٦
١ ”حْضَامْ، وَارْ ثْصدَّاقمْ زَّاثْ إِ إِوْذَانْ، حِيمَا أَذْ كنِّيوْ ژَترنْ. مَاڒَا أَمْيَا، وَارْ غَارْومْ إِتِّيڒِي بُو ڒَْاجَارْ زِي بَابَاثْومْ إِ إِدْجَانْ ذڭْ إِجنْوَانْ.
٢ مَاڒَا ثْصدّْقذْ، وَارْ ت تّڭّْ ذِي ڒُْْبُوقْ أَمْ مَامّشْ ث تّڭّنْ إِمْنَافْقنْ ذِي ثمْزِيذَاوِينْ ؤُ ذِي زّْنَاقِي، حِيمَا أَذْ ثنْ شنّْعنْ إِوْذَانْ. س ثِيذتّْ نشّْ أَذْ أَومْ إِنِيغْ، نِيثْنِي أَقَا ؤُفِينْ ڒَْاجَارْ نْسنْ زِي بعْذَا.
٣ مَاشَا شكْ، خْمِي غَا ثْصدّْقذْ، إِتّْخصَّا أَفُوسْ نّشْ أَزڒْمَاضْ وَارْ إِسِّينْ مِينْ إِتّڭّْ ؤُفُوسِي نّشْ،
٤ حِيمَا صّذْقثْ نّشْ أَذْ ثِيڒِي س ثْنُوفّْرَا ؤُشَا بَابَاشْ، ونِّي إِتّْوَاڒَانْ ذِي ثْنُوفّْرَا، أَذْ شكْ إِخدْجصْ س بْطَايْطَايْ.“
٥ ”مَاڒَا ثژُّودْجذْ، وَارْ تِّيڒِي شَا أَمْ يِيمْنَافْقنْ إِنِّي ؤُمِي إِعْجبْ أَسنْ ڒْْحَاڒْ أَذْ ژَّادْجنْ أَمْ بدّنْ ذِي ثمْزِيذَاوِينْ ذ ثْغمُّورَا ن زّْنَاقِي حِيمَا أَذْ ثنْ ژَترنْ إِوْذَانْ. س ثِيذتّْ نشّْ أَذْ أَومْ إِنِيغْ، أَقَا نِيثْنِي ؤُفِينْ ڒَْاجَارْ نْسنْ زِي بعْذَا.
٦ مَاشَا شكْ، مَاڒَا ثژُّودْجذْ، أَذفْ غَارْ وخَّامْ نّشْ، بلّعْ ثَاوَّارْثْ، ژَّادْجْ إِ بَابَاشْ ونِّي إِدْجَانْ ذِي ثْنُوفّْرَا، ؤُشَا بَابَاشْ إِ إِتّْوَاڒَانْ ذِي ثْنُوفّْرَا ذ نتَّا إِ شكْ إِ غَا إِخدْجْصنْ س بْطَايْطَايْ.
٧ مَاڒَا ثژُّودْجمْ وَارْ تّْعَاوَاذمْ إِ وَاوَاڒْ أَمْ مَامّشْ تّْژَادْجَانْ لْكُوفَّارْ، مِينْزِي إِتّْغِيڒْ أَسنْ س وَاوَاڒنْ نْسنْ أَطَّاسْ أَذْ أَسنْ إِتّْوَاسڒْ.
٨ وَارْ تِّيڒِيمْ خنِّي أَمْ نِيثْنِي، مِينْزِي بَابَاثْومْ إِسّنْ مِينْ ثحْذَاجمْ قْبڒْ ذ أَسْ إِ غَا ثتَّارمْ شَا.
٩ أَمُّو إِ غَا ثژَّادْجمْ كنِّيوْ:
’أَ بَابَاثْنغْ إِ إِدْجَانْ ذڭْ إِجنْوَانْ،
أَذْ يِيڒِي إِسمْ نّشْ إِتّْوَاقدّسْ،
١٠ أجّْ أَذْ د-ثَاسْ ثْڭلْذِيثْ نّشْ،
أَذْ يِيڒِي ڒْْخَاضَارْ نّشْ
أَمْ ذڭْ ؤُجنَّا أَمُّو عَاوذْ ذِي ثمُّورْثْ.
١١ أوْشْ أَنغْ أَسّْ-أَ أَغْرُومْ إِ نهْذَاجْ.
١٢ غْفَارْ أَنغْ إِمَارْوُوسَا نّغْ،
أَمْ مَامّشْ نْسَامحْ عَاوذْ
إِ يِينِّي د أَنغْ إِتُّورْسنْ،
١٣ ؤُ وَارْ ذ أَنغْ سِيذِيفْ شَا ذڭْ ؤُجَارّبْ،
مَاشَا فكّْ أَنغْ زڭْ ؤُمْعفَّانْ.
مِينْزِي ثَاڭلْذِيثْ ذ جّهْذْ ذ ؤُعُودْجِي
أَذْ إِڒِينْ إِ شكْ إِ ڒبْذَا قَاعْ!‘
١٤ مَاغَارْ مَاڒَا كنِّيوْ ثْسَامْحمْ إِ إِوْذَانْ إِ إِعذِّيينْ نْسنْ، ؤُڒَا ذ بَابَاثْومْ إِ إِدْجَانْ ذڭْ إِجنْوَانْ أَذْ أَومْ إِغْفَارْ.
١٥ مَاشَا مَاڒَا كنِّيوْ وَارْ ثتّْسِيمِيحمْ إِ إِوْذَانْ، أَقَا ؤُڒَا ذ بَابَاثْومْ وَارْ إِغفَّارْ شَا إِعذِّيينْ نْومْ.“
١٦ ”ڒَْامِي ثْژُومّمْ، وَارْ تّڭّمْ أَغمْبُوبْ أَبَارْشَانْ أَمْ يِيمْنَافْقنْ، إِنِّي إِسّْنقْڒَابنْ أَغمْبُوبْ نْسنْ حِيمَا أَذْ ثنْ ژَترنْ إِوْذَانْ بلِّي أَقَا ژُومّنْ. س ثِيذتّْ نشّْ أَذْ أَومْ إِنِيغْ، أَقَا نِيثْنِي ؤُفِينْ ڒَْاجَارْ نْسنْ زِي بعْذَا.
١٧ مَاشَا شكْ، مَاڒَا ثْژُومّذْ، ذْهنْ أَزدْجِيفْ نّشْ ؤُشَا سِيرذْ أَغمْبُوبْ نّشْ،
١٨ حِيمَا وَارْ ثْبِينِيذْ شَا إِ إِوْذَانْ بلِّي ثتّْژُومّذْ، مَاشَا إِ بَابَاشْ ونِّي إِدْجَانْ ذِي ثْنُوفّْرَا، ؤُشَا بَابَاشْ إِ إِتّْوَاڒَانْ ذِي ثْنُوفّْرَا، أَقَا نتَّا إِ شكْ إِ غَا إِخدْجْصنْ.“
١٩ ”وَارْ سْمُونَامْ شَا ڒكْنُوزْ إِ يِيخفْ نْومْ ذَا ذِي دُّونشْثْ مَانِي إِ ثنْ غَا ثشّْ ثْشِينْذَا ذ دّْرَا، ؤُ مَانِي غَا سّْنُوقّْبنْ إِخوَّاننْ، أَذْ ثنْ أَشَارنْ،
٢٠ مَاشَا سْمُونمْ إِ يِيخفْ نْومْ ڒكْنُوزْ ذڭْ ؤُجنَّا مَانِي وَارْ ثنْ ثتّتّْ شَا ثْشِينْذَا ذ دّْرَا، ؤُ مَانِي وَارْ سّْنُوقُّوبنْ إِخوَّاننْ، وَارْ ثنْ تَّاشَارنْ.
٢١ مِينْزِي مَانِي غَا يِيڒِي ڒْْكنْزْ نّشْ، أَقَا أَذْ ذِينْ يِيڒِي ؤُڒَا ذ ؤُڒْ نّشْ.“
٢٢ ”ڒفْنَارْ ن أَرِّيمثْ نتَّا ذ ثِيطّْ. مَاڒَا خنِّي ثِيطّْ نّشْ أَقَا ثصْفَا، أَذْ ثِيڒِي أَرِّيمثْ نّشْ مَارَّا ذ ثَافَاوْثْ.
٢٣ مَارَا ثِيطّْ نّشْ ذ ثَاعفَّانْثْ، خنِّي أَذْ ثِيڒِي أَرِّيمثْ نّشْ مَارَّا ذ ثَادْجسْثْ. مَاڒَا ثَافَاوْثْ ثنِّي ذَايكْ ذ ثَادْجسْثْ، مشْحَاڒْ ثمْغَارْ ثَادْجسْثْ!
٢٤ ؤُڒَا ذ إِجّْ وَارْ إِزمَّارْ أَذْ إِخْذمْ إِ ثْنَاينْ ن إِسِيذِيثنْ، مِينْزِي خنِّي نتَّا أَذْ إِشَارْهْ إِجّنْ، أَذْ إِخْسْ ونّغْنِي، نِيغْ أَذْ إِوقَّارْ إِجّنْ، أَذْ إِسّحْقَارْ ونّغْنِي. كنِّيوْ وَارْ ثْزمَّارمْ أَذْ ثْسخَّارمْ إِ أَربِّي ذ ثنْعَاشِينْ.“
٢٥ ”س ؤُيَا نشّْ أَذْ أَومْ إِنِيغْ: ’وَارْ كسِّيمْ أَمْنُوسْ ذِي ثُوذَارْثْ نْومْ، مِينْ غَا ثشّمْ نِيغْ مِينْ غَا ثسْومْ، ؤُڒَا إِ أَرِّيمثْ نْومْ مَامّشْ ت إِ غَا ثسّْيَارْضمْ. خْزَارمْ، مَا وَارْ ثحْڒِي ثُوذَارْثْ خْ مَاشَّا نِيغْ أَرِّيمثْ خْ وَارُّوضْ؟
٢٦ خْزَارمْ غَارْ إِجْضَاضْ ن ؤُجنَّا، أَقَا نِيثْنِي وَارْ زَارّْعنْ، وَارْ مجَّارنْ ؤُشَا وَارْ تّْخمِّيڒنْ ذِي ڒمْرَاسِي. وَاخَّا أَمنِّي بَابَاثْومْ إِ إِدْجَانْ ذڭْ إِجنْوَانْ إِ ثنْ إِسّشَّانْ. خْزَارمْ، مَا كنِّيوْ وَارْ ثسّكّْوِيمْ شَا كْثَارْ أَطَّاسْ خَاسنْ؟
٢٧ مَانْ ونْ زَّايْومْ إِزمَّارْ س ومْنُوسْ نّسْ أَذْ يَارْنِي مْغِيرْ إِجّْ ن ؤُغِيڒْ ذِي ثُوزّڭَّارْثْ نّسْ؟
٢٨ ؤُ مَايمِّي ثْكسِّيمْ أَمْنُوسْ إِ وَارُّوضْ؟ خْزَارمْ مَامّشْغمّْينْثْ ثْلِيلِّيشِينْ ذڭْ إِيَّارْ. نِيثنْثِي وَارْ خدّْمنْثْ، وَارْ تّْقَارْضْشنْثْ،
٢٩ مَاشَا نشّْ أَذْ أَومْ إِنِيغْ، ؤُڒَا ذ سُولِيمَانْ ذِي مَارَّا أَعُودْجِي نّسْ وَارْ يَارْضْ شَا أَمْ يِيجّنْ زَّايْسنْ.
٣٠ مَاڒَا أَربِّي إِسّْيَارْضْ أَمُّو أَرْبِيعْ ن إِيَّارْ إِ إِدْجَانْ أَسّْ-أَ ؤُشَا ثِيوشَّا أَذْ إِمّنْضَارْ ذِي ثفْقُونْثْ، مَا خنِّي وَارْ كنِّيوْ إِسّْيِيرّضْ أَطَّاسْ حْسنْ زَّايسْ، أَ كنِّيوْ إِ ذِي إِدْجَا ذْرُوسْ ن لْ-إِيمَانْ؟
٣١ س ؤُيَا وَارْ كسِّيمْ شَا أَمْنُوسْ، وَارْ قَّارمْ: ’مِينْ غَا نشّْ؟‘، ؤُ: ’مِينْ غَا نْسُو؟‘، نِيغْ: ’مِينْ غَا نْيَارْضْ؟‘
٣٢ مَاغَارْ ڒڭْنُوسْ ن دُّونشْثْ أَرزُّونْ مَانْ أَيَا مَارَّا، مَاشَا بَابَاثْومْ إِ إِدْجَانْ ذڭْ إِجنْوَانْ إِسّنْ أَقَا ثحْذَاجمْ مَانْ أَيَا مَارَّا.
٣٣ أَرْزُومْ أَمزْوَارُو خْ ثْڭلْذِيثْ ن أَربِّي ذ ثْسڭْذَا نّسْ، ؤُشَا مَانْ أَيَا مَارَّا أَذْ غَارْومْ إِمَّارْنِي عَاوذْ.
٣٤ س ؤُيَا وَارْ كسِّيمْ أَمْنُوسْ إِ مِينْ إِ غَا يِيڒِي ثِيوشَّا، مِينْزِي ثِيوشَّا أَذْ ثكْسِي أَمْنُوسْ إِ يِيخفْ نّسْ. إِشْفَا إِ كُوڒْ أَسّْ ثُوعفّْنَا نّسْ.“