٢١
١ ؤُڒْ ن ؤُجدْجِيذْ
أَمْ ثْغزْرَاثِينْ ن وَامَانْ
ذڭْ ؤُفُوسْ ن سِيذِي.
نتَّا إِندّهْ إِ-ث، مَانِي مَا إِخْسْ نتَّا.
٢ مَارَّا إِبْرِيذنْ ن بْنَاذمْ
نِيشَانْ ذِي ثِيطَّاوِينْ نّسْ،
مَاشَا سِيذِي إِتّْقدْجَابْ ؤُڒَاونْ.
٣ ثِيمڭَّا ن ثْسڭْذَا ذ ڒْْحقّْ،
ذ ثِينَا إِ سِيذِي حْسنْ زِي ثوْهِيبْثْ ن ثْغَارْصْثْ.
٤ نّْفَاخثْ ن ثِيطَّاوِينْ ذ ؤُڒْ أَعفَّارْ،
أَرْبرْ ن إِعفَّاننْ ذ دّنْبْ.
٥ إِخمِّيمنْ ن ونِّي إِمحْضنْ
تَّاوْينْ مْغِيرْ غَارْ ؤُفيّضْ،
مَاشَا مَارَّا ونِّي إِتّْقدْجِيقنْ أَطَّاسْ
إِتَّاوِي غَارْ ڒحْوجْ وَاهَا.
٦ أَسْمُونِي ن وَاڭْڒَا س يِيڒسْ إِسّْخَارِّيقنْ،
أَمُّو إِ ثدْجَا ثْوَارِّيثْ ن نّفْسْ
إِعدُّونْ ذغْيَا
ن يِينِّي يَارزُّونْ ڒْْموْثْ.
٧ لْعُونْفْ ن إِعفَّاننْ إِتّْجَارَّا إِ-ثنْ،
مَاغَارْ تَّاڭِينْ أَذْ ڭّنْ مِينْ إِسڭّْمنْ.
٨ أَبْرِيذْ ن بُو-ؤُمَارْوَاسْ إِتّفْرِيغْ،
مَاشَا أَمزْذَاڭْ إِتّڭّْ مِينْ إِدْجَانْ نِيشَانْ.
٩ إِحْڒَا أَذْ ثْزذْغذْ
ذڭْ إِشْثْ ثغْمَارْثْ ن ثْزقَّا، خْ ثْزذِّيغْثْ
أَكْ-ذ إِشْثْ ن ثمْغَارْثْ إِتّمْشُوبُّوشنْ
ذڭْ إِشْثْ ن ثَادَّارْثْ ثْشَارْشْ.
١٠ ڒعْمَارْ ن إِعفَّاننْ إِتّْمژْرِي ذِي ڒْْغَارْ،
أَمْقَارّبْ نّسْ وَارْ غَارسْ إِتِّيفْ أَرْضَا
ذِي ثِيطَّاوِينْ نّسْ.
١١ مَاڒَا إِتّْوَاخدْجصْ ؤُمسْثهْزِييْ،
إِدَّاكّْوَاڒْ ونِّي
وَارْ غَارسْ بُو ڒفْهَامثْ ذ أَمِيغِيسْ،
مَاڒَا سّْڒمْذنْ أَمِيغِيسْ،
إِكسِّي نتَّا ثُوسّْنَا.
١٢ إِجّْ ن ؤُمْسڭّذْ إِتّْبقّشْ مْلِيحْ
ثَادَّارْثْ ن ؤُعفَّانْ،
إِغطّڒْ إِعفَّاننْ ذِي أَرْژِييّثْ.
١٣ ونِّي إِتّْبلَّاعنْ أَمزُّوغْ نّسْ
غَارْ إِغُويَّانْ ن ؤُمزْڒُوضْ،
ؤُڒَا ذ نتَّا أَذْ إِسْغُويْ
مَاشَا وَارْ خَاسْ د-تَّارَّانْ.
١٤ صّذْقثْ ذِي ثْنُوفّْرَا ثصْڒحُّو وغْضَابْ،
ثَارْزفْثْ إِمّوْشنْ ذڭْ وحْسِينْ ن وَارُّوضْ
ثصْڒحُّو أَخيّقْ إِمْغَارنْ.
١٥ أَقَا ذ ڒفْرَاحثْ إِ ؤُمْسڭّذْ
مَاحنْذْ أَذْ إِڭّْ مِينْ إِدْجَانْ نِيشَانْ،
مَاشَا ذ أَشڒْوَاوْ إِ يِينِّي إِتّڭّنْ ڒْْغشّْ.
١٦ بْنَاذمْ نِّي إِتّفّْغنْ
زڭْ وبْرِيذْ ن ڒعْقڒْ،
أَذْ يَاريّحْ ذڭْ وڭْرَاوْ
ن ڒخْيَاڒَاثْ ن إِمتَّانْ.
١٧ ونِّي إِتّخْسنْ أَفَارَّاجْ، أَذْ إِحْوَاجْ،
ونِّي إِتّخْسنْ بِينُو ذ زّشْثْ،
وَارْ إِذِّيكّْوِيڒْ ذ بُو وَاڭْڒَا.
١٨ أَعفَّانْ ذ دّيّثْ إِ إِمْسڭَّاذنْ،
ؤُ أَغدَّارْ أَذْ د-يِيڒِي
ذڭْ ومْشَانْ ن يِينِّي إِڭُّورنْ نِيشَانْ.
١٩ إِحْڒَا أَذْ ثْزذْغذْ ذِي ثمُّورْثْ إِخْڒَانْ،
خْ ثَازذِّيغْثْ أَكْ-ذ إِشْثْ ن ثمْغَارْثْ
إِتّمْشُوبُّوشنْ ؤُ إِتّقّْسنْ.
٢٠ إِجّْ ن ڒْْكنْزْ إِتّْوَاحْوَاجنْ ذ زّشْثْ
أَقَا أَثنْ ذِي ثْزذِّيغْثْ ن إِمِيغِيسنْ،
مَاشَا بْنَاذمْ أَبُوهَاڒِي إِصَارّضْ إِ-ث.
٢١ ونِّي يَارزُّونْ خْ ثْسڭْذَا
ذ ثْمخْسِيوْثْ إِشوَّارنْ،
إِتَّافْ ثُوذَارْثْ ذ ثْسڭْذَا ذ شَّانْ.
٢٢ أَمِيغِيسْ إِتّْڭعَّاذْ
خْ ثنْذِينْثْ ن أَيْثْ ن بُو-ثغْڒُوضْثْ،
إِغطّڒْ جّهْذْ ن تِّيقثْ نْسنْ ذِي ثمُّورْثْ.
٢٣ ونِّي إِحطَّانْ أَقمُّومْ ذ يِيڒسْ نّسْ،
إِحطَّا ڒعْمَارْ نّسْ زِي ڒحْصَارَاثْ.
٢٤ ونِّي ذ بُو-نّْفَاخثْ إِفُّوشّْحنْ
تّْڒَاغَانْ أَسْ ’أَمسْثهْزِييْ‘،
نتَّا إِتّڭّْ س نّْفَاخثْ بْڒَا ڒقْيَاسْ.
٢٥ شّهْوثْ ن ؤُمعْڭُوزْ ثْنقّْ إِ-ث،
مَاغَارْ إِفَاسّنْ نّسْ ؤُڭِينْ أَذْ خذْمنْ.
أَوَاڒنْ إِوزّْننْ ن سُولِيمَانْ - ثَاسْغَارْثْ 1د
٢٦ أَسّْ إِمُونْ إِتّْشهَّا ثِيمسْڒَايِينْ ن ؤُشهِّي،
مَاشَا أَمْسڭّذْ أَذْ إِوْشْ،
وَارْ إِتّْغِيمِي إِتّطّفْ ذِي شَا إِ يِيخفْ نّسْ.
٢٧ ثَاغَارْصْثْ ن ؤُعفَّانْ ذ نّْعِي،
مَاهُو مَاڒَا نِيثْنِي أَذْ ت أَوْينْ
س ؤُنكّْوِي إِغشّنْ.
٢٨ أَشهَّاذْ إِسّْخَارِّيقنْ أَذْ إِتّْوَاهلّكْ،
مَاشَا أَرْيَازْ نِّي إِتّسْڒَانْ،
أَذْ إِسِّيوڒْ ثِيذتّْ ڒبْذَا.
٢٩ أَرْيَازْ أَعفَّانْ إِسّجْهذْ إِخفْ نّسْ
أَكْ-ذ وُوذمْ نّسْ،
مَاشَا ونِّي إِڭُّورنْ نِيشَانْ
إِسّمْثنْ إِبْرِيذنْ نّسْ.
٣٠ وَارْ ثدْجِي ثِيغِيثْ ؤُڒَا ذ ڒفْهَامثْ،
وَارْ ذِينْ إِدْجِي بُو ؤُشَاوَارْ قِيبَاتْشْ إِ سِيذِي.
٣١ أَيِيسْ أَذْ أَسْ حزّْمنْ إِ وَاسّْ ن ؤُمنْغِي،
مَاشَا ڒغْڒبْ غَارْ سِيذِي.