٢٨
ثِيغَارْصَا ن كُوڒْ أَسّْ
١ إِسِّيوڒْ سِيذِي أَكْ-ذ مُوسَا، إِنَّا:
٢ ”ؤُمُورْ أَيْثْ ن إِسْرَائِيل، إِنِي أَسنْ: ’إِتّْخصَّا كنِّيوْ أَذْ ثحْضَامْ خْ ثْغَارْصْطْ إِنُو، مَاشَّا إِنُو إِ ثوْهِيبِينْ إِنُو ن ثْمسِّي، إِشْثْ ن ڒفْوَاحثْ إِتّْفُوحنْ إِ نشّْ، مَاحنْذْ أَذْ أَيِي ثنْثْ ثْقدّْممْ ذِي ڒْْوقْثْ نّسْ إِتّْوَاڭّنْ.‘
٣ أَذْ أَسنْ ثِينِيذْ: ’أَقَا ثَا ذ ثَاوْهِيبْثْ ن ثْمسِّي إِ إِتّْخصَّانْ أَذْ ثْقدّْممْ: ثْنَاينْ ن إِزْمَارنْ إِشْنَانْ ن إِجّْ ن ؤُسڭّْوَاسْ، أَمْ ثْغَارْصْثْ ن وشْمَاضْ ڒبْذَا.
٤ إِجّْ ن إِزْمَارْ أَذْ ث ثسّْوجْذذْ ذِي صّْبحْ ؤُشَا إِزْمَارْ نّغْنِي أَذْ ث ثسّْوجْذذْ جَارْ بدُّو ن وزْينْ ن وَاسّْ أَڒْ د-ثوْضَا ثْمذِّيثْ
٥ ؤُشَا أَكْ-ذ مَانْ أَيَا أَمْ ثوْهِيبْثْ ن ڒْْغِيدْجثْ إِشْثْ ن ثعْشَارْثْ ن يِيجّْ ن إِفَا ن وَارنْ أَزْذَاذْ إِخدْجْضنْ س يِيجّْ ن أَرْبعْ ن إِجّْ ن ؤُهِينُو ن زّشْثْ، تّْوَادّْزنْ ث-إِ-د زِي زِّيثُونْ.
٦ أَقَا-ت ذ ثَاغَارْصْطْ ن وشْمَاضْ ن ڒبْذَا، ثنِّي ثُوغَا إِتّْوَاڭّنْ ذڭْ وذْرَارْ ن سِينَا أَمْ يِيشْثْ ن ڒفْوَاحثْ إِتّْفُوحنْ، أَقَا-ت ذ إِشْثْ ن ثوْهِيبْثْ ن ثْمسِّي إِ سِيذِي.
٧ ثَاوْهِيبْثْ نّسْ ن ؤُسيّبْ أَذْ ثِيڒِي ذ إِجّْ ن أَرْبعْ ن إِجّْ ن ؤُهِينُو إِ يِيجّْ ن إِزْمَارْ. سيّبْ ثَاوْهِيبْثْ ن ؤُسيّبْ ن شّْرَابْ ذِي زَّاوشْثْ إِقدّْسنْ زَّاثْ إِ سِيذِي.
٨ أَذْ ثسّْوجْذذْ إِزْمَارْ نّغْنِي جَارْ بدُّو ن وزْينْ ن وَاسّْ أَڒْ د-ثوْضَا ثْمذِّيثْ. أَذْ ث ثسّْوجْذذْ أَمْ مَامّشْ ثسّْوجْذذْ ثَاوْهِيبْثْ ن ڒْْغِيدْجثْ ذِي صّْبحْ ؤُ أَمْ مَامّشْ ثسّْوجْذذْ ثَاوْهِيبْثْ ن ؤُسيّبْ نّسْ، أَمْ إِشْثْ ن ثوْهِيبْثْ ن ثْمسِّي، إِشْثْ ن ڒفْوَاحثْ إِتّْفُوحنْ إِ سِيذِي.‘ “
ثِيغَارْصَا ن كُوڒْ سِّيمَانَا
٩ ”ذڭْ وَاسّْ ن سّبْثْ أَذْ ثسّْوجْذذْ ثْنَاينْ ن إِزْمَارنْ إِشْنَانْ ن إِجّْ ن ؤُسڭّْوَاسْ ذ ثْنَاينْ ن ثعْشُورِينْ ن يِيجّْ ن إِفَا ن وَارنْ أَزْذَاذْ أَمْ ثوْهِيبْثْ ن ڒْْغِيدْجثْ إِخدْجْضنْ س زّشْثْ أَكْ-ذ ثوْهِيبْثْ نّسْ ن ؤُسيّبْ.
١٠ أَقَا-ت ذ ثَاغَارْصْطْ ن وشْمَاضْ ن سّبْثْ إِ مْكُوڒْ سّبْثْ، أَذْ ت ثَارْنِيذْ إِ ثْغَارْصْثْ ن وشْمَاضْ ن ڒبْذَا ذ ثوْهِيبْثْ نّسْ ن ؤُسيّبْ.“
ثِيغَارْصَا ن كُوڒْ ؤُيُورْ
١١ ”ذڭْ ؤُمزْوَارْ ن كُوڒْ إِجّْ ن إِيُورنْ نْومْ إِتّْخصَّا أَذْ ثْقدّْممْ إِشْثْ ن ثْغَارْصْثْ ن وشْمَاضْ إِ سِيذِي: ثْنَاينْ ن إِفُونَاسنْ - إِمژْيَاننْ ن إِشْثْ ن ثْفُونَاسْثْ - إِجّْ ن إِشَارِّي، سبْعَا ن إِزْمَارنْ إِشْنَانْ قَاعْ ن إِجّْ ن ؤُسڭّْوَاسْ
١٢ ؤُشَا أَكْ-ذ مَانْ أَيَا ثْڒَاثَا ن ثعْشُورِينْ ن إِجّْ ن إِفَا ن وَارنْ أَزْذَاذْ أَمْ ثوْهِيبْثْ ن ڒْْغِيدْجثْ إِخدْجْضنْ س زّشْثْ إِ يِيجّْ ن ؤُفُونَاسْ أَمژْيَانْ ؤُ ثْنَاينْ ن ثعْشُورِينْ ن يِيجّْ ن إِفَا ن وَارنْ أَزْذَاذْ أَمْ ثوْهِيبْثْ ن ڒْْغِيدْجثْ إِخدْجْضنْ س زّشْثْ إِ يِيجّْ ن إِشَارِّي
١٣ ؤُشَا أَرْنِي إِشْثْ ن ثعْشَارْثْ ن يِيجّْ ن إِفَا ن وَارنْ أَزْذَاذْ أَمْ ثوْهِيبْثْ ن ڒْْغِيدْجثْ إِخدْجْضنْ س زّشْثْ إِ يِيجّْ ن إِزْمَارْ. أَقَا-ت ذ ثَاغَارْصْثْ ن وشْمَاضْ س إِشْثْ ن ڒفْوَاحثْ إِتّْفُوحنْ، أَقَا-ت ذ إِشْثْ ن ثوْهِيبْثْ ن ثْمسِّي إِ سِيذِي.
١٤ ثِيوْهِيبِينْ نْسنْ ن ؤُسيّبْ أَذْ إِڒِينْثْ ذ أَزْينْ ن ؤُهِينُو ن بِينُو أَكْ-ذ ؤُفُونَاسْ أَمژْيَانْ ذ إِشْثْ ن تُّوڒُوثْ ن إِجّْ ن ؤُهِينُو أَكْ-ذ إِشَارِّي ذ يِيجّْ ن أَرْبعْ ن إِجّْ ن ؤُهِينُو أَكْ-ذ إِزْمَارْ. ثَا ذ ثَاغَارْصْثْ ن وشْمَاضْ ن كُوڒْ أَيُورْ، إِ كُوڒْ أَيُورْ زڭْ إِيُورنْ ن ؤُسڭّْوَاسْ.
١٥ إِتّْخصَّا أَذْ ثسّْوجْذذْ إِجّْ ن ؤُمْيَانْ زڭْ إِغَايْضنْ ذ ثَاغَارْصْثْ ن دّنْبْ إِ سِيذِي، أَذْ ت ثَارْنِيذْ إِ ثْغَارْصْثْ ن وشْمَاضْ نْ ڒبْذَا أَكْ-ذ ثوْهِيبْثْ نّسْ ن ؤُسيّبْ.“
ثِيغَارْصَا ذڭْ وُوسَّانْ ن ڒْْعِيذْ ن ؤُسعْذُو
١٦ ذڭْ ؤُيُورْ أَمزْوَارُو، ذڭْ وَاسّْ وِيسّْ أَرْبعْطَاشْ ن ؤُيُورْ، أَذْ ثِيڒِي ثْغَارْصْثْ ن ؤُسعْذُو ن سِيذِي.
١٧ ذڭْ وَاسّْ وِيسّْ خمّسْطَاشْ ن سِيمَانْثْ ن ؤُيُورْ أَذْ يِيڒِي ڒْْعِيذْ. سبْعَا ن وُوسَّانْ أَذْ شّنْ أَغْرُومْ بْڒَا أَنْثُونْ.
١٨ ذڭْ وَاسّْ أَمزْوَارُو ن ڒْْعِيذْ أَذْ يِيڒِي يِيجّْ ن ؤُمُونِي إِقدّْسنْ. وَارْ تّڭّمْ ؤُڒَا ذ إِشْثْ ڒْْخذْمثْ إِ إِتّْخصَّانْ أَذْ ثتّْوَاڭّْ.
١٩ أَذْ ثْقدّْممْ إِشْثْ ن ثوْهِيبْثْ ن ثْمسِّي أَمْ ثْغَارْصْثْ ن وشْمَاضْ إِ سِيذِي: ثْنَاينْ ن إِفُونَاسنْ إِمژْيَاننْ ذ إِجّْ ن إِشَارِّي ذ سبْعَا ن إِزْمَارنْ ن إِجّْ ن ؤُسڭّْوَاسْ. إِتّْخصَّا أَذْ إِڒِينْ شْنَانْ قَاعْ.
٢٠ أَذْ ثِيڒِي ثوْهِيبْثْ ن ڒْْغِيدْجثْ ن وَارنْ أَزْذَاذْ إِخدْجْضنْ س زّشْثْ. أَذْ زَّايسْ ثسّْوجْذمْ ثْڒَاثَا ن ثعْشُورِينْ ن يِيجّْ ن إِفَا إِ يِيجّْ ن ؤُفُونَاسْ أَمژْيَانْ ذ ثْنَاينْ ن ثعْشُورِينْ ن يِيجّْ ن إِفَا إِ يِيجّْ ن إِشَارِّي.
٢١ أَذْ ثسّْوجْذذْ إِشْثْ ن ثعْشَارْثْ ن يِيجّْ ن إِفَا إِ يِيجّْ ن إِزْمَارْ، ؤُشَا أَمُّو إِ مَارَّا سبْعَا ن إِزْمَارنْ نِّي.
٢٢ سوْجذْ عَاوذْ إِجّْ ن ؤُمْيَانْ زڭْ إِغَايْضنْ ذ ثَاغَارْصْثْ ن دّنْبْ مَاحنْذْ أَذْ إِتّْوَاڭّْ وصْڒَاحْ إِ كنِّيوْ.
٢٣ أَذْ ثسّْوجْذمْ مَانْ أَيَا سنّجْ إِ ؤُسوْجذْ ن ثْغَارْصْثْ وشْمَاضْ ذِي صّْبحْ نِّي إِدْجَانْ ذ إِشْثْ ن ثْغَارْصْثْ ن وشْمَاضْ إِ ڒبْذَا.
٢٤ أَمْ مَامّشْ ؤُيَا أَذْ ثسّْوجْذمْ مَاشَّا ن ثوْهِيبِينْ ن ثْمسِّي سبْعَا ن وُوسَّانْ، ذِي كُوڒْ أَسّْ زَّايْسنْ، أَمْ إِشْثْ ن ڒفْوَاحثْ إِتّْفُوحنْ إِ سِيذِي. أَذْ إِتّْوَاسّوْجذْ سنّجْ إِ ؤُسوْجذْ ن ثْغَارْصْثْ ن وشْمَاضْ ن ڒبْذَا أَكْ-ذ ثوْهِيبْثْ نّسْ ن ؤُسيّبْ.
٢٥ ذڭْ وَاسّْ وِيسّْ سبْعَا أَذْ ثڭّمْ إِجّْ ن ؤُمُونِي إِقدّْسنْ. وَارْ تّڭّمْ ؤُڒَا ذ إِشْثْ ڒْْخذْمثْ إِ إِتّْخصَّانْ أَذْ ثتّْوَاڭّْ.“
إِمزْوُورَا ن ڒْْغِيدْجثْ
٢٦ ”ذڭْ وَاسّْ ن ثْمنْزُوثْ ن صَّابثْ ذِي ڒْْعِيذْ ن سِّيمَانَاثْ، خْمِي د غَا ثْقدّْممْ إِشْثْ ن ثوْهِيبْثْ ن ڒْْغِيدْجثْ ن جْذِيذْ غَارْ سِيذِي، أَذْ ثڭّمْ إِجّْ ن ؤُمُونِي إِقدّْسنْ. وَارْ تّڭّمْ ؤُڒَا ذ إِشْثْ ن ڒْْخذْمثْ إِ إِتّْخصَّانْ أَذْ ثتّْوَاڭّْ.
٢٧ أَذْ ثْقدّْممْ إِشْثْ ن ثْغَارْصْثْ ن وشْمَاضْ أَمْ يِيشْثْ ن ڒفْوَاحثْ إِتّْفُوحنْ إِ سِيذِي: ثْنَاينْ ن إِفُونَاسنْ إِمژْيَاننْ إِ يِيجّْ ن إِشَارِّي ذ سبْعَا ن إِزْمَارنْ ن إِجّْ ن ؤُسڭّْوَاسْ
٢٨ أَكْ-ذ ثوْهِيبْثْ نّسْ ن ڒْْغِيدْجثْ ن وَارنْ أَزْذَاذْ إِخدْجْضنْ س زّشْثْ: ثْڒَاثَا ن ثعْشُورِينْ ن يِيجّْ ن إِفَا إِ يِيجّْ ن ؤُفُونَاسْ أَمژْيَانْ ذ ثْنَاينْ ن ثعْشُورِينْ ن يِيجّْ ن إِفَا إِ يِيجّْ ن إِشَارِّي
٢٩ ؤُڒَا ذ إِشْثْ ن ثعْشَارْثْ ن يِيجّْ ن إِفَا إِ كُوڒْ إِزْمَارْ، ؤُشَا أَمُّو إِ مَارَّا سبْعَا ن إِزْمَارنْ نِّي.
٣٠ سْوجْذمْ عَاوذْ إِجّْ ن ؤُمْيَانْ زڭْ إِغَايْضنْ أَمْ ثْغَارْصْثْ ن دّنْبْ مَاحنْذْ أَذْ إِتّْوَاڭّْ وصْڒَاحْ إِ كنِّيوْ.
٣١ أَذْ ثنْ ثسّْوجْذمْ سنّجْ إِ ؤُسوْجذْ ن ثْغَارْصْثْ ن وشْمَاضْ ن ڒبْذَا ذ ثوْهِيبْثْ نّسْ ن ڒْْغِيدْجثْ. أَذْ إِڒِينْ شْنَانْ قَاعْ إِ كنِّيوْ أَكْ-ذ ثوْهِيبِينْ نْسنْ ن ؤُسيّبْ.“