٣
ثَاسْغُونْثْ جَارْ ورْيَازْ ذ ثمْغَارْثْ ذِي ڒمْڒَاشْ
١ أَمُّو عَاوذْ كنِّينْثْ، أَ ثِيمْغَارِينْ، مَارْسنْثْ إِخفْ نْكنْثْ إِ يرْيَازنْ نْكنْثْ نِّي وَارْ إِطِّيعنْ إِ وَاوَاڒْ، حِيمَا أَذْ ثنْ ثَاربْحنْثْ بْڒَا أَرْبَارْ س ثِيشْڒِي نْكنْثْ إِشْنَانْ،
٢ خْ مِينِّي إِ غَا ژَترنْ مَامّشْ ثتّڭُّورنْثْ س ثِيڭّْوُوذِي ذ ڒهْيَا.
٣ وَارْ تّْزهّْجنْثْ س مِينْ إِتّْبَاننْ غَارْ بَارَّا: أَمُوذِي ن ؤُشُووَّافْ، ثِيمڭَّا ن وُورغْ نِيغْ ثْيَارْضِي ن وَارُّوضْ إِصبْحنْ،
٤ مَاشَا زهّْجنْثْ س بْنَاذمْ إِنُّوفَارنْ ذڭْ وُوڒْ، س أَرُّوحْ ن ثمْهِينْثْ إِ وَارْ إِتّْوَاغشّنْ، أَقَا-ث ذ إِجّْ ن ؤُزهّجْ إِصبْحنْ زَّاثْ إِ أَربِّي.
٥ أَقَا أَمُّو ثُوغَا زهّْجنْثْ زِيشْ ثمْغَارِينْ ثِيمْقدَّاسِينْ، إِنِّي ثُوغَا إِسِّيثِيمنْ خْ أَربِّي، ڒعْمُورْ نْسنْثْ، ؤُشَا ثُوغَا طَّاعنْثْ إِ يرْيَازنْ نْسنْثْ.
٦ أَمُّو ثُوغَا سَارَا ثمَّارْسْ إِخفْ نّسْ إِ إِبْرَاهِيمْ، ثْڒَاغَا أَسْ: ”سِيذِي!“، ؤُشَا كنِّينْثْ ثْذوْڒنْثْ ذ يسِّيسْ أَمْ ثتّڭّنْثْ مِينْ إِصبْحنْ، مَاڒَا وَارْ ثتّڭّْوذنْثْ.
٧ كنِّيوْ، أَ إِرْيَازنْ، زذْغمْ أَكْ-ذ ثمْغَارِينْ نْومْ س ڒعْقڒْ ؤُ وقَّارمْ ثنْثْ أَمْ إِغَارَّافنْ يَارخْفنْ، حِيمَا وَارْ ثتّْوَامنْعنْثْ شَا ثْژَادْجِيثِينْ نْومْ، مِينْزِي نِيثنْثِي أَذْ وَارْثنْثْ ثِيموْشَا ن ثُوذَارْثْ إِتّْذُومَانْ أَكِيذْومْ.
أَودّبْ ذڭْ إِصُورَافْ ن لْمَاسِيحْ
٨ غَارْ ؤُنڭَّارْ، مُونمْ مَارَّا غَارْ أَرَّايْ ذ إِجّنْ، ودّْبمْ أَكْ-ذ يِينِّي إِودّْبنْ، خْسمْ إِجّنْ ونّغْنِي س ثَايْرِي، أَرحْممْ، إِڒِيمْ ثْضَارْفمْ.
٩ وَارْ د-تَّارِّيمْ خْ ڒْْغَارْ س ڒْْغَارْ، نِيغْ ثِيكّْوُورَا س ثِيكّْوُورَا، مَاشَا س ڒْْعكْسْ بَارْكمْ، مِينْزِي كنِّيوْ أَقَا ثتّْوَاڒَاغَامْ-د حِيمَا أَذْ ثْوَارْثمْ لْبَارَاكَا.
١٠ س ؤُيَا، أجّْ ونِّي إِخْسنْ ثُوذَارْثْ ذ وُوسَّانْ إِشْنَانْ، أَذْ إِحْضَا إِڒسْ نّسْ زِي مِينْ وَارْ إِحْڒِينْ ؤُڒَا ذ إِينْشِيشنْ نّسْ زڭْ وَاوَاڒْ إِشمّْثنْ.
١١ أجّْ إِ-ث أَذْ إِڭّْوجْ خْ مِينْ إِدْجَانْ ذ أَعفَّانْ، أَذْ إِڭّْ مِينْ إِصبْحنْ، أَذْ يَارْزُو خْ ڒهْنَا ؤُشَا أَذْ ث إِضْفَارْ س شْضَارثْ.
١٢ مِينْزِي ثِيطَّاوِينْ ن سِيذِي خْ إِمْسڭَّاذنْ، ؤُ إِمزُّوغنْ نّسْ أَقَا أَثنْ مَاحنْذْ أَذْ أَسنْ سْڒنْ، مَاشَا ؤُذمْ ن سِيذِي أَقَا-ث ضِيدّْ إِ ؤُمْعفَّانْ.
١٣ وِي إِزمَّارنْ أَذْ ذَايْومْ إِڭّْ ڒْْغَارْ، مَاڒَا كنِّيوْ ثضْفَارمْ مِينْ إِصبْحنْ؟
١٤ مَاڒَا ثْودّْبمْ ذِي طّْوعْ ن ثْسڭْذَا، أَقَا سّعْذْ نْومْ. وَارْ تّڭّْوذمْ زڭْ يِينِّي كنِّيوْ إِسِّيڭّْوذنْ، وَارْ تّْنخْڒِيعمْ شَا،
١٥ مَاشَا قدّْسمْ سِيذِي، لْمَاسِيحْ، ذڭْ وُوڒَاونْ نْومْ، ؤُ إِڒِيمْ ڒبْذَا ثْوجْذمْ مَاحنْذْ أَذْ ثَارّمْ س ثمْهِينْثْ ذ ؤُوقَّارْ خْ يِينِّي كنِّيوْ إِ غَا إِسّقْسَانْ خْ ؤُسِيثمْ ن لْ-إِيمَانْ نْومْ،
١٦ زِي ثْنفْسشْثْ إِشْنَانْ، حِيمَا إِنِّي خَاومْ إِعَاوْذنْ أَخْمِي خْ إِوْذَانْ إِعفَّاننْ، أَذْ سضْحَانْ ؤُمِي تّْشقَّافنْ ذِي ثشْرِي ن ثُوذَارْثْ نْومْ إِشْنَانْ ذِي لْمَاسِيحْ.
١٧ أَقَا إِنفّعْ أَذْ ثْودّْبمْ، مَاڒَا إِخْسْ أَربِّي، أَمْ ثتّڭّمْ مِينْ إِصبْحنْ، مَاشَا وَارْ إِدْجِي مَاڒَا كنِّيوْ ثتّڭّمْ مِينْ إِدْجَانْ ذ أَعفَّانْ.
١٨ مِينْزِي ؤُڒَا ذ لْمَاسِيحْ ثُوغَا إِمُّوثْ إِشْثْ ن ثْوَاڒَا إِ دّْنُوبْ، أَقَا أَمْسڭَّاذْ ذِي طّْوعْ ن إِمذْنَابْ، حِيمَا أَذْ كنِّيوْ إِسِّيوضْ غَارْ أَربِّي، نتَّا ذ ونِّي إِمُّوثنْ ذِي أَرِّيمثْ، مَاشَا أَقَا إِدَّارْ ذِي أَرُّوحْ،
١٩ ذ ونِّي إِبَارّْحنْ إِ ڒعْمُورْ نِّي إِتّْوَاطّْفنْ ذِي ڒَْاخَارْثْ،
٢٠ إِنِّي ثُوغَا وَارْ إِتّْوَاسّْقنْعنْ ذڭْ وُوسَّانْ ن نُوحْ، ؤُمِي ثُومُورْ تَّاسِيعْ ن ڒْْخَاضَارْ ن أَربِّي، أَقَا أَذْ ذِينْ يِيڒِي ؤُغَارَّابُو أَمْ ثُوغَا إِتّْرَاجَا نتَّا أَذْ ثُوبنْ نِيثْنِي. ؤُذْفنْ غَارْ ؤُغَارَّابُو مْغِيرْ ثْمنْيَا ن ڒعْمُورْ نِّي إِتّْوَاحْضَانْ دَّارنْ ذڭْ وَامَانْ.
٢١ عْلَاحْسَابْ أَمذْيَا نِّي، أَقَا ؤُڒَا ذ كنِّيوْ ثتّْوَاسّْنجْممْ س ؤُسغْضصْ - ونِّي وَارْ إِدْجِينْ أَسِيرْذْ ن ڒخْمجْ ن أَرِّيمثْ، مَاشَا أَذْ يِيڒِي مَاڒَا ثْشهّْذمْ خْ أَربِّي س ثْنفْسشْثْ إِشْنَانْ - ؤُ س ثْنُوكْرَا ن يَاسُوع لْمَاسِيحْ،
٢٢ ونِّي إِتّْوَاسُّوعْڒَانْ غَارْ ؤُجنَّا، إِقِّيمْ غَارْ ؤُفُوسِي ن أَربِّي، أَمْ ذ أَسْ تّْوَامَّارْسنْثْ لْمَالَاكَاثْ ذ صُّولَاطَاثْ ذ جّهْذْ سَاذُو نتَّا.