١٧
جّْرِيحشْثْ إِنقّنْ
١ إِسِّيوڒْ سِيذِي أَكْ-ذ مُوسَا، إِنَّا:
٢ ”إِنِي إِ أَلِيعَازَارْ، مِّيسْ ن ؤُكهَّانْ هَارُونْ، بلِّي أَذْ إِكْسِي ثِيمجْمَارِينْ زڭْ ؤُحَاذُوقْ ن ثْمسِّي ؤُشَا أَذْ إِسُّويسْ مِينْ إِقِّيمنْ ن ثْمسِّي ذِي ڒَْاڭّْوَاجْ، مِينْزِي أَقَا ثِيمجْمَارِينْ نِّي، قدّْسنْثْ إِ دْجَانْثْ!
٣ جّمْ ثنْ أَذْ ڭّنْ زِي ثْمجْمَارِينْ ن يرْيَازنْ-أَ، إِنِّي ثُوغَا إِخطَّانْ ضِيدّْ إِ ڒعْمُورْ نْسنْ، ثِيڒْوِيحِينْ ذ ثِيزِيرَارِينْ إِ دُّورِي إِ ؤُعَالْطَارْ، مِينْزِي إِوْينْ ثنْثْ زَّاثْ إِ وُوذمْ ن سِيذِي، س ؤُيَا تّْوَاقدّْسنْثْ ثِينَا. أَذْ إِڒِينْثْ ذ إِجّْ ن ؤُشيَّارْ إِ أَيْثْ ن إِسْرَائِيل.“
٤ خنِّي إِكْسِي ؤُكهَّانْ أَلِيعَازَارْ ثِيمجْمَارِينْ ن نّْحَاسْ نِّي د-إِوْينْ يِينِّي إِتّْوَاشمْضنْ إِ ثوْهِيبْثْ، ؤُشَا ثْكثْكنْ ثنْثْ حِيمَا أَذْ زَّايْسنْثْ ذْڒنْثْ أَعَالْطَارْ
٥ إِ ڒِْيذَارثْ إِ أَيْثْ ن إِسْرَائِيل، حِيمَا ؤُڒَا ذ إِجّْ ن ورْيَازْ وَارْ إِدْجِينْ زِي زَّارِيعثْ ن هَارُونْ، وَارْ د-إِتّْقَارِّيبْ شَا بْڒَا تّسْرِيحْ زَّاثْ إِ وُوذمْ ن سِيذِي، حِيمَا أَذْ إِسّْبخَّارْ ڒبْخُورْ، مَاحنْذْ وَارْ ذ أَسْ إِڒْقفْ مِينْ إِڒقْفنْ قُورَاحْ ذ ؤُبَارُّو نّسْ، أَمْ مَامّشْ ثُوغَا إِسِّيوڒْ سِيذِي س ؤُقمُّومْ ن مُوسَا.
٦ ثِيوشَّا نّسْ ثُوغَا مَارَّا ثَامسْمُونْثْ ن أَيْثْ ن إِسْرَائِيل ثتّْنذْقَامْ ضِيدّْ إِ مُوسَا ذ هَارُونْ، نَّانْ: ”كنِّيوْ ثنْغِيمْ ڒْْڭنْسْ ن سِيذِي!“
٧ ؤُشَا ؤُمِي ثْمُونْ ثْمسْمُونْثْ ضِيدّْ إِ مُوسَا ذ هَارُونْ ؤُشَا بْذَانْ نِيثْنِي ڭُّورنْ غَارْ ؤُقِيضُونْ ن ؤُمْسَاڭَارْ، خْزَارْ، أَقَا ذِينْ أَسيْنُو نِّي ث إِذْڒِينْ ؤُشَا إِبَانْ-د ؤُعُودْجِي ن سِيذِي.
٨ يُوسَا-د مُوسَا أَكْ-ذ هَارُونْ، بدّنْ زَّاثْ إِ ؤُقِيضُونْ ن ؤُمْسَاڭَارْ.
٩ إِسِّيوڒْ سِيذِي أَكْ-ذ مُوسَا، إِنَّا:
١٠ ”كَّارمْ، أَڭّْوجمْ زِي ڒْْوسْطْ ن ثْمسْمُونْثْ ؤُ نشّْ أَذْ ثنْ مْحِيغْ ذڭْ إِجّْ ن ورْمَاشْ ن وَابْڒِيونْ!“ خنِّي وْضَانْ خْ وُوذمْ نْسنْ.
١١ إِنَّا مُوسَا إِ هَارُونْ: ”كْسِي ذغْيَا إِجّْ ن ڒْْمجْمَارْ، أڭّْ خَاسْ ثِيمسِّي ن ؤُعَالْطَارْ ؤُشَا سَارْسْ خَاسْ ڒبْخُورْ. أَزّڒْ غَارْ ثْمسْمُونْثْ ؤُشَا أڭّْ أَصْڒَاحْ ذِي طّْوعْ نْسنْ، مِينْزِي إِفّغْ-د ؤُذُوقّزْ ن وغْضَابْ زِي زَّاثْ إِ وُوذمْ ن سِيذِي. أَقَا ذَا جّْرِيحشْثْ أَمْ ثبْذَا عَاذْ.“
١٢ إِكْسِي هَارُونْ ڒْْمجْمَارْ، أَمْ مَامّشْ إِنَّا مُوسَا، ؤُشَا يُوزّڒْ غَارْ ڒْْوسْطْ ن وڭْرَاوْ ن ڒْْڭنْسْ، ؤُشَا خْزَارْ، جّْرِيحشْثْ ثُوغَا أَمْ ثبْذَا عَاذْ جَارْ ڒْْڭنْسْ، ؤُشَا نتَّا إِسَّارْسْ ذَايسْ ڒبْخُورْ ؤُشَا إِڭَّا أَصْڒَاحْ ذِي طّْوعْ ن ڒْْڭنْسْ.
١٣ ثُوغَا إِبدّْ جَارْ إِمتَّانْ ذ إِمُودَّارنْ ؤُشَا ثتّْوَاسّْبدّْ جّْرِيحشْثْ.
١٤ وِي إِمُّوثنْ زِي جّْرِيحشْثْ ثُوغَا أَثنْ ذِي أَرْبعْطَاشْ-أَڒفْ ؤُ-سبْعَا-مْيَا، بْڒَا إِنِّي إِمُّوثنْ ذِي سِّيبّثْ ن قُورَاحْ.
١٥ إِذْوڒْ هَارُونْ غَارْ مُوسَا غَارْ وَاذَافْ ن ؤُقِيضُونْ ن ؤُمْسَاڭَارْ. أَقَا ثتّْوَاسّْبدّْ جّْرِيحشْثْ.
ثَاغَّارْشْثْ إِزّيْزُوينْ ن هَارُونْ
١٦ إِسِّيوڒْ سِيذِي أَكْ-ذ مُوسَا، إِنَّا:
١٧ ”سِيوڒْ أَكْ-ذ أَيْثْ ن إِسْرَائِيل ؤُشَا كْسِي زَّايْسنْ إِشْثْ ن ثغَّارْشْثْ إِ كُوڒْ ثَادَّارْثْ ن إِبَابَاثنْ نْسنْ، زِي مَارَّا ڒْْحُوكَّامْ نْسنْ، عْلَاحْسَابْ لْعَاذَاذْ ن ثُوذْرِينْ ن إِبَابَاثنْ نْسنْ، ثنْعَاشْ ن ثغَّارْينْ. إِتّْخصَّا أَذْ ثَارِيذْ إِسمْ ن كُوڒْ إِجّْ زَّايْسنْ خْ ثغَّارْشْثْ نّسْ.
١٨ أَذْ ثَارِيذْ إِسمْ ن هَارُونْ خْ ثغَّارْشْثْ ن لَاوِي، مِينْزِي أَذْ ذِينْ ثِيڒِي إِشْثْ ن ثغَّارْشْثْ إِ يِيجّْ ن ؤُزدْجِيفْ ن ثَادَّارْثْ ن ڒجْذُوذْ نْسنْ.
١٩ أَذْ ثنْثْ ثڭّذْ ذڭْ ؤُقِيضُونْ ن ؤُمْسَاڭَارْ، زَّاثْ إِ شّْهَاذثْ، مَانِي كِيذْومْ غَا مْسَاڭَارغْ.
٢٠ خنِّي أَذْ إِمْسَارْ، أَقَا أَذْ ثْنُووَّارْ ثغَّارْشْثْ ن ورْيَازْ نِّي إِخْضَارغْ نشّْ ؤُشَا أَذْ سّْبدّغْ أَنذْقمْ ضِيدّْ إِنُو إِ زِي خَاومْ نّْذقْمنْ أَيْثْ ن إِسْرَائِيل.“
٢١ إِسِّيوڒْ مُوسَا أَكْ-ذ أَيْثْ ن إِسْرَائِيل، ؤُشَا مَارَّا ڒْْحُوكَّامْ نْسنْ وْشِينْ إِشْثْ ن ثغَّارْشْثْ إِ مْكُوڒْ إِجّْ ن ڒْْحَاكمْ، عْلَاحْسَابْ ڒْْقدّْ ن ثُوذْرِينْ ن إِبَابَاثنْ نْسنْ، ثنْعَاشْ ن ثغَّارْينْ. ؤُشَا ثَاغَّارْشْثْ ن هَارُونْ ثُوغَا-ث جَارْ ثغَّارْينْ نْسنْ.
٢٢ مُوسَا إِسَّارْسْ ثِيغَّارْينْ نِّي زَّاثْ إِ وُوذمْ ن سِيذِي ذڭْ ؤُقِيضُونْ ن شّْهَاذثْ.
٢٣ ثِيوشَّا نّسْ يُوذفْ مُوسَا غَارْ ؤُقِيضُونْ ن شّْهَاذثْ، ؤُشَا خْزَارْ، ثَاغَّارْشْثْ ن هَارُونْ ذِي طّْوعْ ن ثَادَّارْثْ ن لَاوِي ثُوغَا ثڭَّا ثَاشْڒَاڒْثْ ؤُشَا ثَاعبُّوزْثْ ثسُّوفّغْ-د ؤُشَا نُّووَّارْ نّسْ يَارْزمْ ؤُشَا يِيوِي-د دْجُوزْ يِيوْضنْ.
٢٤ خنِّي إِسُّوفّغْ مُوسَا مَارَّا ثِيغَّارْينْ زِي زَّاثْ إِ وُوذمْ ن سِيذِي غَارْ مَارَّا أَيْثْ ن إِسْرَائِيل. ژْرِينْ أَيَا ؤُشَا طّْفنْ كُوڒْ إِجّْ ثَاغَّارْشْثْ نّسْ.
٢٥ خنِّي إِنَّا سِيذِي إِ مُوسَا: ”أَرّْ ثَاغَّارْشْثْ ن هَارُونْ زَّاثْ إِ شّْهَاذثْ، أَذْ ت ثحْضِيذْ أَمْ يِيجّْ ن ؤُشيَّارْ ضِيدّْ إِ يِينِّي إِغوّْغنْ. أَمُّو إِ غَا ثسّْبدّذْ أَنذْقمْ نْسنْ ضِيدّْ إِنُو مَاحنْذْ نِيثْنِي وَارْ تّْمتِّينْ شَا.“
٢٦ ؤُشَا إِڭَّا مُوسَا أَمْ مَامّشْ ذ أَسْ يُومُورْ سِيذِي، أَمُّو إِ إِڭَّا نتَّا.
٢٧ خنِّي سِّيوْڒنْ أَيْثْ ن إِسْرَائِيل أَكْ-ذ مُوسَا، نَّانْ: ”خْزَارْ، أَذْ زَّايْنغْ إِفّغْ بُوحْبڒْ، أَذْ نتّْوَاهلّكْ، أَذْ نتّْوَاهلّكْ مَارَّا نشِّينْ!
٢٨ مَانْ ونْ مَا إِ د غَا إِقَارّْبنْ غَارْ ؤُقِيضُونْ ن سِيذِي، أَذْ إِمّثْ. مَا أَذْ نتّْوَاثحَّا أَڒْ زَّايْنغْ إِفّغْ بُوحْبڒْ؟“