١٥
ثِيغَارْصَا ن ثْمسِّي
١ إِسِّيوڒْ سِيذِي أَكْ-ذ مُوسَا، إِنَّا:
٢ ”سِيوڒْ أَكْ-ذ أَيْثْ ن إِسْرَائِيل، إِنِي أَسنْ: ’خْمِي غَا ثَاذْفمْ غَارْ ثمُّورْثْ مَانِي غَا ثْزدّْغمْ، ثَامُّورْثْ نِّي ذ أَومْ غَا وْشغْ،
٣ ؤُشَا أَذْ ثسّْوجْذمْ ذِينْ إِشْثْ ن ثوْهِيبْثْ ن ثْمسِّي إِ سِيذِي، إِشْثْ ن ثْغَارْصْثْ ن وشْمَاضْ نِيغْ إِشْثْ ن ثوْهِيبْثْ إِ ثْغَارْصْثْ إِ ؤُكمّڒْ ن إِجّْ ن لْوَاعْذْ نِيغْ إِشْثْ ن ثوْهِيبْثْ س ڒْْخَاضَارْ نِيغْ إِشْثْ ن ثوْهِيبْثْ إِ ڒعْيُوذَاثْ نْومْ إِتّْوَاڭّنْ، مَاحنْذْ أَذْ ثِيڒِي ذ إِشْثْ ن ڒفْوَاحثْ إِتّْفُوحنْ إِ سِيذِي، زِي ڒبْهَايمْ نِيغْ زڭْ وُودْجِي،
٤ خنِّي ونِّي د غَا إِقدّْمنْ ثَاوْهِيبْثْ نّسْ إِ سِيذِي، أَذْ يَاوِي عَاوذْ إِشْثْ ن ثوْهِيبْثْ ن ڒْْغِيدْجثْ زڭْ إِشْثْ ن ثعْشَارْثْ ن يِيجّْ ن إِفَا ن وَارنْ أَزْذَاذْ إِخدْجْضنْ س يِيجّْ ن أَرْبعْ ن إِجّْ ن ؤُهِينُو ن زّشْثْ.
٥ أَذْ ثسّْوجْذذْ أَكْ-ذ مَانْ أَيَا إِجّْ ن أَرْبعْ ن إِجّْ ن ؤُهِينُو ن بِينُو أَمْ ثوْهِيبْثْ ن ؤُسيّبْ إِ كُوڒْ إِجّْ ن إِزْمَارْ، مَاحنْذْ أَذْ ثِيڒِي خْ ثْغَارْصْثْ ن وشْمَاضْ نِيغْ خْ ثوْهِيبْثْ إِ ثْغَارْصْثْ،
٦ نِيغْ، مَاڒَا أَذْ ثِيڒِي إِ يِيجّْ ن إِشَارِّي، خنِّي إِتّْخصَّا أَذْ ثسّْوجْذذْ إِشْثْ ن ثوْهِيبْثْ ن ڒْْغِيدْجثْ زِي ثْنَاينْ ن ثعْشُورَايْ ن إِجّْ ن إِفَا ن وَارنْ أَزْذَاذْ إِخدْجْضنْ س إِشْثْ ن تُّوڒُوثْ ن إِجّْ ن ؤُهِينُو ن زّشْثْ،
٧ ؤُشَا أَذْ ثْقدّْمذْ عَاوذْ إِشْثْ ن تُّوڒُوثْ ن إِجّْ ن ؤُهِينُو ن بِينُو أَمْ ثوْهِيبْثْ ن ؤُسيّبْ، أَمْ يِيشْثْ ن ڒفْوَاحثْ إِتّْفُوحنْ إِ سِيذِي.‘ “
٨ ”خْمِي غَا ثسّْوجْذذْ أَمژْيَانْ ن ؤُفُونَاسْ أَمْ ثْغَارْصْثْ ن وشْمَاضْ نِيغْ أَمْ ثوْهِيبْثْ إِ ثْغَارْصْثْ مَاحنْذْ أَذْ يِيڒِي إِ ؤُكمّڒْ ن إِجّْ ن لْوَاعْذْ نِيغْ أَمْ ثْغَارْصْثْ ن ڒهْنَا إِ سِيذِي،
٩ خنِّي إِتّْخصَّا أَذْ ثْقدّْمذْ أَكْ-ذ ؤُمژْيَانْ ن ؤُفُونَاسْ عَاوذْ إِشْثْ ن ثوْهِيبْثْ ن ڒْْغِيدْجثْ ن ثْڒَاثَا ن ثعْشُورَايْ ن إِجّْ ن إِفَا ن وَارنْ أَزْذَاذْ إِخدْجْضنْ ذڭْ وزْينْ ن ؤُهِينُو ن زّشْثْ،
١٠ ؤُشَا إِتّْخصَّا عَاوذْ أَذْ د-ثَاوْيذْ أَزْينْ ن ؤُهِينُو ن بِينُو أَمْ ثوْهِيبْثْ ن ؤُسيّبْ، أَمْ ثوْهِيبْثْ ن ثْمسِّي، إِشْثْ ن ڒفْوَاحثْ إِتّْفُوحنْ إِ سِيذِي.
١١ أَمُّو إِ إِتّْخصَّا أَذْ ڭّنْ إِ كُوڒْ أَفُونَاسْ، نِيغْ إِ كُوڒْ إِشَارِّي، نِيغْ إِ كُوڒْ إِجّْ زڭْ وُودْجِي، زڭْ إِحُوڒِييّنْ نِيغْ زڭْ إِغَايْضنْ.
١٢ عْلَاحْسَابْ ڒْْقدّْ ن إِمُودَّارنْ إِ ثْغَارْصْثْ إِ غَا ثسّْوجْذمْ، أَذْ ثڭّمْ أَمُّو إِ كُوڒْ إِجّْ ن ؤُمُودَّارْ، عْلَاحْسَابْ ڒْْقدّْ إِكمّْڒنْ ن إِمُودَّارنْ.
١٣ مَارَّا إِنِّي د-إِتّْوَاخڒْقنْ ذِي ثمُّورْثْ أَذْ ڭّنْ ثِيمسْڒَايِينْ-أَ أَمُّو، خْمِي د غَا قدّْمنْ نِيثْنِي إِشْثْ ن ثوْهِيبْثْ ن ثْمسِّي، إِشْثْ ن ڒفْوَاحثْ إِتّْفُوحنْ إِ سِيذِي.
١٤ خْمِي غَا ثَافذْ جَارْ مَارَّا جِّيڒَاثْ نْومْ إِجّْ ن ؤُبَارَّانِي إِ إِقِّيمنْ أَكِيذْومْ، نِيغْ إِجّنْ ونِّي إِزدّْغنْ ذِي ڒْْوسْطْ نْومْ، أَقَا نتَّا أَذْ إِسّوْجذْ إِشْثْ ن ثوْهِيبْثْ ن ثْمسِّي، إِشْثْ ن ڒفْوَاحثْ إِتّْفُوحنْ إِ سِيذِي، خنِّي أَذْ ت إِڭّْ أَمْ مَامّشْ ت ثتّڭّمْ كنِّيوْ.“
١٥ أَيْ، أَڭْرَاوْ ن ڒْْڭنْسْ، أَذْ ذِينْ ثِيڒِي إِشْثْ ن ثوْصيّثْ، إِشْثْ ن ثوْصيّثْ إِ ڒبْذَا إِ كنِّيوْ ؤُ إِ ؤُبَارَّانِي نِّي أَكِيذْومْ إِقِّيمنْ إِ مَارَّا جِّيڒَاثْ نْومْ. أَذْ يِيڒِي ؤُبَارَّانِي أَمْ مَامّشْ ثدْجَامْ كنِّيوْ زَّاثْ إِ وُوذمْ ن سِيذِي.
١٦ أَذْ يِيڒِي إِجّْ ن ؤُزرْفْ ذ إِشْثْ ن لْفَارِيضَا إِ كنِّيوْ ؤُ إِ ؤُبَارَّانِي نِّي أَكِيذْومْ إِقِّيمنْ.“
إِمزْوُورَا ن وَارنْ
١٧ إِسِّيوڒْ سِيذِي أَكْ-ذ مُوسَا، إِنَّا:
١٨ ”سِيوڒْ أَكْ-ذ أَيْثْ ن إِسْرَائِيل ؤُشَا إِنِي أَسنْ: ’خْمِي غَا ثَاذْفمْ غَارْ ثَامُّورْثْ مَانِي كنِّيوْ غَا يْأَوْيغْ،
١٩ خنِّي أَذْ إِمْسَارْ، ؤُمِي غَا ثشّمْ أَغْرُومْ زِي ڒْْغِيدْجثْ ن ثمُّورْثْ، أَقَا كنِّيوْ أَذْ ثسّْڭعّْذمْ إِشْثْ ن ثوْهِيبْثْ ن ؤُسْڭعّذْ إِ سِيذِي.
٢٠ زِي ثْمزْوَارُوثْ ن وَارشْثِي نْومْ أَذْ ثسّْڭعّْذمْ إِشْثْ ن ثمْسمّنْثْ أَمْ ثوْهِيبْثْ ن ؤُسْڭعّذْ. أَذْ ت ثسّْڭعّْذمْ أَمْ مَامّشْ ثسّْڭعّْذمْ ثَاوْهِيبْثْ ن ؤُسْڭعّذْ ن ؤُنذْرَارْ.
٢١ زِي ثْمزْوَارُوثْ ن وَارشْثِي نْومْ أَذْ ثْقدّْممْ إِشْثْ ن ثوْهِيبْثْ ن ؤُسْڭعّذْ إِ سِيذِي ذِي مَارَّا جِّيڒَاثْ نْومْ.‘ “
دّنْبْ وَارْ إِدْجِي نعْمَاذَا
٢٢ ”مَاڒَا ثْودَّارمْ ؤُ وَارْ ثتّڭّمْ مَارَّا ڒُْومُورَاثْ-أَ إِ ثُوغَا إِسَّاوَاڒْ سِيذِي أَكْ-ذ مُوسَا
٢٣ - مَارَّا مِينْ ذ أَومْ يُومُورْ سِيذِي س ثْسخَّارْثْ ن مُوسَا زڭْ وَاسّْ مِينْ زِي ث يُومُورْ سِيذِي، سّنِّي ذ ثْسَاونْثْ، ذِي مَارَّا رجْيُوڒْ نْومْ -
٢٤ خنِّي أَذْ إِمْسَارْ، مَاڒَا إِتّْوَاڭّْ س ؤُودَّارْ بَارَّا إِ ثِيطَّاوِينْ ن ثْمسْمُونْثْ، أَقَا ثَامسْمُونْثْ مَارَّا أَذْ ثسّوْجذْ إِجّْ ن ؤُفُونَاسْ، أَمژْيَانْ ن ثْفُونَاسْثْ، أَمْ ثْغَارْصْثْ ن وشْمَاضْ، أَمْ إِشْثْ ن ڒفْوَاحثْ إِتّْفُوحنْ إِ سِيذِي أَكْ-ذ ثوْهِيبْثْ نّسْ ن ڒْْغِيدْجثْ ذ ثوْهِيبْثْ نّسْ ن ؤُسيّبْ عْلَاحْسَابْ لْفَارِيضَا ؤُ أَكْ-ذ يِيجّْ ن ؤُمْيَانْ زڭْ إِغَايْضنْ أَمْ ثْغَارْصْثْ ن دّنْبْ.
٢٥ خنِّي أَذْ إِڭّْ ؤُكهَّانْ أَسْڒَاحْ إِ مَارَّا ثَامسْمُونْثْ ن أَيْثْ ن إِسْرَائِيل ؤُشَا أَذْ أَسنْ إِتّْوَاغْفَارْ، مِينْزِي مَانْ أَيَا إِمْسَارْ زڭْ ؤُودَّارْ، ؤُشَا نِيثْنِي قدّْمنْ ثَاوْهِيبْثْ نْسنْ، إِشْثْ ن ثوْهِيبْثْ ن ثْمسِّي إِ سِيذِي، ؤُڒَا ذ ثَاغَارْصْثْ نْسنْ ن دّنْبْ، زَّاثْ إِ وُوذمْ ن سِيذِي.
٢٦ مَارَّا ثَامسْمُونْثْ ن أَيْثْ ن إِسْرَائِيل أَذْ ثتّْوَاغْفَارْ، ؤُڒَا ذ أَبَارَّانِي نِّي إِزدّْغنْ ذِي ڒْْوسْطْ نْومْ، خْ ؤُمِي إِمْسَارْ أَمْ إِودَّارْ مَارَّا ڒْْڭنْسْ.“
٢٧ ”مَاڒَا إِجّنْ بْنَاذمْ إِخْضَا أَمْ نتَّا إِودَّارْ، خنِّي أَذْ د-إِسّْقَارّبْ إِشْثْ ن ثْغَايْضثْ ن إِجّْ ن ؤُسڭّْوَاسْ أَمْ ثْغَارْصْثْ ن دّنْبْ.
٢٨ أَكهَّانْ أَذْ إِڭّْ أَصْڒَاحْ زَّاثْ إِ وُوذمْ ن سِيذِي خْ بْنَاذمْ نِّي ثُوغَا إِودَّارْ، أَمْ ثُوغَا إِخْضَا س ؤُودَّارْ زَّاثْ إِ وُوذمْ ن سِيذِي، أَمْ خَاسْ إِ غَا يڭّْ أَسْڒَاحْ ؤُشَا خنِّي أَذْ أَسْ إِتّْوَاغْفَارْ.
٢٩ أَذْ ذِينْ يِيڒِي إِجّْ ن ؤُزرْفْ إِ ونِّي إِڭِّينْ شَا س ؤُودَّارْ، إِ ونِّي د-إِخڒْقنْ ذِي ثمُّورْثْ ؤُڒَا إِ ؤُبَارَّانِي نِّي إِزدّْغنْ ذِي ڒْْوسْطْ نْومْ.“
دّنْبْ س ؤُفُوسْ إِڭعّْذنْ
٣٠ ”مَاشَا بْنَاذمْ نِّي إِڭِّينْ شَا س ؤُفُوسْ إِڭعّْذنْ، مَا نتَّا إِتّْوَاخْڒقْ-د ذِي ثمُّورْثْ نِيغْ نتَّا ذ أَبَارَّانِي، أَقَا نتَّا إِشقّفْ ذِي سِيذِي ؤُشَا بْنَاذمْ نِّي أَذْ إِتّْوَاقسّْ زِي ڒْْوسْطْ ن ڒْْڭنْسْ نّسْ،
٣١ ؤُمِي إِسّحْقَارْ أَوَاڒْ ن سِيذِي ؤُ يَارْژَا ڒُْومُورْ نّسْ. بْنَاذمْ نِّي أَذْ إِتّْوَاقسّْ قَاعْ زِي ڒْْڭنْسْ نّسْ، ڒْْمُوعْصِييّثْ نّسْ أَذْ ثِيڒِي خَاسْ.“
٣٢ ڒَْامِي ثُوغَا أَيْثْ ن إِسْرَائِيل ذِي ڒخْڒَا، ؤُفِينْ إِجّْ ن ورْيَازْ إِتّْحَارْوَاشْ أَكشُّوضْ ذڭْ وَاسّْ ن سّبْثْ.
٣٣ إِنِّي ث يُوفِينْ أَمْ ثُوغَا إِتّْحَارْوَاشْ أَكشُّوضْ، إِوْينْ ث غَارْ مُوسَا ذ هَارُونْ ذ مَارَّا ثَامسْمُونْثْ.
٣٤ ڭِّينْ ث ذِي ثْحطُّوثْ، مِينْزِي ثُوغَا وَارْ د-إِبِينْ مِينْ زَّايسْ غَا ڭّنْ.
٣٥ خنِّي إِنَّا سِيذِي إِ مُوسَا: ”أَرْيَازْ نِّي أَذْ إِتّْوَانغْ نِيشَانْ. مَارَّا ثَامسْمُونْثْ أَذْ ث ثَارْجمْ بَارَّا إِ ڒْْمَارْڭحْ ن ڒْْعسْكَارْ.“
٣٦ خنِّي ثسُّوفّغْ إِ-ث مَارَّا ثْمسْمُونْثْ بَارَّا إِ ڒْْمَارْڭحْ ن ڒْْعسْكَارْ ؤُشَا نِيثْنِي أَرجْمنْ ث أَڒَامِي إِمُّوثْ، أَمْ مَامّشْ ث يُومُورْ سِيذِي إِ مُوسَا.
ثِيشَارْشِيفَا ن ڒِْيذَارثْ
٣٧ إِسِّيوڒْ سِيذِي أَكْ-ذ مُوسَا، إِنَّا:
٣٨ ”سِيوڒْ أَكْ-ذ أَيْثْ ن إِسْرَائِيل ؤُشَا إِنِي أَسنْ، أَذْ ڭّنْ إِ يِيخفْ نْسنْ ثِيشَارْشِيفَا غَارْ ثْغمُّورَا ن وَارُّوضْ نْسنْ ذِي مَارَّا جِّيڒَاثْ نْسنْ ؤُشَا أَذْ ڭّنْ إِجّْ ن ؤُفِيڒُو ذ أَذحْمِي غَارْ ثْشَارْشِيفَا، ثِينِّي غَارْ ثْغمُّورَا.
٣٩ أَذْ يِيڒِي ؤُفِيڒُو غَارْ ثْشَارْشِيفْثْ، حِيمَا أَذْ ثْوَاڒَامْ أَفِيڒُو نِّي ؤُشَا أَذْ ثِيذَارمْ ذِي مَارَّا ڒُْومُورَاثْ ن سِيذِي ؤُشَا أَذْ ثنْثْ ثڭّمْ ؤُ وَارْ ثْضفَّارمْ شّهْوَاثْ ن وُوڒَاونْ نْومْ ذ ثِيطَّاوِينْ نْومْ، إِنِّي أَوَارْنِي أَسنْثْ ثنُّوممْ أَذْ ثسّفْسذمْ إِخفْ نْومْ،
٤٠ ؤُ حِيمَا أَذْ ثْخَارّْصمْ ذِي ڒُْومُورَاثْ إِنُو، أَذْ زَّايْسنْثْ ثڭّمْ، مَاحنْذْ أَذْ ثِيڒِيمْ ثتّْوَاقدّْسمْ زَّاثْ إِ أَربِّي نْومْ.
٤١ نشّْ ذ سِيذِي، أَربِّي نْومْ ونِّي كنِّيوْ د-إِسُّوفّْغنْ زِي ثمُّورْثْ ن مِيصْرَا حِيمَا أَذْ إِڒِيغْ ذ أَربِّي نْومْ. نشّْ ذ سِيذِي، أَربِّي نْومْ!“