١٥
أَوَاڒنْ إِوزّْننْ ن سُولِيمَانْ - ثَاسْغَارْثْ 1ج
١ ثْوَارِّيثْ إِفْسُوسنْ
ثسّسْمَاضْ أَخيّقْ،
مَاشَا أَوَاڒْ إِتّقّْسنْ
إِسّكَّارَا-د أَخيّقْ.
٢ إِڒسْ ن إِمِيغِيسنْ إِجبّذْ ثُوسّْنَا
غَارْ زَّاثْ،
مَاشَا أَقمُّومْ ن إِبُوهَاڒِييّنْ
إِتَّازّڒْ س ثُوبُّوهڒْيَا.
٣ ثِيطَّاوِينْ ن سِيذِي ذِي كُوڒْ أَمْشَانْ،
تّْحكَّارنْثْ إِ إِصبْحَاننْ ذ إِعفَّاننْ.
٤ إِڒسْ نِّي إِسّْڭنْفَانْ ذ ثَاشجَّارْثْ ن ثُوذَارْثْ،
مَاشَا أَرّْهَاجْ نّسْ إِتَّارژَّا بُوحْبڒْ.
٥ أَبُوهَاڒِي إِنطَّارْ تَّارْبِييّثْ ن بَابَاسْ،
مَاشَا ونِّي إِتّْحكَّارَانْ
إِ ؤُوبّخْ، أَقَا إِفْثنْ.
٦ ذِي ثَادَّارْثْ ن ؤُمْسڭَّاذْ -
ذَايسْ ڒْْكنْزْ إِمْغَارْ،
مَاشَا ذِي مِينْ د-إِتَّاوِي ؤُعفَّانْ
ذَايسْ ثَامَارَا.
٧ إِينْشِيشنْ ن إِمِيغِيسنْ تّْبزَّاعنْ ثُوسّْنَا،
مَاشَا ؤُڒْ ن إِبُوهَاڒِييّنْ وَارْ إِدْجِي نِيشَانْ.
٨ ثَاغَارْصْثْ إِ إِتّْقدَّامنْ إِعفَّاننْ
ذ نّْعِي إِ سِيذِي،
مَاشَا ثَاژَادْجِيثْ ن إِنِّي إِڭُّورنْ نِيشَانْ
أَقَا-ت إِ نتَّا ذ أَرْضَا.
٩ أَبْرِيذْ ن ؤُعفَّانْ ذ نّْعِي إِ سِيذِي،
مَاشَا ونِّي إِضفَّارَانْ ثَاسڭْذَا،
إِتّخْسْ إِ-ث نتَّا.
١٠ تَّارْبِييّثْ إِقسْحنْ ثْڒقّفْ
ونِّي إِسمْحنْ ذڭْ وبْرِيذْ،
ؤُ ونِّي إِشَارّْهنْ أَوبّخْ،
أَذْ إِمّثْ.
١١ ڒَْاخَارْثْ ذ ثسْرَافْثْ ن ؤُهلّكْ
أَقَا ذِينْ أَرزْمنْ زَّاثْ إِ سِيذِي،
مشْحَاڒْ عَاذْ وُوڒَاونْ ن ثَارْوَا ن بْنَاذمْ؟
١٢ أَمسْثهْزِييْ وَارْ إِتّخْسْ
ونِّي ث إِ غَا إِوبّْخنْ،
وَارْ إِتّْرِيحْ شَا غَارْ إِمِيغِيسنْ.
١٣ ؤُڒْ إِفَارْحنْ إِتّڭّْ ؤُذمْ إِشْنَانْ،
مَاشَا أَمْنُوسْ ذڭْ وُوڒْ إِسكّفْ بُوحْبڒْ.
١٤ ؤُڒْ إِفهّْمنْ يَارزُّو ثُوسّْنَا،
مَاشَا أَقمُّومْ ن إِبُوهَاڒِييّنْ
إِسّشَّا إِخفْ نّسْ س ثُوبُّوهڒْيَا.
١٥ إِ يِينِّي إِتّْوَاحْصَارنْ مَارَّا ؤُسَّانْ نْسنْ
أَقَا إِعفّْننْ،
مَاشَا ؤُڒْ إِفَارْحنْ
أَمْ إِشْثْ ن زَّارْذثْ وَارْ إِقطِّينْ.
١٦ إِحْڒَا ذْرُوسْ أَكْ-ذ ثڭّْوُوذِي ن سِيذِي،
خْ إِجّْ ن ڒْْكنْزْ ذ أَمقّْرَانْ س ڒحْوڒْ.
١٧ إِحْڒَا إِجّْ ن طّبْصِي ن ڒْْخُوضَارْثْ
مَانِي ثْحكّمْ ثَايْرِي،
خْ إِجّْ ن ؤُينْذُوزْ إِصحّنْ أَكْ-ذ وشْرَاهْ.
١٨ أَرْيَازْ إِتَّارُّوجْذُوذنْ
إِسّكَّارَا إِمنْغِييّنْ،
مَاشَا ونِّي غَارْ إِدْجَا تَّاسِيعْ ن ڒْْخَاضَارْ
إِسّخْسَايْ أَمنْغِي.
١٩ أَبْرِيذْ ن ؤُمعْڭُوزْ
أَمْ شْبَارْقْ أَكْ-ذ إِسنَّاننْ،
مَاشَا أَمسْرُوقْ ن يِينِّي إِڭُّورنْ نِيشَانْ
أَقَا إِتّْوَاسّْڭعّذْ.
٢٠ مِّيسْ أَمِيغِيسْ إِسّْفَارّحْ بَابَاسْ،
مَاشَا بْنَاذمْ أَبُوهَاڒِي
إِسّحْقَارَا يمَّاسْ.
٢١ ثُوبُّوهڒْيَا أَقَا-ت ذ ڒفْرَاحثْ
إِ ونِّي وَارْ غَارْ إِدْجِي بُو وُوڒْ إِمْثنْ،
مَاشَا إِجّْ ن ورْيَازْ ن ڒفْهَامثْ
إِڭُّورْ نِيشَانْ.
٢٢ إِنْوَاينْ فشّْڒنْ
مَاڒَا وَارْ ذِينْ إِدْجِي شّْوَارْ،
مَاشَا س وَاطَّاسْ ن إِمْشَاوَارنْ
أَذْ يِيڒِي ونْوَايْ.
٢٣ أَرْيَازْ غَارسْ ڒفْرَاحثْ
ذِي ثمْوَارِّيثْ إِصبْحنْ
زڭْ ؤُقمُّومْ نّسْ.
مشْحَاڒْ إِصْبحْ وَاوَاڒْ ذِي ڒْوقْثْ نّسْ!
٢٤ أَبْرِيذْ ن ثُوذَارْثْ إِندّهْ
غَارْ سنّجْ إِ ؤُفهَّامْ،
مَاحنْذْ نتَّا أَذْ إِحيّذْ
خْ ڒَْاخَارْثْ سْوَادَّايْ.
٢٥ ثَادَّارْثْ ن بُو-نّْفَاخثْ
أَذْ ت إِقْڒعْ سِيذِي،
مَاشَا أَيْمِيرْ ن ييَّارْ ن ثَاجَّاتْشْ
إِسّمْثَانْ إِ-ث نتَّا.
٢٦ إِخمِّيمنْ ن ؤُعفَّانْ ذ نّْعِي إِ سِيذِي،
مَاشَا أَوَاڒنْ إِشوَّارنْ ذ إِمزْذَاڭنْ.
٢٧ ونِّي يَارزُّونْ خْ أَرْبحْ
إِغطّڒْ ثَادَّارْثْ نّسْ ذِي أَرّْژِييّثْ،
مَاشَا ونِّي إِشَارّْهنْ ثَارْزِيفِينْ، أَذْ إِدَّارْ.
٢٨ ؤُڒْ ن إِمْسڭَّاذنْ إِتّْخَارَّاصْ
مَاحنْذْ أَذْ د-يَارّْ،
مَاشَا أَقمُّومْ ن إِعفَّاننْ
إِتّْفيّضْ س ڒْْغَارْ.
٢٩ إِڭّْوجْ سِيذِي خْ إِعفَّاننْ،
مَاشَا ثَاژَادْجِيثْ ن إِمْسڭَّاذنْ إِتّسْڒَا أَسْ.
٣٠ ثَافَاوْثْ ذِي ثِيطَّاوِينْ ثسّْفَارّحْ ؤُڒْ،
ڒخْبَارْ أَصبْحَانْ إِسّْيُومَا إِغْسَانْ.
٣١ أَمزُّوغْ إِتّسْڒَانْ
غَارْ ؤُوبّخْ إِ ثُوذَارْثْ،
أَذْ إِسّنْسْ ذِي ڒْْوسْطْ ن إِمِيغِيسنْ.
٣٢ ونِّي إِنطَّارنْ تَّارْبِييّثْ،
إِسّحْقَارَا إِخفْ نّسْ،
مَاشَا ونِّي إِتّسْڒَانْ غَارْ ؤُوبّخْ،
إِسّْيَاوَانْ ؤُڒْ نّسْ.
٣٣ ثِيڭّْوُوذِي ن سِيذِي ذ تَّارْبِييّثْ غَارْ ثِيغِيثْ،
ؤُ أَوَاضعْ إِتِّيزْوَارْ إِ شَّانْ.