٣
أَضْفَارْ ن ؤُڒَاغِي ن أَربِّي
١ س ؤُينِّي، أَ أَيْثْمَا، فَارْحمْ ذِي سِيذِيثْنغْ. وَارْ خَافِي يوْعَارْ أَذْ أَومْ أَرِيغْ ثِيمسْڒَايِينْ-أَ ثْوَاڒَا نّغْنِيثْ، مِينْزِي أَذْ زَّايْسنْثْ ثتّْوَاحْضَامْ.
٢ حْضَامْ إِخفْ نْومْ زڭْ يِيطَانْ، حْضَامْ زڭْ إِخدَّامنْ إِعفَّاننْ، حْضَامْ زڭْ إِنِّي إِقطّْعنْ أَيْسُومْ.
٣ مِينْزِي نشِّينْ ذ أَخْثَانْ، نشِّينْ إِنِّي إِتّْسخَّارنْ إِ أَربِّي س أَرُّوحْ، إِنِّي إِسّمْغَارَانْ ذِي يَاسُوع لْمَاسِيحْ، ؤُشَا وَارْ تِّيقّنْ شَا ذڭْ وخْثَانْ ن ويْسُومْ ن بْنَاذمْ.
٤ نشّْ زمَّارغْ أَذْ تِّيقّغْ ذڭْ ويْسُومْ إِنُو، مِينْزِي مَاڒَا إِتّْغِيڒْ إِ حذْ أَذْ إِتِّيقّْ ذڭْ ويْسُومْ نّسْ، نشّْ كْثَارْ:
٥ أَقَا أَيِي ذ أَمخْثَانْ زڭْ وَامِي غَارِي ثْمنْيَا ن وُوسَّانْ، زِي ڒْْڭنْسْ ن إِسْرَائِيل، زڭْ أَيْثْ ن بِينْيَامِينْ، نشّْ ذ أَعِيبْرَانِي زڭْ إِعِيبْرَانِييّنْ، زِي جِّيهثْ ن شَّارِيعَا نشّْ ذ أَفَارِيسِي،
٦ زڭْ ؤُغزْذِيسْ ن شْضَارثْ ثُوغَا ذَارّْشغْ خْ ثْمسْمُونْثْ ن لْمَاسِيحْ، زڭْ ؤُغزْذِيسْ ن ثْسڭْذَا ثنِّي ذِي شَّارِيعَا أَقَا أَيِي بْڒَا ڒْْعِيبْ.
٧ مَاشَا مِينْ ثُوغَا غَارِي أَرْبحْ، أَقَا ڭِّيغْ ث ذ ثَاخسَّارْثْ خْ سِّيبّثْ ن لْمَاسِيحْ.
٨ نشّْ ڭِّيغْ مَارَّا مَانْ أَيَا ذ ثَاخسَّارْثْ زِي سِّيبّثْ ن ثُوسّْنَا ن سِيذِي يَاسُوع لْمَاسِيحْ، ونِّي ذِي طّْوعْ نّسْ خْسَارغْ كُوڒْشِي، ڭِّيغْ ث أَمشْنَاوْ وفْرَاضْ يُورْصُوضنْ حِيمَا أَذْ أَربْحغْ لْمَاسِيحْ،
٩ مَاحنْذْ أَذْ تّْوَافغْ ذَايسْ، وَارْ إِدْجِي س ثْسڭْذَا ن إِخفْ إِنُو ثنِّي زِي شَّارِيعَا - مَاشَا أَكْ-ذ ثنِّي د-إِتّفّْغنْ زِي لْ-إِيمَانْ ن لْمَاسِيحْ، أَقَا-ت ذ ثَاسڭْذَا ثنِّي زِي أَربِّي -
١٠ حِيمَا أَمُّو إِ غَا سّْنغْ يَاسُوع ذ جّهْذْ ن ثْنُوكْرَا نّسْ، ؤُ مَاحنْذْ أَذْ شَارْشغْ ذڭْ ؤُودّبْ نّسْ، أَذْ ذوْڒغْ ذڭْ وَارْوَاسْ ن ڒْْموْثْ نّسْ،
١١ حِيمَا س شَا ن وبْرِيذْ أَذْ أَوْضغْ غَارْ ثْنُوكْرَا زِي ثَادَّارْثْ ن إِمتِّيننْ.
١٢ نشّْ وَارْ تِّيوِيضغْ نِيغْ تّْوَاكمّْڒغْ عَاذْ، مَاشَا يمَّارغْ إِ مَانْ أَيَا، حِيمَا، مَاڒَا إِعدّڒْ، أَذْ طّْفغْ مِينْ خفْ إِ ذ أَيِي إِطّفْ يَاسُوع لْمَاسِيحْ.
١٣ أَ أَيْثْمَا، وَارْ ذ أَيِي إِتّْغِيڒْ أَقَا طّْفغْ ث، مَاشَا تّڭّغْ إِشْثْ ن ڒْْحَاجّثْ: تُّوغْ مِينْ أَوَارْنِي أَيِي ؤُشَا أَذْ سّْوِيژّْضغْ إِخفْ إِنُو غَارْ مِينْ ذِينْ زَّاثِي.
١٤ تِّيزَّارغْ غَارْ لْغَارَاضْ حِيمَا أَذْ طّْفغْ تَّاجْ ن ؤُغلّبْ ن ثْڒَاغِيثْ يُوعْڒَانْ ن أَربِّي ثنِّي إِدْجَانْ ذِي يَاسُوع لْمَاسِيحْ.
١٥ أجّْ إِنِّي إِوْضنْ غَارْ ڒكْمَارثْ، أَذْ ركّْزنْ خنِّي ذِي ثْمسْڒَايِينْ-أَ. ؤُشَا مَاڒَا غَارْومْ نّيّثْ نّغْنِي ذِي شَا، أَقَا أَربِّي أَذْ أَومْ إِسّْشنْ مَانْ أَيَا عَاوذْ.
١٦ مَاشَا أجّْ أَنغْ، حِيمَا أَذْ نَاوضْ غَارْ مَانْ أَيَا، أَذْ نُويُورْ ذڭْ وبْرِيذْ ذ إِجّنْ س إِخَارِيصّنْ نّغْ ذ إِجّنْ.
١٧ ضْفَارمْ أَيِي-د، أَ أَيْثْمَا، كْسِيمْ ثِيوصَّافْ إِ إِنِّي يُويُورنْ عْلَاحْسَابْ أَمذْيَا إِ زَّايْنغْ ثژْرِيمْ.
١٨ مِينْزِي أَقَا ذِينْ أَطَّاسْ إِنِّي يُويُورنْ وَارْ إِدْجِي أَمنِّي، نِّيغْ أَومْ ت أَطَّاسْ ن إِمُورنْ - ؤُشَا ڒخُّو أَذْ ت إِنِيغْ س إِمطَّاونْ - أَقَا أَثنْ ذ ڒْْعذْيَانْ ن صَّالِيبْ ن لْمَاسِيحْ.
١٩ أَنڭَّارُو نْسنْ ذ أَهلّكْ، أَربِّي نْسنْ ذ أَعذِّيسْ نْسنْ ؤُشَا أَعُودْجِي نْسنْ ذ أَبهْذڒْ نْسنْ، ؤُ نّيّثْ نْسنْ ذِي ثْمسْڒَايِينْ ن دُّونشْثْ.
٢٠ مَاشَا نشِّينْ نتّْسخَّارْ ذڭْ إِجنْوَانْ إِ زَّايسْ نتّْرَاجَا عَاوذْ ونِّي ذ أَنغْ إِتِّيشنْ ثُوذَارْثْ، سِيذِيثْنغْ يَاسُوع لْمَاسِيحْ،
٢١ ونِّي إِ غَا إِبدّْڒنْ أَرِّيمثْ نّغْ إِحبْضنْ، حِيمَا أَذْ ثذْوڒْ ذِي صِّيفثْ ن أَرِّيمثْ نّسْ إِعُودْجنْ، عْلَاحْسَابْ جّهْذْ نّسْ ثَامقّْرَانْثْ إِ زِي إِ غَا إِتّْوَاڭّْ مَارَّا مِينْ إِدْجَانْ سْوَادَّايْ نّسْ.