١١
١ ڒْْمِيزَانْ أَغشَّاشْ ذ نّْعِي إِ سِيذِي،
مَاشَا أَژْرُو ن ڒوْزنْ نِيشَانْ
إِتَّافْ أَرْضَا نّسْ.
٢ مَاڒَا ثُوسَا-د نّْفَاخثْ،
ثُوسَا-د ؤُڒَا ذ ڒفْضِيحثْ،
مَاشَا غَارْ إِمْوَاضْعنْ ثدْجَا ثِيغِيثْ.
٣ ڒصْفَايثْ ن إِنِّي إِڭُّورنْ نِيشَانْ
ثْندّهْ إِ-ثنْ،
مَاشَا ثَاحْرَايْمشْثْ ن إِغدَّارنْ
ثَاڒدّدْجْ إِ-ثنْ.
٤ أَڭْڒَا وَارْ إِنفّعْ
غَارْ وَاسّْ ن ؤُذُوقّزْ ن ؤُفُوڭمْ،
مَاشَا ثَاسڭْذَا ثتّْفكَّا زِي ڒْْموْثْ.
٥ ثَاسڭْذَا ن ونِّي إِڭُّورنْ نِيشَانْ
إِتَّارَّا أَبْرِيذْ نّسْ نِيشَانْ،
مَاشَا أَعفَّانْ إِوطَّا س ثُوعفّْنَا نّسْ.
٦ ثَاسڭْذَا ن إِنِّي إِڭُّورنْ نِيشَانْ
أَذْ ثنْ ثْفكّْ،
مَاشَا إِغدَّارنْ أَذْ تّْوَاشَارْفنْ
ذڭْ ؤُمژْرِي نْسنْ.
٧ مَاڒَا إِمُّوثْ بْنَاذمْ أَعفَّانْ،
إِفْنَا ڒَْايَاسْ نّسْ،
ؤُڒَا ذ مِينْ تّْرَاجَانْ
يرْيَازنْ ذَايْسنْ ثرْيَاسْثْ أَذْ إِفْنَا.
٨ أَمْسڭّذْ أَذْ د-إِتّْوَافكّْ
زِي ڒحْصَارثْ،
ؤُشَا خنِّي أَعفَّانْ أَذْ د-يَاسْ
ذڭْ ومْشَانْ نّسْ.
٩ أَمْنَافقْ إِتَّاردّدْجْ جَّارْ نّسْ
س ؤُقمُّومْ نّسْ،
مَاشَا إِمْسڭَّاذنْ
أَذْ تّْوَافكّنْ س ثُوسّْنَا.
١٠ ثَانْذِينْثْ ثتّسْڒِيوْڒِيوْ
مَاڒَا إِمْسڭَّاذنْ أَقَا أَثنْ مْلِيحْ،
ؤُ مَاڒَا تّْوَاهلّْكنْ إِعفَّاننْ،
أَقَا ذِينْ أَسْڒِيوْڒوْ.
١١ ثتّْوَاسّْڭعّذْ ثنْذِينْثْ
س لْبَارَاكَا ن إِنِّي إِڭُّورنْ نِيشَانْ،
مَاشَا س ؤُقمُّومْ ن إِعفَّاننْ
أَذْ ثتّْوَاهْذمْ.
١٢ ونِّي وَارْ غَارْ إِدْجِي شَا وُوڒْ إِمْثنْ،
إِسّحْقَارَا جَّارْ نّسْ،
مَاشَا أَرْيَازْ ونِّي غَارْ إِدْجَا ڒفْهَامثْ
إِتّسْقَارْ.
١٣ ونِّي إِڭُّورنْ ذَا ذ ذِيهَا س ثخْبَارْجِيثْ،
إِتّْعَارَّا مِينْ إِنُّوفَّارنْ،
مَاشَا ونِّي إِ ذِي إِدْجَا أَرُّوحْ
ذَايسْ ڒَْامَانْ، أَقَا إِسّْنُوفَّارَا ثَامسْڒَاشْثْ.
١٤ مَاڒَا وَارْ ذِينْ أَذبَّارْ، إِوطَّا ڒْْڭنْسْ،
مَاشَا أَذْ يِيڒِي ؤُسنْجمْ س ڒمْغَارثْ ن ؤُمْشَاوَارْ.
١٥ ونِّي إِضمّْننْ ڒْْبَارَّانِي،
وَارْ د أَسْ ثتّفّغْ شَا مْلِيحْ،
مَاشَا ونِّي إِشَارّْهنْ
إِنِّي إِتّڭّنْ ثِيشْثِي خْ ؤُفُوسْ،
أَقَا-ث ذِي ڒَْامَانْ.
١٦ ثَامْغَارْثْ ثتَّافْ أَرْضَا، ثطّفْ
ذِي ڒْْعزّْ نّسْ،
مَاشَا أَيْثْ ن بُو-ڒخْشُونثْ
تّطّْفنْ ذڭْ وَاڭْڒَا.
١٧ بْنَاذمْ س ثْمخْسِيوْثْ إِشوَّارنْ
إِتّڭّْ ڒْخَارْ إِ ڒعْمَارْ نّسْ،
مَاشَا أَقسَّاحْ إِتّْغزَّا
أَيْسُومْ ن يِيخفْ نّسْ.
١٨ أَعفَّانْ إِمجَّارْ ڒْْغِيدْجثْ ن ڒْْغشّْ،
مَاشَا ونِّي إِزَارّْعنْ ثَاسڭْذَا،
إِمجَّارْ إِشْثْ نْ ڒْمُونثْ إِمثْننْ.
١٩ ثَاسڭْذَا نِيشَانْ ثتَّاوِي غَارْ ثُوذَارْثْ،
ونِّي يَاردّْفنْ ڒْْغَارْ،
يَارزُّو ڒْْموْثْ نّسْ.
٢٠ إِنِّي غَارْسنْ ؤُڒْ إِفَارْغنْ
أَقَا أَثنْ ذ نّْعِي إِ سِيذِي،
مَاشَا إِنِّي إِڭُّورنْ نِيشَانْ
نتَّا يَارطَّا ذَايْسنْ.
٢١ س ثِيذتّْ، أَعفَّانْ وَارْ إِتّْغِيمِي بْڒَا ڒخْڒَاصْ،
مَاشَا ثَارْوَا ن إِمْسڭَّاذنْ
أَذْ تّْوَاسّْنجْمنْ.
٢٢ أَمشْنَاوْ إِشْثْ ن ثْخَاذنْثْ ن وُورغْ
ذِي ثِينْزَارْ ن يِيڒفْ،
أَمُّو إِ ثدْجَا إِشْثْ ن ثمْغَارْثْ ثشْنَا
وَارْ ذِي إِدْجَا ؤُميّزْ.
٢٣ مژْرِي ن إِمْسڭَّاذنْ
مْغِيرْ غَارْ مِينْ إِصبْحنْ،
مَاشَا ڒَْايَاسْ ن إِعفَّاننْ
أَقَا-ث نْهْڒَا ڒعْبَارْ.
٢٤ أَقَا ذِينْ إِجّنْ ونِّي إِبطَّانْ س وشْرِيمْ،
وَاخَّا أَمنِّي إِتّْوَارْنِي أَسْ عَاذْ كْثَارْ،
ؤُ أَقَا ذِينْ إِجّنْ ونِّي إِمنّْعنْ كْثَارْ
خْ مِينْ إِشُووَّارنْ،
وَاخَّا مَانْ أَيَا إِندّهْ غَارْ زّڒْضْ.
٢٥ ڒعْمَارْ نِّي إِتّْبَارْكنْ أَذْ إِتّْوَاسّْجِيونْ،
ؤُ ونِّي إِتِّيشنْ أَمَانْ،
أَذْ أَسْ إِمّوْشْ وَامَانْ
إِ نتَّا سِيمَانْثْ نّسْ.
٢٦ ونِّي إِتّْخمَّاڒنْ إِمنْذِي،
إِنعّڒْ إِ-ث شّعْبْ،
مَاشَا لْبَارَاكَا أَذْ ثِيڒِي
خْ ؤُزدْجِيفْ ن ونِّي إِزْنُوزَانْ إِمنْذِي.
٢٧ ونِّي إِتّْشطَّارنْ ذِي طّْوعْ ن
مِينْ إِصبْحنْ،
يَارزُّو مِينْ يَارْضَانْ،
مَاشَا ونِّي إِتّْحَامَانْ ڒْْغَارْ، أَذْ ث إِڒْقفْ.
٢٨ ونِّي إِتّْشَاڒنْ خْ وَاڭْڒَا نّسْ، أَذْ إِوْضَا،
مَاشَا إِمْسڭَّاذنْ تّْنعْنِيعنْ
أَمْ إِفثْوَانْ إِزِيزَاونْ.
٢٩ ونِّي إِهكّْوْڒنْ أَيْثْبَابْ ن ثَادَّارْثْ نّسْ،
أَذْ إِوَارْثْ أَسمِّيضْ،
ؤُ أَبُوهَاڒِي أَذْ يِيڒِي ذ أَمْسخَّارْ
ن ونِّي ذِي إِدْجَا وُوڒْ أَمِيغِيسْ.
٣٠ ڒْْغِيدْجثْ ن ؤُمْسڭَّاذْ
ذ إِشْثْ ن ثْشجَّارْثْ ن ثُوذَارْثْ،
ونِّي يَاربّْحنْ ڒعْمُورْ أَقَا-ث ذ أَمِيغِيسْ.
٣١ خْزَارْ، أَقَا أَذْ إِتّْوَاخدْجصْ
ؤُمْسڭّذْ ذِي ثمُّورْثْ،
خنِّي مَاهُو أَعفَّانْ ذ ؤُمذْنُوبْ.