إِحَافِييّنْ،
فهْممْ خنِّي مِينْ إِدْجَانْ ذ أَفْثَانْ،
كنِّيوْ إِبُوهَاڒِييّنْ،
فهْممْ س وُوڒْ نْومْ.
٦ سْڒمْ، مِينْزِي أَذْ سِّيوْڒغْ
أَوَاڒنْ إِ د-إِجبّْذنْ ڒفْثنْ،
أَنُورْزمْ ن إِينْشِيشنْ إِنُو
جبّذْ-د ثِيمسْڒَايِينْ إِسڭّْذنْ،
٧ مَاغَارْ أَنغْ إِنُو أَذْ يِينِي ثِيذتّْ س نّيّثْ،
ڒْْهَارْذْ إِعفّْننْ أَقَا-ث ذ نّْعِي
إِ إِينْشِيشنْ إِنُو.
٨ مَارَّا أَوَاڒنْ ن ؤُقمُّومْ إِنُو
تّفّْغنْ-د زِي ثْسڭْذَا،
وَارْ ذَايْسنْ ؤُڒَا ذ إِشْثْ ن ڒْْحَاجّثْ
إِخْنُونّسنْ نِيغْ إِفَارْغنْ.
٩ أَقَا أَثنْ مَارَّا صْفَانْ
إِ ونِّي ذِي ثدْجَا ڒفْهَامثْ،
ؤُڒَا س ڒقْيَاسْ إِ يِينِّي إِخْسنْ أَذْ أَفنْ ثُوسّْنَا.
١٠ كْسِيمْ تَّارْبِييّثْ إِنُو، وَارْ إِدْجِي نُّوقَارْثْ،
ؤُڒَا ثُوسّْنَا كْثَارْ خْ وُورغْ إِقُّورنْ،
١١ مَاغَارْ ثِيغِيثْ حْسنْ زِي ڒْْمَارْجَانْ،
مَارَّا مِينْ ذِي إِزمَّارْ بْنَاذمْ
أَذْ إِمژْرِي،
وَارْ إِزمَّارْ أَذْ ذَايسْ يَارْوسْ.
١٢ نشّْ، ثِيغِيثْ، زدّْغغْ غَارْ وفْثَانْ،
تَّافغْ ثُوسّْنَا س ؤُحَاذُورْ.
١٣ ثِيڭّْوُوذِي ن سِيذِي ذ أَشْرَاهْ ن ڒْْغَارْ،
نّْفَاخثْ ذ ثْشنَّاعْثْ ذ ؤُمسْرُوقْ أَعفَّانْ،
نشّْ شَارّْهغْ ؤُڒَا ذ أَقمُّومْ
إِشُّورْ س ڒخْذَاعَاثْ.
١٤ غَارِي أَشَاوَارْ ذ ثْوِيزَا،
نشّْ ذ ڒفْهَامثْ، غَارِي جّهْذْ.
١٥ زَّايِي حكّْمنْ إِجدْجِيذنْ،
زَّايِي تَّاريْسنْ أَيْثْ ن جّهْذْ س ثْسڭْذَا.
١٦ زَّايِي حكّْمنْ ڒْْحُوكَّامْ
ذ ثَارْوَا ن ثَاصِيڒثْ،
مَارَّا ڒْْقُوضَاثْ ن ثمُّورْثْ.
١٧ نشّْ تّخْسغْ مَارَّا
إِنِّي ذ أَيِي إِتّخْسنْ،
ذ يِينِّي خَافِي يَارزُّونْ زِيشْ، أَذْ أَيِي أَفنْ.
١٨ أَڭْڒَا ذ شَّانْ أَقَا أَثنْ غَارِي،
أَڭْڒَا إِقِّيمنْ ذ ثْسڭْذَا.
١٩ فْرُوثَا إِنُو ثشْنَا خْ وُورغْ إِتِّيسِّيقنْ،
وَاهْ خْ وُورغْ أَزْذَاذْ،
ڒْْغِيدْجثْ إِنُو ثعْذُو نُّوقَارْثْ إِقُّورنْ.
٢٠ نشّْ ڭُّورغْ خْ ؤُمسْرُوقْ ن ثْسڭْذَا،
ذِي ڒْْوسْطْ ن إِمسْرَاقْ ن ڒْْحقّْ،
٢١ حِيمَا أَذْ أَرّغْ إِنِّي ذ أَيِي إِتّخْسنْ
أَذْ طّْفنْ إِشْثْ ن ثسْغَارْثْ ذ ڒْْوَارْثْ،
نشّْ أَذْ شُّورغْ إِخَّامنْ ن ثْخُوبَايْ نْسنْ.
٢٢ سِيذِي إِڭَّا أَيِي، ذ أَمزْوَارُو ن وبْرِيذْ نّسْ،
عَاذْ قْبڒْ أَمزْوَارُو ن ثْمڭَّا نّسْ
زڭْ وشْحَاڒْ ؤُيَا.
٢٣ زِي ڒبْذَا إِتّْوَازدْجعْ خَافِي جّهْذْ،
زڭْ ؤُمزْوَارُو،
زِي ڒْْوقْثْ ن ؤُمزْوَارُو
إِ ذِي ثتّْوَاڭّْ ثمُّورْثْ،
٢٤ ؤُمِي وَارْ ذِينْ ثُوغِي عَاذْ أَمَانْ إِهوْڒنْ،
نشّْ تّْوَاخڒْقغْ-د،
ؤُمِي وَارْ ذِينْ ثُوغِي عَاذْ ڒْْعُونْصَارَاثْ
شُّورنْثْ س وَامَانْ.
٢٥ قْبڒْ مَا أَذْ تّْوَاڭّنْ إِذُورَارْ،
قْبڒْ مَا أَذْ إِڒِينْثْ ثوْرِيرِينْ،
ثُوغَا خڒْقغْ-د نشّْ.
٢٦ نتَّا ثُوغَا عَاذْ وَارْ د-إِخْڒِيقْ
ثَامُّورْثْ ذ إِيَّارنْ،
ؤُڒَا ذ ثَامزْوَارُوثْ ن ثْعجَّاجْثْ ن دُّونشْثْ.
٢٧ ؤُمِي نتَّا إِڭَّا إِجنْوَانْ، ثُوغَا أَيِي ذِينْ،
ؤُمِي نتَّا يَارْشمْ إِشْثْ ن ثْقُورَارشْثْ
خْ وُوذمْ ن وَامَانْ إِهوْڒنْ.
٢٨ ؤُمِي نتَّا إِڭَّا إِسيْنُوثنْ سنّجْ،
ؤُمِي تّْوَاجهْذنْثْ
ڒْْعُونْصَارَاثْ ن وَامَانْ إِهوْڒنْ،
٢٩ ؤُمِي نتَّا إِڭَّا إِ ڒبْحَارْ أَيْمِيرْ نّسْ،
مَاحنْذْ أَمَانْ
وَارْ د -عدُّونْ ڒُْومُورْ نّسْ،
ؤُمِي نتَّا إِعْبَارْ ذْسُوسَا ن ثمُّورْثْ،
٣٠ ثُوغَا أَيِي ذ أَمُوذْرُوسْ إِعِيزّنْ
غَارْ ؤُغزْذِيسْ نّسْ.
نشّْ ثُوغَا أَيِي مَارَّا ذ ثَارِّيثْ ن مژْرِي
أَسّْ خْ وَاسّْ،
تِّيرَارغْ زَّاثْ إِ وُوذمْ نّسْ ڒبْذَا،
٣١ تِّيرَارغْ ذِي مَارَّا ثَامُّورْثْ نّسْ،
أَمْ ثُوغَا ثَارِّيثْ ن مژْرِي إِنُو
أَكْ-ذ ثَارْوَا ن بْنَاذمْ.
٣٢ خنِّي ڒخُّو، أَ إِحنْجِيرنْ إِنُو،
سْڒمْ-د غَارِي!
سّعْذْ ن يِينِّي إِحطَّانْ إِبْرِيذنْ إِنُو.
٣٣ سْڒمْ غَارْ تَّارْبِييّثْ
ؤُ ذوْڒمْ ذ إِمِيغِيسنْ،
وَارْ نطَّارمْ تَّارْبِييّثْ.
٣٤ سّعْذْ ن بْنَاذمْ نِّي غَارِي إِسْڒَانْ،
ونِّي إِطّْفنْ أَشْبَارْ غَارْ ثوُّورَا إِنُو
زڭْ وَاسّْ أَڒْ وَاسّْ،
إِحتَّا خْ ثْغمَّارْ ن ثوُّورَا إِنُو،
٣٥ مَاغَارْ ونِّي ذ أَيِي يُوفِينْ، أَذْ يَافْ ثُوذَارْثْ،
ؤُ أَذْ إِطّفْ أَرْضَا ن سِيذِي.
٣٦ ونِّي إِ ذ أَيِي إِخْضَانْ، إِيزّمْ ڒعْمَارْ نّسْ،
مَارَّا إِنِّي ذ أَيِي إِشَارّْهنْ، تّخْسنْ ڒْْموْثْ.