٣٠
أَوَاڒنْ إِوزْننْ ن أَجُورْ
١ أَوَاڒنْ ن أَجُورْ،
مِّيسْ ن يَاكِي، زِي ثقْبِيتْشْ ن مَاسَّا.
نشّْ أَرْبڒغْ، أَ أَربِّي،
نشّْ أَرْبڒغْ، أَ أَربِّي، ؤُ كمّْڒغْ.
٢ مَاغَارْ نشّْ ذ أَقفُّوحْ، وَارْ إِدْجِي ذ بْنَاذمْ،
ڒفْهَامثْ ن بْنَاذمْ وَارْ غَارِي ثدْجِي.
٣ نشّْ وَارْ ڒْْمِيذغْ ثِيغِيثْ،
مَاحنْذْ أَذْ غَارِي ثِيڒِي ثُوسّْنَا
ن ؤُمْقدَّاسْ أَمقّْرَانْ.
٤ وِي إِڭعّْذنْ غَارْ ؤُجنَّا ؤُشَا إِهْوَا-د؟
مَانْ ونْ إِيَارّْونْ أَسمِّيضْ
ذڭْ إِفَاسّنْ نّسْ؟
وِي إِسّنّْضنْ أَمَانْ ذڭْ وَارُّوضْ؟
وِي يَاركّْننْ
مَارَّا ثِينڭُّورَا ن ثمُّورْثْ؟
مَانْ إِسمْ نّسْ ؤُ مَانْ إِسمْ ن مِّيسْ؟
شكْ ثسّْنذْ ث، مَا وَارْ إِدْجِي أَمنِّي؟
٥ كُوڒْ أَوَاڒْ ن أَربِّي إِتّْوَاصفَّا،
أَقَا نتَّا ذ أَذُورِّي
إِ يِينِّي غَارسْ د-يَاركّْوَاڒنْ.
٦ وَارْ أَرنِّي غَارْ وَاوَاڒنْ نّسْ،
حِيمَا نتَّا وَارْ شكْ إِتّْوبّخْ،
ؤُ أَذْ ثْبَانذْ-د شكْ ذ بُو-إِخَارِّيقنْ.
٧ نشّْ تَّارغْ أَشْ ثْنَاينْ ن ثْمسْڒَايِينْ،
وَارْ خَافِي ثنْثْ قطّعْ قْبڒْ إِ غَا مّْثغْ.
٨ سِيڭّْوجْ خَافِي مِينْ إِبضْڒنْ
ذ ڒْْهَارْذْ إِخَارِّيقنْ،
وَارْ ذ أَيِي تِّيشْ زّڒْضْ ؤُڒَا ذ وَاڭْڒَا،
شَارّڭْ أَيِي ثَاسْغَارْثْ إِنُو
إِ ذ أَيِي د-إِتَّاسنْ زڭْ وغْرُومْ،
٩ مَاڒَا لَّا، خْمِي غَا جِّيوْنغْ،
أَذْ ثَاغْ أَذْ شكْ نْكَارغْ،
أَذْ إِنِيغْ ’وِي إِدْجَانْ سِيذِي؟‘،
نِيغْ خنِّي، مَاڒَا زڒْضغْ، أَذْ أَشَارغْ،
ؤُ أَذْ ڭّغْ ڒْْعِيبْ ذڭْ يِيسمْ ن أَربِّي إِنُو.
١٠ وَارْ شقّفْ ذڭْ إِجّْ ن ؤُمْسخَّارْ
غَارْ سِيذِيسْ نّسْ،
حِيمَا نتَّا وَارْ شكْ إِنعّڒْ
ؤُ خنِّي شكْ أَذْ ذَايكْ يِيڒِي ڒْْعِيبْ.
١١ أَقَا ذِينْ إِجّْ ن جِّيڒْ إِ إِنعّْڒنْ بَابَاسْ،
ؤُ وَارْ إِتّْبَاركْ يمَّاسْ،
١٢ إِجّْ ن جِّيڒْ إِ يدْجَانْ ذ أَمزْذَاڭْ
ذِي ثِيطَّاوِينْ نّسْ،
مَاشَا وَارْ إِتّْوَاسِيرْذْ زِي ڒخْمجْ نّسْ،
١٣ إِجّْ ن جِّيڒْ س ڒْْخزْرَاثْ إِنفْخنْ،
س وَابْڒِيونْ نّسْ إِڭعّْذنْ،
١٤ إِجّْ ن جِّيڒْ س ثغْمَاسْ أَمْ ڒسْيُوفْ
ذ ثغْمَاسْ ن ثغْمَارْثْ أَمْ ڒمْوَاسْ،
حِيمَا أَذْ صَارْضنْ
إِنِّي إِتّْوَاحْصَارنْ زِي ثمُّورْثْ
ذ إِمزْڒَاضْ زڭْ إِوْذَانْ.
١٥ ثَادَّا غَارسْ ثْنَاينْ ن يسِّيسْ:
’أوْشْ!‘ ’أوْشْ!‘
أَقَا ذِينْ ثْڒَاثَا نِّيعمَّارْصْ أَذْ جِّيوْننْ.
أَربْعَاعمَّارْصْ أَذْ إِنِينْ: ”شْفَا!“
١٦ ڒَْاخَارْثْ ذ ڒمْڒَاوثْ إِبلّْعنْ،
ثَامُّورْثْ إِ وَارْ إِجِّيوْننْعمَّارْصْ
زڭْ وَامَانْ،
ؤُڒَا ذ ثْمسِّي
وَارْ قَّارنْثْعمَّارْصْ: ”شْفَا!“
١٧ ثِيطّْ إِ إِسّْثهْزَانْ زِي بَابَاسْ،
ؤُ ثسّحْقَارْ طَّاعثْ إِ يمَّاسْ،
أَذْ ت قڒْعنْ إِبَاغْڒِيونْ غَارْ ثغْزَارْثْ،
ؤُ إِمژْيَاننْ ن ؤُڭِيذرْ أَذْ ت شّنْ.
١٨ ثْڒَاثَا-يَا ن ثْمسْڒَايِينْ
عْذُونْثْ أَيِي س ڒعْجبْ،
أَربْعَا وَارْ ثنْثْ سِّينغْ:
١٩ أَبْرِيذْ ن ؤُڭِيذرْ ذڭْ ؤُجنَّا،
أَبْرِيذْ ن ؤُفِيغَارْ خْ ثصْضَارْثْ،
أَبْرِيذْ ن ؤُغَارَّابُو ذڭْ وُوڒْ ن ڒبْحَارْ،
ؤُ أَبْرِيذْ ن ورْيَازْ أَكْ-ذ ثعْزَارشْثْ.
٢٠ أَمُّو إِ إِتّڭّْ
أَبْرِيذْ ن إِشْثْ ن ثمْغَارْثْ إِزنَّانْ:
نتَّاثْ ثتّتّْ، ثسِّيرِيذْ أَقمُّومْ نّسْ،
ثقَّارْ: ”نشّْ وَارْ ڭِّيغْ وَالُو ذ ڒْْغشّْ!“
٢١ سَاذُو ثْڒَاثَا ن ثْمسْڒَايِينْ-أَ
ثنْهزّْ ثمُّورْثْ،
سَاذُو أَربْعَا إِ وَارْ ثْزمَّارْ أَذْ ثَارْبُو:
٢٢ سَاذُو إِجّْ ن ؤُمْسخَّارْ
مَاڒَا نتَّا إِذْوڒْ ذْ أَجدْجِيذْ،
سَاذُو إِجّْ ن ؤُبُوهَاڒِي
مَاڒَا نتَّا إِجِّيونْ أَغْرُومْ،
٢٣ سَاذُو إِشْثْ ن ثمْغَارْثْ ثتّْوَاسّحْقَارْ
مَاڒَا نتَّاثْ ثتّْوَاسّمْڒشْ،
ؤُ سَاذُو إِشْثْ ن ثَايَّا
مَاڒَا ثطّفْ ڒْْوَارْثْ ن لَالَّاسْ.
٢٤ أَربْعَا-يَا ذ إِمژْيَاننْ قَاعْ خْ ثمُّورْثْ،
عَاذْ نِيثْنِي ذ إِمِيغِيسنْ قَاعْ:
٢٥ ثِيكضْفِينْ وَارْ دْجِينْثْ ذ ڒْْڭنْسْ إِجهْذنْ،
مَاشَا عَاذْ نِيثنْثِي سّوْجَاذنْثْ
مَاشَّا نْسنْ ذڭْ ؤُنبْذُو.
٢٦ إِكَاوْكَاونْ ن ثصْضَارْثْ
ذ إِجّْ ن ڒْْڭنْسْ نْهْڒَا جّْهذْ،
مَاشَا نِيثْنِي بنَّانْ
ثَازذِّيغْثْ نْسنْ خْ ثصْضَارْثْ.
٢٧ ثَامُوغْرِي وَارْ غَارسْ بُو أَجدْجِيذْ،
وَاخَّا أَمنِّي إِفّغْ س ؤُستّفْ مَارَّا.
٢٨ أَزرْمُومِّي ثْزمَّارذْ
أَذْ ث ثطّْفذْ س ثْنَاينْ ن إِفَاسّنْ،
عَاذْ أَقَا-ث نتَّا ذِي ڒقْصُورْ ن إِجدْجِيذنْ.
٢٩ ثْڒَاثَا-يَا صُّورُوفنْ س ڒْْعزّْ،
أَربْعَا ڭُّورنْ س ثشْڒِي ثشْنعْ:
٣٠ أَيْرَاذْ، بُو-ثغْرُوضْثْ جَارْ ڒْْمَارْ،
ونِّي وَارْ إِتّْوخِّيرنْ زَّاثْ إِ حذْ،
٣١ إِجّْ ن ؤُغِيڒَاسْ س ثجْعِينَّاثِينْ نّسْ بيْسنْثْ،
نِيغْ إِجّْ ن ؤُمْيَانْ،
ؤُ إِجّْ ن ؤُجدْجِيذْ نِّي غَارْ إِدْجَا
ؤُڒَاغِي ن ؤُمنْغِي.
٣٢ مَاڒَا شكْ ثڭِّيذْ س ثُوبُّوهڒْيَا
ؤُمِي ثسّْڭعّْذذْ إِخفْ نّشْ،
نِيغْ ثْخمّمذْ ذِي ثحْرَايْمشْثْ:
سَارْسْ أَفُوسْ خْ ؤُقمُّومْ!
٣٣ مَاغَارْ أَسنْذُو ن ؤُغِي إِتَّاوِي-د ثْرُوسِّي،
ؤُ أَسنْذُو ن ونْزَارنْ
إِتَّاوِي-د إِذَامّنْ،
ؤُ أَسنْذُو ن ؤُخيّقْ،
إِتَّاوِي-د أَمْشُوبّشْ.