١٠
ڒْعَاهْذْ ذ ثْمَارْسِيوْثْ ن ؤُشمّعْ
١ ”خْ قَاعْ مَانْ أَيَا أَذْ نڭّْ إِجّْ ن ڒْْعَاهْذْ إِمْثنْ ؤُشَا أَذْ ث نْزمّمْ ذِي ثِيرَا ؤُشَا ڒْْحُوكَّامْ نّغْ، إِلَاوِييّنْ نّغْ ذ إِكهَّاننْ نّغْ أَذْ خَاسْ ڭّنْ أَشمِّيعْ.“
٢ إِنِّي خَاسْ إِڭِّينْ أَشمِّيعْ ذ إِنَا:
نَاحَامْيَا، ونِّي ذ لْوَالِي أَمقّْرَانْ، مِّيسْ ن حَاكَالْيَا، ذ صِيذْقِييَا،
٣ سَارَايَا، عَازَارْيَا، إِرْمِييَا،
٤ فَاشْحُورْ، أَمَارْيَا، مَالْكِييَا،
٥ حَاتُّوشْ، شَابَانْيَا، مَالُّوخْ،
٦ حَارِيمْ، مَارِيمُوثْ، عُوبَاذْيَا،
٧ ذَانِييَالْ، جِينِّيثُونْ، بَارُوخْ،
٨ مَاشُولَّامْ، أَبِييَا، مِييَامِينْ،
٩ مَاعَازْيَا، بِيلْجَايْ ذ شَامْعِييَا. إِنَا ثُوغَا أَثنْ ذ إِكهَّاننْ.
١٠ ؤُشَا إِلَاوِييّنْ: يشُوعَا، مِّيسْ ن أَزَانْيَا، ذ بِينَّايْ. زڭْ أَيْثْ ن حِينَاذَاذْ، قَاذْمِييِيلْ.
١١ ؤُڒَا ذ أَيْثْمَاثْسنْ: شَابَانْيَا، هُوذِييَا، قَالِيطَا، قَالَايَا، حَانَانْ،
١٢ مِيخَا، رَاحُوبْ، حَاشَابْيَا،
١٣ زَاكُّورْ، شَارَابْيَا، شَابَانْيَا،
١٤ هُوذِييَا، بَانِي ذ بَانِينُو.
١٥ إِزدْجِيفنْ ن ڒْْڭنْسْ: فَارْعُوشْ، فَاحَاثْ-مُوآبَ، عِيلَامْ، زَاتُّو، بَانِي،
١٦ بُونِّي، عَازْجَاذْ، بِيبَايْ،
١٧ أَذُونِييَا، بِيغْوَايْ، عَاذِينْ،
١٨ أَطِيرْ، حِيزْقِييَا، عَازُّورْ،
١٩ هُوذِييَا، حَاشُومْ، بِيصَايْ،
٢٠ حَارِيفْ، عَانَاثُوثْ، نِيبَايْ،
٢١ مَاجْفِيعَاشْ، مَاشُولَّامْ، حَازِيرْ،
٢٢ مَاشِيزَابْيِيلْ، صَاذُوقْ، يَادُّوعْ،
٢٣ فَالَاطْيَا، حَانَانْ، عَانَايَا،
٢٤ هُوشِيعَا، حَانَانْيَا، حَاشُوبْ،
٢٥ هَالُّوحِيشْ، فِيلْجَا، شُوبِيقْ،
٢٦ رَاحُومْ، حَاشَابْنَا، مَاعَاسِييَا،
٢٧ أَخِييَا، حَانَانْ، عَانَانْ،
٢٨ مَالُّوخْ، حَارِيمْ ذ بَاعْنَا.
٢٩ إِنِّي إِقِّيمنْ زِي ڒْْڭنْسْ، إِكهَّاننْ، إِلَاوِييّنْ، إِعسَّاسنْ ن ثوُّورَا، إِمذْيَازنْ، إِمْسخَّارنْ ن زَّاوشْثْ ثَامقّْرَانْثْ ذ مَارَّا إِنِّي ذ إِعزّْڒنْ إِخفْ نْسنْ خْ ڒڭْنُوسْ ن ثمُّورَا غَارْ شَّارِيعَا ن أَربِّي، ثِيمْغَارِينْ نْسنْ، إِحنْجِيرنْ نْسنْ ذ يسِّيثْسنْ، كُوڒْ إِجّْ ونِّي غَارْ ثدْجَا ثُوسّْنَا ذ ڒفْهَامثْ،
٣٠ نِيثْنِي مَارَّا ڒصْقنْ غَارْ أَيْثْمَاثْسنْ، أَيْثْ ن بُو-صُّولْطَا نْسنْ، ؤُشَا شَّارْشنْ ذِي نّعْڒثْ ذ ثْجَادْجِيثْ مَاحنْذْ أَذْ دَّارنْ عْلَاحْسَابْ شَّارِيعَا ن أَربِّي، ثنِّي إِمّوْشنْ خْ ؤُفُوسْ ن مُوسَا، أَمْسخَّارْ ن أَربِّي، ؤُشَا مَاهنْذْ أَذْ حْضَانْ مَارَّا ڒُْومُورَاثْ ن سِيذِي، سِيذِيثْنغْ، ؤُشَا أَذْ طّْفنْ ذِي لْفَارَايِيضْ نّسْ ذ ثْوصَّا نّسْ.
٣١ عَاوذْ نڭَّا خَانغْ مَاحنْذْ وَارْ نتِّيشْ يسِّيثْنغْ إِ ڒڭْنُوسْ ن ثمُّورْثْ ؤُ وَارْ نتِّيوِي يسِّيثْسنْ إِ إِحنْجِيرنْ نّغْ ذ ثَامْغَارْثْ.
٣٢ ؤُشَا مَاڒَا ڒڭْنُوسْ ن ثمُّورْثْ ؤُسِينْ-د ذڭْ وَاسّْ ن سّبْثْ، إِوْينْ صّڒْعثْ ذ عْڒَامْ كُوڒْ إِمنْذِي حِيمَا أَذْ زّنْزنْ أَيَا، أَقَا نشِّينْ ذِي سّبْثْ نِيغْ ذڭْ إِجّْ ن وَاسّْ إِقدّْسنْ نّغْنِي وَارْ خَاسنْ نتِّيوِي وَالُو. ؤُشَا أَمُّو عَاوذْ نڭَّا خَانغْ، أَقَا نشِّينْ أَذْ نجّْ ثَامُّورْثْ ذڭْ ؤُسڭّْوَاسْ وِيسّْ سبْعَا ؤُ وَارْ نْكسِّي أَرِّيبَا زڭْ ؤُڒَا ذ يِيجّنْ.
٣٣ نڭَّا خَانغْ ڒُْومُورَاثْ مَاحنْذْ أَذْ نوْشْ إِشْثْ ن تُّوڒُوثْ ن شِيقْلُو ذڭْ ؤُسڭّْوَاسْ إِ ثْسخَّارْثْ ن ثَادَّارْثْ ن أَربِّي نّغْ،
٣٤ إِ وغْرُومْ ن وسْشَانْ ؤُ إِ ثوْهِيبْثْ ن ڒْْغِيدْجثْ نْ ڒبْذَا ؤُ إِ ثْغَارْصْثْ ن وشْمَاضْ ن ڒبْذَا ذڭْ وُوسَّانْ ن سّبْثْ ؤُ ذڭْ وُوسَّانْ ن ؤُيُورْ ن جْذِيذْ، إِ ڒعْيُوذَاثْ إِتّْوَاڭّنْ، إِ ثْمسْڒَايِينْ إِقدّْسنْ ؤُ إِ ثْغَارْصَا ن دّنْبْ مَاحنْذْ أَذْ زَّايْسنْثْ إِتّْوَاڭّْ أَصْڒَاحْ خْ إِسْرَائِيل ؤُ خْ مَارَّا ثَاسخَّارْثْ ن ثَادَّارْثْ ن أَربِّي نّغْ.
٣٥ نشِّينْ، إِكهَّاننْ، إِلَاوِييّنْ ذ ڒْْڭنْسْ، أَمْ نتّْوَاستّفْ عْلَاحْسَابْ ڒَْادْجَاثْ ن إِبَابَاثنْ نّغْ، ڭِّينْ ثَاقدُّوحْثْ إِ ثوْهِيبْثْ ن ؤُكشُّوضْ ثنِّي ثُوغَا إِتّْخصَّا أَذْ ثتّْوَاسِّيذفْ غَارْ ثَادَّارْثْ ن أَربِّي نّغْ ذڭْ وُوسَّانْ إِتّْوَاڭّنْ، أَسڭّْوَاسْ أَوَارْنِي إِ ؤُسڭّْوَاسْ، مَاحنْذْ أَذْ ثتّْوَاسّشْمضْ خْ ؤُعَالْطَارْ ن سِيذِي، أَربِّي نّغْ، أَمْ مَامّشْ إِ ثُورَا ذِي شَّارِيعَا.
٣٦ ؤُشَا نڭَّا خَانغْ عَاوذْ مَاحنْذْ أَذْ نَاوِي ثَامنْزُوثْ ن ثمُّورْثْ نّغْ ذ ثْمنْزُوثْ ن ڒْْغِيدْجثْ ن مَارَّا ثِيشجِّيرَا غَارْ ثَادَّارْثْ ن سِيذِي، أَسڭّْوَاسْ خْ ؤُمَاسْ،
٣٧ ؤُڒَا ذ إِمنْزَا ن إِحنْجِيرنْ نّغْ ذ ڒبْهَايمْ نّغْ أَمْ مَامّشْ إِ ثُورَا ذِي شَّارِيعَا، ؤُشَا أَذْ نَاوِي إِمنْزَا ن إِفُونَاسنْ نّغْ ذ وُودْجِي نّغْ ذِي ثَادَّارْثْ ن أَربِّي، غَارْ إِكهَّاننْ نِّي إِتّْسخَّارنْ ذِي ثَادَّارْثْ ن أَربِّي.
٣٨ ؤُشَا نڭَّا خَانغْ عَاوذْ مَاحنْذْ أَذْ نتَّاوِي ثَامزْوَارُوثْ ن مِينْ إِتّْوَاڭّنْ زڭْ وَارشْثِي نّغْ ؤُ زِي ثوْهِيبِينْ ن ؤُسْڭعّذْ نّغْ ؤُ زِي فْرُوثَا ن مَارَّا ثِيشجِّيرَا ؤُ زِي بِينُو ن جْذِيذْ ذ زّشْثْ غَارْ إِكهَّاننْ ذڭْ إِخَّامنْ إِ ڒخْزنْ ن ثَادَّارْثْ ن أَربِّي نّغْ، ؤُڒَا ذ ڒعْشُورْ ن ثمُّورْثْ نّغْ غَارْ إِلَاوِييّنْ. ؤُشَا إِلَاوِييّنْ سِيمَانْثْ نْسنْ أَذْ طّْفنْ ڒعْشُورْ ذِي مَارَّا ثِيندَّامْ مَانِي ثُوغَا نْخدّمْ نشِّينْ خْ ثمُّورْثْ،
٣٩ ؤُشَا أَذْ يِيڒِي ؤُكهَّانْ، إِجّْ ن مِّيسْ ن هَارُونْ، غَارْ إِلَاوِييّنْ خْمِي غَا طّْفنِيلَاوِييّنْ ڒعْشُورْ. ؤُشَا إِلَاوِييّنْ سِيمَانْثْ نْسنْ أَذْ أَوْينْ إِشْثْ ن ثعْشَارْثْ ن ڒعْشُورْ غَارْ ثَادَّارْثْ ن أَربِّي، غَارْ إِخَّامنْ ن ثَادَّارْثْ ن ثْخُوبَايْ،
٤٠ مِينْزِي أَيْثْ ن إِسْرَائِيل ذ أَيْثْ ن لَاوِي أَذْ أَوْينْ ثَاوْهِيبْثْ ن ؤُسْڭعّذْ ن ڒْْحبّْ ن يِيرْذنْ، ڒَْا ن بِينُو ن جْذِيذْ ؤُڒَا ن زّشْثْ ذڭْ إِخَّامنْ إِ ڒخْزنْ. مَاغَارْ ڒقْشُوعْ ن زَّاوشْثْ إِقدّْسنْ أَقَا أَثنْ ذِينْ، ؤُڒَا ذ إِكهَّاننْ نِّي إِتّْسخَّارنْ ذ إِعسَّاسنْ ن ثوُّورَا ذ إِمذْيَازنْ. إِتّْخصَّا أَنغْ وَارْ نْسمّحْ شَا ذِي ثَادَّارْثْ ن أَربِّي نّغْ.