٢٥
أَوَاڒنْ إِوزْننْ ن سُولِيمَانْ - ثَاسْغَارْثْ 2
١ ؤُڒَا ذ إِنَا ذ أَوَاڒنْ إِوزْننْ ن سُولِيمَانْ
نِّي إِتّْعَاوَاذنْ ؤُرِينْ ثنْ إِرْيَازنْ ن حِيزْقِييَا،
أَجدْجِيذْ ن يَاهُوذَا.
٢ أَقَا ذ شَّانْ ن أَربِّي
مَاحنْذْ أَذْ إِسَّارْ إِشْثْ ن ثْمسْڒَاشْثْ،
مَاشَا شَّانْ ن إِجدْجِيذنْ
ذ أَبقّشْ ذڭْ إِشْثْ ن ثْمسْڒَاشْثْ.
٣ ڒُْوعْڒَا ن ؤُجنَّا ذ ڒَْادْجَاغْ ن ثمُّورْثْ،
ذ وُوڒْ ن إِجدْجِيذنْ وَارْ دْجِينْ إِ ؤُبقّشْ.
٤ كّسْ كُوفُّو زِي نُّوقَارْثْ،
أَذْ د-ثفّغْ إِشْثْ نْ ڒْقشْعثْ إِ ومْزِيڒْ.
٥ سْبعّذْ إِعفَّاننْ
زِي زَّاثْ ن وُوذمْ ن ؤُجدْجِيذْ،
خنِّي أَذْ إِتّْوَاسّمْثنْ
ڒْْعَارْشْ نّسْ س ثْسڭْذَا.
٦ وَارْ ثْفيّشْ زَّاثْ إِ وُوذمْ ن ؤُجدْجِيذْ،
وَارْ تّْبذِّي مَانِي تّْبدَّانْ إِمقّْرَاننْ.
٧ مَاغَارْ إِحْڒَا أَذْ أَشْ إِنِينْ: ”ڭعّذْ-د ذَا!“،
ؤُڒَا مَا أَذْ شكْ سّهْوَانْ
زَّاثْ إِ وُوذمْ ن إِجّْ ن ؤُمْشنّعْ
نِّي ژْرِينْثْ ثِيطَّاوِينْ نّشْ.
٨ وَارْ تّْقدْجِيقْ أَذْ ثذْعِيذْ،
مَاغَارْ مِينْ ثخْسذْ أَذْ ثڭّذْ
غَارْ ؤُنڭَّارْ نّسْ،
مَاڒَا جَّارْ نّشْ أَذْ شكْ إِسّفْضحْ؟
٩ شَارّعْ أَكْ-ذ جَّارْ نّشْ،
مَاشَا وَارْ سُّوفُّوغْ سِّيرّْ ن ونّغْنِي،
١٠ حِيمَا ونِّي ذ أَسْ إِتّسْڒَانْ
وَارْ شكْ إِسّْحشّمْ شَا،
مَاغَارْ ڒخْذنِّي وَارْ إِزمَّارْ
أَذْ ثتّْوَاسّْبعّذْ ڒفْضِيحثْ نّشْ عَاذْ.
١١ أَمْ تّفَّاحِينْ ن وُورغْ
خْ طّْبَاسَا ن نُّوقَارْثْ،
أَمُّو دْجَانْ وَاوَاڒنْ سِّيوْڒنْ ثنْ
س ڒقْيَاسْ نّسْ.
١٢ أَمْ إِشْثْ ن ثْخَاذنْثْ ن وُورغْ
ؤُ أَمْ إِشْثْ ن ثْسدّشْثْ ن وُورغْ إِغْڒَانْ قَاعْ،
أَمُّو إِ إِدْجَا ؤُوبّخْ أَمِيغِيسْ
غَارْ ؤُمزُّوغْ إِتّسْڒَانْ.
١٣ أَمْ وذْفڒْ أَسمَّاضْ
ذڭْ إِجّْ ن وَاسّْ ن ثْميْرَا،
أَمُّو إِ إِدْجَا ؤُمْسخَّارْ ذَايسْ ڒَْامَانْ
إِ ونِّي ث إِسّكَّانْ،
مَاغَارْ إِسّْفَاقَا ڒعْمَارْ ن بَابْ نّسْ.
١٤ أَمْ إِسيْنُوثنْ ذ ؤُسمِّيضْ بْڒَا أَنْژَارْ،
أَمُّو أَرْيَازْ نِّي إِتّْعفَّارْ
ذڭْ إِشْثْ ن ثرْزفْثْ وَارْ إِسكّْوِينْ.
١٥ س تَّاسِيعْ ن ڒْْخَاضَارْ إِتّْوَاسّقْنعْ ڒْْحَاكمْ،
إِجّْ ن يِيڒسْ أَمِيژِيذْ إِتَّارژَّا إِغْسَانْ.
١٦ مَاڒَا ثُوفِيذْ ثَامّنْثْ،
أشّْ مِينْ ثحْوَاجذْ وَاهَا،
نِيغْ أَذْ ثَافّْ ثشِّيذْ كْثَارْ زِي مِينْ ثحْوَاجذْ،
ؤُ بَالَاكْ أَذْ ت-إِ-د ثْعُوقّذْ.
١٧ وَارْ سّْرُوسَا أَضَارْ نّشْ
أَطَّاسْ ذِي ثَادَّارْثْ ن جَّارْ نّشْ،
نِيغْ أَذْ شكْ إِجِّيونْ ؤُ أَذْ شكْ إِعِيفّْ.
١٨ أَمْ وفْضِيسْ ذ سِّيفْ ذ فْڒِيثْشَا إِقضْعنْ،
أَمُّو إِ إِدْجَا ورْيَازْ نِّي إِشهّْذنْ
س ژُورْ خْ جَّارْ نّسْ.
١٩ أَمْ ثِيغْمسْثْ يَارْژنْ
ؤُ أَمْ ؤُضَارْ إِنْقْرَاضنْ،
أَمُّو إِ إِدْجَا ؤُثشْڒِي
خْ ونِّي وَارْ ذِي إِدْجِي تِّيقثْ
ذڭْ وَاسّْ ن ڒحْصَارثْ.
٢٠ أَمْ ونِّي إِتّكّْسنْ أَپَارْثسُّو نّسْ
ذڭْ إِجّْ ن وَاسّْ إِسْمضْ
ؤُ أَمْ ڒْْخدْجْ إِ تّڭّنْ خْ نِيطْرُونْ،
أَمُّو إِ إِدْجَا ونِّي إِتّْغنَّاجنْ إِزْڒَانْ
زَّاثْ إِ يِيجّنْ س وُوڒْ إِشْضنْ.
٢١ مَاڒَا إِدْجُوژْ ونِّي شكْ إِشَارّْهنْ،
خنِّي أوْشْ أَسْ أَغْرُومْ،
مَاڒَا إِفُّوذْ، أوْشْ أَسْ أَذْ إِسُو،
٢٢ مَاغَارْ أَمُّو إِ ثْيَارّْوذْ
ڒفْحمْ إِتّحْذُوذُوقنْ خْ ؤُزدْجِيفْ نّسْ،
ؤُ سِيذِي أَذْ شكْ إِخدْجصْ.
٢٣ أَسمِّيضْ زِي شَّامَالْ إِتَّاوِي-د أَنْژَارْ،
إِڒسْ أَغدَّارْ إِتَّاوِي-د ؤُذْمَاونْ إِخيّْقنْ.
٢٤ إِحْڒَا أَذْ ثْزذْغذْ
ذڭْ إِشْثْ ثغْمَارْثْ ن ثْزقَّا،
ؤُڒَا خْ ثَازذِّيغْثْ
أَكْ-ذ إِشْثْ ن ثمْغَارْثْ إِتّمْشُوبُّوشنْ
ذڭْ إِشْثْ ن ثَادَّارْثْ ثْشَارْشْ.
٢٥ أَمْ وَامَانْ إِصمَّاضنْ
إِ يِيجّْ ن ڒعْمَارْ يُوحڒْ،
أَمُّو إِ إِدْجَا ڒخْبَارْ أَصبْحَانْ
زڭْ إِشْثْ ن ثمُّورْثْ ثِيڭّْوجْ.
٢٦ أَمْ إِجّْ ن ڒْْعُونْصَارْ إِتّْوَافسْذنْ
ؤُ أَمْ إِجّْ ن وَانُوغشّنْ ث،
أَمُّو إِ إِدْجَا ؤُمْسڭّذْ إِتّْزعْزِيعنْ
زَّاثْ إِ وُوذمْ ن إِعفَّاننْ.
٢٧ مَاشَّا ن وَاطَّاسْ ن ثَامّنْثْ
وَارْ إِدْجِي شَا مْلِيحْ،
مَاشَا ثَارزُّوثْ
ذِي ثْمسْڒَايِينْ يوْعَارنْ ذ شَّانْ.
٢٨ أَمْ إِشْثْ ن ثنْذِينْثْ إِهذْمنْ بْڒَا ڒْْحِيضْ،
أَمُّو إِ إِدْجَا إِجّْ ن ورْيَازْ
وَارْ إِتّطّفْ بُوحْبڒْ نّسْ.