عُوبَاذْيَا
١
١ ڒوْحِييْ ن عُوبَاذْيَا.
”أَمُّو إِ إِقَّارْ سِيذِي إِنُو، سِيذِي، خْ إِذُومْ:
‘نشِّينْ نسْڒَا إِجّْ ن ڒخْبَارْ زِي سِيذِي،
ؤُ إِجّْ ن ؤُمْسكِّي إِتّْوَاسّكّْ غَارْ ڒڭْنُوسْ:
كَّارْ، جّمْ أَنغْ أَذْ خَاسْ نْغوّغْ،
أَذْ نمّْنغْ أَكْ-ذ إِذُومْ!‘
٢ خْزَارْ، نشّْ ڭِّيغْ شكْ ذ أَمژْيَانْ جَارْ ڒڭْنُوسْ،
شكْ ثتّْوَاسّحْقَارَاذْ أَطَّاسْ.
٣ نّْفَاخثْ ن وُوڒْ نّشْ ثشْمثْ إِ شكْ،
شكْ ذ ونِّي ذِينْ إِزدّْغنْ ذڭْ إِمُوشَانْ ن ؤُذُورِّي جَارْ ڒجْرُوفْ،
ذِي ثْزذِّيغْثْ نّشْ يُوعْڒَانْ،
شكْ ذ ونِّي إِقَّارنْ ذڭْ وُوڒْ نّشْ:
’مَانْ ونْ ذ أَيِي غَا إِغضْڒنْ غَارْ ثمُّورْثْ؟‘
٤ مَاڒَا ثسّْڭعّْذذْ إِخفْ نّشْ أَمْ ؤُڭِيذرْ،
نِيغْ ثڭِّيذْ ڒْْعُوشّْ نّشْ جَارْ إِثْرَانْ،
نشّْ أَذْ شكْ د سّنِّي سّهْوِيغْ،
أَمُّو إِ إِقَّارْ سِيذِي.“
٥ ”مَاڒَا ؤُذْفنْ-د غَاركْ إِشفَّارنْ،
نِيغْ إِخوَّاننْ س دْجِيڒثْ،
- أَ، مَامّشْ إِ غَا ثتّْوَاڒدّْدْجذْ أَڒْ طَّارْفْ -
مَا وَارْ تَّاشَارنْ أَڒْ غَارْسنْ إِ غَا يِيڒِي مِينْ إِكْفَانْ؟
مَاڒَا ؤُسِينْ-د غَاركْ إِنِّي إِ غَا إِڒقْضنْ أَضِيڒْ،
مَا أَذْ جّنْ شَا مِينْ إِتّْوَاڒقْضنْ أَوَارْنِي أَسنْ؟
٦ أَ مَامّشْ إِ غَا أَرْزُونْ ذِي عِيسُو،
مَامّشْ إِ غَا بقّْشنْ ڒكْنُوزْ نّسْ نُّوفَارنْ!
٧ مَارَّا إِرْيَازنْ نِّي إِڭِّينْ إِجّْ ن ڒْْعَاهْذْ أَكِيذكْ،
عَارْننْ شكْ غَارْ ويْمِيرْ،
إِرْيَازنْ نِّي ثُوغَا أَكِيذكْ إِدَّارنْ ذِي ڒهْنَا، شمْثنْ شكْ،
نِيثْنِي زمَّارنْ خَاكْ.
أَغْرُومْ زَّايكْ ڭِّينْ ث ذ ثَارحْسِيثْ سْوَادَّايْ نّشْ.
’أَقَا نتَّا وَارْ ذَايسْ بُو ڒفْهَامثْ.‘
٨ مَا وَارْ إِتِّيڒِي ذڭْ وَاسّْ نِّي، إِقَّارْ سِيذِي،
أَقَا نشّْ أَذْ أَردّْدْجغْ إِمِيغِيسنْ زِي إِذُومْ،
ؤُ ڒفْهَامثْ زڭْ إِذُورَارْ ن عِيسُو؟
٩ أَيْثْ ن بُو-ثغْرُوضْثْ نّشْ أَذْ تّْوَاحْصَارنْ
زِي ثِيڭّْوُوذِي، أَ ثَايْمَانْ،
حِيمَا كُوڒْ إِجّنْ زڭْ إِذُورَارْ ن عِيسُو
أَذْ إِتّْوَاقْضعْ س ونْغَايْ.“
١٠ ”زِي سِّيبّثْ ن لْعُونْفْ خْ ؤُمَاشْ يَاعْقُوبْ،
أَذْ شكْ ثْذڒْ ڒفْضِيحثْ،
ؤُ أَذْ ثتّْوَاكّْسذْ إِ ڒبْذَا.
١١ ذڭْ وَاسّْ إِ ذِي ثُوغَا خَاسْ ثْبدّذْ،
ذڭْ وَاسّْ إِ ذِي إِبَارَّانِييّنْ إِوْينْ-د أَڭْڒَا نّسْ
ؤُ ؤُذْفنْ ڒْْبَارَّانِي غَارْ ثوُّورَا نّسْ،
ؤُ نْضَارنْ ثَاقدُّوحْثْ خْ ؤُرْشَالِيمْ،
ثُوغَا شكْ أَمْ يِيجّنْ زَّايْسنْ.
١٢ مَاشَا وَارْ ذ أَشْ إِعدّڒْ أَذْ ثقِّيمذْ ثْخزَّارذْ
ذڭْ وَاسّْ ن ؤُمَاشْ،
ذڭْ وَاسّْ ن وشْثَابْ نّسْ أَبَارْشَانْ،
وَارْ ذ أَشْ إِعدّڒْ أَذْ ثْفَارْحذْ خْ إِحنْجِيرنْ ن يَاهُوذَا،
ذڭْ وَاسّْ ن وَاردّدْجْ نْسنْ
ؤُ وَارْ ذ أَشْ إِعدّڒْ أَذْ ثَارزْمذْ أَقمُّومْ نّشْ أَطَّاسْ
ذڭْ وَاسّْ ن ڒحْصَارثْ نْسنْ.
١٣ وَارْ إِعدّڒْ أَذْ ثَاذْفذْ غَارْ ثوَّارْثْ نْ ڒْڭنْسْ إِنُو
ذڭْ وَاسّْ ن ؤُهلّكْ نْسنْ
وَارْ ذ أَشْ إِعدّڒْ أَذْ ثقِّيمذْ ثْخزَّارذْ عَاوذْ
ذڭْ وَاسّْ ن ؤُضيّعْ نْسنْ
ؤُ وَارْ ذ أَشْ إِعدّڒْ أَذْ ثقِّيمذْ ثسّْوِيژّْضذْ
إِفَاسّنْ نّشْ غَارْ وَاڭْڒَا نّسْ
ذڭْ وَاسّْ ن ؤُضيّعْ نّسْ،
١٤ وَارْ ذ أَشْ إِعدّڒْ أَذْ ثْبدّذْ
غَارْ مَانِي تّْمڒْقَانْ إِبْرِيذنْ،
مَاحنْذْ أَذْ ثتّحِّيذْ إِنِّي إِنجْمنْ
ؤُ وَارْ ذ أَشْ إِعدّڒْ
أَذْ ثْسلّْمذْ إِنِّي ثُوغَا يَاروْڒنْ
ذڭْ وَاسّْ ن ڒحْصَارثْ.“
١٥ ”مَاغَارْ يُوذسْ-د أَسّْ ن سِيذِي
خْ مَارَّا ڒڭْنُوسْ!
أَمْ ثڭِّيذْ شكْ، أَذْ زَّايكْ إِتّْوَاڭّْ،
أَخدْجصْ نّشْ أَذْ د-إِذْوڒْ خْ ؤُزدْجِيفْ نّشْ.
١٦ مَاغَارْ أَمْ مَامّشْ ثسْوِيمْ كنِّيوْ
خْ وذْرَارْ إِنُو إِقدّْسنْ،
أَمُّو أَذْ سْونْ مَارَّا ڒڭْنُوسْ ڒبْذَا،
وَاهْ، أَذْ سْونْ أَذْ سكّْفنْ،
أَذْ ذوْڒنْ أَخْمِيعمَّارْصْ وَارْ ثُوغَا دْجَانْ.
١٧ مَاشَا خْ وذْرَارْ ن صِيهْيُونْ
أَذْ يِيڒِي مِينْ إِنّجْمنْ،
ؤُ وَانِيثَا أَذْ يِيڒِي ذ أَمْقدّسْ،
ؤُ إِنِّي ن ثَادَّارْثْ ن يَاعْقُوبْ
أَذْ طّْفنْ ثِيسقَّاڒْ نْ ڒْوَارْثْ نْسنْ.
١٨ ثَادَّارْثْ ن يَاعْقُوبْ أَذْ ثِيڒِي ذ ثِيمسِّي،
ؤُ ثَادَّارْثْ ن يُوسُوفْ ذ أَشعَّاڒْ،
ؤُشَا ثَادَّارْثْ ن عِيسُو أَذْ ثِيڒِي أَمْ يِيغدْجْ
ؤُ نِيثْنِي أَذْ أَسنْ سّْشمْضنْ
ؤُ أَذْ ثنْ شّنْ،
أَڒَامِي وَارْ إِقِّيمْ
ؤُڒَا ذ إِجّْ إِدَّارْ ذِي ثَادَّارْثْ ن عِيسُو،
مَاغَارْ سِيذِي أَقَا إِسِّيوڒْ.“
١٩ ”إِنِّي ن ثمُّورْثْ ن لْجَانُوبْ
أَذْ طّْفنْ إِذُورَارْ نْ عِيسُو ذ ثَاسْغَارْثْ،
ؤُ يِينِّي ن ثمُّورْثْ إِوَاطَانْ
أَذْ طّْفنْ ثَامُّورْثْ ن إِفِيلِيسْطِينِييّنْ ذ ڒْْوَارْثْ
وَاهْ، نِيثْنِي أَذْ طّْفنْ إِيَّارْ ن إِفْرَايِيمْ
ذ ييَّارْ ن سَامَارْيَا ذ ڒْْوَارْثْ،
ؤُ بِينْيَامِينْ أَذْ إِطّفْ جِيلْعَاذْ ذ ڒْْوَارْثْ،
٢٠ ؤُ إِمنْفِييّنْ زِي ڒْْعسْكَارْ-أَ
إِنِّي إِدْجَانْ غَارْ أَيْثْ ن إِسْرَائِيل
أَذْ طّْفنْ ثَامُّورْثْ ن أَيْثْ ن كنْعَانْ
ذ ڒْْوَارْثْ أَڒْ صَارْفَاثْ،
ؤُ إِمنْفِييّنْ زِي ؤُرْشَالِيمْ
نِّي إِدْجَانْ ذِي صَافَارَاذْ،
أَذْ طّْفنْ ثِيندَّامْ
ن ثمُّورْثْ ن لْجَانُوبْ ذ ڒْْوَارْثْ.
٢١ إِمْسلّْكنْ أَذْ ڭعّْذنْ أَذْرَارْ ن صِيهْيُونْ،
حِيمَا أَذْ حَاكْمنْ أَذْرَارْ ن عِيسُو،
ؤُشَا ثَاڭلْذَا أَذْ ثِيڒِي ن سِيذِي.“