٣٣
إِسَافَارنْ زِي مِيصْرَا أَڒْ كنْعَانْ
١ أَمُّو إِ سّْمُّوطِّيينْ أَيْثْ ن إِسْرَائِيل إِنِّي د-إِفّْغنْ زِي ثمُّورْثْ ن مِيصْرَا، زڭْ ومْشَانْ غَارْ ومْشَانْ، أَمْ تّْوَاستّْفنْ نِيثْنِي عْلَاحْسَابْ ثِيرْبِيعِينْ ن ڒْْعسْكَارْ نْسنْ، س ؤُفُوسْ ن مُوسَا ذ هَارُونْ.
٢ خْ ڒُْومُورْ ن سِيذِي يُورَا مُوسَا إِمُوشَانْ مَانِيسْ د-فّْغنْ أَكْ-ذ إِرحَّالنْ نْسنْ. إِنَا ذ إِرحَّالنْ نْسنْ أَكْ-ذ إِمُوشَانْ مَانِيسْ د-فّْغنْ.
٣ فسْينْ إِقِيضَانْ نْسنْ، فّْغنْ زِي رَاعَامْسِيسْ ذڭْ ؤُيُورْ أَمزْوَارُو، ذڭْ وَاسّْ وِيسّْ خمّسْطَاشْ ن ؤُيُورْ أَمزْوَارُو. ذِي صّْبحْ، ذغْيَا أَوَارْنِي إِ ثْغَارْصْثْ ن ؤُسعْذُو فّْغنْ-د أَيْثْ ن إِسْرَائِيل س يِيجّْ ن ؤُفُوسْ إِتّْوَاسّْڭعّْذنْ زَّاثْ إِ ثِيطَّاوِينْ ن مَارَّا إِمِيصْرِييّنْ،
٤ ؤُمِي ثُوغَا شغْڒنْ إِمِيصْرِييّنْ نطّْڒنْ مَارَّا إِمنْزَا نْسنْ، إِنِّي إِوْثَا سِيذِي س ڒْْموْثْ جَارْ أَسنْ. عَاوذْ إِسِّيوضْ سِيذِي ڒحْكَامْ نّسْ خْ إِربِّيثنْ نْسنْ.
٥ فسْينْ أَيْثْ ن إِسْرَائِيل إِقِيضَانْ نْسنْ، فّْغنْ زِي رَاعَامْسِيسْ ؤُشَا وْثِينْ إِقِيضَانْ نْسنْ ذِي سُوكُّوثْ.
٦ فسْينْ إِقِيضَانْ نْسنْ، فّْغنْ زِي سُوكُّوثْ ؤُشَا وْثِينْ إِقِيضَانْ نْسنْ ذِي إِثَامْ غَارْ ثْمَا ن ڒخْڒَا.
٧ فسْينْ إِقِيضَانْ نْسنْ، فّْغنْ زِي إِثَامْ ؤُشَا ذوْڒنْ-د غَارْ بِي-هَاحِيرُوثْ نِّي إِدْجَانْ أَرنْذَاذْ ن بَاعْلْ-صَافُونْ ؤُشَا وْثِينْ إِقِيضَانْ نْسنْ زَّاثْ إِ وُوذمْ ن مَاجْذَالْ.
٨ فسْينْ إِقِيضَانْ نْسنْ، فّْغنْ زِي بِي-هَاحِيرُوثْ ؤُشَا شُوكّنْ ذِي ڒْْوسْطْ ن ڒبْحَارْ غَارْ ڒخْڒَا ؤُشَا ؤُيُورنْ ثِيشْڒِي ن ثْڒَاثَا ن وُوسَّانْ ذِي ڒخْڒَا ن إِثَامْ، خنِّي وْثِينْ إِقِيضَانْ نْسنْ ذِي مَارَا.
٩ فسْينْ إِقِيضَانْ نْسنْ، فّْغنْ زِي مَارَا ؤُشَا إِوْضنْ غَارْ إِلِيمْ، مَانِي إِدْجَا ثنْعَاشْ ن إِغْبَالُوثنْ ن وَامَانْ ذ سبْعِينْ ن ثْشجِّيرَا ن ثِينِي ؤُشَا وْثِينْ إِقِيضَانْ نْسنْ ذِينْ.
١٠ فسْينْ إِقِيضَانْ نْسنْ، فّْغنْ زِي إِلِيمْ ؤُشَا وْثِينْ إِقِيضَانْ نْسنْ غَارْ ڒبْحَارْ ن ثلْڭَا.
١١ فسْينْ إِقِيضَانْ نْسنْ، فّْغنْ زِي ڒبْحَارْ ن ثلْڭَا ؤُشَا وْثِينْ إِقِيضَانْ نْسنْ ذِي ڒخْڒَا ن سِينْ.
١٢ فسْينْ إِقِيضَانْ نْسنْ، فّْغنْ زِي ڒخْڒَا ن سِينْ ؤُشَا وْثِينْ إِقِيضَانْ نْسنْ ذِي ذُوفْقَا.
١٣ فسْينْ إِقِيضَانْ نْسنْ، فّْغنْ زِي ذُوفْقَا ؤُشَا وْثِينْ إِقِيضَانْ نْسنْ ذِي أَلُوشْ.
١٤ فسْينْ إِقِيضَانْ نْسنْ، فّْغنْ زِي أَلُوشْ ؤُشَا وْثِينْ إِقِيضَانْ نْسنْ ذِي رَافِيذِيمْ، مَانِي وَارْ يُوفِي أَمَانْ إِ ڒْْڭنْسْ مَاحنْذْ أَذْ سْونْ.
١٥ فسْينْ إِقِيضَانْ نْسنْ، فّْغنْ زِي رَافِيذِيمْ ؤُشَا وْثِينْ إِقِيضَانْ نْسنْ ذِي ڒخْڒَا ن سِينَا.
١٦ فسْينْ إِقِيضَانْ نْسنْ، فّْغنْ زِي ڒخْڒَا ن سِينَا ؤُشَا وْثِينْ إِقِيضَانْ نْسنْ ذِي قَابَارُوثْ-هَاثَاآوَاثْ.
١٧ فسْينْ إِقِيضَانْ نْسنْ، فّْغنْ زِي قَابَارُوثْ-هَاثَاآوَاثْ ؤُشَا وْثِينْ إِقِيضَانْ نْسنْ ذِي حَاضَايْرُوثْ.
١٨ فسْينْ إِقِيضَانْ نْسنْ، فّْغنْ زِي حَاضَايْرُوثْ ؤُشَا وْثِينْ إِقِيضَانْ نْسنْ ذِي رِيثْمَا.
١٩ فسْينْ إِقِيضَانْ نْسنْ، فّْغنْ زِي رِيثْمَا ؤُشَا وْثِينْ إِقِيضَانْ نْسنْ ذِي رِيمُّونْ-فَارِيصْ.
٢٠ فسْينْ إِقِيضَانْ نْسنْ، فّْغنْ زِي رِيمُّونْ-فَارِيصْ ؤُشَا وْثِينْ إِقِيضَانْ نْسنْ ذِي لِيبْنَا.
٢١ فسْينْ إِقِيضَانْ نْسنْ، فّْغنْ زِي لِيبْنَا ؤُشَا وْثِينْ إِقِيضَانْ نْسنْ ذِي رِيسَّا.
٢٢ فسْينْ إِقِيضَانْ نْسنْ، فّْغنْ زِي رِيسَّا ؤُشَا وْثِينْ إِقِيضَانْ نْسنْ ذِي قِيهَايْلَاثَا.
٢٣ فسْينْ إِقِيضَانْ نْسنْ، فّْغنْ زِي قِيهَايْلَاثَا ؤُشَا وْثِينْ إِقِيضَانْ نْسنْ ذِي وذْرَارْ ن شَافَارْ.
٢٤ فسْينْ إِقِيضَانْ نْسنْ، فّْغنْ زڭْ وذْرَارْ ن شَافَارْ ؤُشَا وْثِينْ إِقِيضَانْ نْسنْ ذِي حَارَاذَا.
٢٥ فسْينْ إِقِيضَانْ نْسنْ، فّْغنْ زِي حَارَاذَا ؤُشَا وْثِينْ إِقِيضَانْ نْسنْ ذِي مَاقْهَايْلُوثْ.
٢٦ فسْينْ إِقِيضَانْ نْسنْ، فّْغنْ زِي مَاقْهَايْلُوثْ ؤُشَا وْثِينْ إِقِيضَانْ نْسنْ ذِي ثَاحَاثْ.
٢٧ فسْينْ إِقِيضَانْ نْسنْ، فّْغنْ زِي ثَاحَاثْ ؤُشَا وْثِينْ إِقِيضَانْ نْسنْ ذِي ثَارَاحْ.
٢٨ فسْينْ إِقِيضَانْ نْسنْ، فّْغنْ زِي ثَارَاحْ ؤُشَا وْثِينْ إِقِيضَانْ نْسنْ ذِي مِيثْقَا.
٢٩ فسْينْ إِقِيضَانْ نْسنْ، فّْغنْ زِي مِيثْقَا ؤُشَا وْثِينْ إِقِيضَانْ نْسنْ ذِي حَاشْمُونَا.
٣٠ فسْينْ إِقِيضَانْ نْسنْ، فّْغنْ زِي حَاشْمُونَا ؤُشَا وْثِينْ إِقِيضَانْ نْسنْ ذِي مُوسِيرُوثْ.
٣١ فسْينْ إِقِيضَانْ نْسنْ، فّْغنْ زِي مُوسِيرُوثْ ؤُشَا وْثِينْ إِقِيضَانْ نْسنْ ذِي بَانِي-يَاعْقَانْ.
٣٢ فسْينْ إِقِيضَانْ نْسنْ، فّْغنْ زِي بَانِي-يَاعْقَانْ ؤُشَا وْثِينْ إِقِيضَانْ نْسنْ ذِي حُورْ-جِيذْجَاذْ.
٣٣ فسْينْ إِقِيضَانْ نْسنْ، فّْغنْ زِي زِي هُورْ-جِيذْجَاذْ ؤُشَا وْثِينْ إِقِيضَانْ نْسنْ ذِي يُوثْبَاثْ.
٣٤ فسْينْ إِقِيضَانْ نْسنْ، فّْغنْ زِي زِي يُوثْبَاثْ ؤُشَا وْثِينْ إِقِيضَانْ نْسنْ ذِي عَابْرُونَا.
٣٥ فسْينْ إِقِيضَانْ نْسنْ، فّْغنْ زِي زِي عَابْرُونَا ؤُشَا وْثِينْ إِقِيضَانْ نْسنْ ذِي عِيصْيُونْ-جَابَارْ.
٣٦ فسْينْ إِقِيضَانْ نْسنْ، فّْغنْ زِي زِي عِيصْيُونْ-جَابَارْ ؤُشَا ؤُشَا وْثِينْ إِقِيضَانْ نْسنْ ذِي ڒخْڒَا ن صِينْ نِّي يدْجَا قَاذَاشْ.
٣٧ فسْينْ إِقِيضَانْ نْسنْ، فّْغنْ زِي قَاذَاشْ ؤُشَا وْثِينْ إِقِيضَانْ نْسنْ غَارْ وذْرَارْ ن هُورْ، غَارْ ثْمَا ن ثمُّورْثْ ن إِذُومْ.
٣٨ يُوڒِي ؤُكهَّانْ هَارُونْ أَذْرَارْ ن هُورْ أَمْ مَامّشْ ذ أَسْ إِنَّا سِيذِي ؤُشَا إِمُّوثْ ذِينْ ذڭْ ؤُسڭّْوَاسْ وِيسّْ أَربْعِينْ أَوَارْنِي إِ ؤُفُّوغْ ن أَيْثْ ن إِسْرَائِيل زِي ثمُّورْثْ ن مِيصْرَا، ذڭْ ؤُيُورْ وِيسّْ خمْسَا، ذڭْ وَاسّْ أَمزْوَارُو ن ؤُيُورْ.
٣٩ ثُوغَا هَارُونْ غَارسْ مْيَا ؤُ-ثْڒَاثَا ؤُ-عِيشْرِينْ ن إِسڭّْوُوسَا ؤُمِي إِمُّوثْ ذڭْ وذْرَارْ ن هُورْ.
٤٠ ؤُشَا أَكنْعَانِي، أَجدْجِيذْ ن عَارَاذْ، ونِّي ثُوغَا إِزدّْغنْ ذِي لْجَانُوبْ ن ثمُّورْثْ ن كنْعَانْ، إِسْڒَا س ثْوَاسِيثْ ن أَيْثْ ن إِسْرَائِيل.
٤١ فسْينْ إِقِيضَانْ نْسنْ، فّْغنْ زڭْ وذْرَارْ ن هُورْ ؤُشَا وْثِينْ إِقِيضَانْ نْسنْ ذِي صَالْمُونَا.
٤٢ فسْينْ إِقِيضَانْ نْسنْ، فّْغنْ زِي صَالْمُونَا ؤُشَا وْثِينْ إِقِيضَانْ نْسنْ ذِي فُونُونْ.
٤٣ فسْينْ إِقِيضَانْ نْسنْ، فّْغنْ زِي فُونُونْ ؤُشَا وْثِينْ إِقِيضَانْ نْسنْ ذِي ؤُبُوثْ.
٤٤ فسْينْ إِقِيضَانْ نْسنْ، فّْغنْ زِي ؤُبُوثْ ؤُشَا وْثِينْ إِقِيضَانْ نْسنْ ذِي ڒْْخِيرْبَاثْ ن عَابَارِيمْ ذِي جّْوَايهْ ن ويْمِيرْ أَكْ-ذ مُوآبَ.
٤٥ فسْينْ إِقِيضَانْ نْسنْ، فّْغنْ زِي ڒْْخِيرْبَاثْ ن عَابَارِيمْ ؤُشَا وْثِينْ إِقِيضَانْ نْسنْ ذِي ذِيبُونْ-جَاذْ.
٤٦ فسْينْ إِقِيضَانْ نْسنْ، فّْغنْ زِي ذِيبُونْ-جَاذْ ؤُشَا وْثِينْ إِقِيضَانْ نْسنْ ذِي عَالْمُونْ-ذِيبْلَاثَايِيمْ.
٤٧ فسْينْ إِقِيضَانْ نْسنْ، فّْغنْ زِي عَالْمُونْ-ذِيبْلَاثَايِيمْ ؤُشَا وْثِينْ إِقِيضَانْ نْسنْ ذڭْ إِذُورَارْ ن عَابَارِيمْ زَّاثْ إِ وُوذمْ ن وذْرَارْ ن نابُو.
٤٨ فسْينْ إِقِيضَانْ نْسنْ، فّْغنْ زڭْ إِذُورَارْ ن عَابَارِيمْ ؤُشَا وْثِينْ إِقِيضَانْ نْسنْ ذِي ڒوْضَاثْ ن مُوآبَ غَارْ لْ-ؤُرْذُونْ أَرنْذَاذْ إِ أَرِيحَا.
٤٩ نِيثْنِي وْثِينْ إِقِيضَانْ نْسنْ غَارْ لْ-ؤُرْذُونْ زِي بَايْثْ-يَاشِيمُوثْ أَڒْ أَبَالْ-شِيطِّيمْ ذِي ڒوْضَاثْ ن مُوآبَ.
أَوَاڒْ ن مُوسَا خْ ؤُطفُّو ن كنْعَانْ
٥٠ إِسِّيوڒْ سِيذِي أَكْ-ذ مُوسَا ذِي ڒوْضَاثْ ن مُوآبَ غَارْ لْ-ؤُرْذُونْ أَرنْذَاذْ ن أَرِيحَا، إِنَّا:
٥١ ”سِيوڒْ أَكْ-ذ أَيْثْ ن إِسْرَائِيل ؤُشَا إِنِي أَسنْ: ’خْمِي إِ غَا ثژْوَامْ لْ-ؤُرْذُونْ غَارْ ثمُّورْثْ ن كنْعَانْ،
٥٢ خنِّي إِتّْخصَّا كنِّيوْ أَذْ ثسُّوفّْغمْ مَارَّا إِمزْذَاغْ ن ثمُّورْثْ زَّاثْ إِ ؤُغمْبُوبْ نْومْ ذ مَارَّا ڒخْيَاڒَاثْ نْسنْ إِنقْشنْ أَذْ ثنْثْ ثَارذْدْجمْ. عَاوذْ إِتّْخصَّا كنِّيوْ أَذْ ثثحَّامْ مَارَّا ڒخْيَاڒَاثْ إِفسْينْ نْسنْ ذ مَارَّا ڒڭْعُوذِي نْسنْ.
٥٣ أَذْ ثطّْفمْ ثَامُّورْثْ ذ ڒْْوَارْثْ ؤُشَا أَذْ ذَايسْ ثْزذْغمْ، مِينْزِي نشّْ وْشِيغْ أَومْ ثَامُّورْثْ نِّي ذ أَڭْڒَا.
٥٤ أَذْ ثبْضَامْ ثَامُّورْثْ س ثْقدُّوحْثْ أَمْ ڒْْوَارْثْ خْ ڒَْادْجَاثْ نْومْ. وِي غَارْ إِدْجَا أَطَّاسْ، أَذْ أَسْ ثوْشمْ أَطَّاسْ، ؤُ ونِّي غَارْ إِدْجَا ذْرُوسْ، أَذْ أَسْ ثوْشمْ ذْرُوسْ. مَانِي ذ أَسْ د-ثُوسَا ثْقدُّوحْثْ، أَذْ يِيڒِي نّسْ. عْلَاحْسَابْ ثِيقبَّاڒْ ن ڒجْذُوذْ نْومْ أَذْ ثْوَارْثمْ ثَاسْغَارْثْ نْومْ.
٥٥ مَاشَا مَاڒَا كنِّيوْ وَارْ ثسُّوفُّوغمْ شَا إِمزْذَاغْ ن ثمُّورْثْ زَّاثْ إِ وُوذمْ نْومْ، خنِّي أَذْ إِمْسَارْ أَقَا إِنِّي إِ غَا ثجّمْ أَذْ قِّيمنْ، أَذْ ذوْڒنْ ذ إِسنَّاننْ ذِي ثِيطَّاوِينْ نْومْ ذ إِوزْوِيزنْ ذڭْ إِغزْذِيسنْ نْومْ ؤُشَا نِيثْنِي أَذْ كنِّيوْ حْصَارنْ ذِي ثمُّورْثْ نِّي مَانِي ثْزدّْغمْ.
٥٦ ؤُشَا خنِّي أَذْ إِمْسَارْ أَذْ أَومْ ڭّغْ أَمْ مَامّشْ ثُوغَا خَارّْصغْ أَذْ أَكِيذْسنْ ڭّغْ.“