٥
أَغكّْوِي زِي ثمْغَارْثْ ثَابَارَّانِيثْ
١ مِّي إِنُو، أوْشْ ثَايْنِيثْ إِ ثِيغِيثْ إِنُو،
أوْشْ أَمزُّوغْ إِ ڒفْهَامثْ إِنُو،
٢ مَاحنْذْ أَذْ ثوْشذْ حَاضُورْ،
ؤُ إِينْشِيشنْ نّشْ أَذْ حْضَانْ خْ ثُوسّْنَا.
٣ مِينْزِي إِينْشِيشنْ ن ثمْغَارْثْ ثَابَارَّانِيثْ
تُّوذُومنْ س ثَامّنْثْ ن ثغْرَاصْثْ،
أَنغْ نّسْ ذ أَڒقَّاغْ خْ زّشْثْ،
٤ مَاشَا غَارْ ؤُنڭَّارْ
أَقَا-ت ذ ثَامرْزَاڭْثْ أَمْ شِّيحْ،
ثقْضعْ أَمْ يِيجّْ ن سِّيفْ
س ثْنَاينْ ن وُوذْمَاونْ.
٥ إِضَارنْ نّسْ تَّاوْينْ غَارْ ڒْْموْثْ،
إِصُورَافْ نّسْ ندّْهنْ غَارْ ڒَْاخَارْثْ.
٦ أَڒَامِي وَارْ ثطِّيفذْ عمَّارْصْ
أَبْرِيذْ ن ثُوذَارْثْ،
ڭُّورنْثْ ڒَْاثَارَاثْ ن إِضَارنْ نّسْ
سَّا ذ سَّا بْڒَا مَا ثسّْنذْ شكْ.
٧ خنِّي ڒخُّو، أَ إِحنْجِيرنْ، سْڒمْ-د غَارِي،
وَارْ ثْحيَّاذمْ شَا
خْ وَاوَاڒنْ ن ؤُقمُّومْ إِنُو.
٨ سِيڭّْوجْ أَبْرِيذْ نّشْ خَاسْ،
وَارْ تَّاذسْ ثَاوَّارْثْ ن ثَادَّارْثْ نّسْ،
٩ حِيمَا وَارْ ثتِّيشذْ شَّانْ نّشْ إِ إِنّغْنِي،
إِسڭّْوُوسَا نّشْ إِ ونِّي إِتّقْسِيحنْ أَطَّاسْ،
١٠ حِيمَا إِبَارَّانِييّنْ
وَارْ تّْجَاوَاننْ ذڭْ وَاڭْڒَا نّشْ،
ؤُ مَارَّا ڒْْغِيدْجثْ ن ؤُمَارّثْ نّشْ
وَارْ د-ثتِّيسْ ذِي ثَادَّارْثْ
ن ونِّي وَارْ إِتّْوِيسّْننْ،
١١ ؤُ أَذْ ثْزهَّارذْ غَارْ ؤُنڭَّارْ،
خْمِي غَا ثتّْوَاشّْ أَرِّيمثْ نّشْ
ذ ويْسُومْ نّشْ،
١٢ أَذْ ثِينِيذْ: ”مَامّشْ ڭِّيغْ نشّْ
شَارْهغْ تَّارْبِييّثْ،
مَامّشْ إِنْضَارْ ؤُڒْ إِنُو أَوبّخْ؟
١٣ مَامّشْ وَارْ سْڒِيغْ غَارْ ثْمِيجَّا
ن يِينِّي ذ أَيِي إِذَارّْبنْ،
وَارْ وْشِيغْ أَمزُّوغْ إِنُو
إِ إِمْسڒْمَاذنْ إِنُو؟
١٤ عْڒَاحَاڒْ ثُوغَا ؤُفِيغْ إِخفْ إِنُو
ذِي عْڒَامْ كُوڒْ ڒْغَارْ،
ذِي ڒْْوسْطْ ن وڭْرَاوْ ن ڒْْڭنْسْ ؤُ ن ثْمسْمُونْثْ!“
١٥ سُووْ أَمَانْ زڭْ وَانُو نّشْ،
ؤُڒَا ذ أَمَانْ إِسِّيزّْڒنْ
زِي ڒَْادْجَاغْ ن ڒْْعُونْصَارْ نّشْ.
١٦ إِڒِي أَذْ سّفْينْ وَامَانْ
ن ڒْْعُونْصَارْ نّشْ بَارَّا،
أَمْ ثْغزْرَاثِينْ ن وَامَانْ خْ إِبْرِيذنْ.
١٧ أجّْ إِ-ثنْ أَذْ إِڒِينْ إِ شكْ وحّْذكْ،
وَارْ إِدْجِي إِ إِبَارَّانِييّنْ إِ ذِينْ زَّاثكْ.
١٨ أَذْ إِتّْوَابَاركْ ڒْْعُونْصَارْ نّشْ،
فَارْحْ إِ ثمْغَارْثْ زڭْ وُوسَّانْ ن ثمْژِي نّشْ.
١٩ ثُوذَاذْثْ إِعِيزّنْ ؤُڒَا ذ ثِيغيْذثْ ن وزْغَارْ
إِشوَّارنْ نتَّاثْ!
أجّْ إِبَّاشْ نّسْ أَذْ شكْ سّْيِيوْينْ
ذِي مَارَّا ؤُسَّانْ،
سلّمْ إِخفْ نّشْ ڒبْذَا غَارْ ثَايْرِي نّسْ!
٢٠ مَايمِّي، أَ مِّي،
أَذْ شكْ ثغْوَا ثمْغَارْثْ ثَابَارَّانشْثْ،
أَذْ ثْذَارّْعذْ إِ وحْسِينْ ن ثمْغَارْثْ
وَارْ ثسِّينذْ؟
٢١ مَاغَارْ إِبْرِيذنْ ن بْنَاذمْ
أَقَا أَثنْ ذِينْ زَّاثْ إِ ثِيطَّاوِينْ ن سِيذِي،
نتَّا يَارْزُو ذِي مَارَّا إِمسْرَاقْ نّسْ.
٢٢ ڒْْمُوعْسِييّثْ ن يِيخفْ نّسْ
أَذْ ثْحبّسْ أَعفَّانْ،
س إِسغْوَانْ ن دّْنُوبْ نّسْ أَذْ إِتّْوَاشدّْ.
٢٣ نتَّا أَذْ إِمّثْ
ؤُمِي وَارْ ذِينْ ثُوغِي تَّارْبِييّثْ،
أَذْ إِودَّارْ
س ثُوبُّوهڒْيَا نّسْ ثَامقّْرَانْثْ.